Luti 4 - Bible en Kiyombe

Khuedolo yi Luti

¹ Landila dio, Boazi wukuma va muelo mbanza ayi wukala vana. Tumbu zimbukila, butu kiluta fikama kitubila Boazi kilembo vioki. Buna wuntela mbila: «Nge kingandi, fikama ayi kala vava.» Ayi mutu beni wuvutuka ayi wukala.

² Buna wubonga kumi di batu mu kabu di bakulutu ba mbanza ayi wukamba bakala yandi. Bakala.

³ Landila dio, wukamba nkudi wuluta fikama: «Zebi ti Naomi wubedi mu tsi Moabi fuiti teka tini ki ntoto kibika khomba eto yibakala Elimeleki.

⁴ Kudi minu, ndikikembi ti fuiti kukamba diawu: Sumba tini ki ntoto beni va ntuala basi tsi ayi bakulutu ba batu beto. Ti tidi kula tini kintoto beni, kula kiawu vayi ti mengi ku kikula, wukhamba muingi ndizaba bila kuisi ko wunkaka tika ngeyo ko wulenda kula kiawu, bila minu ku mbusa aku ndidi.» Buna nkudi wuluta fikama wunkamba: «Minu ndiela kula kiawu.»

⁵ Vayi Boazi wunkamba: «Lumbu kiwela sumba tini kintoto kudi Naomi bo buawu phe wela sumbila kiawu kudi Luti muisi Moabi, difuola muingi zina di bakala diandi difua dibika zimbukusu mu mvuilu andi.»

⁶ Buna nkudi wuluta fikama wukamba: «Ndilendi ko kula tini ki ntoto beni diambu ndibika sikisa mvuilu ami. Ngeyo, kula kuaku kiawu mu minsua miami mi nkudi, bila ndilendi ko kukikula.»

⁷ Mu tsi khulu, fu kiba mu Isaeli, mu matedi khudulu ayi matedi viakasana, mu siamisa mintindu mimio mi mambu: Bakala kafuiti vula tsapatu ziandi ayi vana ziawu kudi wundiata yandi, bobo bubela kimbangi mu Isaeli.

⁸ Mu thangu nkudi wuluta fikama kakamba Boazi kasumba tini ki ntoto beni mu diambu diaku, wuvula tsapatu ziandi.

⁹ Buna Boazi wukamba bakulutu ayi batu babo: «Luidi zimbangi lumbu kiaki ti tsumbidi mu kedika mu mioko mi Naomi bibio bivua Elimeleki ayi bibio bivua Kilioni ayi Mahiloni.

¹⁰ Ayi buela, mbongidi Luti, muisi Moabi, fuola di Mahiloni, nketo ami muingi nditombula nkuna kudi wufua wowo wumvinginina kimvuama kiandi ayi muingi zina diandi dibika zimbala mu khomba ziandi ayi mu buala diandi dikabutukila. Luidi zimbangi lumbu kiaki.»

¹¹ Buna batu babo baba va muelo mbanza ayi bakulutu bakamba: «Tuidi zimbangi! Bika Yave kavanga nketo wulembo koti mu nzo aku kaba banga Lakheli ayi banga Leya, bobo babole batunga nzo Isaeli ayi ngeyo, monisa mfunu aku mu Efalata ayi mutu wuzabakana mu Betelemi.

¹² Ayi mu nkuna Yave kala kuvana mu nzila muana nketo wawu, bika nzo aku yiba banga nzo yi Pelesi, Tamali kabutila Yuda.»

Mbutukulu yi Obedi, nkulu Davidi

¹³ Buna Boazi wubonga Luti ayi wuyiza ba nkazi andi. Bu kabundana yandi, Yave wuyambula kabaka buemba ayi wubuta muana bakala.

¹⁴ Buna baketo bakamba Naomi : «Bika Yave kasakumunu lumbu kiaki bu kambu ku khambusu nkudi. Bika zina diandi dienda makumbu mu Isaeli!

¹⁵ Ayi wuyikidi mutu vutudi muela aku ayi wuntomisa bununu buaku, bila nzitu aku wumbuta nio wukuzolanga ku wombo ayi niowo lutidi mbote kudi ngeyo viokila tsambudi di bana ba babakala.»

¹⁶ Buna Naomi wubonga muana wu bakala ayi wuntula mu khata andi. Yandi wunyundula.

¹⁷ Buna bakundi bamvana zina, bakamba: «Muana bakala wubutukidi kudi Naomi.» Ayi bantedila mu zina di Obedi. Niandi se di Yese, se di Davidi.

¹⁸ Vayi tala minkuna mi Pelesi:Pelesi wubuta Heseloni,

¹⁹ Heseloni wubuta Lami, Lami wubuta Aminadabi,

²⁰ Aminadabi wubuta Nasoni, Nasoni wubuta Salamoni,

²¹ Salamoni wubuta Boazi, Boazi wubuta Obedi,

²² Obedi wubuta Yese, Yese wubuta Davidi.