Ruma 11 - Ya Baru nga Tulag

Ya asi ne̍ Apu Diyus kadiya Israe̍lita

¹ Ket kumaan na ngarudin? Binaybay-an aya ne̍ Apu Diyus diya Israe̍lita nga toley na? Bekken met! Ta orey iyaken, Israe̍lita ngac pe̍ nga isa nga kapututan nito Be̍nhamin nga nagtaud ito am-ama tida nga Abraham.

² Madi ngarud binaybay-an ne̍ Apu Diyus diya toley na nga sigud nga emmu na orey itun pekkem nga igida ya isaad na. Emmuc nga malagip nu ngarud to naisurat iya Bibliya maipanggep ito panagpilit nito mammadtu nga E̍lyas e̍ Apu Diyus. Nagriri to E̍lyas itun gapu iya kinadake̍c dito kailiyan na nga Israe̍lita,

³ nga kinunen na, “Apu, pinatey da diya amin nga nibon mu nga mammadtu, se̍ linasang da dito pagdatunan nga naariman nga maipaay ikew. Is-isa ngac ngasin nga nabuna nga mangdaydayaw ikew, ket gabay dac met pe̍ nga patayen,” kunen na.

⁴ Ngem malagip nu pe̍ to sungbat ne̍ Apu Diyus ito E̍lyas itun, nga kinunen na, “Uwed met pitu nga ribu nga toley ku nga binatic nga madi nagparintumeng nga agdaydayaw iya didiyusen nga Baal,” kunen na itun.

⁵ Ket agten met ita nga timpu, ta uwed nabuna nga toley ne̍ Apu Diyus nga pinili na gapu iya siaayat nga panangaasi na.

⁶ Ket ya panagpili ne̍ Apu Diyus, gapu was iya panangaasi na nga siaayat. Itu nga bekken nin nga gapu iya wanglen toley. Ta no gapu iya wanglen toley kuma ya panagpili ne̍ Apu Diyus, ket bekken nga napudnu ya siaayat nga panangaasi nan.

⁷ Dikad pe̍ emmu tida nga madi nasmac diya Israe̍lita to sapsapulen da, malacsid to bungguy nga pinili ne̍ Apu Diyus, ket igida ngas ya nakasmac. Ngem diya duduma, madi da nikaskasu nge̍ Apu Diyus, ta nagbalin da nga batingur.

⁸ Ta agten iya naisurat iya Bibliya nga kunen na, “Pinagmulinas ne̍ Apu Diyus ya panpanunut da, tasun orey agingga ita, arig nga madi da makasingen, se̍ arig nga madi da pe̍ makagicna, orey uwed met mata se̍ tinga da,” kunen na.

⁹ Ket agten pe̍ ito kagi nito Ari Dabid itun, nga kinunen na, “Ket ya pagragsakan da, agbalin kuma nga arig nga ilug nga mangtiliw igida. Se̍ agbalin kuma nga arig nga pakaisacdulan da, tasun mabales da.

¹⁰ Gumicbet kuma ya panpanunut da, tasun di da maawatan ya pudnu. Ket maparparigat da kuma ka agnanayun,” kunen na.

¹¹ Ket iya agten iyan, mabalin nga pagarupen nu nga diya Israe̍lita, pakapukawan da met to arig nga pakaisacdulan da, nga madi da pulus nga maisalakanin. Ngem bekken met nga agten iyan! Ta gapu ito basul diya Israe̍lita nga madi da namati, uwed pakaisalakanan pe̍ yin diya bekken nga Hudyu, tasun umapal kuma diya Israe̍lita iya kasasaad diya bekken nga Hudyu.

¹² Ket gapu ito basul diya Israe̍lita nga madi da namati, uwed pakatulungan diya duduma nga toltoley iya lubung. Ngarud, gapu ito nagkurangan da, uwed met pakatulunganin diya bekken nga Hudyu. Ket gapu ta natungpal yanin kadiya bekken nga Hudyu, di ngarud ad-adda pekkem ita ya pannakaisalakan diya Hudyu?

Ya panangaasi ne̍ Apu Diyus kadiya bekken nga Hudyu

¹³ Ket itan, uwed ibagac dakayu nga bekken nga Hudyu: Gapu ta apustul lac nga naibon dakayu nga bekken nga Hudyu, ipasnec ku ya kinaapustul ku.

¹⁴ Ipasnec ku ngarud ya panagsirbic, tasun no maemmuwan kuma diya padac nga Hudyu ya kasasaad nun, bareng no apalan da pe̍. Ket no apalan da ya kasasaad nu, bareng no uwed da nad pe̍ maisalakan igida.

¹⁵ Ta emmu tida nga gapu ta binaybay-an ne̍ Apu Diyus diya Hudyu win, uwed gundaway diya duduma nga toltoley iya lubung nga maitunus e̍ Apu Diyusin. Dikad pe̍ no mamati kuma diya Hudyu ita, nabarbaru ngarud pekkem ya pagbanagan niya pannakaannamung da ita, gapu ta itu met ya gundaway da nga agbiyag manin orey natey dan.

¹⁶ Kaspagarigan no uwed kuma e̍teng nga maidatun e̍ Apu Diyus nga gayat iya nagamey nga are̍na nga para tinapay. No annamungan ne̍ Apu Diyus ya e̍teng nga maidatun, di ngarud met mairaman ya amin nito nagamey nga are̍na? Agten iyan ngarud diya Hudyu. Ket maiyarig da pe̍ kadiya gamut niya isa nga kayu. Ta no kuwa ne̍ Apu Diyus diya gamut, ket kuwa na met pe̍ diya amin nga sanga na.

¹⁷ Ket diya Hudyu, maiyarig da iya isa nga naimula nga kayu ulibu nga naseple̍ng diya duduma nga sanga na. Ket dakayu nga bekken nga Hudyu, arig kayu met nga sanga niya isa nga atap nga kayu ulibu. Ket arig nga naisilpu kayu iya nakaseple̍ngan nito sanga nito naimula nga ulibu, tasun mairaman kayu pe̍ iya totec dito gamgamut na, nga itu ya mangpabileg iyan nga kayu.

¹⁸ Ngem masapul nga madi kayu agpasindayaw nga manguyaw kadito Hudyu nga maiyarig kadiya naseple̍ng nga sanga. Ta dakayu nga bekken nga Hudyu, laglagipen nu kuma nga arig kayu ngas iya sanga nga bibiyagen diya gamut. Ket diya gamut met ya mangbiyag dakayu, bekken nga dakayu ya mangbiyag kadiya gamut.

¹⁹ Ngem mabalin nga kunen nu, “Bo a, ngem naituwey da mettin nga arig nga naseple̍ng nga sangsanga, tasun uwed gundaway mi nga maisilpu nga maisukat igida,” kunen nu ngata.

²⁰ Ket tutu met nga naituwey dan, ngem ya gapu na, ket gapu ta di da met namati. Ket no dakayu, uwed ya nabaru nga kasasaad nun gapu mettas iya panamati nu. Itu nga madi kayu kuma ngarud agpasindayaw, no di kayu lugud kuma agannad.

²¹ Ta e̍ Apu Diyus, madi na met kinekke̍ngan dito Hudyu ito di da mamati igina, orey no igida to maiyarig kadiya sigud nga sanga niya kayu nga ulibu. Dikad pe̍ no dakayu, nalaclaka ngarud ya panangituwey na dakayu, ta bekken kayu nga sigud nga kuwa na.

²² Ket iya agten iyan, maemmuwan tida met ya panangaasi ne̍ Apu Diyus se̍ ya panagunget na pe̍. Ta nipalak-am na ya unget na kadiya Hudyu nga madi mamati nga arig nga naiduclapin. Ngem no dakayu nga bekken nga Hudyu, kinaasiyan nakayu nga gennungin. Kaasiyan nakayu ngarud, no ituluy nu ya panangipateg nu iya panangaasi na. Ngem no madi kayun, ket ituwey nakayu met pe̍ iya kasasaad nu, nga maiyarig iya sanga nito kayu nga ulibu.

²³ Ket orey diya Hudyu nga naituwey itan, maisoli da manin iya sigud nga kasasaad da, no mamati da. Ta mabalin ngarud ne̍ Apu Diyus nga pasoliyen da iya sigud nga kasasaad da, nga arig nga isilpu na da manin ito sigud nga kayu ulibu.

²⁴ Tutu met ya agten iyan, ta dakayu nga bekken nga Hudyu, maiyarig kayu ngas iya naputed nga sanga niya isa nga atap nga kayu ulibu. Ket arig nga naisilpu kayun iya sigud nga kayu ulibu nga naimula, orey bekken nga itu ya sigud nga kasasaad nu. Ket no mabalin nga maisilpu ya sabali nga sanga ito sigud nga kayu ulibu nga naimula, siguradu nga nalaclaka pekkem ya panangipasoli ne̍ Apu Diyus kadiya Hudyu. Ta maiyarig da kadiya sanga niya kayu nga maisilpu iya sigud nga nakaseple̍ngan da.

Ya kaasi ne̍ Apu Diyus ket maipaay ka amin nga toley

²⁵ Kakabsat, uwed met isa nga adal nga di pekkem naipakaemmu dakayu, ket gabay ku no maemmuwan nu kuma, tasun madi kayu tumangsit gapu iya kinasirib nu. Ket idi ya ipakaemmuc dakayu: Uwed da met duduma nga Israe̍lita nga nagbalin nga batingur e̍ Apu Diyusin. Ngem agpatingga nad ya kinabatingur da no kustu win ya bilang diya bekken nga Hudyu nga naitipunin e̍ Apu Diyus.

²⁶ Ket iya agten iyan, uwed nad ngarud pakaisalakanan diya amin nga Israe̍lita. Ta agten met iya naisurat iya Bibliya nga kinunen na, “Ya mangisalakan igida, ket gayat nad enna ili nga Siyun. Ket pasardengngen na nad ya panagwangel ka dake̍c diya kapututan nito Hakub.

²⁷ Ket yan nad ya panangipac ku kadiya basbasul dan, sigun ito nikaric igida itun,” kunen na.

²⁸ Ket no gapu iya Makaparagsac nga Damag maipanggep e̍ Je̍su Kristu, ket nagbalin nga kakuntra ne̍ Apu Diyus diya Hudyu, ta di da met patiyen ya Makaparagsac nga Damag. Ket para dakayu nga bekken nga Hudyu, ket paglaingan nu met ya panangkuntra ne̍ Apu Diyus kadiya Hudyu. Ngem no maipanggep iya panangpili ne̍ Apu Diyus kadiya Hudyu, napateg da pekkem igina gapu ito nikari na kadito am-ama da itun.

²⁹ Ta pulus nga madi met babawiyen ne̍ Apu Diyus ya arimanen na nga panangaasi na winno panangpili na.

³⁰ Ta agten pe̍ dakayu nga bekken nga Hudyu, ket nagsukir kayu met itun e̍ Apu Diyus. Ngem ita, kinaasiyan nakayu nge̍ Apu Diyusin, gapu ta diya Hudyu win ya nagsukir iginan.

³¹ Ket iya agdama, agsukir ngarudin diya Hudyu. Ngem ya panangaasi ne̍ Apu Diyus itan dakayu nga bekken nga Hudyu, itu pe̍ yin ya gundaway diya Hudyu nga mae̍cdan ka kaasi.

³² Ta nikeddeng ne̍ Apu Diyus nga ipalubus na nga maturayan diya amin nga toley iya kinasukir da, orey diya Hudyu se̍ diya bekken nga Hudyu, tasun maipaay na ya kaasi na igida nga amin.

Ya kinadayaw ne̍ Apu Diyus

³³ Ay, napalaus met nga unay ya panagkaasi ne̍ Apu Diyus! Se̍ nauneg nga unay ya sirib na se̍ diya emmu na! Awan ngarud makailawlawag kadiya pangngeddeng ne̍ Apu Diyus, se̍ awan makaawat kadiya pangpanggep na.

³⁴ Agten iyan pe̍ ya naisurat iya Bibliya nga kunen na, “Nagan na aya ya makabalin nga mangemmu iya panpanunut niya Apu? Awan met! Se̍ awan pe̍ makabalin nga mamagbaga igina.

³⁵ Ket awan met pe̍ makaisagut e̍ Apu Diyus tasun masapul nga supapakan na kuma,” kunen na.

³⁶ Awan ngarud makaisagut e̍ Apu Diyus, ta igina met ya namarsuwa kadiya amin. Igina met pe̍ ya mangituray kadiya amin nga naparsuwa, ket agpaay da pe̍ nga amin igina. Madaydayaw kuma nge̍ Apu Diyus ka agnanayun! Agten iyan kuma.