ESTER 4 - AMÜSÜH HÜM CL Bible (BSI)

Mordekainü Ester ki Arung Kheangkhi

¹ Küyimki Mordekainü harü sokhea, akhim rukrüpbah shungliukhim phuyu tüsho awah mujubah kiuto phulung ching wukhiuk tüsho achangnü zhide trip;

² apinü kiulongthsüpuh ripit khiungde zhide arü tüshe apinü ripit ching a müyüzah, tümüde shungliukhim phuyurü a kiulongthsüpuh ripit alunglim müyüzahshihpü thiyukhüm lakheah.

³ Kiulongthsüpuh yukhüm khiungkhi lomi alala ching, Jihudarü atüzhokhi ato lakheah. Arünü khümkeak thsüde trip, tüsho mitripde ahihkhühnü shungliukhim phuyubah awah ching awuh.

⁴ Küyimki Ester ki ayamlaberü le dukhabonü Mordekai dünkheak thakhea, alibe mulong thsümünim. Anihbenü Mordekai kilim shungliukhim müthri phuyushihpü püpü khimmih mühah tüshe ju müleangkhi.

⁵ Tüshe alibenü Hathak dukha, kiulongthsüpuhnü anihbe yamlarü thsüshihkhi ju jihbah Mordekai kheak tümü dünjia la tüsho tümü amütsananü ayimkhitshihpü thiyi.

⁶ Hathaknü Mordekai yimde kiuto phulung ching kiulongthsüpuh limkhuh ki yü.

⁷ Mordekainü api kheak tümü dünjikhea tüsho Hamannü Jihudarü laksahpü thsungkheaknü kiulongthsüpuh rahpung-yam ching sho küdükhüh zopü alokhikhea ju alala api ki thaa huh.

⁸ Hathak kilim Jihudarü sheshihpü Susa ching thiyukhüm jihkhi hüm khülang apinü jih. Ju lude yünü Ester ki adünjikhi thade jihang de mushu; ju ruk Esternü she kiulongthsüpuh ki yübah anihbe mihtsürübo thsungkheaknü mushushihpü thiyi.

⁹ Hathaknü yü tüsho Mordekainü athakhi Ester ki thaa huh,

¹⁰ tüsho Mordekai kilim jihloshihpü thsüde Esternü api ki thiyusheak ha jih,

¹¹ “Athrürü yungsho aliberü, khürükhüh müjide kiulongthsüpuh yamlung lim yüzahsho ju mihtsürü ashepü tsütsü. Ju thiyukhüm ah; kiulongthsüpuh ki lümlung-jihrübo tüsho lomi mihtsürübonü mükheahlah. Ha yakzan hode atsokhitpü limro ju: Küyimki kiulongthsüpuhnü khürü ki shoto tso shuhkihbanü akhümkhitbah tüshe nimung samrü bande kiulongthsüpuhnü I müji.”

¹² Küyimki Mordekainü Ester yusheak sokhea,

¹³ apinü atünadopü yu ha mühahlo: “Nü kiulongthsüpuh yam ching lamonü Jihudarü bolungnü nü lang akhümkhitbah de dülüm.

¹⁴ Nünü hadürü kim ching sheak makhiukde binsho, yinmi limnü Jihudarü kilim arung arübah, tüsho arü khümkhitbah tüshe nü a ashebah tüsho nü buh yamkhün adükheakbah. Shenü mükheahla, hadürü kim khülang thsungkheaknü nü kiulongthsüberü kamshihkhi she alapü kuklah.”

¹⁵ Esternü Mordekai kilim ha thalo:

¹⁶ “Yüang tüsho Susa ching Jihudarü alala bemukhungang; khümkeak thsüde I thsungkheak tamkhüntamnüang. Nimung mahsam tsüngre mahsam dütsühyung. I tüsho I yamlaberünü she ju ruk thsübah. Jushu yakzannü mümülülü she I kiulongthsüpuh miki yübah; ha dünkheak I ashepü kamkam she I ashebah.”

¹⁷ Esternü athakhi yande Mordekai yü tüsho ju alala rhimo.