MARK 11 - AMÜSÜH HÜM CL Bible (BSI)

Jirusalem ching Akuk Ngüde Yüzahkhi

¹ Küyimki arübo Jirusalem phüni Oliv Müzüng ching, Bethphage tüsho Bethani ching arükhea, apinü ajingyanrü mahne thiyia yüshih;

² tüsho apinü ane ki tha, “Nüke mikhuh lakhi kiulong ching yüzahang, tüsho nüke yüzah yanalünde shenü mübinkhi donki nunu khülang chinga ngübah. Ju trünang tüsho bebah arang.

³ Tüsho khürünü nüke ki, ‘Tümü thsükhi nükenü ha rhimocho?’ de thasho, ‘Atungpuhnü ha yihnüpü lah,’ de thaang tüsho nahdü lang apinü ha ching arüshihbah.”

⁴ Jumonü anenü limro ching yü, tüsho kiudunglimro ching khimdopü ki donki nunu khülang chinga zokhi ngü; tüsho anenü ju trünkhi.

⁵ Tüsho ju kheak zhiprü khürünü ane ki tha, “Nükenü donki nunu tümü thsüpü trüncho?”

⁶ Jumonü Jisunü thiyukhüm jihkhi nangde anenü arü ki tha. Tüsho arünü bebah yüshih.

⁷ Jushu anenü donki nunu ju Jisu ki bedarü tüsho ju kheak arü khimmihbo phukih, tüsho apinü ju kheak bin.

⁸ Tüsho ahihkhühnü arü khimmihbo limro kheak khima zo, tüsho püpürünü sangdungbo kheaknü akhahbo ngamkhi tüsho limro kheak khima zo.

⁹ Judüki mikhuh tüsho dunglim yürübonü zhide tha, “Hosanna! Atungpuh mung ching arübuh shiang!

¹⁰ Atungpuh mung chingnü arüde alakhi isa abuh David kiulongthsü müngühmühi thsang! Achangbe chingnü shiang!”

¹¹ Jisunü Jirusalem ching yübah arüngyam ching yüzah. Jumonü küyimki apinü alala mükamde akheahkhea, kim ashukhinü apinü thürükheak mahne bebah Bethani ching yü.

Jisunü Khubasodung Athrukhi

¹² Ashidopü, arü Bethani chingnü akhiukchoki, api khümde alakheah.

¹³ Tüsho limshunü khubasodung ayü kihde ngübah aso kihnahnü de akheahpü yü. Küyimki api ju ki arükhea, ayübo kheak hode apinü tümü müngü, tümüde ju khubaso asopü kim yungde alakheah.

¹⁴ Judüki apinü khubasodung ki tha, “Kheaküa shenü she nü kheaknü aso dütsühshih.” Tüsho api jingyanrübonü ju so.

Jisu Arüngyam ching Yükhi

¹⁵ Jumonü arübo Jirusalem ching arü. Tüsho Jisunü arüngyam ching yüzahbah shothsümolorübo yankhitpü tankih, tüsho sho-müthrirü dükhümbo le müthrithrümpü yinrübo binkiu thülah-a bahjih.

¹⁶ Tüsho apinü sheshe arüngyam kinü kukruk mühanhoshih.

¹⁷ Judüki apinü arü ki thsangyude tha, “ ‘Trükshih alala thsungkheak I yam ki tamkhüntamnü yam de ajihbah’ de thrüta müla de? Tüshe nüsanü ju ahührü jikpung kamshihdo.”

¹⁸ Tüsho yakzan thsangyurübo le amükeam putungrübonü ju sobah api laksahpü rük yim; arünü api trede alakheah, tümütüsho mihtsürü alalanü api thsangyukhi kheak müyinsahde alakheah.

¹⁹ Tüsho küyimki arelim kamkhea, apinü kiuto chingnü wukhiuk.

Khubasodung kheaknü Anikhitbe

²⁰ Ashido yapsu arübo tsahhode alachoki, arünü khubasodung ju aying chingnü yiuh-a ngü.

²¹ Tüsho Peternü lümkhitde api ki tha, “Thsangyurü, kheahang! Nünü athrukhi khubasodung thsü yiuh-a lah.”

²² Jumonü Jisunü arü ki alo, “Thrünpuh kheak akin laang.

²³ Atsütsü inü nüsa ki thachoh, shepünü ha müzüng ki, ‘Shuhakhinang tüsho keto ching jipyukang’ de thacho, tüsho api mulong ching müdukiuhlode apinü tümü thachonü adünjipü kinsho, api thsungkheak ju rhimobah.

²⁴ Jumonü inü nüsa ki thachoh, tümüpürü nüsanü tamkhüntamnüde akheangbanü nüsanü jurü leangkhipü akin laang, tüsho nüsanü jurü ngübah.

²⁵ Tüsho küyimki nü zhipbah tamkhüntamnüba, khürü kheak nü azhihkhi tümükhüh lasho, api neak bahjang, junangde yinmi ching nü Buhnü she nü neak bahjihbah.

²⁶ Tüshe nünü neak mübahjihsho, yinmi ching nü Buhnü she nü neak mübahjih.”

Jisu Thiyukhüm-sühmüh Keokhikhi

²⁷ Judüki arübo Jirusalem ching alode arü. Tüsho api arüngyam ching tsahde alachoki, amükeam putungrübo, yakzan thsangyurübo, tüsho azothsürübo api kilim arü.

²⁸ Tüsho arünü api ki tha, “Tümü thiyukhümsühmühnü nünü harü rhimocho? Tüsho harü rhimopü thiyukhümsühmüh shenü nü kilim jihkhea?”

²⁹ Tüshe Jisunü arü ki alo, “Inü she nüsa ki khülang keokhibah; I ki aloang tüsho tümü thiyukhümsühmühnü inü harü rhimochonü nüsa ki thabah:

³⁰ Johannü baptijihkhi ju yinmi chingnü a shi mihtsürü kilimnü a? I ki aloang.”

³¹ Tüsho arünü arü bolung lümakheahde thaachih, “Yinmi chingnü de thasho, judüasho tümüde nüsanü api kheak mükinkhea de apinü athabah.

³² Tüshe arünü mihtsürü kilimnü de athapü she mihtsürübo tre, tümüde alalanü Johan ju wukihrü khejih.”

³³ Jumonü arünü Jisu ki alo, “Isanü mümükheah.” Tüsho Jisunü arü ki tha, “Inü tümü thiyukhüm-sühmühnü harü rhimochonü nüsa ki she mütha.”