1 Peter 1 - Yupik Bible

Yuuluaqaasqun

¹ Wii, Peter-aaq, Jesus Christ-am apostle-aara skavtanun tamiini nunalegnun Pontus-aami, Galatia-mi, Cappadocia-mi, Asia-mi Bithynia-mi-llu,

² cucukumalrianun Agayutem Aatam picirkillruciatun ciunguluku, Anernerem kenciknarivkallruciatun niisngasqelluku Jesus Christ-aq, auganek minguumaarkauluteng. Naklekun uitanqegcin-llu elpecen̄un amlleriinarli.

Unguvam Neryuniurutii

³ Quyanarquq Aata, Atanemta Jesus Christ-am Agayutii, taum naklekutni nang'arkaunrilnguq aturluku, Jesus Christ-am unguiruciakun neryuniurutkitaakut

⁴ paitarkamten̄ek arumaarkaunrilngurmek, menuitellriamek, perrirarkaunrilngurmek-llu, qilagmi uitalriamek pikarpecen̄ek elpeci.

⁵ Agayutem pinian tegumiaqek'ngaini, anirtuutem ukveqellrakun upingalluku alairumaarkaq ernermi nangneqlirmi.

⁶ Taumek angnirpagci, carrarmi cakviurarkaungerpeci ayuqenrilngurteggun naspaamaluci.

⁷ Ukverci naspaamasqelluku, suulutaami piunrirarkami piksuuminarqenrulria, kenerkun naspaamang'e'rmi nallunairumanaurtuq nanraumallerkarci qigcignarillerkarci-llu, ucurnarillerkarci-llu Jesus Christ-am alaillerkaani.

⁸ Ellii tangrrumanrilengraan kenkarci, ellii-llu maa-i tangeqsailengerpeciu ukveqluku angnirtuci angnirkun angqapigtellriakun, ucurnamek muirumaluni.

⁹ Ukverpeci iqua ciuniurluku tarnerpeci anirtuumallerkaa.

¹⁰ Tamana anirtuun prophet-aat kangingnaurutkellruat yuarluku-llu cumiggluteng, nallunairillruluteng naklekutmek elpecen̄un tut'arkamek.

¹¹ Christ-am Anerneran ellaitnelnguum nasvicateng ciunguluku nangteqlerkaanek ucurnarillerkaanek-llu, taringyugyaaqaat cam nalliini wall'u qaillun tuaten pillerkaa.

¹² Ellaitnun nallunairumallruuq, ellmeggnun pivkenaku wangkutnun tau͡gaam qalarutkellerteng Gospel-aaq tut'arkaucianek, elpecen̄un qalarutkumalria Anernerkun Tanqilriakun pakmaken qilagmek atrarcecimalriakun; tamakut an'gilat tangerrsuumiryaaqait.

Kencignarqesqutet

¹³ Taumek, umyuarpeciuggun naquggluci upingaci, umyuangqerqici, neryuniurutkurluku naklekun atu'urkarci, elpecen̄un taicimaarkaq Jesus Christ-am alaillerkaani.

¹⁴ Niisngalriatun mikelngurcetun pikici, aglumacit eluciqevkenaki atulalci nallumallerpecen̄i.

¹⁵ Tau͡gaam kelegtessi ellualriaruciatun elpeci-llu ellualriarukici ayuqucirpeciuggun tamalkuan.

¹⁶ Tua-i-wa igausngiin, “Menuilkici, wii menuilama.”

¹⁷ Kaigavikekuvciu Aata yuum taungucianek catkiyuilnguq, tau͡gaam caliarakun yuk tamalkuan cuqeskii, maanteqacuaqallerpecen̄i qigcigyugluci yuuci.

¹⁸ Nallunrilucirpecetun akiliucimanrituci piunrirarkatgun, akikun wall'u suulutaakun, ayuqucillerpecen̄ek piciunrilngurnek ciuliarpeci piciryaraitgun,

¹⁹ tau͡gaam assiqapigtellriakun Christ-am augakun, qusngiyagaam apquciilnguum piatun.

²⁰ Ellii ilumun elkarcimallruuq ellarpak tusnganengvailgan, tau͡gaam makuni ernerni kinguqvani elpecen̄un alaillruuq.

²¹ Elliikun Agayutmun ukvertuci maktestiinun tuqumalrianek ucurnarivkarluku-llu, Agayun ukvervikesqelluku neryuniurvikluku.

²² Tua-i-llu Anernerkun yuucirci carrillruavciu piciulriim niisngallrakun ilakutellriit keneklerkaatnun piciulriamek; taumek kenkuci atunem menuilngurkun ircaqukun tengruluci

²³ yuurtenqigtellruavci naucetaarkatun aruarkaulriakun pivkenaci, tau͡gaam aruarkaunrilngurkun, Agayutem qaneryaraakun unguvalriakun akwanun piugarkaulriakun.

²⁴ “Tua-i tamarmi kemlek canegtun ayuquq yuum-llu tamarmi ucurnarqucia can'gem kangratun ayuquq. Canek nalalartuq, kangra-llu iggluni.

²⁵ Tau͡gaam Atanrem qaneryaraa akwanun piuguq.” Qaneryaraq-llu waniwauguq Gospel-aaq elpecen̄un qalarutkumalria.