MARK 5 - AMÜSÜH HÜM CL Bible (BSI)

Amünean Me Lakhi Mihtsürü Thsüngukhi

¹ Judüki arünü keto thripkhüh lim, Gadara lomi ching arü.

² Tüsho küyimki api sangkung chingnü akhiukkheanü, zukleangnü amünean me yüzahkhi mihtsürü khülangnü mibahpung chingnü api shoru,

³ api ju kiuyuk bolung lakheah; tüsho shenü she api ju wuhrünliunü she mürhükkhuk,

⁴ tümütüsho api khah tüsho jing rhükkheah, tüshe apinü wuhrünliu ju yihshak tüsho ajing kheaknü yinchibo yihshak. Sheshe api danyukpü sühmüh mülade alakheah.

⁵ Azhing tüsho ayin, api ju müzüngbo le mibahpungbo ching zhide tüsho lungbonü aküdah thsüde tsütde alakheah.

⁶ Tüshe küyimki apinü limshu chingnü Jisu ngükhea, apinü alihde yü tüsho api ki khukning.

⁷ Khide Achang Thrünpuh tsührü Jisu, inü nü ki tümü thsüba? I düthsümüchi de Thrünpuh mung tamde inü nü ki thachoh.

⁸ Tümüde apinü anihbuh ki tha, “Amünean me, mihtsürü kheaknü akhiukang!”

⁹ Judüki apinü anihbuh ki keokhi, “Nü mung she a?” Tüsho apinü alo, “I mung Boto ah; tümüde isa ahihkhüh ah.”

¹⁰ Tüsho lomi chingnü apinü yankhita mübahpü anihbuhnü api ki mushu.

¹¹ Kheakü müzüngbo thüninde kheaknu boto ato khülang motsühmoyungde alakheah.

¹² Tüsho amünean mebo alalanü api ki mushude tha, “Kheaknubo kilim isa yübah jurü ching yüzahshang.”

¹³ Jumonü apinü arü ki mülüjih. Amünean mebonü akhiukbah kheaknu boto ching yüzah, tüsho kheaknu 2000 bande lungrhün ching nanachihde keto lim yüki tüsho ke ching thüraksah.

¹⁴ Kheaknu neakrübonü alihde yübah kiuto tüsho lomi ching tha. Tüsho arünü ju dünjikhi kheahpü wukhiuk.

¹⁵ Küyimki arü Jisu kilim arükhea, amünean mebo yüzahkhi mihtsürü thsü khim phuyubah lümkhi atsü kama binde ngü; tüsho arübonü tre.

¹⁶ Tüsho sherünü angükheanü, amünean me yüzahbuh kheak dünjikhi, tüsho kheaknubo dünkheak arü ki thaa huh.

¹⁷ Judüki arünü arü lomi chingnü chamachihde atsopü api ki mushupü tankih.

¹⁸ Tüsho küyimki api sangkung ching yüzahkhea, amünean me yüzahbuhnü api lung yüpü anihbuh ki mushu.

¹⁹ Jisunü api yanlo, tüshe api ki tha, “Nü müyamrübo kilim thüyam lim yüang, tüsho Atungpuhnü nü thsungkheak ato rhimokhi tüsho apinü nü ki muzhokhi dünkheak arü ki thaa huhang.”

²⁰ Apinü chamachih tüsho Jisunü api thsungkheak rhimokhi alala Dekapoli ching zhiyukpü tankih; tüsho alalanü müyinsah.

Jairus Tsührübe tüsho Aliberü Arhang Kamloshihkhi

²¹ Küyimki Jisu ju sangkung chingnü püpü thrip hode ayükhea, yimto ato khülang api ki mukhungde arü; tüsho api keto ki lakheah.

²² Tüsho kheahang, sinagog yakzanshuhrü bolung khülang amung Jairus arü. Tüsho küyimki anihbuhnü api ngükhea, apinü ajing ki mükhüm

²³ tüsho api ki mushude tha, “I tsührü akheambe ashepü thsüde lah. Arübah anihbe kheak nü khahnü qiujang, junangde anihbe angubah tüsho rhangdung labah.”

²⁴ Jumonü Jisunü api lung yü tüsho yimto atonü api dunglim arü tüsho anihbuh mükamdo.

²⁵ Kheakü aliberü khülang kam thürükheak mahne thiyih müyande alakheah,

²⁶ tüsho anihbe küpkhuk ato lude thümürü kilim lakhit phinphurukde kheahshihshih she angupü dün amütsübe lang kam.

²⁷ Küyimki alibenü Jisu dünkheak sokhea, anihbenü boto ching api dunglim arü tüsho api khim qiu;

²⁸ tümüde alibenü lüm, “Inü api khim lang she qiusho, I angubah.”

²⁹ Zukleangnü alibe thiyih müyankhi tukloabah, tüsho alibenü anihbe pang ching thsünü ngukhi mükheah.

³⁰ Tüsho api kheaknü wu wukhiukkhi Jisunü nahde mükheahbah boto ching rholo tüsho tha, “Shenü I khim qiukhea?”

³¹ Tüshe ajingyanrübonü api ki tha, “Yimto atonü nü mükamdokhi nünü ngülah, tüsho nünü thachoh, ‘Shenü I qiukhea?’ ”

³² Tüsho shepünü ha rhimokheanü apinü mükamde kheah.

³³ Tüshe alibenü trede tüsho ajande, anihbe kheak dünjikhi mükheahde arü tüsho api ki mükhümde api ki thiyuro alala tha.

³⁴ Tüsho apinü alibe ki tha, “I tsah-a, nü yo akinnü nü thsüngudo. Akhimahede tsoang, tüsho nü tukthsü nguabahang.”

³⁵ Api thiyu thade alachoki, sinagog yakzanshuhbuh yam chingnü khürü arübah tha, “Nü tsührübe shea lah. Tümü thsüpü thsangyurü küpkhuk jihpü?”

³⁶ Jisunü thiyu soakede sinagog yakzanshuhbuh ki tha, “Dütre; akin lang laang.”

³⁷ Tüsho apinü Peter, Jakob, tüsho Jakob niurü Johan kheak hode api dunglim yüpü sheshe mümülü.

³⁸ Jushu apinü sinagog yakzanshuhbuh yam ching arü, tüsho arhunganimde achangnü tüzhode mitripkhi ngü.

³⁹ Küyimki api yükheanü, apinü arü ki tha, “Tümü thsükhi ha arhunganimkhi tüsho atripkhi la? Azürü ju müshe, tüshe ayapkhi lang ah.”

⁴⁰ Arünü api mükhemükimde münejih. Tüshe küyimki apinü arü wukhiukshihkhea, azürü abuh le abe, tüsho ane lung lakhi bea lubah azürü yappung ching yüzah.

⁴¹ Judüki apinü azürü ju akhahnü shuh-a lubah anihbe ki tha, “Talitha, kumi,” amütsan, “Azübe, inü nü ki thachoh, asürang.”

⁴² Zukleangnü alibenü asürü tüsho tsah, tümüde anihbe kam 12 lakheah. Tüsho arübo müyinsah.

⁴³ Tüshe shenü she ju mümükheahshihpü arü ki müküpde thiyukhüm jih, tüsho alibe kilim atsühpü tümükhüh jihpü tha.