ESTER 7 - AMÜSÜH HÜM CL Bible (BSI)

¹ Junangde kiulongthsüpuh le Haman ane Ester lung yimtsühpü yü.

² Mahne nipü arü yukhu yungde alachoki kiulongthsüpuhnü Ester ki keokhi, “ Kiulongthsüberü Ester, nünü tümü künla? I ki thaang tüsho ju nünü angübah. I kiulongthsü thripkhüh thsüthsü she ajihbah.”

³ Esternü alo, “O kiulongthsüpuh, nünü I muzhode inü amushukhi anijihsho, inü alunekhi ju I tüsho I mihtsürübo rhangdung lashang.

⁴ I mihtsürü tüsho I asheshihpü yindo. Athrürü tüsho aliberü azhorü kuhi ching yinkhi ruk lang she dükhülaa inü kiulongthsüpuh küpkhuk jihde mütha; tüshe isa asheshihpü thsüdo!”

⁵ Zerzesnü Ester ki tha, “Shepünü hadürü rhimopü mürangcho? Ha mihtsürü küching la?”

⁶ Esternü alo, “Isa riri, isa thsümüchirü ju, akhüh mihtsürü Haman ah!” Judüki Hamannü kiulongthsüpuh le kiulongthsübe ane kheak trede kheahmürip.

⁷ Kiulongthsüpuhnü abukakhiukde wusubah abinpung khiungshak chingnü wungdo ayam shahwün ching wukhiuk. Hamannü kiulongthsüpuh ngüchoki api thsümüchipü labah de lümbah arhangdung thsungkheak Ester dunglim mükhümde mushu.

⁸ Küyimki kiulongthsüpuh azahlokhea, Hamannü mihmüthsüm kheangde Ester binkiu kheak khukningde mushu. Ha ngübah kiulongthsüpuhnü zhi, “Ha buh ha I yam ching I mikinü kiulongthsübe kheak aneak rhimopü thsücho shi?” Ju thaakede dukhabonü Haman ku muhiudojih.

⁹ Arü bolung mihtsürü khülang, Harbonanü tha, “Hamannü alü rhimodo, tümüde Mordekai shepünü nü rhangdung khümkhitkhea, api sheshihpü süksahdung thsü, tüsho ju ashanglim limthrip 22nü thsü!” “Haman ju kheak zhinang!” de kiulongthsüpuhnü thiyukhüm jih.

¹⁰ Junangde Haman ju anihbuhnü Mordekai sheshihpü süksahdung thsükhi kheak zhinde sheshih. Jushu kiulongthsüpuh bukakhiukkhi keamlo.