ODE HI̍YƐCHƐ 7 - Ye̳ka Onīpīpē̳ Yī O̳wo̳

Āchɛ u̍nɔ ohu igwa̍arāata̍ yī Ali̍sɛ̄rɛli

¹ La okwi̍ihi yī ɔla̍ā, n ma̍ ayɛ̍ɛ̄chɛ̄rɔ̄ yī Ɔwɔ āchɛ ɛnɛ nīi e̍ yarɛ abɔ̍ɔ la oe̍ ɛnɛnɛ yī ajɛyɛ̄ɛchɛ nūma̍. E̍ yɛ ē ku̍ owu wa̍a̍ nīi ē gwō bū la oe̍ ɛnɛnɛ nūma̍ ma̍ ē bī, hɛ̄ɛbɛ nīi owu ɔha̍lɔha̍ i̍ ge̍ē gwō kla̍ ajɛ nūma̍ kɛ̄ɛ li̍hu kɛ̄ɛ ɔchi̍ ɔha̍lɔha̍ gɛ ni̍.

² Bɛ̍ɛ̄nɛ̄, n gba̍a ma̍ ɔyɛ̍ɛ̄chɛ̄rɔ̄ yī Ɔwɔ ɔha̍ nīi bū abɔ̍ɔ la wāā yɛnɔ ɔ̄chī yeēwā. O̍ bī ina̍aba yī Ɔwɔ ɔhɔ̄leyī nīi e̍ ē bī hu āchɛ yī nū ukɔ̄ ma̍ abɔ̍ɔ. O̍ kɛlā gbōō grāa ayɛ̍ɛ̄chɛ̄rɔ̄ yī Ɔwɔ ɛnɛnɛ ɛla̍ā nīi Ɔwɔ de wɔhu̍ de wa̍ nīi e̍ ge̍ē de ajɛyɛ̄ɛchɛ nūma̍ ba̍la li̍hu wa̍a̍ ē bīya ma̍.

³ Ɔyɛ̍ɛ̄chɛ̄rɔ̄ ɔla̍ā da ayɛ̍ɛ̄chɛ̄rɔ̄ ɛnɛ ɛla̍ā hīka, “Ala̍ e̍e de ajɛyɛ̄ɛchɛ ba̍la li̍hu ba̍la ɛchi̍ wa̍a̍ bīya hunū we̍ ni̍, kpɛɛ nīi alɔ ē de ina̍aba yī Ɔwɔ ba̍ a̍chɛ̍ yī Ɔwɔ yī alɔ la inēyī hu wa̍ ukɔ̄ o̍bū.”

⁴ Āchɛ nīi e̍ de ina̍aba yī Ɔwɔ ba̍ wā la inēyī hu wa̍ ukɔ̄ ma̍, e̍ de koko̍o de u: E̍ lɛ āchɛ u̍nɔ ohu igwa̍arāata̍ bū la wɔma ɔha̍lɔha̍ wa̍a̍ la I̍sɛ̄rɛli.

⁵ Āchɛ u̍nɔ ohu che igwo̍ bū la wɔma yī Iju̍da. Āchɛ u̍nɔ ohu che igwo̍ bū la wɔma yī Iru̍bɛ̄ɛn. Āchɛ u̍nɔ ohu che igwo̍ bū la wɔma yī Iga̍adi.

⁶ Āchɛ u̍nɔ ohu che igwo̍ bū la wɔma yī A̍sha. Āchɛ u̍nɔ ohu che igwo̍ bū la wɔma yī Ina̍fu̍tāli. Āchɛ u̍nɔ ohu che igwo̍ bū la wɔma yī Ima̍nāsɛ.

⁷ Āchɛ u̍nɔ ohu che igwo̍ bū la wɔma yī Isi̍mīyɔn. Āchɛ u̍nɔ ohu che igwo̍ bū la wɔma yī Ili̍fāyi. Āchɛ u̍nɔ ohu che igwo̍ bū la wɔma yī I̍saka.

⁸ Āchɛ u̍nɔ ohu che igwo̍ bū la wɔma yī Ijɛ̍būlɔn. Āchɛ u̍nɔ ohu che igwo̍ bū la wɔma yī Ijo̍sɛ̄ɛfu. Āchɛ u̍nɔ ohu che igwo̍ ohōhī bū la wɔma yī Ibɛ̍njāmɛn. Āchɛ nūma̍ wa̍a̍, e̍ de ina̍aba yī Ɔwɔ ba̍ wā la inēyī hu wa̍ ukɔ̄.

Ɔgbādu ɔnɔ̄kɔ̄kū ɔha̍

⁹ N deyīrɛ bɛ̍ɛ̄nɛ̄ ma̍, n ma̍ āchɛ ɛha̍ nīi lyɛ̄mɛ̄ kpɛ̍ɛ nīi ɔ̄chɛ i̍ ge̍ē ka wa̍ ɔkɔ̄ka ē mɛ ni̍. E̍ bū la ɔchamɔcha wa̍a̍, ba̍la ipwɔ̍ɔma ɔha̍lɔha̍ wa̍a̍, ba̍la ipwɔ̍ɔcha ɔha̍lɔha̍ wa̍a̍, ba̍la ita yī āchɛ̄ɛchɛ ɔha̍lɔha̍ wa̍a̍ la yɛchɛ. Aa̍ wa̍a̍ yarɛ abɔ̍ɔ la iyɔ̄bū yī atɛ̍ ɔla̍ā ba̍la Ɔyɔ̍ɔ̄nyīyɛrɔ̄ ɔla̍ā. E̍ tū ɛjā ɔnɛ̄rɛ̍ɛ̄rɛ̍ cha̍cha̍ la iyē, gba̍a bī i̍cha̍ārī la abɔ̄ cha̍cha̍.

¹⁰ E̍ tɔ̍ɔna ka gbōō bɛ̍ɛ̄nɛ̄ hīka, “Ɔhɛ̍ta̍ yī alɔ bū la abɔ̄ yī Ādā nīi hyāhɔ̄ ma̍ la atɛ̍ ma̍ ba̍la abɔ̄ yī Ɔyɔ̍ɔ̄nyīyɛrɔ̄ nūma̍ oo!”

¹¹ Ayɛ̍ɛ̄chɛ̄rɔ̄ yī Ɔwɔ mɔri̍mɔri̍ gblāa wa̍a̍ ta̍kakatū atɛ̍ ɔla̍ā ba̍la ɛgabɔ̄ ɛla̍ā ba̍la ɛjā ɔhɔ̄leyī ɛla̍ā nīi lɛ ɛnɛ ma̍. Ɔpɔ̄ɔpɛ̄, aa̍ wa̍a̍ de inēyī gbajɛ la iyɔ̄bū yī atɛ̍ ɔla̍ā ya̍ otūlichō de Ɔwɔ.

¹² E̍ ka bɛ̍ɛ̄nɛ̄ hīka: “O̍ ge̍ lɛ i̍ngɔ̍ɔ. Ɔkɔ̄kā, ba̍la rīgā, ba̍la lɛlā ojo̍ōje̍ ka̍ka̍, ba̍la o̍be, ba̍la otūlichō, ba̍la wɔhu̍, ba̍la ɔgɔnyɛ ɔgɔ̄ga ge̍ - iyī Ɔwɔ yī alɔ i̍ngɔ̍ɔ kpɛɛ ku yɛ̄grāa i̍mɔ̄mɛni̍. O̍ ge̍ lɛ i̍ngɔ̍ɔ!”

¹³ Ɔha̍ lipu̍ yī ɛgabɔ̄ ɛla̍ā che um ikpo̍ bɛ̍ɛ̄nɛ̄ hīka, ānyɛ ɛ̍lɛ gblāa aa̍ nīi - ɛ̍lɛ tū ɛjā ɛnɛ̄rɛ̍ɛ̄rɛ̍ ku ajɛ ku ajɛ ma̍/? Aba̍ nīi ɛ̍lɛ u̍tu bū ma̍/?

¹⁴ N hīya anu̍ ɔkɔ hīka ami i̍ jo̍ōkū ni̍; anu̍ ɔlɔjā ge̍ē jo̍ōkū a̍nɛ. Ɔgabɔ̄ ɔla̍ā koko̍o de u bɛ̍ɛ̄nɛ̄ hīka, “Ma̍ ko̍ō! Āchɛ nūma̍, aa̍ ga gla̍la̍la̍ hī ichi̍ ɔdwɔ̄bi̍ ɔnɔ̄kɔ̄kū ɔla̍ā nīi e̍ ya̍ āchɛ ma̍ a̍nɛ. E̍ de aru̍ ɔkwajɛ yī wā ɔla̍ā nɔ̄na nīi o̍ de lɛ̍rɛ̍ fre̍te̍te̍ bū la yeyī yī Ɔyɔ̍ɔ̄nyīyɛrɔ̄ ɔla̍ā.

¹⁵ Ɔla̍ā - ohu̍ nīi e̍ ē yarɛ amu i̍ngɔ̍ɔ la iyɔ̄bū yī atɛ̍ yī Ɔwɔ ē chrāa anu̍ ɛrɔ̄ myɛ̄grāa-myɛ̄grāa la yɛnɔ kɛ̄ɛ otu̍ amu u̍ma̍ la u̍nu̍ yī Ɔwɔ a̍nɛ. Ādā ɔlɔjā nīi hɔ̄ aa̍ la atɛ̍ ma̍ ge̍ē de wa̍ gbōgbō hwɔhi hwɔhi bū la onīi o̍ hɔ̄ abɔ̍ɔ ma̍.

¹⁶ Lɛmiyɛ kɛ̄ɛ odīyenyi i̍ ge̍ē ya̍ wā ge̍ē gbo̍ mɛ ē gɛ ni̍. Ɔhɛ̍puu yī yɛnɔ ɔha̍lɔha̍ i̍ ge̍ē hɔ̄ de wa̍ ge̍ē gbo̍ ē gɛ ni̍.

¹⁷ Wu̍chē oji̍ nɛ, Ɔyɔ̍ɔ̄nyīyɛrɔ̄ ɔla̍ā nīi hɔ̄ aa̍ la iyārɛ̄ɛpa yī atɛ̍ ma̍ ge̍ē de pīya ɔ̄chɛ odeyīrɛ wa̍ hwɔhi hwɔhi bɔ̄ɔkɔ nīi ɔ̄chɛ ɔgbyɛ̄wū deyīrɛ anyīyɛrɔ̄ yī nū ma̍. O̍ ge̍ē bī wā gāa libu̍ yī yenyi ɔngmɔ̍ɔ̄ngma̍ nīi ge̍ē de ɔhɔ̄leyī de wa̍ ma̍. Ɔwɔ ɔlɔjā ge̍ē ngū wā yeje ē hī eyī ke̍e̍.”