Juan 1 - Ya Baru nga Tulag

Maipanggep iya Kagi ne̍ Apu Diyus nga nagpaitoley

¹ Sacbay nito rugi niya amin, uwed sigud nga kabulun ne̍ Apu Diyus nga maawagan ka Kagi. Ket Diyus mettas pe̍ yani.

² Ngarud, sigud da nga agbulubulun, orey ito sacbay nga mairugi ya amin.

³ Ket amin nga pinarsuwa ne̍ Apu Diyus, nipaparsuwa na igina. Ngarud, awan met naparsuwa no di gapu was igina.

⁴ Idi nga maawagan ka Kagi, igina ya pagtaudan niya biyag. Ket idi nga biyag, itu ya arig nga mangwada iya lemlemmet diya toley.

⁵ Ket ya wada, agdarang iya gicbet, ket madi mabalinan niya gicbet nga pagicbetten.

⁶ Ket itun, uwed isa nga toley nga nibon ne̍ Apu Diyus nga agnagan ka Juan.

⁷ Naibon yani nga mangipakaemmu kadiya toltoley maipanggep iyan nga maawagan ka wada, tasun gapu iya panangipakaemmu nito Juan, mamati kuma diya amin nga makagicna igina.

⁸ Bekken nga e̍ Juan to maawagan ka wada, no di lugud igina ya naibon nga mangipakaemmu iya maipanggep iya maawagan ka wada.

⁹ Ket ya pudnu nga maawagan ka wada, igina ya umbe̍t iya lubung ngi nga mangwada iya orey nagan na nga toley.

¹⁰ Ngarud, ya mangwada, uwed idi nga lubung itun. Ket amin nga uwed iya lubung, naparsuwa gapu igina. Ngem orey pe̍ no agten iyan, diya toltoley iya lubung, madi da met naawatan ya maipanggep igina itun.

¹¹ Ket ito inumbe̍t iya mismu nga ili na, madi met inawat diya kailiyan na.

¹² Ngem diya amin nga imawat igina, nga itu diya sipapati iya kinaturay na, ne̍cdan na da ka kalinteggan nga agbalin nga anac ne̍ Apu Diyus.

¹³ Ket dito nagbalin nga anac ne̍ Apu Diyus, bekken nga gapu iya kadawyan nga pannakaiyanac da ka toley, winno gapu iya tarigagay niya kinatoley winno ya tarigagay niya kinalalaki, no di lugud gapu was iya pannakabalin ne̍ Apu Diyus.

¹⁴ Ngarud, to maawagan ka Kagi, ket nagbalin nga toley itun, ket nakipagedyan dactida idi nga lubung. Ket dakami, nasingen mi ya kinadayaw na nga tumaud e̍ Apu Diyus nga Ama na. Igina ngarud ya nadayaw nga kackaisu nga Anac ne̍ Apu Diyus, ket yan nas siaayat nga asi, se̍ kinapudnu ya uwed igina.

¹⁵ Nipakaemmu nito Juan ya pudnu maipanggep igina, ito kinunen na ka nabileg, “Itu yani to kagkagiyec ito kinunec nga, ‘Yan nga sumarsarunu iyaken, ket nadaydayaw ngem iyaken. Ta orey ito madic pekkem naiyanac, uwed met nga sigudin,’ kunec met,” kunen na.

¹⁶ Ket idi nga maawagan ka Kagi, agtatalunatun ya nikaasi na dactida nga amin, gapu iya nabuslun nga siaayat nga asi na nga awan pagkurangan na.

¹⁷ Ta agten idi: To Linteg tida nga Hudyu, nipaibilin ne̍ Apu Diyus itun ito Muyse̍s. Ngem ya siaayat nga panangaasi se̍ kinapudnu nga gennung nga nipakaemmu ne̍ Apu Diyusin, ket e̍ Je̍su Kristu met ya nakaigapu kadiyan.

¹⁸ Awan ngarud toley nga nakasingen e̍ Apu Diyus. Ngem ya kackaisu nga Anac na, igina mettas ya mangipakaemmu maipanggep igina, ta igina met ya makiab-abay iya Ama.

Maipanggep ito gagara nito Juan nga Mammautisar

¹⁹ Ket agten idi ya panangipakaemmu nito Juan maipanggep e̍ Je̍sus itun: Iya name̍nsan, uwed da agsirsirbi iya Te̍mplu se̍ katulungan iya Te̍mplu nga kapututan nito Le̍bi, nga nawe̍ da ito edyan nito Juan, nga gayat da ka He̍rusale̍m. Nibon diya pangpangulu diya Hudyu didi nga agsirsirbi se̍ katulungan, nga mawe̍ da kanu agsaludsud ito Juan no igina ya Kristu.

²⁰ Ket to Juan, madi naglibac ito sinaludsud da, no di lugud nipalawag na nga nalaing igida nga kinunen na, “Bekken nga iyaken ya Kristu,” kunen na.

²¹ Ket dito naibon, sinaludsud da manin nga kinunen da, “No agten iyan, nagan mu ngarud? To mammadtu nga E̍lyas ka kadi?” kunen da. Ket nisungbat nito Juan, “Bekken met,” kunen na. Ket kinunen da manin, “Ikew kadi ya naikari nga Mammadtu nga padpadaanan mi?” kunen da. Ket kinunen nito Juan manin, “Bekken met,” kunen na.

²² Ket nagsaludsud da manin nga kinunen da ito Juan, “Ibagam kay no nagan mu, ta masapul nga uwed isungbat mi kadito nangibon dakami. Nagan ya makunem maipanggep iya kinatoley mu?” kunen da.

²³ Ket to Juan, nisungbat na to nipadtu nito mammadtu nga Isayas itun nga kinunen na, “Iyaken ya mangip-ipkaw nga mangibagbaga enna away, nga kunec ya agten idi: ‘Palinteggen nu ya dalan para iya Apu!’” kunen na.

²⁴ Ket dito nagsaludsud ito Juan, naibon da met nga gayat kadiya Parisiyu.

²⁵ Ket nagsaludsud da manin ito Juan nga kinunen da, “No bekken nga ikew ya Kristu, winno to E̍lyas, winno ya naikari nga Mammadtu, ape̍ ngarud nga mamautisar ka?” kunen da.

²⁶ Ket simungbat to Juan nga kinunen na, “No iyaken, danum ya pamautisar ku. Ngem uwed makibulubulun dakayun nga isa nga madi kayu met malasin.

²⁷ Ket igina, orey sumarsarunu nad iyaken, madi yac pe̍ maikari nga orey no mangukas ngas iya listun niya palloka na,” kunen na.

²⁸ Ket amin diyan nga napasamac, napasamac da enna ili nga Be̍tanya, iya demmang niya wangag Hordan nga pamacbautisaran nito Juan.

To pannakaiyem-emmu ne̍ Je̍sus kadiya toltoley

²⁹ Iya kadamlag niyan, nasingen nito Juan nge̍ Je̍sus nga umbe̍t iya edyan na. Ket to Juan, kinunen na, “Singen nu yan! Igina yanin ya maawagan ka Urbun Karne̍ru ne̍ Apu Diyus nga mangipac kadiya basbasul diya uwed idi nga lubung!

³⁰ Itu yani to kagkagiyec ito kinunec nga uwed sumarsarunu iyaken nga isa nga toley nga nadaydayaw ngem iyaken. Ta orey ito madic pekkem naiyanac, uwed met nga sigudin, kunec itun.

³¹ Ket orey iyaken, madic emmu itun no nagan na yani nga nibon ne̍ Apu Diyus. Ngem itu ya gagarac nga mamautisar ka danum, tasun maipakaemmu kuma yani dakayu nga padac nga Israe̍lita,” kunen na.

³² Ket agten idi pe̍ to panangipakaemmu nito Juan maipanggep e̍ Je̍sus: “Nasingec ya Ispiritu ne̍ Apu Diyus nga simegged nga agten iya kalapati nga gayat ka langit, nga nakitipun igina.

³³ Madi yac pe̍ emmu itun no nagan na yani nga nibon ne̍ Apu Diyus. Ngem e̍ Apu Diyus nga nangibon pe̍ iyaken nga mamautisar ka danum, ket kinunen na met iyaken itun nga, ‘Masingem nad ya Ispirituc nga sumegged nga makitipun iya isa nga toley. Ket itu yanin ya mamautisar ka Ispiritu Santu,’ kunen na iyaken.

³⁴ Ket tutu met, ata nasingec ngarud yanin, ket itu nga panecnekkac dakayu nga igina met ya Anac ne̍ Apu Diyus,” kunen na.

Dito nona nga adalan ne̍ Je̍sus

³⁵ Ket ito sumunu nga algew, uwed to Juan se̍ duwa nga adalan na antuni.

³⁶ Ket e̍ Je̍sus, tumalib manin iyan. Ket ito nasingen nito Juan, kinunen na, “Singen nu! Igina mettin ya maawagan ka Urbun Karne̍ru ne̍ Apu Diyus,” kunen na.

³⁷ Ket dito duwa nga adalan nito Juan, ito nagicna da to kinagi na, nawe̍ da simurut e̍ Je̍susin.

³⁸ Ket e̍ Je̍sus, limaw-ing ket nasingen na da nga mip-ipuyut igina. Itu nga kinunen na igida, “Nagan ya sapsapulen nu?” kunen na. Ket kinunen dito duwa, “Awac kadi ya paged-edyanam, Rabbi?” kunen da. (Ket ya kagi nga Rabbi, “Mistru” ya kayat na nga kagiyen.)

³⁹ Ket kinunen ne̍ Je̍sus igida, “Umbe̍t nu was singen, a,” kunen na met. Dikad pe̍ nibulun da ngarud e̍ Je̍susin, ket nasingen da ya paged-edyanan na. Dandani alas kuwatru iya gidam itun, ket nakipagedyan da e̍ Je̍sus iyan nga algew.

⁴⁰ Ket ya isa kadito duwa nga nakagicna ito nibaga nito Juan, nga igina pe̍ to nipuyut e̍ Je̍sus itun, ket itu nge̍ Andre̍s nga kabsat ne̍ Simon Pe̍dru.

⁴¹ Ket e̍ Andre̍s, sigida nga nawe̍ na sinapul nge̍ Simon nga kabsat na, ket nibaga na e̍ Simon, “Nasmac mi ngarudin ya Me̍siyas!” kunen na. (Kagi diya Hudyu ya “Me̍siyas”, nga kayat na nga kagiyen, “Kristu.”)

⁴² Ket iya agten iyan, nipen nito Andre̍s nge̍ Simon enna edyan ne̍ Je̍sus. Ket binubuteg ne̍ Je̍sus, nga kinunen na, “Ikew nge̍ Simon nga anac ne̍ Juan. Ngem manipud ita, managan ka ngarud ka Se̍pas.” (Kayat na nga kagiyen, “batu”, winno “Pe̍dru” ka kagi Griye̍gu.)

To panangpasurut ne̍ Je̍sus kade̍ Pe̍lipe̍ nge̍ Natanye̍l

^43-44 Ito kadamlag na, nalagip ne̍ Je̍sus ya mawe̍ ka prubinsiya nga Galilya. Ket naaskuran na nge̍ Pe̍lipe̍ nga iBe̍tsayda nga kailiyan de̍ Andre̍s nge̍ Pe̍dru. Ket kinunen ne̍ Je̍sus e̍ Pe̍lipe̍, “Suruten nac,” kunen na.

⁴⁵ Ket e̍ Pe̍lipe̍, nawe̍ na met sinapul nge̍ Natanye̍l, ket kinunen na igina, “Nasmac mi mettin to toley nga nisurat nito Muyse̍s iya libru na nga Linteg tida, se̍ to nisurat dito mammadtu pe̍. Itu met nge̍ Je̍sus nga iNasare̍t nga anac ne̍ Huse̍,” kunen na.

⁴⁶ Ngem kinunen ne̍ Natanye̍l, “Ahah! Uwed aya nabaru nga mabalin nga tumaud enna Nasare̍t?” kunen na. Ket kinunen ne̍ Pe̍lipe̍, “Umbe̍t mu was singen, a,” kunen na.

⁴⁷ Ket ito nasingen ne̍ Je̍sus nge̍ Natanye̍l nga sumungsungad iya edyan na, kinunen na maipanggep igina, “Singen nu yan. Isa met nga pudnu nga Israe̍lita, ta awan kinabusid igina,” kunen ne̍ Je̍sus.

⁴⁸ Ket to Natanye̍l, nagsaludsud e̍ Je̍sus nga kinunen na, “Kumaan ngarud ya pannakaem-emmum iyaken?” kunen na. Ket e̍ Je̍sus, kinunen na, “Ito uwed ka pekkem iya sidung nito kayu nga igus, sacbay nga inawis naka nge̍ Pe̍lipe̍, nasingen nakan,” kunen na.

⁴⁹ Ket to Natanye̍l, kinunen nan, “Mistru, Anac naka ngarud nge̍ Apu Diyus! Ikew ya Ari mi nga Israe̍lita!” kunen na.

⁵⁰ Ket kinunen ne̍ Je̍sus igina, “Mamati ka ngarud iyaken ita, gapu ta kinunec nga nasingen naka iya sidung nito kayu nga igus. Ngem uwed pekkem diya masingem nad nga nakaskasdaaw nga banbanag ngem iyan!” kunen na.

⁵¹ Ket kinunen manin ne̍ Je̍sus igida nga aminin, “Tutu met yani nga ibagac dakayu: Masingen nu nad nga aglukat ya langit. Ket diya anghe̍le̍s ne̍ Apu Diyus, masingen nu da nga ngumudu ka langit se̍ sumoli manin iya Anac nga Naipatoley,” kunen na.