MATHI 28 - AMÜSÜH HÜM CL Bible (BSI)

Arhang Kamlokhi

¹ Kheakü Amuni dunglim, amu-khip akhuhbe nimung mükikde, Mari Magdalen tüsho püpürü Mari arünü kiuyuk kheahpü arü.

² Tüsho kheahang, muliuyuk ato khülang lakheah; tümüde Atungpuh yunirü yinmi chingnü aki tüsho lung ju lah-a bahbah ju kheak bin.

³ Api phü ju chinchobe, tüsho api khimmih ju phürüm nangde müyedo alakheah.

⁴ Aheangrübonü api trede ajan tüsho ashekhi mihtsürü nangde kam.

⁵ Tüshe yunirünü aliberübo ki tha, “Dütre, tümüde nüsa ju yümkih-a bahkhi Jisu yimchoh de inü mükheahlah.

⁶ Api ha ching müla; tümüde apinü athakhi nangde anihbuh arhang kamlodo. Arang, Atungpuh yappung kheahang.

⁷ Tüsho niokheamde yübah api jingyanrübo ki, api ashe chingnü arhang kamlodo, tüsho api nüsa müngüh Galilee ching yüchoh de thaang; ju ching nüsanü api ngübah. Kheahang, inü nüsa ki thado.”

⁸ Jumonü arünü trede tüsho khide asühde kiuyuk chingnü nahde chamachih, tüsho api jingyanrübo ki thapü alihde yü.

⁹ Arübo api jingyanrübo ki thapü yüchoki, zukleangnü Jisunü arü shorubah tha, “Nüsa lung mungtsü laang!” Tüsho arünü arübah ajing kheak ramrih tüsho api kingaün.

¹⁰ Judüki Jisunü arü ki tha, “Dütre. Yüang tüsho I keoniorübo ki Galilee ching yüpü thaang; ju ching arünü I ngübah.”

Aheangrü Yusheak

¹¹ Küyimki arü yüde alakheanü, aheangrü khürünü kiuto ching arübah amükeam putungrübo ki adünjikhi alala thiyusheak jih.

¹² Küyimki arünü azothsürübo lung mukhungbah lümkhi asukachihkhea, arünü bonungrübo kilim sho ahihdo jih,

¹³ tüsho tha, “Isa yapde alachoki api jingyanrübonü azhing ching arübah api ahühde tsodo de arü ki thaang.

¹⁴ Kovünornü ha yusheak shosho, isanü api reangkeamshihbah, tüsho nüsa küpkhuk müngüde alabah.”

¹⁵ Jumonü bonungrübonü sho ju lu tüsho arü ki athsunganahkhi nangde rhimo. Tüsho ha yukhüm Jihudarü bolung khihni khiungde thabude arü.

Jisu Api Jingyanrübo ki Akhiukkhi

¹⁶ Judüki jingyanrü thürükheak khülang ju Jisunü arü ki thiyikhi müzüng lim Galilee ching yü.

¹⁷ Tüsho küyimki arünü api ngükhea, arünü api kingaün; tüshe khürünü lümshangmang.

¹⁸ Judüki Jisunü arübah arü ki tha, “Yinmi ching tüsho alomi kheak thiyukhümsühmüh alala I kilim jihdo.

¹⁹ Jumonü yüang tüsho Abuh, Atsührü tüsho Amüsüh Me mung chingnü baptide trükshih alala jingyanrübo kamshang,

²⁰ inü nüsa ki thiyukhüm jihkhi alala anipü arü ki thsangyuang; tüsho kheahang, I nüsa lung kamruhroro, lün akheam khiungde alabah.”