MÜCHITMUDU 9 - AMÜSÜH HÜM CL Bible (BSI)

Lümlung tüsho Makhakhi

¹ Lümlungnü anihbe yam thsüdo, tüsho dungjing thüne khimdo;

² anihbenü shih laksahdo, yukhu rhudo, tüsho dükhüm kheanga zolah.

³ Anihbenü kiuto ching achangbe dangpungbo chingnü ajishihpü ayamlaberübo thiyido,

⁴ “Shepü lümlung mülanü ha ching rholode azahshang!” Shepü anikhitkhi mülanü anihbenü api ki thachoh,

⁵ “Arang, I yikhap tsühang tüsho inü arhukhi yukhu yungang.

⁶ Makhakhi bahyukang tüsho laang, tüsho anikhitkhi limro ching yüang.

⁷ “Shepünü keangrümünerü thsülangbanü mükhemükim münitchoh, tüsho shepünü mihbukmuyuk mihtsürü thürühbanü nihbuh lang yurichoh.

⁸ Luhmünerü düthürüh, jude yungsho apinü nü thraneanbah; lümlung larü mihtsürü thürühang, tüsho apinü nü muzhobah.

⁹ Lümlung larü mihtsürü kilim thsangdanang, tüsho api lümlung alü labah; thiyuro mihtsürü thsangyuang, tüsho api anikhitkhi ching rünkihbah.

¹⁰ “Atungpuh trekhi ju lümlung atankih ah, tüsho Amüsüh Khülang mükheahmudu ju anikhitkhi lah.

¹¹ Tümüde I hode nü nimungbo alü kamshihbah, tüsho rhangdung kambo nü kilim yukajakjihbah.

¹² Nü lümlung larü a sho, nü lümlungnü nü kilim thsambah jihbah; nü luhmünerü a sho, nü lang thsünübah.”

¹³ Makhakhi liberü ju sheak tolah; anihbe müdanyuk tüsho tümü mümükheah.

¹⁴ Tümüde alibenü anihbe yam khimdopü ki yungsho kiuto ching achang dangpung kheak binchoh,

¹⁵ arü limro ching langde ayüpü tsahhode ayürü jipü:

¹⁶ “Shepü lümlung mülanü ha ching rholode azahang”; shepü anikhitkhi mülanü anihbenü api ki thachoh,

¹⁷ “Ahühkhi ke ju niunglah, tüsho jikde atsühkhi yikhap ju kedaklah.”

¹⁸ Tüshe ju ching ashepü lah, anihbe hanrübo ju Ashe-lomi asükbo ching lah de apinü mümükheah.