ODE HI̍YƐCHƐ 8 - Ye̳ka Onīpīpē̳ Yī O̳wo̳

Akpɔ ɔmarāapa nīi ha̍aba ku̍ īpū ɔla̍ā nīi e̍ hā ɔ̄ ɔhɔ̄hā ma̍

¹ Ɔyɔ̍ɔ̄nyīyɛrɔ̄ ɔla̍ā de akpɔ yī ɛbɛ ɔmarāapa nīi ha̍aba ku̍ īpū ɔla̍ā nīi e̍ hā ɔ̄ ɔhɔ̄hā ngmri̍ngmri̍ ma̍ hɛ̍ bɛ̍ɛ̄nɛ̄ ma̍, ɛbɛ hi̍ya cho̍cho̍ wa̍a̍ abɔ̍ɔ la ichō gbajɛ lɛ̄rɛ̄ yī ākārākā ke̍e̍.

² Bɛ̍ɛ̄nɛ̄ ma̍, n ma̍ ayɛ̍ɛ̄chɛ̄rɔ̄ yī Ɔwɔ - arāapa ɛla̍ā nīi ē rɛ la iyɔ̄bū yī Ɔwɔ ma̍; e̍ de lɛjī arāapa de wa̍ bī abɔ̍ɔ.

³ Bɛ̍ɛ̄nɛ̄, ɔyɛ̍ɛ̄chɛ̄rɔ̄ yī Ɔwɔ ɔha̍ nīi bī ɔjā oni̍pī kwɛ̍kwɛ̍ lipu̍ u̍kpu̍ūhā yī igo̍olu ma̍ wā ge̍ rɛ abɔ̍ɔ la ɛbɛ ɔyɔ̍ɔ̄pɔ̄pā. E̍ de ɔjā oni̍pī kwɛ̍kwɛ̍ tū mwɛbɛ de ɔ̍, nīi o̍ ge̍ē de ē ba̍ ɔhā wa̍a̍ nīi āchɛ yī Ɔwɔ ē ji ma̍, hɛ̄ɛbɛ nīi o̍ ge̍ē de ē ya̍ ɔpɔ̄pā de Ɔwɔ abɔ̍ɔ la ɛbɛ ɔyɔ̍ɔ̄pɔ̄pā nīi e̍ ya̍ la igo̍olu igo̍olu rɛ abɔ̍ɔ la iyɔ̄bū yī atɛ̍ ma̍.

⁴ Ingūɔ̄la̍ yī ɔjā oni̍pī kwɛ̍kwɛ̍ ɔla̍ā nīi e̍ de tū ɔla̍ ma̍ pīya ga ichō ba̍la ɔhā nīi āchɛ yī Ɔwɔ ē ji ma̍ hī abɔ̄ yī ɔyɛ̍ɛ̄chɛ̄rɔ̄ yī Ɔwɔ ɔla̍ā nīi rɛ abɔ̍ɔ la iyɔ̄bū yī Ɔwɔ ma̍.

⁵ Bɛ̍ɛ̄nɛ̄ ma̍, ɔyɛ̍ɛ̄chɛ̄rɔ̄ yī Ɔwɔ ɔla̍ā nāa u̍kpu̍ūhā obī tū ɔjā oni̍pī kwɛ̍kwɛ̍ ɔla̍ā, wu̍ ɔla̍ mu ɔ̍ bī abɔ̍ɔ la ɛbɛ ɔyɔ̍ɔ̄pɔ̄pā ɔla̍ā. O̍ de u̍kpu̍ūhā ɔla̍ā ta̍ wā la ajɛyɛ̄ɛchɛ. Ɔpɔ̄ɔpɛ̄, yakpla̍ gbo ɛbɛ̍bɛ̍ ɛbɛ̍bɛ̍; ojiya rɛ bāa otutu ma̍; ɔla̍ yī yakpla̍ kɔ̄ bāa ɔmanyamanya ma̍; ajɛ he̍ejē wɔhu̍ wɔhu̍.

Lɛlā yī lɛjī arāapa

⁶ Ɔpɔ̄ɔpɛ̄, ayɛ̍ɛ̄chɛ̄rɔ̄ yī Ɔwɔ arāapa ɛla̍ā ti̍bi̍īyēchɛ̄ nīi e̍ ge̍ē gwō lɛjī arāapa ɛla̍ā bɛ̍ɛ̄nɛ̄.

⁷ Ɔyɛ̍ɛ̄chɛ̄rɔ̄ yī Ɔwɔ ɔrāarāa gwō lɛjī yī nū; ɔpɔ̄ɔpɛ̄, achɔ̄ yī yakpla̍, ba̍la ɔla̍ ti̍yabɔ̄ tū la yeyī kɔ̄ i̍ngɔ̍ɔ kpɔ̍tɔ̍kpɔ̍tɔ̍ gblāa wā la ajɛ. Wāā ūkpo̍he lipu̍ yī ɛta̍ yī ajɛyɛ̄ɛchɛ wa̍a̍ de wɔla̍ cha̍cha̍; wāā ūkpo̍he lipu̍ yī ɛta̍ yī ɛchi̍ ba̍la īpū yī a̍chi̍ wa̍a̍ nīi lōlīmīmɛ̄ we̍ ma̍ de wɔla̍ i̍ngi̍ngɔ̍ɔ cha̍cha̍.

⁸ Ɔyɛ̍ɛ̄chɛ̄rɔ̄ yī Ɔwɔ ɔmɛpa wā ge̍ gwō lɛjī yī nū; ɔpɔ̄ɔpɛ̄, ɔjā ɔha̍ nīi ya̍ bāa yɛwu ɔnɔ̄kɔ̄kū ɔha̍ nīi yɛ ē rɔ̍la̍ ma̍, e̍ wu̍ ɔ̄ ta̍tū ga lipu̍ yī li̍hu. Wāā ūkpo̍he lipu̍ yī ɛta̍ yī li̍hu wa̍a̍ nīi hɔ̄ ma̍ de pīya yeyī i̍ngɔ̍ɔ ke̍e̍.

⁹ Wāā ūkpo̍he lipu̍ yī ɛta̍ yī ɛjā wa̍a̍ nīi tū la yenyi ma̍ pīyaku̍ cha̍cha̍; wāā ūkpo̍he lipu̍ yī ɛta̍ yī wɔwu̍ wa̍a̍ nīi yɛ li̍hu ma̍ chāajɛ cha̍cha̍.

¹⁰ Ɔyɛ̍ɛ̄chɛ̄rɔ̄ yī Ɔwɔ ɔmɛta̍ wā ge̍ gwō lɛjī yī nū bɛ̍ɛ̄nɛ̄; ɔpɔ̄ɔpɛ̄, i̍nyi̍nyɔ̍ɔwīyā ɔnɔ̄kɔ̄kū ɔha̍ nīi yɛ ē chɔ̄chɛ̄ bāa otīnīkā ma̍ ha̍ābɔ̄ bū abɔ̍ɔ la ichō ge̍ ta̍tū la wāā ūkpo̍he lipu̍ yī ɛta̍ yī ɔkpa̍ ba̍la opi̍yenyi wa̍a̍.

¹¹ Riyī yī i̍nyi̍nyɔ̍ɔwīyā ɔ̍lɔma̍ re̍ka A̍gwɔ̍ɔnɔ. O̍ ya̍ nīi wāā ūkpo̍he lipu̍ yī ɛta̍ yī yenyi yī ɔkpa̍ wa̍a̍ de lwɔnɔnɔ. Āchɛ yɛ̄mɛ̄mɛ̄ pīyaku̍ wu̍chē yī yenyi ɔla̍ā nīi de ya̍ wɔnɔnɔ nīi e̍ gwa̍ ma̍.

¹² Bɛ̍ɛ̄nɛ̄, ɔyɛ̍ɛ̄chɛ̄rɔ̄ yī Ɔwɔ ɔmɛnɛ titi gwō lɛjī yī nū; ɔpɔ̄ɔpɛ̄, wāā ūkpo̍he lipu̍ yī ɛta̍ yī yɛnɔ, ba̍la iyī ɔwīyā, ba̍la iyī i̍nyi̍nyɔ̍ɔwīyā wa̍a̍ ku̍ bīya kplɔkplɔ. Wɔhu̍ yī oho̍ōhu̍ yī wā, a ge̍ de ɔ̍ kɔ̄ ɛbɛ ɛtɛ̍ɛta̍, ūkpo̍he i̍ hɔ̄ de wa̍ gɛ ni̍. A ge̍ de ɔ̄chī ūkpo̍he kɔ̄ ɛbɛ ɛta̍, yɛ̄grāa ūkpo̍he yī nū, ɛbɛ ɔlɛgēdēgēdē i̍ hɔ̄ gɛ ni̍. I̍ngi̍ngɔ̍ɔ nīi iyī otu̍ titi de lɛ a̍nɛ.

¹³ N yɛ ē deyīrɛ bɛ̍ɛ̄nɛ̄ ma̍, n ma̍ oge ɔnɔ̄kɔ̄kū ɔha̍ nīi yɛ ē wōwu ga hwɛɛ abɔ̍ɔ la ichō. O̍ tɔ̍ɔna gbōō hīka, “Akanya ɔdwɔ̄bi̍ ɔdwɔnyɛ! Akanya ɔdwɔ̄bi̍ ɔdwɔnyɛ! I̍īyo̍ de āchɛ nīi ge̍ē hɔ̄ abɔ̍ɔ la ajɛyɛ̄ɛchɛ yɛ̄grāa nīi lɛjī ɛta̍ yī ayɛ̍ɛ̄chɛ̄rɔ̄ ɛta̍ ehēhī ge̍ē kɛlā ma̍!”