ODE HI̍YƐCHƐ 4 - Ye̳ka Onīpīpē̳ Yī O̳wo̳

Otūlichō ɔyɔ̍ɔ̄ya̍ abɔ̍ɔ la Ichō

¹ Yɛ̄grāa ɔla̍ā, n gba̍a myɛ̍ma̍ ɔlɛbɛ̍bi̍ ɔha̍. N ma̍ ɔpu ɔha̍ nīi lwāa tɔ̍ɔ̄ta̍ abɔ̍ɔ la ichō. Ɔkɔlɛ̄lā ɔlɛfrāfrā bāa lɛjī ɔha̍ nīi n po̍ i̍gba̍a nīi yɛ ē kɛlā tāa ami ma̍ gba̍a ka grāa ami hīka, amɔ̍lɔ ge̍ yewā la ichō hɛ̄ɛbɛ nīi anɔ̍lɔ ge̍ chabɔ̄ yī lɛlā nīi - ɔ̍lɔ ge̍ē ya̍ la ɔ̄chī iyɔ̄bū ma̍ hu̍ amɔ̍lɔ.

² Ɔpɔ̄ɔpɛ̄, Uhu yī Ɔwɔ kla̍ ami i̍ngɔ̍ɔ bri̍bri̍bri̍. Abɔ̍ɔ la ichō, n ma̍ atɛ̍ ɔha̍ nīi ɔ̄chɛ ɔha̍ hɔ̄ abɔ̍ɔ la anu̍.

³ Eyī yī ɔ̄chɛ ɔlɔjā ho̍ōhu̍ kpɛ̍ɛ bāa achɔ̄ ita ɔha̍ nīi - achɔ̄ ɔlamu ɔlamu gba̍a̍ re̍ka ija̍si̍pa ba̍la ikane̍liya ma̍. Ɔjɔ̍ ɔnɔ̄kɔ̄kū ɔha̍ hɛ̍ ta̍kakatū atɛ̍ nīi o̍ hyāhɔ̄ ma̍. Ɛ̍na yī ɔjɔ̍ ɔla̍ā lɛ i̍ngɔ̍ɔ ke̍e̍ bāa iyī achɔ̄ oli̍hi̍hi̍ ɔha̍ nīi re̍ka ɛ̍mɛ̄rāadi ma̍.

⁴ Ɔchi̍īkpā ɛha̍ lɛ ohu che ɛnɛ gblāa abɔ̍ɔ ta̍kakatū atɛ̍ ɔla̍ā; ɛgabɔ̄ āchɛ ohu che ɛnɛ chī hyāhɔ̄ abɔ̍ɔ la aa̍ i̍ngɔ̍ɔ wa̍a̍. Ɛgabɔ̄ ɛla̍ā tū ɛjā ɔnɛ̄rɛ̍ɛ̄rɛ̍, gba̍a kla̍ okpo ɔkla̍lɛhu̍ yī igo̍olu igo̍olu cha̍cha̍.

⁵ Bū abɔ̍ɔ la atɛ̍ ɔla̍ā, ɔla̍ yī yakplɔ̍ɔwɔ yɛ abɔ̍ɔ ē kɔ̄ bāa ɔmanyamanya ma̍, ojiya ɔnɔ̄kɔ̄kū ba̍la yakpla̍ ogbōgbo rɛ abɔ̍ɔ i̍ngi̍ngɔ̍ɔ. Otīnīkā arāapa ɛha̍ nīi e̍ mwɔla̍ tū wā ma̍ gblāa abɔ̍ɔ ē chɔ̄chɛ̄ la iyɔ̄bū yī atɛ̍ ɔla̍ā. Aa̍ re̍ka uhu arāapa yī Ɔwɔ a̍nɛ.

⁶ Abɔ̍ɔ la iyɔ̄bū yī atɛ̍ ɔla̍ā, ɔjā ɔha̍ rɛ abɔ̍ɔ kpɛ̍ɛ bāa li̍hu nīi - inyinyɔ i̍ngɔ̍ɔ ke̍e̍ ma̍. O̍ lɛ chra̍da̍da̍ i̍ngɔ̍ɔ ke̍e̍ bāa ɔjā nīi re̍ka ikri̍si̍ta ma̍. Abɔ̍ɔ la ɔta̍kakatū yī atɛ̍ ɔla̍ā, ɛjā ɔhɔ̄leyī ɛha̍ lɛ ɛnɛ gblāa abɔ̍ɔ la ɛ̍ngɔ̍ ɛnɛnɛ yī atɛ̍ ɔla̍ā. Ɛjā ɛla̍ā tū īkprī yɛ̄mɛ̄ kpɛ̍ɛ, gala okwi̍ihi ba̍la iyɔ̄bū wa̍a̍.

⁷ Ɔrāarāa lɛ bāa wɔ̍ga̍ba̍ ma̍. Ɔmɛpa lɛ bāa ɔ̍drɔ̄ yī egedebi̍ya̍ ma̍. Ɔmɛta̍ tū eyī bāa ɔ̄chɛ̄ɛchɛ ma̍. Ɔmɛnɛ lɛ bāa oge nīi yɛ ē wōwu ma̍.

⁸ Ɔnyɔnyɛ lipu̍ yī ɛjā ɛnɛnɛ ɛla̍ā tū acha̍ erīiyī. E̍ chī tū īkprī la ɛbɛha̍ ɛbɛha̍ cha̍cha̍, gala lipu̍ yī wā ba̍la yɛchɛ yī wā. La otu̍ oo, yɛnɔ oo, e̍ ē gblāa abɔ̍ɔ ē gwe̍ejē i̍ngɛ̍ɛ̄nɛ̄ hīka, “Ɔnɛ̄ɛhɛhi, ɔnɛ̄ɛhɛhi, ɔnɛ̄ɛhɛhi ge̍ iyī Ādādā Nīi - Ɔwɔ, Ɔgɔnyɛ Ɔnɔ̄kɔ̄kū Ma̍! O̍ hɔ̄ gbi̍chɛ gbi̍chɛ; o̍ hɔ̄ u̍ma̍ama; o̍ chī ge̍ē wā we̍!”

⁹ Ɔ̄chɛ nīi hyāhɔ̄ abɔ̍ɔ la atɛ̍ ɔla̍ā ma̍, anu̍ nīi ɛjā ɔhɔ̄leyī ɛnɛnɛ ɛla̍ā yɛ ē gwe̍ejē ɔla̍ā de rīgā ba̍la otūlichō ba̍la oto̍gbo̍ de anu̍ nīi ge̍ē hɔ̄leyī ku yɛ̄grāa i̍mɔ̄mɛni̍ ma̍ a̍nɛ. Ɛjā ɛnɛnɛ ɛla̍ā ge̍ yɛ ē ya̍ i̍ngɔ̍ɔ mɛ̍,

¹⁰ ɛgabɔ̄ āchɛ ohu che ɛnɛ ɛla̍ā ē gbo la ajɛ ē de ɔ̄chɛ nīi hyāhɔ̄ abɔ̍ɔ la atɛ̍ ɔla̍ā ma̍, ē ya̍ otūlichō de anu̍ nīi ge̍ē hɔ̄leyī ku yɛ̄grāa i̍mɔ̄mɛni̍ ma̍. E̍ lwāa okpo ɔkla̍lɛhu̍ yī wā gblāa la ajɛ la iyɔ̄bū yī atɛ̍ ɔla̍ā bɛ̍ɛ̄nɛ̄ hīka ɔ̍lɔ ge̍,

¹¹ “Awɔ - Ādādā yī alɔ ba̍la Ɔwɔ yī alɔ a̍nɛ. Awɔ ngma̍ la ɔnāa rīgā ba̍la otūlichō ba̍la wɔhu̍ a̍nɛ. Wu̍chē oji̍ nɛ, awɔ ya̍ ɛjā wa̍a̍ a̍nɛ. Bū lɔkɔ nīi ā chikpo̍ ma̍ nīi ɛjā wa̍a̍ chī hɔ̄, gba̍a lɛ ɔhɔ̄leyī a̍nɛ.”