ODE HI̍YƐCHƐ 5 - Ye̳ka Onīpīpē̳ Yī O̳wo̳

Rīgā yī Ɔyɔ̍ɔ̄nyīyɛrɔ̄ yī Ɔwɔ

¹ Bɛ̍ɛ̄nɛ̄ ma̍, n ma̍ ɔjā oti̍īpū gblāa ɔha̍ nīi e̍ ē hā ɔ̄ ɔhɔ̄hā ngmri̍ngmri̍ ma̍. Ɔ̄chɛ nīi hyāhɔ̄ la atɛ̍ ɔla̍ā ma̍ bī abɔ̍ɔ la abɔ̄ yī nū. E̍ tɔ̍ɔ̄jā gblāa la anu̍ wa̍a̍ la oe̍ ɛpɛpa yī nū wa̍a̍. E̍ ha̍aba ku̍ ɔ̄ la akpɔ arāapa.

² Bɛ̍ɛ̄nɛ̄ ma̍, n ma̍ ɔyɛ̍ɛ̄chɛ̄rɔ̄ yī Ɔwɔ ɔnɔ̄kɔ̄kū ɔha̍ nīi o̍ wā ge̍ tɔ̍ɔna hwōō hīka, “Ɔ̄nyɛ ngma̍ la oge̍ wī akpɔ nūma̍ hɛ̄ɛbɛ lwāa īpū nūma̍ ma̍ ēēe?”

³ E̍ i̍ ma̍ ɔ̄chɔ̄chɛ abɔ̍ɔ la ichō, kɛ̄ɛ amu la ajɛ, kɛ̄ɛ abɔ̍ɔ la ayekū nīi ngma̍ la ɔlwāa īpū ɔ̍lɔma̍ ma̍ mɛ ni̍.

⁴ N ta̍ kpu̍u lɛgba bɛ̍ɛ̄nɛ̄. Wu̍chē oji̍ nɛ, e̍ i̍ ma̍ ɔ̄chɔ̄chɛ nīi ngma̍ la ɔlwāa īpū ɔla̍ā ma̍ ɔ̄ gɛ ni̍.

⁵ Bɛ̍ɛ̄nɛ̄, ɔgabɔ̄ ɔha̍ da u hīka, “A ā drɛ̄ɛgba ni̍! Ma̍ gɛ ko̍ō! Wɔ̍ga̍ba̍ Oyo̍oliju̍da nīi - ībī yī Ide̍bīidi ma̍ yɛ̍ɛ̄ngrɔ̄ɔ de wɔhu̍ nāa mɛ̍. Anu̍ lwɔhu̍ ge̍ē hɛ̍ akpɔ arāapa ɛla̍ā o̍bū lwāa īpū ɔla̍ā ma̍ ē mɛ a̍nɛ.”

⁶ Bɛ̍ɛ̄nɛ̄ ma̍, n wā ge̍ ma̍ Ɔyɔ̍ɔ̄nyīyɛrɔ̄ ɔha̍ nīi rɛ abɔ̍ɔ la iyārɛ̄ɛpa yī atɛ̍ ɔla̍ā. Ɛjā ɔhɔ̄leyī ɛnɛnɛ ɛla̍ā ba̍la ɛgabɔ̄ ɛla̍ā wa̍a̍ gblāa abɔ̍ɔ ta̍kakatū ɔ̄. Ɔyɔ̍ɔ̄nyīyɛrɔ̄ ɔla̍ā lɛ bɔ̄ɔjā nīi e̍ de ɔ̍ ngmo̍ o̍bū ma̍. O̍ tū ajī arāapa ba̍la īkprī arāapa. Ɛjā arāapa arāapa nūma̍ - uhu arāapa yī Ɔwɔ nīi o̍ de tɛ̄rɔ̄ ga lipu̍ yī yɛchɛ wa̍a̍ ma̍ nɛ.

⁷ Ɔyɔ̍ɔ̄nyīyɛrɔ̄ ɔla̍ā gāa bɛ̍ɛ̄nɛ̄ ge̍ de īpū ɔla̍ā nāa bū la abɔ̄ līre̍ yī Ādā ɔla̍ā nīi hyāhɔ̄ abɔ̍ɔ la atɛ̍ ma̍.

⁸ O̍ ya̍ i̍ngɔ̍ɔ ɔpɔ̄ɔpɛ̄ ma̍, ɛjā ɔhɔ̄leyī ɛla̍ā nīi lɛ ɛnɛ ma̍ ba̍la ɛgabɔ̄ āchɛ ohu che ɛnɛ ɛla̍ā ngma̍ ta̍gbo la ajɛ de Ɔyɔ̍ɔ̄nyīyɛrɔ̄ ɔla̍ā. Ɔnyɔnyɛ bī lɛ̄ngū ba̍la ɔjā oni̍pī kwɛ̍kwɛ̍ mōmu lipu̍ yī u̍kpu̍ūhā ɛha̍ nīi e̍ ya̍ la igo̍olu igo̍olu ma̍. Ɛjā oni̍pī kwɛ̍kwɛ̍ ɛla̍ā re̍ka ɔhā yī āchɛ yī Ɔwɔ a̍nɛ.

⁹ E̍ gwe̍ejē onīpīpɛ̄ ɔha̍ bɛ̍ɛ̄nɛ̄ hīka, “Awɔ kpɛ̍ɛ ngma̍ la ɔnāa īpū ɔla̍ā a̍nɛ. Awɔ ngma̍ la ɔhɛ̍ akpɔ ɛla̍ā nīi ku̍ ɔ̄ bī ma̍ a̍nɛ. Wu̍chē oji̍ nɛ, e̍ de wɔ ngmo̍ ya̍ ɔpɔ̄pā mɛ̍. Bū la ɔpīyaku̍ yī wɔ, a de āchɛ̄ɛchɛ wa̍a̍ ra̍ de Ɔwɔ. Ɔcha ɔha̍lɔha̍ wa̍a̍, ba̍la ipwɔ̍ɔma ɔha̍lɔha̍ wa̍a̍ ba̍la ipwɔ̍ɔcha ɔha̍lɔha̍ wa̍a̍ ba̍la ita āchɛ̄ɛchɛ ɔha̍lɔha̍ wa̍a̍ nɛ.

¹⁰ A de wa̍ pīya wɔma yī aligbe yī Ɔwɔ mɛ̍, hɛ̄ɛbɛ nīi e̍ ge̍ē hɔ̍chɛ̍ ē de Ɔwɔ yī alɔ. Bū la ɛbɛ ɔla̍ā, aa̍ ge̍ē deyīrɛ ajɛyɛ̄ɛchɛ nūma̍ a̍nɛ.”

¹¹ Bɛ̍ɛ̄nɛ̄ nīi n gba̍a yɛ ē deyīrɛ ma̍, n pɔ̍ɔkɔ yī u̍nu̍nɔ che u̍nɔ ohūkū yī ayɛ̍ɛ̄chɛ̄rɔ̄ yī Ɔwɔ. E̍ gblāa abɔ̍ɔ ta̍kakatū atɛ̍ ɔla̍ā ba̍la ɛjā ɔhɔ̄leyī ɛla̍ā nīi lɛ ɛnɛ ma̍ ba̍la ɛgabɔ̄ ɛla̍ā wa̍a̍.

¹² Aa̍ wa̍a̍ gwe̍ejē bāa ɔtātā ma̍ hīka, “Ɔyɔ̍ɔ̄nyīyɛrɔ̄ nīi e̍ de ɔ̍ ngmo̍ ya̍ ɔpɔ̄pā ma̍, anu̍ ngma̍ la ɔnāa wɔhu̍, ba̍la wɔdu, ba̍la lɛlā ojo̍ōje̍ ka̍ka̍, ba̍la a̍ga̍ba̍, ba̍la otūlichō, ba̍la rīgā ba̍la ɔkɔ̄kā a̍nɛ oo!”

¹³ Bɛ̍ɛ̄nɛ̄ ma̍, n gba̍a pɔ̍ɔkɔ yī ɛjā wa̍a̍ nīi Ɔwɔ ya̍ ma̍: Ɛjā wa̍a̍ nīi gblāa abɔ̍ɔ la ichō, ba̍la enīi hɔ̄ amu la ajɛ, ba̍la enīi gblāa la ayekū, ba̍la enīi tū la yenyi ma̍; ɛjā wa̍a̍ jimini nīi Ɔwɔ ya̍ nīi gblāa la ɛbɛha̍ ɛbɛha̍ wa̍a̍ gbrugudu ma̍ yɛ ē gwe̍ejē hīka, “Ɔkɔ̄kā ba̍la otūlichō ba̍la rīgā ba̍la ɔgɔnyɛ ɔgɔ̄ga ge̍ - iyī Ādā nīi hɔ̄ la atɛ̍ ma̍ ba̍la Ɔyɔ̍ɔ̄nyīyɛrɔ̄ ɔla̍ā i̍ngi̍ngɔ̍ɔ kpɛɛ ku yɛ̄grāa i̍mɔ̄mɛni̍!”

¹⁴ Ɔpɔ̄ɔpɛ̄, ɛjā ɔhɔ̄leyī ɛla̍ā nīi lɛ ɛnɛ ma̍ hīyɔkɔ hīka ɔ̍lɔ ge̍ lɛ i̍ngɔ̍ɔ. Ɛgabɔ̄ ɛla̍ā wa̍a̍ ngma̍ ta̍gbo la ajɛ ya̍ otūlichō de ɔ̍.