MARK 2 - AMÜSÜH HÜM CL Bible (BSI)

Thripshe Mihtsürü Thsüngukhi

¹ Tüshe kheaküshe apinü nimung anükhüh dunglim Kapernaum ching yüzah, tüsho api ju thüyam ching lah de so.

² Zukleangnü ahihkhüh mukhungkhinü khimdopü aleanglim ki she khiungshak mülade kam; tüsho apinü arü ki thiyu ju thsangyuthsangra.

³ Judüki arü mihtsürü phüyinü thripshe tukthsürü shuhbah api kilim arü.

⁴ Tütüshe boto lakhinü arünü api thüninde marükhuk, jumonü arünü api kumung ayidükhik chakashungbah tukthsübuh yapkhi ju yükishih.

⁵ Küyimki Jisunü arü akin ngükhea, apinü thripshe tukthsübuh ki tha, “I tsah-a, nü neakbo bahjihdo.”

⁶ Tüshe ju ching athrütrü khürü binde alakheah tüsho arü mulong ching lümakheah,

⁷ “Tümü thsükhi ha mihtsürünü hanangde mükhemükimyu thacho? Thrünpuh kheak hode shenü neakbo bahjihpü kukla?”

⁸ Ha arü mulong ching lümde alakhi ah de Jisunü nahdü lang api me chingnü mükheah, tüsho arü ki tha, “Tümüde nüsanü hadürü lümcho?

⁹ Thripshe tukthsübuh ki, ‘Nü neakbo bahjihdo,’ yungsho, ‘Asürübah nü yapkiu hanang tüsho tsahang,’ de küpü thakhi amülübe laba?

¹⁰ Junangde alomi ching Mihtsürü Tsührünü neak bahjihpü wu lah de nüsanü amükheahbah.” Apinü thripshe tukthsübuh ki tha,

¹¹ “Inü nü ki thachoh, asürübah nü yapkiu shuh-a hanang, tüsho thüyam lim yüang.”

¹² Tüsho zukleangnü api asürübah yapkiu shuh-a han, tüsho arü alala mikinü wukhiuk, junangde arü alala müyinsah tüsho Thrünpuh shide tha, “Isanü hanangde küyimkishe müngüakheah!”

Jisunü Levi Jikhi

¹³ Judüki apinü kheaküshe keto yean wukhiuk; yimto ato api kilim arü, tüsho apinü arü thsangyu.

¹⁴ Tüsho api tsahhode alachoki, apinü Alphia tsührü Levi ruk-threyam ching binde ngü, tüsho apinü anihbuh ki tha, “I dunglim yanang.” Tüsho apinü asürübah api dunglim yan.

¹⁵ Küyimki api Levi yam ching yimtsühde alakhea, ruk-threrü ahihkhüh tüsho aneakrübo she Jisu le ajingyanrü lung binde alakheah; tümüde api dunglim yanrü ahihkhüh lakheah.

¹⁶ Tüsho küyimki athrütrü le Pharisirübonü ruk-threrü tüsho aneakrübo lung api yimtsühde angükhea, arünü api jingyanrübo ki tha, “Tümü thsükhi apinü ruk-threrü le aneakrübo lung tsühyungcho?”

¹⁷ Küyimki Jisunü ha sokhea, apinü arü ki tha, “Mütukthsürü thsungkheak thümürü yihnüpü müla, tüshe tukthsürü thsungkheak ah. Thiyuro-lungkirü yung tüshe aneakrübo jipü I arükheah.”

Khümkeak dünkheak Keokhikhi

¹⁸ Tüsho Johan jingyanrübo le Pharisirübo khümkeak thsüde alakheah. Mihtsürü khürünü arübah Jisu ki keokhi, “Tümü thsükhi Johan jingyanrübo le Pharisirü jingyanrübonü khümkeak thsücho, tüshe nü jingyanrübonü khümkeak müthsü le?”

¹⁹ Jisunü arü ki alo, “Yamkhünkambuh müyamrübonü arü lung yamkhün-kambuh lachoki khümkeak thsüpü kukla de? Arü lung yamkhünkambuh la khiungdüa arünü khümkeak müthsükhuk.

²⁰ Tüshe arü bolung yamkhün-kambuh bede atsopü nimungbo arübah, tüsho arünü khümkeak thsübah.

²¹ “Shenü she khim amürhüt kheak aso mükhüpkihchoh, tümütüsho akhüpkihkhi ju khim kheaknü rukkhichoh, tüsho abitkhi amütsübe kamshihchoh.

²² Yungsho shenü she shihküp-keluh awün ching yukhu amühdo muyukchoh; jude thsüsho shihküp-keluh ju atrübah tüsho yukhu bukkhitbah, tüsho shihküpkeluh ju athsümünimbah. Tüshe shihküp-keluh aso ching yukhu amühdo yukbeah.”

Amuni dünkheak Keokhikhi

²³ Kheakü Amuni khülang ching apinü manji-lu hode yü; tüsho arü yüde alachoki ajingyanrübonü manji rütpü tankih,

²⁴ Tüsho Pharisirünü api ki tha, “Kheahang, Amuni mürhimopü yakzan lakhi tümü thsükhi arünü rhimocho?”

²⁵ Jisunü alo, “David tüsho api lung berübonü yihnüpü ching tüsho khümde alachoki tümü rhimokheanü nüsanü küyimkishe mükheakheah de?

²⁶ Achangbe amükeambuh Abiathar nimungbo ching, apinü Thrünpuh yam ching yüzah tüsho amükeamrübonü lang atsühpü yakzan lakhi amüsühkhitkhi yikhap tsüh tüsho apinü khürü api lung berübo kilim she jih.”

²⁷ Tüsho apinü arü ki tha, “Amuni ju mihtsürü thsungkheaknü thrün; tüsho mihtsürü thsungkheaknü Amuni yung.

²⁸ Jumonü Mihtsürü Tsührü ju Amuni yo Atungpuh ah.”