2 PETER 1 - AMÜSÜH HÜM CL Bible (BSI)

¹ Jisu Khrista tankihrü tüsho amüsüh-thsangyurü Simon Peter kilimnü, Isa Thrünpuh tüsho akhümkhitrü Jisu Khrista thiyuro-lungki ching isa thülünde akin larübo kilim:

² Thrünpuh tüsho isa Atungpuh Jisu mükheahmudu ching nüsa kilim amüthsüm tüsho mungtsü alü kamshang.

Thrünpuhnü Ajikhi tüsho Mokhitkhi

³ Api müretah tüsho atsünü isa jibuh isanü mükheahkhi hode isa rhangdung thsungkheak yihnüpü lakhi tüsho kinde alapü api amüsüh wunü lüpdükhi isa kilim jih.

⁴ Harü hode apinü khide ato tüsho shoto alokhikhibo isa kilim jih, junangde isanü amüsüh yakli ching shihcham lubah tüsho amütsü künkhinü akhiukshihkhi alomi ching athsümünim chingnü isa tsokhibah.

⁵ Ha dünkheaknü nüsanü akin ching atsü yukajakpü mürangang; tüsho atsü ching mükheahmudu;

⁶ tüsho mükheahmudu ching zangrü-danyukkhi, zangrü-danyukkhi ching arümkheamkhi, arümkheamkhi ching akinkhi,

⁷ tüsho akinkhi ching keoniorü lümrhihkhi, tüsho keoniorü lümrhihkhi ching amuzho.

⁸ Tümüde nü harübo suhdahde lasho, arünü nü tümü makükhi tüsho isa Atungpuh Jisu mükheahmudu aso masokhi mülashih.

⁹ Tümüde shepü hadürü mülanü mük tuka lah tüsho chinzhinpü zhomalah, tüsho adüso neakbo chingnü api müsühkhi mihabahdo.

¹⁰ Jumonü keoniorübo, nü jikhi tüsho mokhitkhi mütsanpü alü künang, tümüde nünü ha rhimosho küyimkishe nü mülakphah.

¹¹ Junangde isa Atungpuh tüsho akhümkhitrü Jisu Khrista kiulongthsü ching yüzahpü nüsa thsungkheak suhdahde ajihbah.

¹² Jumonü nüsanü mükheahbah kheakü thiyuro ching düküngde laa lalashe inü kamruhroro harü nüsa ki lümkhitshihpü lümde lachoh.

¹³ I ha pang ching la khiungdüa, inü nüsa ki lümkhitshihkhi ju dükdü ah de inü lümchoh,

¹⁴ tümütüsho isa Atungpuh Jisu Khristanü I ki huhkhi yande I pang nahde luakhinbah de inü mükheahlah.

¹⁵ Tüsho I chamachihshu kim alala ching nüsanü alümkhitpü thsüde inü amürangbah.

Khrista Müretah Ngükhi Thiyumütsan

¹⁶ Isanü nüsa ki wu tüsho isa Atungpuh Jisu Khrista arüpü dünkheak thachoki thiyukheanbo kheak mangükih, tüshe api wüntremüretah isa müknü angükhi lah.

¹⁷ Tümütüsho wüntre-müretah kilimnü api kilim düsheak arüchoki Abuh Thrünpuh kilimnü apinü wüntre tüsho müretah leangkhi: “Ha I mulong keamkhi, inü amuzhokhi I tsührü ah.”

¹⁸ Yinmi chingnü arükhi ha düsheak inü so, tüsho isa amüsüh wung kheak api lung lakheah.

¹⁹ Tüsho isanü alü thsüde amütsankhi ju wukihrübo yu lah, tüsho yinkhibah yapsu chining nüsa mulongbo ching makhiukyi khiungde amiting ching ayin tahyukkhi nangde nüsanü ha mulong jihde anibah.

²⁰ Akhuhde nüsanü anikhitpü lakhi ju, amüsühyu müchitkhi ha shenü she nihbuh küdah thsüde athanakkhi müla,

²¹ tümütüsho müchitkhi tümü she mihtsürü lümkhi chingnü marü, tüshe Amüsüh Menü bede mihtsürübonü Thrünpuh kilimnü asuk.