Esiteli 3 - Bible en Kiyombe

Kithatu ki Hamani ayi Molodokayi

¹ Landila mambu momo, ntinu Kizelisesi wuzangula Hamani, muana Hamedata, mu nkuna wu Angangi, wunzangula ayi wutula kundu ki kitinu kiandi va mbata zimfumu zizio ziba yandi.

² Bisadi bibio bi ntinu baba va muelo babafukamanga ayi buongamanga va ntuala Hamani, bila bobo butumina ntinu mu diambu diandi. Vayi Molodokayi kasi yinama ko ayi kasi fukama ko.

³ Buna bisadi bi ntinu biba va muelo nzo ntinu binyuvulanga kikatingunina thumunu yi ntinu.

⁴ Bu babenkukambanga lumbu ka lumbu ayi mengi kubawila, balubula Hamani muingi batala ti mambu ma Molodokayi mamatatamana, bila wubaluengisa ti wuba nyudayo.

⁵ Bu dimonika ti Hamani wumona ti Molodokayi kasi fukama ko ayi kasi buongama va ntuala andi, buna Hamani wufuluka mu nganzi.

⁶ Vayi diba diambu di kindembikisa mu meso mandi mu tula koko va Molodokayi kaka, bila bankamba: nkangu wawu wu Molodokayi, Hamani wutomba mu fukisa Bayudayo babo baba ku tsi luyalu lu Kizelisesi.

⁷ Mu ngonda yi thete, mu ngonda yi Nisani, mu mvu wu kumi zole wu Kizelisesi, bata wadi yibantedilanga Pulimi va ntuala Hamani, mu lumbu ka lumbu ayi ngonda ka ngonda nate mu ngonda kumi zole yintedolongo ngonda yi Adali.

Hamani wukana bunga Bayudayo

⁸ Hamani wukamba ntinu Kizelisesi: «Vadi dikanda dimosi dibatu didi dimuangana, disasakana mu makanda ma tsi zizio mu kitinu kiaku. Minsiku miawu midi disuasana ayi minkangu minkaka ayi minsiku mi ntinu, batumamananga mio ko ayi disi ko difuana kudi ntinu mu kuba bika nasui.

⁹ Ti dilenda zolakana kudi ntinu, bika kusonoko thumunu mu kubabunga ayi mandi vana kumi di mafunda bi palata mu mioko mi bobo bansala kisalu beni ayi nata zio mu mvuilu yi ntinu.»

¹⁰ Buna ntinu wuvula nlunga wuba mu koko kuandi, wuvana wo kudi Hamani, nio wumonika ntatu wu bayudayo, muana wu Hamedata, mu nkuna Angangi.

¹¹ Buna ntinu wukamba Hamani: «Mbongo, zikuveno, ayi batu phe, muingi wubavanga moso mafueni mu meso maku!»

¹² Buna minsoniki mi ntinu mitumusu mu ngonda yithete, mu lumbu ki kumi tatu mu ngonda, buna buasonama boso bubela mamo matuma Hamani kudi zimfumu ziluzitu zi ntinu ayi zimfumu zi bizunga ayi zimfumu zi makanda ma disuasana, mu kioso zunga boso bubela phila tsonokono andi ayi kadika tsi boso bubela mbembo andi, mu zina di ntinu Kizelisesi disonomina, ayi ditulu dimbu mu nlunga ntinu.

¹³ Bafidisa minkanda mu nzila batu banatanga minkanda mi ntinu mu bizunga bibio bi ntinu, mu bunga, mu vonda ayi fukisa bayudayo babo, kaba ntuena evo kinunu, bana ayi baketo mu lumbu kimosi, mu lumbu ki kumi tatu mu ngonda, mu ngonda Adali ayi mu tana bima biawu.

¹⁴ Nkanda wumosi, wufuiti vanu banga nsiku mu bizunga bi disuasana, wufidusu kudi batu babo, muingi baba bakubama mu lumbu kina.

¹⁵ Minkanda mitotuka nsualu mu phova yi ntinu, ayi nsiku wuvanu mu Suze, mbanza yisiama. Ntinu ayi Hamani bakala muingi banua, vayi mbanza Suze, mbanza yisiama, yawu yiba mu zengele zengele.