MATHI 17 - AMÜSÜH HÜM CL Bible (BSI)

Jisu Jak Müthrikhi

¹ Nimung thuruk dunglim Jisunü api lung Peter, Jakob tüsho aniurü Johan bebah awung achang kheak yükih.

² Ju ching arü miki api jak müthriabah. Api miro ju ani nangde tah, tüsho api khimmihbo ayinatrüm nangde yinde kam.

³ Tüsho kheahang, Jisu ki asukachihde Mosa tüsho Elija arü miki akhiuk.

⁴ Peternü Jisu ki tha, “Atungpuh, isa ha ching lapü tsülah. Nünü mulongsho, nü thsungkheak khülang, Mosa thsungkheak khülang tüsho Elija thsungkheak khülang de inü yünshim mahsam thsanü.”

⁵ Api thade alachoki, amo ayinatrüm khülangnü arü liudo, tüsho amo chingnü düsheak khülangnü tha, “Ha inü amuzhokhi I tsührü; api kheak inü mulong keamchoh. Api ki aniang!”

⁶ Küyimki jingyanrübonü ha sokhea, arünü trede arü miro alo lim mükhüm.

⁷ Tüshe Jisunü arübah arü qiude tha, “Asürang, tüsho dütre.”

⁸ Tüsho küyimki arünü abinkih-a kheahkheanü she müngü tüshe Jisu lang alakheah.

⁹ Arü awung chingnü akibah, Jisunü arü ki thiyukhüm jihde tha, “Mihtsürü Tsührü ashe chingnü masürüyikia she ki she ha michih dütha.”

¹⁰ Tüsho api jingyanrübonü anihbuh ki keokhi, “Dale tüsho tümüde yakzan thsangyurübonü Elija akhuhde arübah de thacho?”

¹¹ Judüki Jisunü arü ki alo, “Dükde Elija akhuhde arübah tüsho alala tsanglungbah.

¹² Tüshe inü nüsa ki thachoh, Elija arüabahdo, tüsho arünü api mükheahkhit, tüshe arü künkhi api kheak rhimodo. Junangde Mihtsürü Tsührü arü khah ching thsünübah.”

¹³ Judüki apinü Johan Baptijihbuh dünkheak arü ki thachoh de jingyanrübonü anikhit.

Amünean Me Yüzahkhi Azürü Thsüngukhi

¹⁴ Küyimki arünü boto ki arükhea, mihtsürü khülang Jisu ki arü tüsho api miki khukning,

¹⁵ tüsho tha, “Atungpuh, I tsührü ki muzhoang, tümüde api zukleang-tukthsünü khide mütsükhinü mo tüsho ke ching yüzahchoh.

¹⁶ Inü api nü jingyanrübo kilim bebah arü tüshe arünü api müthsüngukhuk.”

¹⁷ Jisunü alo, “O akin mülakhi tüsho lakshi lün, külokhüh I nüsa lung laba? Tüsho inü nüsa lung külokhüh arümkheamba? Api I kilim ha ching bede arang.”

¹⁸ Jisunü amünean me thürüh, tüsho anihbuh kheaknü api akhiuk; tüsho ju kim chingnü azürü ju nguabah.

¹⁹ Judüki jingyanrübonü Jisu kilim mükhingde arübah tha, “Tümü thsükhi isanü api müyankhitkhukkhea?”

²⁰ Jisunü alo, “Tümütüsho nüsanü mükinmonü ah. Inü nüsa ki thiyuro thachoh, nüsa akin woninji dükhüh lasho, nüsanü ha müzüng ki thabah, ‘Ha kheaknü ju ching akhinang,’ tüsho ju akhinbah; tüsho nüsa thsungkheaknü tümü she amukukkhi mülade alabah.

²¹ Judüalalashe, hadürü a tamkhüntamnü tüsho khümkeak thsükhinü lang yankhitkhukchoh.”

Jisunü Api Shepü Thalokhi

²² Küyimki jingyanrübo alala Galilee ching rukhüh arükhea, apinü arü ki tha, “Mihtsürü Tsührü ju mihtsürübo khah ching thsungyukjihpü lah.

²³ Arünü api laksahbah tüsho mahsam nipü api arhang kamlobah.” Tüsho jingyanrübo mulong rozhakde alakheah.

Arüngyam Ruk Jihkhi

²⁴ Küyimki arü Kapernaum ching arükhea, arüngyam ruk-threrü Peter kilim arü tüsho tha, “Nü thsangyurünü arüngyam ruk müjihcho de?”

²⁵ Apinü alo, “Am.” Tüshe küyimki Peter thüyam ching arükhea, Jisunü akhuhde tha, “Simon, nünü küde lümcho? Alomi kiulongthsürübo kilim sherünü kukruk-dün yungsho rukbo jihbe a? Lomi ching mihkhungrü kheaknü a shi khiungkerü kheaknü a?”

²⁶ Peternü alo, “Khiungkerübo.” Jisunü api ki tha, “Dale tüsho mihkhungrü a zuzu labah.

²⁷ Tütüshe arü mulong yuribah mütsüle, keto ching yübah keang jipyukang, tüsho akhuh akhiukkhi thüngüh luang. Küyimki amün khimshuhbanü nünü yinchi-sho 1 ngübah; ju luang tüsho ike dün arü kilim jihang.”