ODE HI̍YƐCHƐ 6 - Ye̳ka Onīpīpē̳ Yī O̳wo̳

Akpɔ nīi ha̍aba ku̍ īpū ɔla̍ā nīi e̍ hā ɔ̄ ɔhɔ̄hā ma̍

¹ Bɛ̍ɛ̄nɛ̄, n ma̍ nīi Ɔyɔ̍ɔ̄nyīyɛrɔ̄ ɔla̍ā de akpɔ ūkpo̍he lipu̍ yī akpɔ arāapa nīi ha̍aba ku̍ īpū ɔla̍ā nīi e̍ hā ɔ̄ ɔhɔ̄hā ngmri̍ngmri̍ ma̍ hɛ̍ bɛ̍ɛ̄nɛ̄. Ɔpɔ̄ɔpɛ̄, n po̍ ɔha̍ lipu̍ yī ɛjā ɔhɔ̄leyī ɛla̍ā nīi lɛ ɛnɛ ma̍ nīi ɔkɔlɛ̄lā yī nū yo̍ojiya bāa yakplɔ̍ɔwɔ ma̍ hīka, “Yewā!”

² N deyīrɛ ma̍, n ma̍ wɔnya ɔnɛ̄rɛ̍ɛ̄rɛ̍ ɔha̍ nīi rɛ abɔ̍ɔ. Ɔ̄chɛ nīi che la ichō yī nū ma̍ bī wɔtā abɔ̍ɔ; e̍ de okpo ɔkla̍lɛhu̍ yī ɔchwɔ̄lɛ̍ kla̍ anu̍. O̍ pīya bāa ɔ̄chɛ nīi ge̍ē yɛ̍ɛ̄ngrɔ̄ɔ ē de ɛbɛ ē kla̍ ma̍ yɛ gāa ge̍ē yɛ̍ɛ̄ngrɔ̄ɔ ē de ɛbɛ ē kla̍ bɛ̍ɛ̄nɛ̄.

³ Ɔyɔ̍ɔ̄nyīyɛrɔ̄ ɔla̍ā gba̍a de akpɔ yī ɛbɛ ɔmɛpa nīi ha̍aba ku̍ īpū ɔ̍lɔma̍ ma̍ hɛ̍ bɛ̍ɛ̄nɛ̄. Ɔha̍ lipu̍ yī ɛjā ɔhɔ̄leyī ɛla̍ā gba̍a ka hīka, “Yewā!”

⁴ Wɔnya ɔnɔ̄ɔ̍ɔ̄a̍ ɔha̍ bīyɛchɛ ge̍ rɛ abɔ̍ɔ ɔpɔ̄ɔpɛ̄. Ɔ̄chɛ nīi che la anu̍ ma̍, e̍ de wɔhu̍ de ɔ̍ nīi o̍ ge̍ē bī lɛwu̍ okpo̍ōkpo̍ ē wā la yɛchɛ nūma̍, hɛ̄ɛbɛ nīi āchɛ̄ɛchɛ ge̍ē kpo̍ iyī wā ngmo̍. E̍ de oge ɔnɔ̄kɔ̄kū ɔha̍ de ɔ̍.

⁵ Bɛ̍ɛ̄nɛ̄, Ɔyɔ̍ɔ̄nyīyɛrɔ̄ ɔla̍ā gba̍a de akpɔ yī ɛbɛ ɔmɛta̍ nīi ha̍aba ku̍ īpū ɔ̍lɔma̍ ma̍ hɛ̍. Ɔpɔ̄ɔpɛ̄, n po̍ nīi ɔmɛta̍ lipu̍ yī ɛjā ɔhɔ̄leyī ɛla̍ā ka hīka, “Yewā!” N deyīrɛ ma̍, n ma̍ wɔnya onōbo̍ōbi̍ ɔha̍ nīi wā ge̍ rɛ abɔ̍ɔ. Ɔ̄chɛ nīi che la anu̍ ma̍ bī ɔjā ɔmiya ɔjā ɛpa abɔ̍ɔ la abɔ̄.

⁶ Ɔpɔ̄ɔpɛ̄, n plɛ̍ɛ̄lā ɔha̍ nīi ya̍ bāa ɔkɔlɛ̄lā ma̍ bū abɔ̍ɔ la olo̍ōlo̍ yī ɛjā ɔhɔ̄leyī ɛla̍ā nīi lɛ ɛnɛ ma̍. O̍ ka hīka ɔ̍lɔ ge̍, “I̍gri̍imɔ̍ɔgɔ ūkpo̍he yī igu nīi re̍ka iwi̍iti ma̍ ē gbɔjā nīi olu̍ku̍rɔ̍ ge̍ē nāa yī ure̍ yī u̍ku̍rɔ̍ yī ɔ̄chī ūkpo̍he ma̍. I̍gri̍imɔ̍ɔgɔ ɛta̍ yī igu nīi re̍ka iba̍li ma̍ ē chī gbɔjā nīi olu̍ku̍rɔ̍ ge̍ē nāa yī ure̍ yī u̍ku̍rɔ̍ yī ɔ̄chī ūkpo̍he ma̍. Ala̍ e̍e de yanɔ̄ nīi e̍ ya̍ la īkpō yī o̍līifu ma̍ ba̍la ɛ̍mwɔ̄ ɔla̍ā bīya ni̍ chɔ̍ɔ!”

⁷ Bɛ̍ɛ̄nɛ̄ ma̍, Ɔyɔ̍ɔ̄nyīyɛrɔ̄ ɔla̍ā gba̍a de akpɔ yī ɛbɛ ɔmɛnɛ nīi ha̍aba ku̍ īpū ɔ̍lɔma̍ ma̍ hɛ̍. Ɔpɔ̄ɔpɛ̄, ɔmɛnɛ yī ɛjā ɔhɔ̄leyī ɛla̍ā ka bɛ̍ɛ̄nɛ̄ hīka, “Yewā!”

⁸ N deyīrɛ ma̍, n ma̍ wɔnya ɔlɛbruūbruū ɔha̍ rɛ abɔ̍ɔ. Ɔ̄chɛ nīi che la anu̍ ma̍ re̍ka Rikū; Ayekū Oli̍gba̍o̍ chī ku ɔ̍ la u̍tu ploploplo yɛ abɔ̍ɔ. E̍ de wɔhu̍ de wa̍ nīi e̍ ge̍ē bī wɔhu̍ yī wāā ūkpo̍he lipu̍ yī ɛnɛ yī ajɛyɛ̄ɛchɛ wa̍a̍. Rikū Ɔla̍ā ba̍la Ayekū Oli̍gba̍o̍ lwɔhu̍ ge̍ē bī lɛwu̍ okpo̍ōkpo̍, ba̍la lɛmiyɛ ɔdwɔ̄bi̍, ba̍la iyē oko̍ōku̍ ba̍la ɛbɛ̍la̍chi̍ ē kpo̍ āchɛ ē ngmo̍ amu la ajɛyɛ̄ɛchɛ.

⁹ Ɔyɔ̍ɔ̄nyīyɛrɔ̄ ɔla̍ā gba̍a de akpɔ yī ɛbɛ ɔmɛrwɔ̄ nīi ha̍aba ku̍ īpū ɔ̍lɔma̍ ma̍ hɛ̍ bɛ̍ɛ̄nɛ̄. Ɔpɔ̄ɔpɛ̄, n ma̍ uhu yī āchɛ nīi e̍ de wa̍ ngmo̍ ma̍ abɔ̍ɔ la ihi̍yajɛ yī ɛbɛ ode ɔjā pā Ɔwɔ ɔpɔ̄pā. Uhu yī āchɛ nīi e̍ ngmo̍ wā wu̍chē yī lɛlā yī Ɔwɔ nīi āchɛ ɛla̍ā koko̍o de āchɛ ma̍, ba̍la itɛ̍ɛhi̍yɛ̍ yī lɛlā yī Ɔwɔ nīi e̍ tū hwɔhi hwɔhi ma̍ nɛ.

¹⁰ Uhu ɛla̍ā wa̍a̍ tɔ̍ɔna gbōō hīka, “Ādādā Ɔnɔ̄kɔ̄kū! Awɔ - ɔ̄chɛ ɔnɛ̄ɛhɛhi ba̍la olēchi̍ lēchi̍ nɛ. O̍ ge̍ē ligbo̍ kana̍ o̍bū nīi a ge̍ē hɛ̍ alipu̍ yī yɛchɛ ɛla̍ā lɛpɔ̄ ɔdwɔ̄bi̍, ya̍ wā ichi̍ ku̍re̍ yī ongmo̍ōngmo̍ nīi e̍ kpo̍ alɔ ngmo̍ ma̍?”

¹¹ E̍ de aru̍ ɔkwajɛ ɔnɛ̄rɛ̍ɛ̄rɛ̍ de ɔnyɔnyɛ ɔnyɔnyɛ lipu̍ yī wā wa̍a̍. E̍ ka de wa̍ ka ɛ̍lɛ ge̍ myɛ̍nyɛ̍ kpɔ̍ɔ̍ gbo̍ yɛ̄grāa ɔha̍ yɛ̍yɛ̍ o̍bū; ɛ̍lɛ ge̍ hɛ̍gbɛ̄ɛ̄ lɛbɛ nīi ɛ̍lɛ ge̍ kpo̍ āchɛ nīi - ɔ̍lɔ āchɛ yī Ɔwɔ bāa ɛ̍lɛ ma̍, ba̍la aɛ̍nɛ̍ yī ɛ̍lɛ ehēhī ngmo̍ i̍ngi̍ngɔ̍ɔ bāa ɛ̍lɛ ma̍, hɛ̄ɛbɛ nīi ɛ̍lɛ ge̍ de gɔ̄grāa o̍bū.

¹² Bɛ̍ɛ̄nɛ̄, n gba̍a ma̍ nīi Ɔyɔ̍ɔ̄nyīyɛrɔ̄ ɔla̍ā de akpɔ yī ɛbɛ omerīiyī nīi ha̍aba ku̍ īpū ɔ̍lɔma̍ ma̍ hɛ̍ hī ɔ̄. Ɔpɔ̄ɔpɛ̄, ajɛ wa̍a̍ he̍ejē de yu̍uhuhwi. Yɛnɔ nīi che la ichō ma̍ de gbo̍bi̍ bāa a̍pu onōbi̍ ɔlɛku̍raku̍ra ma̍. Ɔwīyā de lɔ̍a̍ kpɛ̍ɛ bāa yeyī ma̍.

¹³ I̍nyi̍nyɔ̍ɔwīyā ha̍ābɔ̄ wā la ajɛ kpɔ̍tɔ̍kpɔ̍tɔ̍ bɔ̄ɔkɔ nīi ahuhu ɔnɔ̄kɔ̄kū ē ngmla̍a īkpō yī ejū hunū la idīgbo̍ ma̍.

¹⁴ Akpɔ̍ɔwɔ pīyēbi̍ tū gāa hiyuu i̍ngɔ̍ɔ ke̍e̍ bāa ɔjā oti̍īpū gblāa ɔla̍ā nīi e̍ yɛ ē hā ɔ̄ ɔhɔ̄hā ngmri̍ngmri̍ ma̍. Yɛwu ɔha̍lɔha̍ wa̍a̍ ba̍la ajɛ nīi hɛ̍che la iyārɛ̄ɛpa yī li̍hu ma̍ ku̍ kpo̍ hu hī ɛbɛ nīi e̍ rɛ o̍bū ma̍.

¹⁵ Bɛ̍ɛ̄nɛ̄ ma̍, ɛchwɔ̄lɛ̍ yī yɛchɛ wa̍a̍, ba̍la āchɛ odeyīrɛ ɛbɛ, ba̍la a̍dā icho̍ojiya yī wā, ba̍la alwɔdu, ba̍la ɛmaga, ba̍la āchɛ ehēhī wa̍a̍ jimini, tūla afiyɛ ba̍la āchɛ ɛlamu kpo̍ iyī wā ge̍ trɛ̍ba la wɔ̄gɔ̄ ba̍la ihi̍yajɛ yī achɔ̄ yī yɛwu.

¹⁶ E̍ drɛ̄ɛgba ē hī yɛwu ba̍la achɔ̄ ɔnɔ̄kɔ̄kū ɛla̍ā ka ɛ̍lɛ ge̍ mi̍ya che aa̍ la ichō gɛ! Ɛ̍lɛ ge̍ ta̍ aa̍ trɛ̍ba hī ɔtū ngurangura yī Ɔyɔ̍ɔ̄nyīyɛrɔ̄ ɔla̍ā gɛ!

¹⁷ Ɔ̄chī ɔnɔ̄kɔ̄kū nīi ɔ̍lɔ ge̍ē de ɔtū ngurangura yī ɔ̍lɔ ɔla̍ā hi̍yɛchɛ ma̍ ɔ̍lɔ de gbajɛ mɛ̍ oo! Ɔ̄nyɛ kpɛ̍ɛ ɔ̍lɔ chī ge̍ē bī ɔla̍ yī ɔtū ngurangura yī ɔ̍lɔ ɔla̍ā mɛ ma̍ ēēe?