Málkúsi 2 - Eka Eswhī

Yɛɛ́so a á ega mbɛ́tɛ ŋkeluʼ

¹ A ge etɔ́k eleʼé shɔ́ʼɔ́ lɛ́, Yɛɛ́so á zéŋ mbīŋ nzem mé Kafaanawum. Mɛ́ júʼ páʼ a á shʉʼ tɛ ŋgɔ́ á mba.

² Epuɔ tɛ nzá é pú ntó eshʉ̄ʼ ńcúʼte, tɛ ajʉʼ zīi, mɛ́ gɔ etshí akhu éwú, á pú te zɛ́t éwú ú, tɛ mbɔɔ á nchu ŋgyā. Yɛɛ́so á nɔŋ eshúŋɔ anu Ndém á mbū pɔ́p.

³ Amɔ̄ʼ akhu epuɔ, á gē eshʉʼe, epuɔ lekua á nnɔ pɔ́p, é léŋne mmɔʼ ŋkeluʼ, ńdɔkɔ eshʉ̄ʼɛ á njʉ́ɔ Yɛɛ́so.

⁴ Pɔ́ té pú ŋkūʼ á lelɔk ŋkeluʼ mɛ́t, ŋ́gʉɔ tɛ ŋkó á lezēŋ Yɛɛ́so ó, melaʼ alāʼ zīi, á lɛ éwú. Tɛ ndɔ̄k mesitɔ́ɔp, ŋ́kɔ́ʼ á athū ŋgyā, ńdēŋte ajʉʼ zīi, Yɛɛ́so a tshií éwú á ŋgyā. Ńté lephʉ̄ á athū ŋgyā, ésóʼne ŋkeluʼ mɛ́t ánɛ akō, ńtshí á mvhɔ yí.

⁵ Á jʉ́ɔ ntií zīi, epuɔ puɔ mɛ́t é lɔk efɛ́ nnɛ̄t ŋgyá á mbū yí épúp, ńdé á mbū ŋkeluʼ mɛ́t ŋ́gɛ: «Esoó ga, mefa mú é gɔ́ ndekne lekne. »

⁶ Emɔ̄ʼ wɔ kɛ́ʼte‑mbé Ndém pīi, é lɛ á nnɔ éwú, é jʉ́ɔ épúp, ésáŋ á ntɔ̄ŋ pɔ́p ŋ́gɛ:

⁷ «Ŋiŋ wuɔ, a á gaá eshúŋne páʼa ā? A á si nzɔ̄tɛ á Ndém. Awɔ́ a gɔ elēkne mefa epuɔ, té gɔ́ áa ndaʼ Ndém m̄?»

⁸ Yɛɛ́so á lɛ nzhɛ́ á ntē yí, ajū mīi pɔ́ é ntɔ̄ŋ pɔ́p esáŋa, ńdé á mbū pɔ́p ŋ́gɛ: «Pɛ é gaá esáŋ ejʉɔ ntií anu á ntɔ̄ŋ pɛ ɛ̄?

⁹ Meŋ á lé mé ŋkeluʼ jʉɔ ŋ́gɛ, mefa mí é gɔ́ ndekne lekne, á tsya wɛ́ páʼa, ńzhɛ́ ŋ́gɛ, meŋ gɔ le kūʼ á gá á letswi á mbū yí ŋ́gɛ, a elū á esī ntswíʼ akō zí ndɔk nzīŋ ɛ́ lɛ̄?

¹⁰ Táʼ, meŋ á kɔŋ ŋ́gɛ, pɛ ezhɛ́ á légɛ, Méŋ‑Ŋiŋnɔŋ wuɔ a pɔŋteé á yí á lelekne mefa ŋiŋ, á ndo esī atsetsáʼ. Ńdɛ ntswī á mbū ŋkeluʼ ŋ́gɛ:

¹¹ «Meŋ ndʉ́ɛ́ mé wu. Lu á esī, ńtswíʼ á akō jú, éswáŋ nnɛ̄t mé mba ju. »

¹² Á lɛ ndū á esī ntshí ajʉʼ afʉʼ mɛ́t afʉʼ mɛ́t, á mvhɔ epuɔ, ńtswíʼ akō zí ndɔk ntó ŋ́gʉ̄ɔ. Menēk epuɔ é pú ntó á athū, pɔ́ wuʼte á Ndém, ńdé ŋ́gɛ: «Pek laá nzi ŋgɔ́ aleʼé njʉ́ɔ anu páʼ ajʉɔ ɔ́. »

Yɛɛ́so a á ega ndɔ̄kɔ Levi ŋghʉ̄ɛ á ŋiŋ nnɔ yi

¹³ Yɛɛ́so á shʉʼ nzéŋ ḿbīŋ nzem mé akʉŋɛ́ mía ntshi á Ŋgaliléa. Epuɔ tɛ nzáne é shʉʼɛ njʉ́ɔɔ á yí, á nɔŋ nzíʼnɛ á wɔ́p.

¹⁴ Ŋ́ghʉ nnɔ̄ŋ ntsīa á mɛnzhɛ, ńjʉ́ɔ mmɔʼ ŋiŋ, lezēŋ tsí é gɔ́ lɛ Levi, ŋ́gɔ́ á méŋ Alfe. Á náŋ á ajʉʼ afaʼ yí, ájʉʼ zīi, mɛ́ maʼa ncup alāʼ éwú. Yɛɛ́so á lé á mbū yí ŋ́gɛ: «Shʉʼɛ̄, ŋ́gɔ́ á nzem meŋ. » Levi á lɛ ndū á esī, ńtsé á nzem yí.

¹⁵ Yɛɛ́so pɔ́ nnɔ yí é kó nnáŋ á ŋgyā Levi, ńnɔŋ mpfɛ́tɛ azō, mbɔɔ emɔ̄ʼ wɔ tswí‑ncup Lóma tɛ nzáne pɔ́ a emɔ̄ʼ epuɔ pīi, mɛ́ gɛ ntónɛ á wɔ́p ŋ́gɛ epuɔ tepɔŋ. Ntií epuɔ jʉɔ mɛ́t ntsem, e le nɔ̄ŋ nzhɛnɛ á Yɛɛ́so.

¹⁶ Emɔ̄ʼ wɔ kɛ́ʼte‑mbé Ndém ánɛ nnɔ epuɔ Falísia, é jʉ́ɔ páʼ Yɛɛ́so pɔ́ a wɔ tswí‑ncup mbɔɔ epuɔ tepɔŋ pwɔ̄, é si mbútɛ etsō mpfɛ́tɛ. Ńzɛ́tte á mbū nnɔ Yɛɛ́so ŋ́gɛ: «Melaʼ akɔ̄ Yɛɛ́so pɔ́ a wɔ tswí‑ncup mbɔɔ epuɔ tepɔŋ, é ega mbútɛ etsō mpfɛ́tɛ ɛ́?»

¹⁷ Yɛɛ́so á júʼ épúp, ńdé á mbū pɔ́p ŋ́gɛ: «Ŋiŋ a gɔ le gɔ́ ntenté, ńtsɔ́ʼ akhu mbɛt‑megɔ ɔ́, megaŋ agɔ mé tsɔɔ́ʼ akhu zí. Meŋ kɛɛ́ te eshʉ̄ʼɛ á ŋgɔŋ, á efaāʼ epuɔ pīi, pɔ́ méŋwɛ̄t é si ndʉ́ɛ́ ŋ́gɛ, pɔ́ gɛ te efāa ā. Meŋ kɛɛ́ eshʉʼɛ, á efaāʼ megaŋ mefa. »

Mɛ́ é ega nzɛ́ttɛ á Yɛɛ́so anu ánɛ lekɔŋ nnáŋ nzi

¹⁸ Á lɛ afʉʼ mɛ́t, nnɔ Jáaŋ nnoʼ‑epuɔ á ntshi pɔ́ emɔ̄ʼ epuɔ Falísia, é nɔŋ ŋkɔ̄ŋɔ nnáŋa nzi. Emɔ̄ʼ epuɔ, é shʉʼ nzɛ́tte á Yɛɛ́so ŋ́gɛ: «Melaʼ akɔ̄ nnɔ Jáaŋ, pɔ́ nnɔ epuɔ Falísia é si ŋkɔ̄ŋɔ nnáŋa nzi melaʼ Ndém, éwú nnɔ é piŋ nnɔ̄ŋ te ŋghʉ̄ɛ épúp ɔ́ ɔ̄?»

¹⁹ Á pwɛt á mbū pɔ́p ŋ́gɛ: «Pɛ é kwaŋ ŋ́gɛ, ŋiŋ a gɔ etɔ́ŋ lekāk alaá‑ŋgyā tsí, ŋ́kó nzɛ́t á nnɔ mege nnáŋ, pɔ́ kɔŋ náŋ nzi i? Ŋgáŋ, tɛnzwí ŋge pɔ́ a mege é náŋa lɛ akɔ̄ lɛ́, mege é le kɔ̄ŋ nnáŋ nzi í.

²⁰ Afʉʼ á shʉʼ ekuʼe, mɛ́ eshʉʼ efók á tɛnzwí ŋge, ńdɔk ŋgʉ̄ɔ, ajɔ̄ afʉʼ, mesoó pí e ecʉ́ʼ ndúŋ, ŋ́kɔŋ nnáŋ nzi.

²¹ «Ŋiŋ a gɔ le lɔ̄k ajūɔ nzhó eswhī, ḿvhō á nzwiŋ nzhó ɔ́. A ghʉɛ épúp, mbɔ ajūɔ nzhó eswhī á taŋ, ésia á nzwiŋ nzhó, lephʉ̄ e epiŋ mbú ntswiʼne efáŋ.

²² Á zeéŋ ŋgɔ́ lɛ, ŋiŋ a gɔ le néŋ meluʼ meswhī á ntē nzwiŋ ntūʼ zīi mɛ́ le lɔ̄k ŋgup ncūŋte ɛ́. A ghʉɛ épúp, mbɔ meluʼ meswhī é fuʼe, éghʉ nzwiŋ ntūʼ e evɛ́t. Mɛ́ epí meluʼ, ḿbí ntūʼ. Á pɔŋ ŋ́gɛ mɛ́ enéŋ meluʼ meswhī, áa ntē ntūʼ eswhī. »

Mɛ́ é ega nzɛ́ttɛ Yɛɛ́so anu ánɛ aleʼé aswite

²³ Amɔ̄ʼ aleʼé á le kūʼe, Yɛɛ́so pɔ́ a nnɔ yí, é nɔŋ ntɔ́kɔ á ntē ŋkāʼ mmɔʼ ntií ŋgesáŋ. Á gɔ́ aleʼé aswite, nnɔ yí é gē etsia, ńziŋɛ mbwɔ́ʼtɛ mmɔʼ mpfɛ́tɛ.

²⁴ Emɔ̄ʼ epuɔ Falísia é jʉ́ɔ, ńdé á mbū Yɛɛ́so ŋ́gɛ: «Jʉ́ɔ ajū mīi megaŋ nnɔ pú é egā ŋghʉ̄ɛ aleʼé aswite, lepé tsímpɛ é piŋ nnɔ̄ŋ te mvéŋɛ épúp ɔ́. »

²⁵ Á zɛ́tte á wɔ́p ŋ́gɛ: «Pɛ laá mbú ntɔ́ŋ á ntē aŋwaʼne Ndém, tɛ njúʼ anu zīi, Efɔ Ndavít a le ghʉ̄ʉ̄, á afʉʼ zīi, a le nɔ̄ŋ mbúŋɔ etsō lejhʉ̄, nzi é záŋ á wɔ́p a epuɔ pí í lɛ̄?

²⁶ Á lɛ afʉʼ zīi, Abiata a lɛ tɛŋgyā wɔ nɔŋ‑epɔʼ, Ndavít á kó á ntē ntap mbotɛ́ Ndém, ḿbɛ́ ecū mīi mɛ́ nnɔ̄ŋ éwú á mbū Ndém, ḿpfɛ́t, ńzéŋ ŋgyá etsi epuɔ pí, tɛ́ mbɔ mɛ́ le pé ŋ́gɛ, ndɛ́ʼ ŋiŋ á láʼ mpfɛ́t ntií etsō mɛ́t, tɛ ndaʼ wɔ nɔŋ‑epɔʼ. »

²⁷ Yɛɛ́so á zéŋ ndé á mbū pɔ́p ŋ́gɛ: «Ndém a le ghʉ̄ aleʼé aswite, ŋ́gyá mé ŋiŋnɔŋ. A lɛ te yá á ŋiŋnɔŋ á mbū aleʼé aswite ɛ́.

²⁸ Púp tɛ́ Méŋ‑Ŋiŋnɔŋ wuɔ mé pɔŋteé á leshūŋ ajū mīi, mɛ́ gɔ eghʉ̄ʉ, tɛ mbɔɔ ánɛ aleʼé aswite. »