Fílíip 1 - Eka Eswhī

Atsaʼte

¹ Meŋ Pɔ́ɔl mé tíi akɛtte jʉɔ páʼa. Pek Timotɛ, mégaŋ afaʼ Yɛɛ́so Klísto. Ńtíi á mbū pɛ metsem pīi, pɛ le zapá ánɛ Yɛɛ́so Klísto, ńcʉ́ʼ epuɔ Ndém, á wɛ́ pīi pɛ naáŋ á tésɔŋ Fílíio. Ńtíi mbɔɔ á mbū wɔ tshí‑mvhɔ pɔ́ wɔ tɛ́ne‑alúŋ epuɔ Yɛɛ́so.

² Ŋ́gɛ Ndém, á Mɔʼɔ́ yímpɛ, pɔ́ Atsyapuɔ Yɛɛ́so Klísto, e elɛ ŋghʉ̄ anu mbɔŋ té ndhʉ ánɛ pɛ. Ŋ́ghʉ̄ pɛ enáŋ mé apwɛne.

Pɔ́ɔl a á ega esyáknɛ á Ndém, éswíŋtɛ á athū epuɔ Fílíio

³ Meŋ kwaŋteē á wɛ́ efʉʼ akɔ̄ lɛ́, ésyákne á Ndém ga ánɛ athū zɛ́.

⁴ Efʉʼ akɔ̄ lɛ́ yīi, meŋ á si eswíŋtɛ á Ndém á athū pɛ metsem lɛ́, meŋ ndɔ̄ɔk áa lekāk tɛ́ eswíŋte,

⁵ éfhó ánɛ ntií zīi, pɛ lɔɔ̄k ntswíte á gá á leghʉ, ŋke mbɔŋ é saŋ ejʉʼ, tɛ efhó aleʼé zīi pɛ le júʼē, ḿvéŋ, ŋ́gʉɔ ŋkó á ayáʼa.

⁶ Meŋ chʉʉ́ nnɛ̄t nzhɛ́ á légɛ, Ndém, páʼ a ke zī afaʼ mbɔŋ á ntē pɛ lā, a a lɔk egʉɔ mé mvhɔ, tɛ etsékne, áleʼé zīi, Yɛɛ́so Klísto a piŋɛ nzem.

⁷ Á mbɔŋ á mbū meŋ, á lewɛ ejʉɔ ntií akwaŋte ánɛ pɛ metsem, melaʼ mīi, meŋ tshií ntē gá tɛʼ, ánɛ pɛ. Mbɔɔ páʼ Ndém a ke tswī apɔŋɔ́ ntē te ndhʉ ánɛ pímpɛ, ŋ́ghʉ̄ pɛ etswíte á gá á afʉʼ zīi, meŋ ke nɔ̄ŋ nchʉ́ɛ nnɛ̄t ntswīi páʼ, ŋke mbɔŋ é anuúnē, mɛ́ piŋ mbɔ́ŋte á lenēŋ ntē éwú. Ńzéŋ ntswíte á gá tsetsɔŋɔ, páʼ meŋ á ŋgyā atʉɛ́.

⁸ Ndém a á si nzhɛ́ɛ páʼ, á anuúnē á légɛ, meŋ kɔɔ̄ŋ á wɛ́ metsem tɛʼ, mé ŋkɔŋne zīi Yɛɛ́so Klísto a le néŋ á ntē meŋ.

⁹ Aswiŋte zīi, meŋ á si ŋghʉ̄ɛ á mbū Ndém á athū pɛ, a ajʉɔ: meŋ á si ndɔ́ɔ ŋ́gɛ, Ndém a eghʉ̄, pɛ etswiʼne ŋkɔ̄ŋne mennɛ̄t mɛ́, ńdɔk ŋgʉ̄ɔ mé mvhɔ. Púp, ńdɔk nzhɛ́ páʼ Ndém a á épúp, ḿbiŋ ŋghʉ̄ menu mīi, é mbɔŋ á leghʉ.

¹⁰ A egɔ́ épúp, pɛ elɔk ŋkūʼ á lesāŋ tɛ ŋkāŋ nzhɛ mbɔŋ, ŋ́kúʼte. Ńdɔk ndáʼ mbú ŋ́gɔ́ té alɔ́ʼ, épuɔ pīi Yɛɛ́so Klísto, a te e láʼ enɔŋ elaʼa á wɔ́p, á aleʼé zīi, a piŋɛ nzem ɛ́.

¹¹ Yɛɛ́so mɛ́t, a a shʉʼ eghʉʉ, ajūɔ tsem zīi, pɛ ghʉɛ, a egɔ́ áa mbɔŋ. Epuɔ menɔŋ e ejʉ́ɔ épúp, ŋ́ghʉ̄ mekuʼ Ndém, ńzéŋ ŋgūʼte á yí.

Leghʉ mefaʼ Klísto mé ndaʼ mía azō

¹² Epɔ̄ memía, meŋ á si ŋkɔ̄ŋɔ ŋ́gɛ, pɛ ezhɛ́ á légɛ anu zīi, á ke ghʉ̄ á gá la, á gɔ́ áa mmɔʼ mɛnzhɛ, á lelɔk ŋghʉ̄, ŋke mbɔŋ é tswiʼne esāŋ ejʉʼ.

¹³ Á épúp tɛ́ wɔ lʉɔ́ʼ‑ncu tɛ mmī, épi é pípɛ mba ŋgɔpna, mbɔɔ epuɔ tɛ nzáne, é si nzhɛ́ɛ á légɛ, meŋ á ŋgyā atʉɛ́ páʼa, melaʼ anu Klísto.

¹⁴ Emɔ̄ʼ epɔ̄ memía tɛ nzáa, é ke jʉ́ɔ páʼ meŋ á ŋgyā atʉɛ́, ńtswiʼne nnéŋ ntē ánɛ Atsyapuɔ, tɛ pɔ́ é tsetsɔŋɔ, ńcʉ́ʼɛ ntswīi ŋke mbɔŋ, ńdɔkɔ ŋgʉ̄ɔ mé mvhɔ, té pɔ́k.

¹⁵ Á anuúnē á légɛ, emɔ̄ʼ epuɔ é si eshúŋɔ anu Klísto, ŋ́ké eshúŋɔ páʼā, ńdɔkɔ efāʼa azō ánɛ meŋ, ńzéŋɛ ndɔkɔ eséŋɛ ntē ánɛ meŋ. Emɔ̄ʼ epuɔ é piŋ nnɔ̄ŋ eshúŋɔ azɔ́p, mé taʼ ntē.

¹⁶ Ŋ́ghʉ̄ɛ épúp páʼā, ńdɔkɔ ŋkɔ̄ŋɔ á gá. Pɔ́ é si nzhɛ́ɛ á légɛ, meŋ á ŋgyā atʉɛ́ ega páʼa, éfaʼa á gá á lechʉ̄ nnɛ̄t ntswī á légɛ, ŋke mbɔŋ é anuúnē.

¹⁷ Epi emɔ̄ʼ epuɔ é piŋ nnɔ̄ŋ eshúŋɔ anu Klísto páʼā, ńdɔkɔ efāʼa azō ánɛ meŋ. Ajū mīi á tshónɛ á wɔ́p á letswi ŋke, á té ndeŋ ndeŋ ɛ́. Pɔ́ é si ŋkwāŋa ŋ́gɛ, pɔ́ e ghʉ épúp, élɔk etswiʼne ŋgʉɔ̄ʼ za á ŋgyā atʉɛ́ ega.

¹⁸ Mɛ́ nɔŋ eshúŋɔ anu Klísto mé taʼ ntē, kɛɛ́ eshúŋɔ ndɔkɔ efāʼa azō ánɛ meŋ lɛ́, mbɔ á té si eshúŋɔ á gá á azō ɔ́. Mía anu á gɔ́ áa lɛ, mɛ́ eshúŋ anu Klísto. Ntē gá é si ŋgáŋtɛ melaʼ épúp, éshʉʼ ezéŋ etswiʼne egáŋte.

¹⁹ Pɛ é si eswíŋtɛ á Ndém á athū meŋ. Azwakne Yɛɛ́so Klísto á zéŋ nnɔ̄ŋ ntswítɛ á gá. Pɛ eghʉ̄ɛ épúp páʼā, ńdɔkɔ ŋ́gɛ menu muɔ mɛ́t ntsem, e eshʉʼ ŋghʉ̄, meŋ etswɛ́t.

²⁰ Á páʼa ŋgɔ́ ajū mīi, meŋ á si nzwíʼtɛ ŋkone kone. Amɔ̄ʼ ajū mīi á gɔ eghʉ̄ʉ, esē é kú á gá, á té éwú ú. A cʉ́ʼɛ épúp, mbɔ tɛ efhó tsetsɔŋɔ, mbɔɔ páʼ, á gɛ nzī ŋgɔ́ɔ, meŋ chʉʉ́ nnɛ̄t ŋkúʼte á ntē meŋ á lelɔk ega legɔ̄, ŋ́ghʉ̄, epuɔ menɔŋ é wuʼte á Klísto, tɛ meŋ ndáʼa ŋkwhʉ́ kwhʉ̄ʉ, kɛ gá á lezɛ̄t nte lɛ̄ɛ.

²¹ Á mbū meŋ, gá á legɔ̄ á ŋgɔŋ, á gɔ́ áa lelɔk ŋgūʼte á Klísto. Meŋ ké mbīŋ ŋkwhʉ́, á gɔ́ á mbū meŋ, ŋ́gɔ́ áa apɛ.

²² A piŋɛ ŋgɔ́ éyi, meŋ zéŋɛ nnáŋ á ŋgɔŋ, mefaʼ má é tswíte epuɔ, mbɔ á páʼā, meŋ te zɛ́t nzhɛ́ eshhʉ̄ yīi, meŋ a kaŋ á.

²³ Menu muɔ mɛ́t mɛ́mbīa, é si eshūŋnɛ á gá. Meŋ á si ŋkɔ̄ŋɔ á gá á legʉɔ ntswɛ́tte á Klísto, pek yí mé cʉ́ʼɛ nnáŋa. Púp mé mbū meŋ, ŋ́gɔ́ á mía anu.

²⁴ Táʼ, mvhɔ a á gá á lenāŋ á ŋgɔŋ, melaʼ mɛ́.

²⁵ Meŋ kuʼteé á ntē meŋ épúp. Meŋ a náŋ á ŋgɔŋ. Ńzéŋ ŋgɔ́ á si nzhɛ́ɛ á légɛ, meŋ a shʉʼ enáŋ á tsetsɛlɛ pɛ, énɔŋ etswítɛ á wɛ́ metsem, á letswiʼne efɛ́ nnɛ̄t ŋgyá á mbū Yɛɛ́so, ńnáŋ mé lekāk.

²⁶ Ńdɔkɔ ŋ́gɛ, afʉʼ zīi meŋ á shʉʼ tɛ ŋgɔ́ á tsetsɛlɛ pɛ, pɛ etswiʼne nzápa á nzem meŋ, ŋ́gūʼte á Yɛɛ́so Klísto.

Ntekné ánɛ páʼ, mɛ́ e cʉ́ʼɛ eziŋɛ épúp

²⁷ Mía azō á gɔ áa lɛ, pɛ ezīŋ ánɛ mɛnzhɛ yīi, ŋke mbɔŋ ánɛ Klísto é si nzɛ́ttɛ, tɛ ŋgɔ́ yīi, azi ŋgɔ́ éyi, meŋ a shʉʼ ejʉ́ɔ á wɛ́, kɛɛ meŋ te shʉʼ eshʉʼ ɛ́ lɛ́ɛ, meŋ etshí njúʼ páʼ pɛ kwɛɛ́t, ńchʉ́ nnɛ̄t ŋgɔ́ á taʼ nchu, éfók mbʉʼ metsem mé taʼ ntē, ŋ́ghʉ̄, lefɛ̄ nnɛ̄t ŋgyá mé Klísto, á gɔ́ páʼ ŋke mbɔŋ é si nzíʼnɛ épúp.

²⁸ Tɛ pɛ é le cʉ́ʼ, megaŋ mbo é ghʉ, pɛ epɔ́k amɔ̄ʼ azō ɔ́. Pɛ eghʉ̄ épúp, a egɔ́ á ayiŋne zīi á tswii á légɛ, pɔ́ é ánɛ mɛnzhɛ lepī. Ŋ́gɔ́ á mbū pɛ, ŋ́gɔ́ á ayiŋne zīi á tswii á légɛ, pɛ é ánɛ mɛnzhɛ letswɛ̄t. A egɔ́ épúp, Ndém mé eghʉ̄ɛ.

²⁹ A le tswī á wɛ́ á apɔŋɔ́ ntē te ndhʉ zí, ŋ́ghʉ̄ pɛ ecʉ́ʼ megaŋ afaʼ Klísto. Pɛ é le lɛ ŋgɔ́ megaŋ afaʼ pí, áa ndaʼ ánɛ lefɛ̄ nnɛ̄t ŋgyá á mbū yí í, ńzéŋ ŋgɔ́ mbɔɔ ánɛ lejʉ̄ɔ ŋgʉɔ̄ʼ melaʼ mí.

³⁰ Ŋ́gē egɔ́ epiɛ́, ńnɔŋ ndʉɔ́ʼɔ ncu á leghʉ, azō á le ŋke mbɔŋ ták, ńdeŋ ndeŋ páʼ pɛ ke jʉ́ɔ á gá á lelʉɔ̄ʼ épúp. Pɛ é si nzhɛ́ɛ páʼ meŋ nzɛɛ́t ntswiʼnɛ ndʉɔ́ʼ lʉɔʼé.