2 Chronicles 1 - Yupik Bible

Angayuqam Solomon-aam Piicallra Elisngamek

¹ Solomon-aam, Angayuqam David-aam qetunraan, ataniungaa Israel-aam angayuqauvia, Agayutiin-llu Atanrem nayuraa piniriqapiggluku-llu.

² Angayuqam Solomon-aam picirkiraa tamiin Israel-aaq: anguyagten̄un atanirturten͞gulriit tiissitsaanun (1,000), yuinarnun-llu tallimanun (100) atanirturten͞gulriit, cuqcistet, ciuliqagten͞gulriit tamiin Israel-aami, ilakuralriit angayuqrit, tamalkuita-llu allat yuut,

³ alerqurluki maligtesqelluni agayularvigmun Gibeon-aami; tuanlan Atanrem Pelatekaa, Moses-aam, Atanrem pistiin, piliaqellra yuilqumi.

⁴ (Tau͡gaam Akquyutem Yaassiiga Jerusalem-aami uitallruuq pelatekami Angayuqam David-aam napartellranun taitellerminiu Yaassiik Kiriath Jearim-aamek.)

⁵ Punerneq-llu ekuavik Bezalel-aam, Uri-m qetunraan, Hur-am tutgariin piliaqellra, Gibeon-aametellruuq ciuqerrani Pelatekaan Atanrem. Tuani-llu Angayuqaq Solomon-aaq, yuut-llu tamarmeng, agayuut Atanermun.

⁶ Solomon-aaq-llu agayuuq Atanermun ciuqerrani Pelatekam elliitnek ekuagiluni punernerkun ekuavigkun; ungungssinek tuqucecillruuq tiissitsaanek (1,000) tamalkuuciicetun-llu ekualuki.

⁷ Tuani unugmi Agayun alairtuq Solomon-aamun apluku-llu, “Camek cikiisqumasit wangnun?”

⁸ Solomon-aam-llu kiugaa, “Kesianek nasvaumallruan kenken angelria caqtaanrilnguq David-aamun atamnun, waniwa-llu angayuqrurcetarpenga eniini.

⁹ Ataneq Agayun, akqutellren David-aamun atamnun piciuresgu. Angayuqrurtellruavnga yugugarnun nunam urraatun amllertalrianun,

¹⁰ taumek elisngamek cikirnga nallunritmek-llu aturyuk'ngamnek ataniullemni yut'en. Tamana pinrilkan qaillun ataniuryugngaciqsia ukut amlleqapigtellriit yut'en?”

¹¹ Agayutem kiugaa Solomon-aaq, “Ellualriamek cucukiuten. Kaiganrituten aklunek wall'u tukuutnek, takarnarqutmek wall'u assilriakun niitnaullerkarpenek wall'u unguvaitnek inglukestevvet wall'u unguvamallerkarpenek, kaigauten elisngamek nallunritmek-llu ataniurnaluki yuunka, wiinga ellaitnun angayuqrurtellrukemken.

¹² Cikirciqamken elisngamek nallunritmek-llu. Ilalukek-llu cikircikamken tukuutnek, akitulrianek, niitnaullerkarpenek-llu pikeksailkiitnek angayuqrullret ciuvni, kinguakun-llu waten ayuqellriamek pingqellriartangqerrngaunani.”

Angayuqam Solomon-aam Pinia Tukuutai-llu

¹³ Tua-i Solomon-aaq ayagtuq agayularvigmek Gibeon-aami, Pelatekaan Atanrem uitavianek, Jerusalem-aamun-llu uterrluni. Tuani-llu ataniuraa Israel-aaq.

¹⁴ Solomon-aaq-llu quyurciuq akalrialegnek ayagassuutnek tiissitsaaq yuinaat-llu yuinaq (1,400) amllertaluteng, qula-llu malrugnek tiissitsaanek (12,000) anguyagten̄ek horse-aalegnek. Tamakut-llu ilait uitavkarai Jerusalem-aami, ilait-llu nunalgartellruluki allanun nunarpagnun.

¹⁵ Atanirturillran nalliini qerrirliq suulutaaq-llu teggalqutun nurnairutellruuk Jerusalem-aami, napat-llu cedar-aat amllerrluteng sycamore-atun napaitun Shephelah-m.

¹⁶ Angayuqam pistain caliaqellruit taivkallrit horse-aat Egypt-aamek Kue-amek-llu, elliin-llu naverrniartain akurtullruluki Kue-amek akilirluki.

¹⁷ Taivkarillruut-llu akalrialegnek pekcessuutnek Egypt-aamek. Tunlarait-llu Hittite-anun Syrian-aanun-llu, ayagassuun atauciq akilirluku tiissitsaam avga yuinarnek tallimanek cipluku (600) qerrirlinek, horse-aat-llu yuinaat qulngurutiit avguluku (150).