Lúkási 1 - Eka Eswhī

Lezi

^1-2 Ndi Teofil, o ó si nzhɛ́ɛ menu mīi, é ke tɔ́k á tsetsɛlɛ pímpɛ. Epuɔ tɛ nzáne é ke fāʼ eshhʉ̄ á letī azɔ́p. Pɔ́ ke tí á mbɔŋɔ́ páʼ wɔ njhʉɛ‑njʉɔ́ e ke pɛté eshúŋ á yímpɛ épúp. Ŋ́gɔ́ epuɔ pīi, é ke jʉ́ɔ menu mɛ́t, tɛ efhó á nzií, ḿbiŋ mbú ncʉ́ʼ azɔ́p wɔ shúŋ‑anu Ndém mɛ́t.

³ Meŋ méŋwɛ̄t azá, meŋ nde chʉ́ nnɛ̄t mmɛ̄te menu muɔ mɛ́t, tɛ efhó páʼ é le zī épúp. Meŋ á piŋ njʉ́ɔ ŋ́gɛ, meŋ a cúʼte menu muɔ mɛ́t, étáŋte etí á mbū wu me Ndi.

⁴ Meŋ tíi páʼa, tɛ́ o elɔk nzhɛ́ á légɛ, menu mīi mɛ́ le ziʼné á wú lā, é si ŋgɔ́ anuúnē.

Cɔʼ Ndém a á ega mbhʉ́ɛ á lezhī Jáaŋ Mbaptísi

⁵ Á lɛ afʉʼ zīi, Elōde a lɛ efɔ á ntē ŋgɔŋ epuɔ Yúda, mmɔʼ nnɔŋ‑epɔʼ á gɔ́ éwú, lezēŋ tsí é gɔ́ lɛ, Sakalía, ŋ́gɔ́ ánɛ nnɔ wɔ nɔŋ‑epɔʼ Abia. Nzwí yi á gɔ́ lɛ, Elizabɛt, ńtó ánɛ nzwɛt Aalɔŋ nnɔŋ‑epɔʼ éyi ndʉɛ.

⁶ Pɔ́ ndō yi metsem, é nɔŋ njúʼɔ nchu Ndém, ŋ́kúʼtɛ lepé tsí, ńzéŋ ŋgɔ́ té alɔ́ʼ á mvhɔ yí.

⁷ Táʼ, pɔ́ le pīŋ te á mɔ́ wɛ, melaʼ mīi Elizabɛt a lɛ á ŋkīŋ. Pɔ́ mémpīa é piŋ nzéŋ ŋ́gɔ́ mbɔ, pɔ́ lé zwiŋ tɛʼ.

⁸ Á shʉʼ amɔ̄ʼ aleʼé, Sakalía á nɔŋ nnɔ̄ŋɔ epɔʼ á ntē Mía Ŋgyā Ndém, melaʼ mīi, nnɔ wɔ́p mé le nɔ̄ŋ ŋghʉ̄ɛ afaʼ, afʉʼ alāʼ mɛ́t.

⁹ Á fhó ánɛ mɛt, páʼ wɔ nɔŋ‑epɔʼ é gɛ ŋghʉ̄ɛ épúp, pɔ́ maʼ azō, ńdɔk efāʼ á nnɔ pɔ́p, ńjʉ́ɔ á ŋiŋ yīi Ndém a á tsɔ́ʼ á yí ŋ́gɛ, a ekó á ŋgyā mɛ́t, á tɛ á ntē éwú, ńtɔ̄ aŋsaŋ. Mɛ́ faʼ épúp, á whʉ ánɛ Sakalía.

¹⁰ Afʉʼ á kuʼ, Sakalía á ge ekó á ŋgyā etɔ aŋsaŋ, alāʼ á zɛ́t apɛ́ eswíŋtɛ á Ndém, páʼ mɛ́ gɛ nzī ŋghʉ̄ɛ épúp.

¹¹ Á kó á ŋgyā épúp, taʼ cɔʼ Ndém á ŋwak, ńtshí á ajʉʼ letɔ‑aŋsaŋ, mé ŋkɔʼɔ́ apū ete.

¹² Sakalía á jʉ́ɔ á yí, além zí á tsɔ́ʼɔ, ecɔʼ é pú ŋgɔ́ á yí.

¹³ Tɛ́ cɔʼ Ndém á lé á mbū yí ŋ́gɛ: «Sakalía, te ezéŋ mbɔ́k, Ndém a ke véŋ ajū mīi, o gɛ ndɔ́ɔ á yí lā. Nzwí wu Elizabɛt a a shʉʼ egɔ́ ŋgɔ ndém, ézhí á mɔ́ mbaŋa, o eké ntswhī lezēŋ tsí lɛ, Jáaŋ.

¹⁴ Mɛ́ e shʉʼ ezhí á mɔ́ mɛ́t, ntē wú e egáŋte, ó ewɛ̄ á mía lekāk. Epuɔ tɛ nzá e epú nzéŋ ŋ́kák azɔ́p.

¹⁵ Mɔ́ wuɔ mɛ́t, a a shʉʼ egɔ́ á mía ŋiŋ á mvhɔ Ndém. Mɛ́ e shʉʼ ege ezhí á yí, Azwakne Ndém a epú ŋgɔ́ ánɛ yí, tɛ a elɔ̄k efhó á levem mɛ́ wɔp. A te shʉʼ enú meluʼ ɔ́, a á le pīŋ nnú amɔ̄ʼ ajū mīi, á gɔ etsēŋte leghi tsí í.

¹⁶ A a shʉʼ eghʉ, epuɔ Islaɛl tɛ nzáne, e epīŋ nzem, ńjúʼ nchu Atsyapuɔ Ndém wɔp.

¹⁷ A a shʉʼ ewɛ mete páʼ ntswi‑ŋke Ndém Eli lā. Tɛ́ elɔk efaʼ á mbɔŋɔ́ mbɔŋɔ́ á mvhɔ Ndém, ńdeŋ ndeŋ páʼ Eli lā. A a shʉʼ eghʉ, ntē memɔʼɔ́ pɔ́ a ewɔŋkhʉ̄, e epīŋ nzem ncʉ́ʼ á taʼ. Wɔ te júʼ á Ndém, e epīŋ nzem njúʼ nchu Ndém páʼ, megaŋ anuúnē. Tɛ́ a elɔ̄k ncūŋte mentē epuɔ menɔŋ, pɔ́ elɔ̄k nnáŋ ńzwíʼte á leshʉʼ Atsyapuɔ. »

¹⁸ Sakalía á júʼ épúp, ńzɛ́tte á cɔʼ Ndém ŋ́gɛ: «Meŋ a shʉʼ ege ezhɛ́ épúp, éjʉ́ɔ akɔ̄? Pek nzwí ga, é gɔ egaá, ńzwīŋ tɛ ŋgɔ́ páʼa, ńzéŋ á mɔ́ nzhí í?»

¹⁹ Cɔʼ Ndém á pwɛt ŋ́gɛ: «Meŋ á lɛ, Ŋgáplíya. Meŋ mbuú ŋgɔ́ á mvhɔ Ndém efʉʼ metsem, ńzwíʼtɛ nchu yí, yí mé tó á gá, ŋ́gɛ meŋ eshʉʼ ntswī ewuɔ ŋke mbɔŋ, á mbū wu.

²⁰ Ashuŋne jʉɔ mɛ́t, á ké egaá egaá lɛ́, éshʉʼ epo afʉʼ zīi, Ndém a á kɔŋ. Júʼɔ́, páʼ o ka véŋ ɛ́ lā, o ecʉ́ʼ á mbúʼ nchu tɛ eláʼ etshí ánɛ afʉʼ zīi, emuɔ menu mɛ́t, é po. »

²¹ Pɔ́ gē egɔ́ á Mía Ŋgyā Ndém eshúŋnɛ épúp, alāʼ zīi á ŋgɔ́ á apɛ́ eswíŋtɛ á Ndém, á yɛ́t ndé ŋ́gɛ, akɔ̄ ŋghʉ̄, tɛ́ Sakalía á kó á ŋgyā, ńnáŋ páʼa ā?

²² Á láʼ nnáŋ tɛ efhó á tɛ ntē ŋgyā ntó, éfāʼ á yí á leshūŋne á mbū alāʼ, ḿbiŋ te kūuʼ, mbɔ a á cʉ́ʼ á mbúʼ nchu, ńcʉ́ʼɛ ndɔ̄kɔ áa mbū mí, éfʉ̄ʼtɛ anu. Alāʼ á jʉ́ɔ épúp, ńzhɛ́ á légɛ, a á kó á ŋgyā, ńjʉ́ɔ á nda jʉ́ɔ anu. Sakalía á pú ntā épúp.

²³ Meleʼé alāʼ mīi, a le nɔ̄ŋ ndɔ̄kɔ ŋghʉ̄ɛ azí afaʼ á ŋgyā Ndém, é shʉʼ mmī, á piŋ nzem mé mba zi.

²⁴ Afʉʼ á shʉʼ nnáŋ tɛ ŋkūʼ, nzwí yi Elizabɛt á gɔ́ ŋgɔ Ndém, ńcʉ́ʼɛ nnáŋa áa mba, ánɛ lekɔŋ yi, tɛ á gɔ́ mesaŋ métáa, té tó apɛ́. Ńnɔŋ ndʉ́ɛ́ ŋ́gɛ:

²⁵ «Jʉ́ɔ́ amɔ̄ʼ anu mbɔŋ zīi, Atsyapuɔ Ndém a á ghʉ ánɛ meŋ. Esē yīi é gɛ nzóko ŋkúu á gá á mvhɔ epuɔ, é mi. »

Cɔʼ Ndém a á phʉ́ ŋ́gɛ, mɛ́ shʉʼ ezhí á Yɛɛ́so

²⁶ Á ge etɔ́k mesaŋ ntokó páʼ Elizabɛt, a lɛ ŋgɔ Ndém, Ndém á tó á cɔʼ yi Ŋgáplíya, á ntē mmɔʼ tésɔŋ Ŋgaliléa, mɛ́ tɔ́ŋ lɛ, Naázalɛt.

²⁷ Ńtó á yí épúp, ŋ́gɛ á egʉɔ ntswī ŋke á mbū mmɔʼ mɔ́ ŋgɔ, lezēŋ tsí é gɔ́ lɛ Malía. Mbɔ mmɔʼ ŋiŋ mbaŋa a ke māʼ ephʉ ánɛ yí, lezēŋ tsí é gɔ́ lɛ Yosɛ́p, á fhó ánɛ ndhu Efɔ Ndavít.

²⁸ Cɔʼ Ndém mɛ́t á gʉɔ njʉ́ɔ á Malía, ńdé á mbū yí ŋ́gɛ: «Meŋ á tsaʼte á wú. Ndém a á me wu, a á pú ŋkɔ́ʼne nzwiŋ wú. »

²⁹ Malía á júʼ, á tsya á yí, á fhʉte á ntē yí ŋ́gɛ: «Ejʉɔ ntií atsaʼte á páʼa, ńdɔkɔ ŋ́gɛ akɔ̄?»

³⁰ Cɔʼ Ndém á lé á mbū yí ŋ́gɛ: «Malía, te zéŋ mbɔ́k. Ndém á pú ŋkɔ́ʼne nzwiŋ wú.

³¹ Júʼɔ́, o shʉʼ egɔ́ ŋgɔ Ndém, ézhí á mɔ́ mbaŋa, éké etswhi lezēŋ tsí lɛ, Yɛɛ́so.

³² A a shʉʼ egɔ́ á mía ŋiŋ, mɛ́ piŋ ntɔ́ŋ á yí lɛ, Méŋ Ndém‑tɛ‑athʉ́‑lephū. Atsyapuɔ Ndém a a shʉʼ eghʉ, a ejhʉ́ lefɔ maŋgānjʉʼ wɔp, á Ndavít.

³³ A a shʉʼ esáʼ ŋgɔŋ Islaɛl á meŋguʼ meŋguʼ, lefɔ tsí e epiŋ ndáʼ le mīi. »

³⁴ Malía á júʼ épúp, ńzɛ́tte á cɔʼ Ndém ŋ́gɛ: «Ajʉɔ anu a shʉʼ etɔ́k ánɛ meŋ lɛ akɔ̄, páʼ meŋ zɛɛ́t te zhɛ́ á ŋiŋ mbaŋa ā?»

³⁵ Cɔʼ Ndém á pwɛt á mbū yí ŋ́gɛ: «Azwakne Ndém a shʉʼ eshʉʼ ekápte á wú, yí méŋwɛ̄t Ndém‑tɛ‑athʉ́‑lephū, a epiŋ ndɔ̄k mete mí ŋghʉ̄, o egɔ́ ŋgɔ Ndém. Melaʼ épúp tɛ́, mɔ́ yīi o o shʉʼ ezhí, mɛ́ é shʉʼ etɔ́ŋ á yí lɛ, Méŋ Ndém, ŋ́gɔ́ á kwaʼ Ndém.

³⁶ Júʼ á mbɔŋɔ́, mɛ́ kɛ si ndʉ́ɛ́ ŋ́gɛ, méŋ mɔ́ wu Elizabɛt a á ŋkīŋ, ḿbiŋ nzéŋ ŋgē egɔ́ épúp, mbɔ a á zwiŋ tɛ ntsīa, táʼ, a piīŋ ŋgɔ́ ayáʼa, ŋ́gɔ́ ŋgɔ Ndém, tɛ mbɔ a á gɔ́ mesaŋ ntokó. A a shʉʼ ezhí á mɔ́ mbaŋa.

³⁷ Ńdɔkɔ ŋ́gɛ, amɔ̄ʼ azō á gɔ le Ndém tsya. »

³⁸ Malía á pwɛt ŋ́gɛ: «Meŋ gɔ́ áa méŋkhʉ̄ Ndém. A eghʉ̄, akɔ̄ lɛ́ zīi o ó lé, a epō ánɛ meŋ. » Á tsɔ́ʼ épúp, cɔʼ Ndém á lɛ ŋgʉ̄ɔ.

Malía a á ega ŋgʉ̄ɔ á ŋgúa Elizabɛt

³⁹ Malía á lɔk meleʼé mɛ́t, ŋ́gákne ndū á esī, ḿbē mekwɛ̄t ŋgɔŋ epuɔ Yúda, ŋ́gʉ̄ɔ mé tésɔŋ yīi Sakalía pɔ́ Elizabɛt, é gɛ nnáŋa éwú.

⁴⁰ Ŋ́gʉɔ tɛ ŋkó éwú, ŋ́kó á ŋgyā Sakalía, ńtsāʼte á Elizabɛt.

⁴¹ Elizabɛt á lɛ ŋgē ejúʼ atsaʼte jʉɔ mɛ́t, mɔ́ á ŋɛnne á levem yí, Azwakne Ndém á kó tɛ ndó ntē yí.

⁴² Á lé mé nte ŋ́gɛ: «Ndém a á néŋ mbwɛ́né ánɛ wu, ńtɔ́k ŋgɔŋ wɔnzwí metsem. Mbɔɔ ánɛ mɔ́ yīi, o o shʉʼ ezhí lā.

⁴³ Mía Nzaʼ‑Ŋkhʉ a shʉʼɛ á mba meŋ páʼa, meŋ gɔ́ azá awɔ́?

⁴⁴ O ka jʉ́ɔ kɛ? Meŋ á lɛ ŋgē ejúʼ atsaʼte jú páʼā, mɔ́ á ŋɛnne á levem meŋ, ŋ́gáŋte.

⁴⁵ O wɛɛ̄ mbwɛ́né, wu yīi o ó véŋ ŋ́gɛ menu mīi, cɔʼ Ndém a ke lé me wu lā, e shʉʼ epoo. »

Malía a á ega ŋgūʼtɛ á Ndém

⁴⁶ Malía á lɛ ŋŋāʼ ŋghi zi, ńdé ŋ́gɛ: «Ntē gá é pú ŋgūʼte á Ndém.

⁴⁷ Meŋ mbiŋ mbú nnáŋ mé lekāk, mélaʼ Ndém, Ŋghʉɛ‑meŋ‑ntswɛ́t.

⁴⁸ A á lɛ mbú ŋkímte á gá, tɛ́ meŋ gɔ́ áa nzoknzem méŋkhʉ̄ yi. Púp, tɛ efhó tsetsɔŋɔ, nzwɛt ŋiŋnɔŋ ntsem, e é cʉ́ʼɛ etɔ́ŋɔ á gá é lɛ, eshhʉ̄ mbɔŋ,

⁴⁹ melaʼ mīi, Atsyapuɔ Ndém a á pú ŋghʉ̄ ntsɔp anu á mbū meŋ. Yí ndaʼ mé si ŋgɔ́ á kwaʼ Ndém.

⁵⁰ A puú ŋgwɛ á apɔŋɔ́ ntē, ánɛ epuɔ pīi, é gɛ njúʼɔ nchu yí, tɛ efhó ánɛ memɔʼɔ́, ŋ́gʉɔ ŋkó ánɛ ndhu zɔp, á mejuŋɔ́ mejuŋɔ́.

⁵¹ A á pú ndɔ̄k ete yí, ŋ́ghʉ̄ memía menu. Ńták leghi wɔ sáʼ‑nnɛ̄t, pɔ́ cʉ́ʼɛ ntāpne tapne.

⁵² Ńtʉɔ̄k mefɔ ánɛ ekɔʼ, ḿmāʼte á esī. Ḿbiŋ ŋkɔ́ʼne nzwiŋ wɔ te kuʼ ánɛ azō.

⁵³ Ŋ́gyá etsō mbɔŋ tɛ záne, á mbū wɔ náŋ‑nzi. Ńjūŋ megaŋ azō, pɔ́ gʉɔ mbū ŋiké.

⁵⁴ A á kwaŋte melaʼne mīi, a le phʉ́ á mbū wɔ maŋgānjʉʼ pímpɛ. Tɛ́ eshʉʼ ntswíte á Islaɛl, ŋgaŋ afaʼ yi.

⁵⁵ A ka lēkne á letswi apɔŋɔ́ ntē zí, á mbū Ablaham pɔ́ ndhu zi, á meŋguʼ meŋguʼ ɔ́. »

⁵⁶ Malía á mak á leshūŋne épúp, pɔ́ Elizabɛt é náŋ tsɔ mesaŋ métɛ́t, á piŋ nzem ŋgʉ̄ɔ mé mba zi.

Elizabɛt a gɔ á nzhí Jáaŋ

⁵⁷ Afʉʼ zīi, Elizabɛt a le nɔ̄ŋ ŋgɔ á nzhíɛ, á shʉʼ ŋkūʼ, á zhí á taʼ mɔ́ mbaŋa.

⁵⁸ Epɔ̄ memía pí mbɔɔ megaŋ ŋkɔʼɔ́ mba pí, é júʼ páʼ Ndém a á ghʉ anu mbɔŋ ánɛ yí ŋgyá á yí á mɔ́, éshʉ̄ʼ, pɔ́ a pɔ́p é púte ŋkák.

⁵⁹ Mɔ́ á tém aleʼé, mɛ́ zéŋ eshʉ̄ʼ ḿbōte á esī, ŋ́gɔ̄ á ntém á yí, ékó etswhi lezēŋ tsí. Pɔ́ le nɔ̄ŋ ŋkɔ̄ŋɔ á letswhi á yí é lɛ, Sakalía, páʼ mɔʼɔ́ yi lā.

⁶⁰ Tɛ́ mɛ́ wɔp Elizabɛt á lʉʼ, ŋ́gɛ mɛ́ etswhī á yí é lɛ, Jáaŋ.

⁶¹ Pɔ́ a pɔ́p é tɔʼne, pɔ́ lé á mbū yí ŋ́gɛ: «Mmɔʼ ŋiŋ a te ánɛ atseŋ ŋgyā zɛ́, tɛ ŋgwɛ̄ lezēŋ cʉɔ ɔ́. »

⁶² Pɔ́ lɔk mbū efʉ̄ʼte, ńzɛ́tte á mɔʼɔ́ mɔ́ ŋ́gɛ, mɛ́ etswhī lezēŋ mɔ́ é lɛ, awɔ́ lɛ́?

⁶³ Sakalía á mɛʼte apū ŋ́gɛ, mɛ́ elɔ̄k ataáflɛ eshʉ̄ʼ. Mɛ́ lɔk eshʉ̄ʼ ŋ́gyá mé yí, á tí á ndo éwú ŋ́gɛ, lezēŋ mɔ́ é lɛ, Jáaŋ. Pɔ́ jʉ́ɔ, menēk mɔ́p é tóte á athū,

⁶⁴ nchu yí é lɛ ntsɔ́ʼɔ afʉʼ mɛ́t afʉʼ mɛ́t. Á lɛ nzī á lezēŋ eshúŋne, ŋ́gūʼte á Ndém mé nte.

⁶⁵ Epuɔ akap alāʼ mɛ́t, é le júʼ ajʉɔ anu, á kʉʼne á wɔ́p tɛʼ. Pɔ́ pú ndɔ̄k emuɔ menu mɛ́t, ésāŋ ŋgɔŋ epuɔ Yúda ntsem zīi, e é ndo mekwɛ̄t mɛ́t.

⁶⁶ Epuɔ pīi, é le nɔ̄ŋ njúʼɔ emuɔ menu mɛ́t, é le jʉ́ɔ páʼ, apū Ndém ánɛ mɔ́ wuɔ mɛ́t, tɛ ndé á nnɔ pɔ́p ŋ́gɛ: «Ejʉɔ ntií mɔ́ e é páʼa, e láʼ egɔ́ lɛ akɔ̄?»

Sakalía á ega ntswīi ŋke Ndém

⁶⁷ Sakalía á lɛ nzī á leshūŋne épúp, Azwakne Ndém á kó tɛ ndó ntē yí, á zi á leshūŋne páʼ ntswi‑ŋke Ndém lā, ńdé ŋ́gɛ:

⁶⁸ «Awuʼte á egɔ́ á mbū Atsyapuɔ, Ndém epuɔ Islaɛl. A á shʉʼ ntswíte epuɔ pí, ńzáʼ ŋkhʉ apuʼ á ntɔ̄ŋ pɔ́p.

⁶⁹ A á fhó ánɛ nzwɛt ŋgaŋ afaʼ yi, Efɔ Ndavít, ńtó á taʼ Ŋghʉɛ‑mɛ́‑tswɛ́t á mbū pímpɛ.

⁷⁰ Á gɔ́ anu zīi, kwaʼ metswi‑ŋke Ndém é le shúŋ tɛ efhó tɛ ŋguʼ, ŋ́gɛ:

⁷¹ “Ndém a a láʼ efók á yímpɛ, á mbū megaŋ mbo pímpɛ. Épiŋ etswí á yímpɛ, á mbū epuɔ pīi, pɔ́ faʼa á lepīk á yímpɛ.”

⁷² A le láʼ ndāʼne ŋ́gɛ, yí e fú etsá mezeŋɛ wɔ maŋgānjʉʼ pímpɛ. Épiŋ ekímte eka yīi, pɔ́ a pɔ́p é le wɛ̄tē.

⁷³ Éfhó ánɛ páʼ, a le láʼ ŋkā á mbū maŋgānjʉʼ yímpɛ Ablaham, ŋ́gɛ,

⁷⁴ yí e láʼ etswí á yímpɛ, á mbū megaŋ mbo pímpɛ, tɛ́ ḿpɛ enáŋ ŋghʉ̄ mefaʼ mí té pɔ́k,

⁷⁵ ḿbiŋ ntswhī ŋ́gɔ́ epuɔ pí, ńjúʼ nchu yí efʉʼ metsem, tɛ ndáʼ ŋkwhʉ́.

⁷⁶ Ḿbiŋ ŋgɔ́ mé wu, me méŋ ga, mɛ́ shʉʼ etɔ́ŋ á wú lɛ, ntswi‑ŋke Ndém, yí méŋwɛ̄t Ndém‑tɛ‑athʉ́‑lephū, melaʼ mīi, o o shʉʼ egɔ́ á mvhɔ Atsyapuɔ, énɔŋ ecuŋtɛ á mɛnzhɛ yīi, a a shʉʼ eziŋ éwú.

⁷⁷ Épú eghʉ, alāʼ zí, a ezhɛ́ á légɛ, Ndém a á si eshʉ̄ʼɛ, ŋ́gɔ̄ á ndekneē mefa mɔ́p, tɛ́ eghʉ pɔ́ etswɛ́t,

⁷⁸ melaʼ mīi, a puú ŋgwɛ̄ ntē mbɔŋ ánɛ epuɔ pí. A a shʉʼ etó á Ntswite‑Ŋgɔŋ, a efhó á lephū esáʼ, páʼ lezēk nu lā, ŋ́kɛ̄ʼɛ á yímpɛ.

⁷⁹ Ḿbú nzéŋ ŋ́kɛ̄ʼɛ epuɔ pīi, pɔ́ naáŋ á ntē nzém, lewhʉ̄ á gɔ́ éwú efāŋnɛ á wɔ́p, tɛ́ ḿpɛ elɔ̄k nzíʼne á yímpɛ, á lenāŋ mé apwɛne. »

⁸⁰ Méŋ Sakalía wuɔ mɛ́t, a le gē enɔŋ etswhíɛ, ńnɔŋ nzápa ntē yí ánɛ Ndém. Ńtswhí tɛ nnáʼ ŋgɔ́ azō, ŋ́gʉɔ nnáŋ á késáatswɛt, á ajʉʼ zīi mɛ́ gɛ te náŋa éwú ú. Tɛ ndáʼ ŋkó á afʉʼ zīi, a le ghʉ̄ʉ̄, epuɔ Islaɛl é zhɛ́ á yí.