ESTER 5 - AMÜSÜH HÜM CL Bible (BSI)

Esternü Akhuhbe Aniojikhi

¹ Esternü khümkeak thsükhi asam nipü kiulongthsü shulünkhim yihbah, kiulongthsürü-yam alunglim, kiulongthsürü yam khiungshak mikhuh abinbah zhip. Kiulongthsüpuh ju alunglim kiulongthsübinkiu kheak azahlim abinbah bin.

² Küyimki apinü Ester wungdo zhipde angükhea, amulong ching muzhode lüm tüsho shoto tso amiki shuhkih. Alibenü arübah tso mulo kheak qiu.

³ “Ha tümüa kiulongthsüberü Ester?” de kiulongthsüpuhnü keokhi. “Nünü tümü künla I ki thaang, tüsho ju luang–mürangkhüh I kiulongthsü thripkhüh thsüthsü she ajihbah,” de tha.

⁴ Esternü alo, “Nü thsungkheak inü are-jim thsakhamlah, jumonü kiulongthsüpuhnü mulongsho Haman nüke arüshihpü mulonglah.”

⁵ Tüsho kiulongthsüpuhnü tha, “Esternü amulongkhi rhimopü thsüde Haman nahnah bebah arang.” Jumonü kiulongthsüpuh le Haman ane Esternü athsakhamkhi aniojikhi ching yü.

⁶ Kiulongthsüpuhnü yukhu yungde keo, “Nünü tümü künlanü thaang, tüsho ju luang. Nünü amushukhi anibah, I kiulongthsü thripkhüh thsüthsü she ajihbah.”

⁷ Esternü alo,

⁸ “Nünü muzhode inü amushukhi alojihsho shido she nü le Haman nüke inü athsakhamkhi jimpung tsühshihnelah. Judüki inü tümü künlanü nü ki thabah.”

Hamannü Mordekai Laksahpü Rük Yimkhi

⁹ Haman ju yimtsühpung chingnü ashude tso tüshe ripit ki Mordekai shorubah api ki wüntre jihde muwusukhi ngübah Hamannü abukakhiuk.

¹⁰ Tüshe alangzü danyukde thüyam lim yü. Junangde apinü she amüyamrü ayam ching jiyuk tüsho aniube Zeresh she arü lung beshih.

¹¹ Apinü kükheangde alakhit, tsührü athrürü hihde alakhi, kiulongthsüpuhnü atorü kamshihkhi, tüsho püpürü torü kheaknü kiulongthsüpuhnü api alü yihnüpü thsüde azokhi arü ki huh.

¹² “ Kheaküshe tümüpürü a” de Hamannü thamusu, “ Kiulongthsüberü Esternü sheshe müji tüshe kiulongthsüpuh ike lang jiyuk, shido she ike jilah.

¹³ Tüshe Jihudabuh Mordekai ju kiulongthsüpuh yam ripit ki binchoki harü I miki tümü nangde müla.”

¹⁴ Ju ching aniube le amüyamrübonü hade tharung, “Nünü süksahdung ashanglim limthrip 22nü thsang, jude thsah shido yapsu kiulongthsüpuh ki thabah Mordekai ju kheak zhinde sheshang, tüsho nü aniojikhi ching asühde yüang.” Haman nü ha lümkhi atsü ah de lümbah süksahdung thsakham.