DANIEL 12 - AMÜSÜH HÜM CL Bible (BSI)

Akheam Kim

¹ “Ju kim ching nü mihtsürü kümrü, yunirü ato Maikel asürübah. Trükshihbo lakhi kim ching küyimkishe mülakhi thsünü kim khülang labah. Tüshe ju kim ching nü mihtsürübo Thrünpuh hüm ching thrüta larü khümkhitbah.

² Asherü ahihdo asürülobah: khürü akheam müla rhangdung labah, tüsho khürü achih ngükhi tüsho akheam müla abahyuk labah.

³ Sherü lümlung lanü thüning nangde ayinbah tüsho sherünü thiyuro-lungki lim ahihdo bechonü lünnü chiningbo nangde ayinbah.

⁴ Tüshe Daniel, nünü akheam kim khiungde aramyubo lodoang tüsho yümdoang. Ahihdo yüla arüla de ashanbah, tüsho amütsü alü kambah.”

⁵ Judüki, I Danielnü kheah, tüsho püpürü mahne akhiuk, khülang ha ayung yean kheak tüsho püpü ju thripkhüh yean lakheah.

⁶ Khülangnü khimthünak phuyubuh mihtsürü, ayung kumung zhipbuh ki tha, “Harü khinthiyinbe müdünjiyichoki külokhüh laba?”

⁷ Ayung kumung zhipkhi, khimthünak phuyubuh mihtsürünü akhah tsülim tüsho huzulim thüning lim shuhkih. Tüsho lün labuh khülangnü, ju kam mahsam kheak thripkhüh labah de thiyuchihchimde athakhi inü so. Küyimki Thrünpuh mihtsürü thsümüchikhi kheambanü, harü alala dünjia labah.

⁸ Inü sodo tüshe manikhitkhuk; jumonü inü keokhi, “ I tungpuh, hanü tümü akhiukba?”

⁹ Apinü tha, “ Nü limro ching yüang, Daniel tümüde thiyubo ha akheam kim khiungde ramlah tüsho yümdolah.

¹⁰ Ahihkhüh tsangkhitbah, müsühkhitbah, tüsho changkhitbah, tüshe mihbukmuyuknü mutukzhakde mihbukmuyuk rhimobah. Mihbukmuyuk shenü she manikhit, tüshe lümlung larünü anikhitbah.

¹¹ Mutukzhakde athraneanbe mihtrebe lakhi kimnü rünbah nimung 1290 labah.

¹² Nimung 1335 muhochoki sherü thülünde alabanü müngühmühi.

¹³ Tüshe nü, nü limro ching yüang, tüsho sühakhimang; akheam nimungbo ching nü thsambah leangkhia lupü nü asürübah.”