Acts 1 - Yupik Bible

Anernerem Tanqilriim Akqutkumallra

¹ Ciuqliit kalikautekellrenka elpenun Theophilus-aaq, qaneryarangqertut Jesus-aam calillranek, ayuqucirtuutekellranek-llu ayagniqarraallranek,

² qilagmun mayullra engelkarrluku, Anernerkun Tanqilriakun alerquumariamiki elitnaurani cucukellni.

³ Nangteqellmi-llu kinguani tangercet'lartuq ellaitnun yuucimitun, nallunaitqapiggluni; yuinaagnek-llu malrugnek ernengqerluni qavcirqunek alairvik'larai, Agayutem-llu Angayuqauvia qalarutekluku.

⁴ Quyungqallratni-llu inerqurai Jerusalem-aamek ayaasqevkenaki, tau͡gaam utaqasqelluku Aatam akqutii, tauna-gguq, “Niitellerci wangnek.

⁵ Wani-wa John-aaq ilumun angllurcecilartuq merkun. Tau͡gaam elpeci ak'anivkenaci anglluumaciquci Anernerkun Tanqilriakun.”

⁶ Quyurrvikellratni aptaat qanerluteng, “Ataneq, uum-qaa nalliini Israel-aam angayuqauvia ataam piurteqataran?”

⁷ Kiugai-llu, “Elpeci nallunrilkaunritarci picirkaq ciunerkaq-llu, Aatam kiimi pisqutkarkaungaku.

⁸ Tau͡gaam elpeci Anernermek Tanqilriamek pingumarikuvci pinimek cikiumaciquci; nallunairistekciqamci-llu Jerusalem-aami, Judea-mi-llu, Samaria-mi-llu, nunani-llu tamaitni.”

Jesus-aam Mayullra

⁹ Makunek-llu qanrucimariamiki tangvainanratni pakmavircecimauq, amirlum-llu naligaa tangrrunrirtelluku.

¹⁰ Ayallrani-llu qilatmun ciugngaurtut, tangerrluku-llu, angutek malruk caniatni nangengqalriik, qatellrianek aturlutek.

¹¹ Taukuk qanertuk ellaitnun, “Galilee-armiuni, ciin nangengqaceci qilagmun ciugngaluci? Una Jesus-aaq, elpecen̄ek pakmavircecimalria, tuaten ayuqluni cali tekitarkauguq tangrrucirpecetun ayallrani qilagmun.”

Matthias-aamek Cucukillrat, Judas-aam Cimirkaanek

¹² Tuaken Olive-aam Ingrianek aterpagcimalriamek utertut Jerusalem-aarmiunun, tamana Sabbath-aam pekcaraatun yaaqsigtauq.

¹³ Nunarpagnun-llu tekicameng, enem qullianun mayurtut quyurrvik'lallermeggnun. Taukut atrit waniwaugut: Peter, John-aaq-llu, James-aaq, Andrew-llu, Philip-aaq, Thomas-aaq-llu, Bartholomew, Matthew-llu, James-aaq-llu Alphaeus-aam qetunraa, Simon-aaq-llu Zealot-aaq, Judas-aaq-llu James-aam anelgutii.

¹⁴ Ukut tamarmeng cumiggluteng piicagtu'rtut umyuallgutekluteng, ilaluteng-llu arnanek, Mary-mek-llu Jesus-aam aaniinek, anelgutainek-llu cali.

¹⁵ Erenret taukut iliitni Peter nangertuq taukut ukverumalriit akunliitnun (tuani quyungqalriit yuinaat arvinelgen engelkartait) qanrutai-llu,

¹⁶ “Ilamaa, igat piciurtarkaullruut, Anernerem Tanqilriim qanellri, David-aakun, Judas-aaq pitekluku, tauna Jesus-aam tegustain apertuutestiit.

¹⁷ Wani-wa ilakellruyaaqerput, caliamten̄ek-llu avgucimallruluni.”

¹⁸ Tauna assiilngillmi akiliutiinek nunautmek kiputellruuq, kanaqerluni-llu ullirtuq, qilui-llu tamarmeng anluteng.

¹⁹ Tamana-llu nallunriraat Jerusalem-aarmiut tamarmeng. Taumek qaneryaramegteggun waten aterpagtaat: Akeldama, mumiggluku kangingqerrluni waten: “Nuna Augtalek.”

²⁰ “Wani-wa kalikani Psalm-ani igausngauq ‘Nunii yuilqerrurrli, yuum-llu nunakenrilliu, qaunqesten͞gucia-llu allam caliaqsaguskiliu.’

²¹ Taumek angutmek cucukiarkaugukut, imumirpak ilakellemta iliitnek, Atanrem Jesus-aam akunlemten̄etellrani.

²² Anglluuciminek John-aamun ayagnirluni, qilagmun-llu maaken wangkutnek ayaucini engelkarrluku; tamakut iliit nallunairisten͞gurrluku Jesus-aam unguirucianun.”

²³ Malruk-llu umyuaqagket: Joseph-aaq-wa Barsabbas-aaq, aterluni-llu Justus-aamek, aipaa-llu Matthias-aamek atengqertuq.

²⁴ Waten-llu piicagtut, “Ataneq, elpet nallunritaten yuut tamarmeng ircaquit; nasviskut ukuk naliagnek cucukucirpenek

²⁵ tegusqelluku Judas-aam caliara, apostle-aarucia-llu, pegcaku taum, nunakani ullagnaluku.”

²⁶ Nall'arcetaarutkagket-llu; nall'arcetaarutiit-llu Matthias-aamun piuq; apostle-aat-llu taukut qulen ataucimek cipnelget ilaksagutaat.