Online Bible

Ɛbɛlyɔ 8 - Bible Iyansi

Yɛsu, undweer a angaŋ

¹ Kyekà, le kiin a indiir itɛɛnà bi alà: Bi ibye anà undweer a angaŋ a tub awà, nde mbuur kàkàbwaay u kɔɔ ibaal a kir a imwol a làkoo a Nzam.

² Nde wàmukyer ingaŋ ande kà idwà anà ntɛn a ndandaa kàkyer Mwol, wɛɛ mpa kàkyer mbuur.

³ Undweer a angaŋ bàfun'sà ntɔn mupà an'kab anà ibɔɔn akà Nzam. Abun, yà ndöŋ naa nde sye ukäl anà undiir mwɛy mupà.

⁴ Kya nde kàlàkal u mɛɛn, nde kàlàkal anki itàkal ngaŋ, ntɔn angaŋ bà paa, ba bàfàpà an'kab mulab nswɛɛŋ a Un'kɔɔn.

⁵ Wɛɛ ba, ingaŋ aba bàfàkyer uboo a idwà akyà ikwom, munii a idwà a ndandaa akyà u du, asànaa nswɛɛŋ a Nzam kàwɛl Mɔsɛ ntɔn mutɔŋ ntɛn a nköŋ: « Indiir byanswà ngye ayàkyer asànaa baswɛŋ bya u du a mɔŋ. »

⁶ Wɛɛ apanà, Yɛsu kan'wal isal aŋàsöön ubwaŋ, ntɔn nde wà mfurbo a nkwà aŋàsöön ubwaŋ, yan'bwaay udu a ilää aŋàsöön ubwaŋ.

⁷ Ntɔn, yàlàkal naa nkwà atàtwɛb yàkäl anki anà an'pɛl, ndöŋ yàlàkal anki mukiir yàyweel.

⁸ Kyekà, muswaŋ naa nkwà atàtwɛb ye anà an'pɛl, Nzam atɛɛnà a un'sɛŋ ande naa: « Ilä byàmuyà, abyà in'yàdyà mɛ nkwà akün anà un'sɛŋ a Isàlɛl anà wà Yudà.

⁹ « Wɛɛ, ya isàkal anki asànaa nkwà kàdi mɛ anà ankaa aba mpal katɛ mɛ mpi u kɔɔ ntɔn mukatwey u Ngipiti. Ntɔn ba ŋakwo bàläm anki uboo a nkwà amɛ, abun, mɛ sye wakapɛ ngö.

¹⁰ « Ntɔn, le nkwà in'sàdyà mɛ anà un'sɛŋ a Isàlɛl ungö a ilä abin ayi: mɛ in'sàsà in'kɔɔn amɛ unsà an'kyän aba, mɛ in'sàsɔn mya u mpem aba: Mɛ in'sàkal Nzam aba, ba bàsàkal un'sɛŋ amɛ.

¹¹ Akà mbuur mwɛy usàkal anki anà ndöŋ mukyään mbääb ande itàkal un'tɔŋ ande mutɛn naa: "Un'yöb Mwol!" Ntɔn baar banswà bàkyer asan'yöb, sɛmà umbɛy tii akà undweer.

¹² Ntɔn mɛ in'sàdwa nkul a ibii aba, mɛ in'fàsàyɔbà anki man'be aba. »

¹³ Abun, Mwol kàbel nde nkwà ayi naa nkwà akün, iswaŋà naa yàtàtwɛb nde kàbuul undiir itaan. Kyekà, undiir usàbulà wà itaan anà usànün, wa wà tsütsü muyaalà.

« Předchozí

další »

The Seed Company

Následuj nás:

Sponzorované odkazy

Reklamy