Minkunga 4 - Nkanda Wu Moyo Nguizani yimona ayi minkunga

Minkunga 4 Yave wumvananga ndembama

Nkunga Davidi, kayimbidila mu bisiku bi zitsinga mu diambu di pfumu minyimbidi.

¹ Wuphutudila mvutu bu ndilembo kutedi, a Nzambi ama yisonga ayi wutsadisa bu ndidi mu phasi ; wumboni kiadi, wa lusambulu luama.

² Nate thangu mbi luela, tatamana fuisa nkembo ama tsoni e ? Nate thangu mbi luela tatamana zodilanga vanga mambu ma phamba ayi tombanga zinzambi zi luvunu e ?

³ Luzaba mboti ti Yave wukisobudidi mutu wumosi wunkinzikanga mambu mandi. Yave wela wa mu thangu ndiela kuntela.

⁴ Ku tsi nganzi eno, kadi vola masumu. Mu thangu luidi mu zimbuka zieno, lufiongunina mintima mieno bosi luba dio sui.

⁵ Lutambika makaba ma busonga, ayi lutula diana dieno mu Yave.

⁶ Bawombo balembo tubi : “Nani wulenda kutumonisa mamboti e ?” Bika kiezila ki zizi kiaku kitukienzula, a Yave !

⁷ Wuwesidi khini yiwombo mu ntimꞌama, viokila yoyi yiba yawu mu thangu baba ble yiwombo ayi vinu kiwombo

⁸ Ndiela lambadala ayi ndiela leka tulu mu ndembama bila ngeyo veka kaka, a Yave bila ngeyo veka kaka wukuphuandisanga mu luvovomo.