MATHI 21 - AMÜSÜH HÜM CL Bible (BSI)

Akuk Ngüde Yüzahkhi

¹ Küyimki arünü Jirusalem thüninde arübah Oliv Müzüng ching lakhi Bethphage khiungkhea, Jisunü jingyanrü mahne thiyide,

² ane ki tha, “Nüke müngüh lakhi kiulong ching ju yüzahang, tüsho nükenü nahdü lang donki khülang anunu bede chinga ngübah. June trünang tüsho I kilim bebah arang.

³ Khürünü nüke ki tümükhüh thasho, Atungpuhnü arü yihnüpü lah de api ki thaang, tüsho apinü nahde arüshihbah.”

⁴ Ha alala wukihrünü athakhi dünjipü lakheah:

⁵ “Zion tsührübe ki thaang, ‘Kheahang, nü kiulongthsüpuh, azhihayihde donki kheak, donki nunu kheak binbah arüchoh.’ ”

⁶ Jingyanrübonü yü tüsho Jisunü arü ki thakhi nangde rhimo.

⁷ Arünü donki tüsho anunu bede arübah arü khimbo phukih, tüsho Jisunü ju kheak bin.

⁸ Tüsho yimto atonü arü khimbo limro kheak khima zo; püpürübonü sangdungbo kheaknü akhahbo ngamkhia limro kheak khima zojih.

⁹ Judüki müngühlim yükhi tüsho dunglim yankhi botonü zhide tha: “Hosanna, David tsührü! Shepü Atungpuh mung chingnü arüchonü müngühmühi thsang! Achangbe chingnü shiang!”

¹⁰ Küyimki Jisu ju Jirusalem ching yüzahkhea, kiuto abümnü arhunganimde tha, “Ha Shepü a?”

¹¹ Tüsho botonü alo, “Ha Galilee ching lakhi Nazareth chingnü wukihrü Jisu ah.”

Jisunü Arüngyam Müsühkhi

¹² Judüki Jisunü arüngyam ching yüzahbah shothsümolorü alala yankhit tüsho sho müthriachihrü dükhümbo le müthrithrümpü yinrü binkiubo lahyuka bahjih.

¹³ Tüsho apinü arü ki tha, “Ha thrüta lah, ‘I yam ki tamkhüntamnü yam de ajibah,’ tüshe nüsanü jangkhijangrarü jikpung kamshihchoh.”

¹⁴ Müktukrü le jingkikrü arüngyam ching api kilim arü, tüsho apinü arü thsüngu.

¹⁵ Tüshe apinü amüyinsahbebo rhimokhi tüsho “Hosanna David tsührü” de azürübonü arüngyam ching zhikhi amükeam putungrübo tüsho yakzan thsangyurübonü ngübah arü bukakhiuk.

¹⁶ Tüsho arünü api ki tha, “Harü tümü thachonü nünü socho shi?” Jisunü tha, “Am; ‘Khungarübo tüsho niuhdukrübo mün chingnü nü khiukdahde shijihkhi lah’ de athakhi nüsanü mükherhak de?”

¹⁷ Tüsho apinü arü bahjihbah kiuto chingnü Bethani lim wukhiuk tüsho ju ching yap.

Jisunü Khubasodung Athrukhi

¹⁸ Yapsu kiuto lim alode arüchoki, api khümde alakheah.

¹⁹ Limmungyean khubasodung zhipde ngübah apinü yü, tüsho ju kheak tümü müngü tüshe ayübo lang alakheah. Tüsho apinü ju ki tha, “Küyimkishe nü kheaknü aso dasolo!” Tüsho judüchokinü khubasodung ju yiuhabah.

²⁰ Küyimki jingyanrübonü ha ngükheanü müyinsahde tha, “Küde thsah khülangkinü khubasodung yiuh-a la?”

²¹ Tüsho Jisunü arü ki alo, “Atsütsü inü nüsa ki thachoh, nüsa akin lasho tüsho mudukiuhlosho, khubasodung kheak rhimokhi lang nüsanü mürhimo tüshe ‘Ha shuh-a keto ching jipa bahang’ de ha müzüng ki thasho, ju arhimobah.

²² Tüsho nüsanü tümüpürü tamkhüntamnüde akheangbanü, nüsa akin lasho nüsanü angübah.”

Jisu Thiyukhüm-sühmüh Keokhikhi

²³ Küyimki api arüngyam ching yüzahkhea, amükeam putungrübo tüsho mihtsürü azothsürübo api thsangyude alachoki arü tüsho tha, “Tümü thiyukhüm-sühmüh hode nünü harü alala rhimocho? Tüsho ha thiyukhüm-sühmüh nü kilim shenü ajihkhea?”

²⁴ Tüshe Jisunü arü ki alo tüsho tha, “Inü she nüsa ki khülang keokhianü, ju nüsanü I ki thasho tümü thiyukhüm-sühmüh hode harü rhimochonü inü nüsa ki thabah:

²⁵ Johannü baptikhi ju küchingnü a? Yinmi chingnü a shi mihtsürübo kilimnü a?” Tüsho arünü arü bolung lümde thaachih, “Isanü, ‘Yinmi chingnü,’ de thasho, apinü isa ki thabah, ‘Dale tüsho tümüde nüsanü api mükinkhea?’

²⁶ Tüshe isanü, ‘Mihtsürübo kilimnü,’ de thasho, isanü boto trelah, tümütüsho alalanü Johan ju wukihrü khejihde lah.”

²⁷ Jumonü arünü Jisu ki alo, “Isanü mümükheah.” Tüsho apinü arü ki tha, “Dale tüsho tümü thiyukhümsühmüh hode inü harü rhimochonü inü nüsa ki mütha.

Tsührü Mahne Shihdanglimyu

²⁸ “Nüsanü tümü lümcho? Mihtsürü khülang tsührü mahne lakheah; tüsho apinü adüjibuh ki yübah tha, ‘I tsah-a, yüang tüsho khihni kurungasolu ching rhimoang.’

²⁹ Tüsho apinü alo, ‘I a muh’; tüshe ju dunglim lümlobah yü.

³⁰ Tüsho apinü mahnepü ki yübah ju ruk tha; tüsho apinü alo, ‘He, atobuh,’ tüshe apinü müyü.

³¹ Mahne bolung shepünü abuhnü alümkhi rhimokhea?” Arünü alo, “Akhuhbuhnü.” Jisunü arü ki tha, “Atsütsü inü nüsa ki thachoh, ruk-threrü tüsho müzammüramrübo nüsa müngühnü Thrünpuh kiulongthsü ching yüchoh.

³² Tümüde thiyuro-lungki limro ching Johan nüsa kilim arü, tüsho nüsanü api kheak akin müla, tüshe ruk-threrübo tüsho müzammüramrübonü api kheak akin la; tüsho nüsanü ha ngü dunglim she nüsa mulong mümüthri tüsho api kheak mükin.

Kurungasolu-thsürü Shihdanglimyu

³³ “Shihdanglimyu püpü: Kurungasolu putungrü khülang lakheah. Apinü ju mükamde shahwün ayün, ju ching anitpung kiu tüsho aheangsadam khülang thsü. Judüki apinü kurungasolu ju thulu-thsürü khürü kilim amüche jihbah hantsah yü.

³⁴ Küyimki yimlupü kim khiungkhea, apinü thulu-mücherü kilim yimlukhi chingnü shihcham lupü ayamlarübo yüshih;

³⁵ Thulu-mücherünü api yamlarübo ram; arünü khülang lak, püpü laksah, tüsho asampü ju lungnü king.

³⁶ Kheaküshe apinü yamlarü püpürü akhuhbe kheaknü alü thsüde yüshih; tüsho arünü ju ruk lang arü kheak rhimo.

³⁷ Ju dunglim apinü arü kilim, ‘Arünü I tsührü wüntre jihbah,’ de thade yüshih.

³⁸ Tüshe küyimki thulu-mücherübonü atsührü ju angükhea, arü khülangnü khülang ki thaachih, ‘Ha yamrüplurüp lubuh ah; arang, isanü api laksahanü tüsho api yamrüplurüp luanü.’

³⁹ Arünü api bea lubah kurungasolu chingnü yankhit, tüsho api laksah.

⁴⁰ Jumonü küyimki kurungasolu putungrü arübanü, apinü thulu-mücherübo kheak tümü thsüba?”

⁴¹ Arünü alo, “Apinü jurü amütsürü thsümüchide asheshihbah, tüsho yimlu kim ching api hi shihcham jihshihpü thsüde kurungasolu ju thulu-mücherü püpürü kilim jihbah.”

⁴² Jisunü arü ki tha, “Nüsanü amüsühyubo ching mükheakheah de: ‘Thüyam-thsürünü abahyukkhi lung ju amühit-lung kamdo; Atungpuhnü ha rhimodo, tüsho ha isa mük ki amüyinsahbe lah’?

⁴³ “Jumonü inü nüsa ki thachoh, yinmi kiulongthsü ju nüsa kheaknü luakhinbah tüsho aso asoshihpü mihtsürübo kilim jihabahbah.

⁴⁴ Tüsho sherü ha lungmi kheak keambanü adütre kamde adannakbah; tüshe sherü kheak ha lung keambanü adübün kamde azünakbah.”

⁴⁵ Küyimki amükeam putungrü tüsho Pharisirübonü api yo shihdanglimyubo sokhea, apinü arü dünkheak thachoh de mükheah.

⁴⁶ Tüshe arünü api rampü mürangchoki, arünü botobo tre, tümütüsho arünü api ju wukihrü khülang khejih.