ODE HI̍YƐCHƐ 3 - Ye̳ka Onīpīpē̳ Yī O̳wo̳

Ɛrɔ̄ yī Ogrēeyī yī āchɛ yī Ɔwɔ la Isa̍dīisi

¹ “Lɛlā nīi a ge̍ē ka ē tū la īpū tɛ̄rɔ̄ hu ɔyɛ̍ɛ̄chɛ̄rɔ̄ yī Ɔwɔ nīi ē deyīrɛ ogrēeyī yī āchɛ yī Ɔwɔ nīi hɔ̄ la Isa̍dīisi ma̍ hɔ̄ ma̍ a̍nɛ: “Ami nīi bī uhu arāapa yī Ɔwɔ ba̍la i̍nyi̍nyɔ̍ɔwīyā arāapa ma̍ tɛ̄rɔ̄ nūma̍ hu ala̍ a̍nɛ. N je̍ ɔjā nīi ala̍ yɛ aa̍ ē ya̍ ma̍. N jo̍ōkū hīka ala̍ ko̍ōku̍ nyaa mɛ̍ ma̍, ala̍ e̍e yɛ ē ro̍ohu ka ala̍ ɔ̍lɔ hɔ̄leyī we̍.

² Ala̍ ā hye̍ēyī gɛ, lɛbɛ nīi ala̍ ge̍ ya̍ nīi ɔjā nīi ala̍ e̍e lɛ we̍ ma̍ ge̍ lwɔhu̍ brii, igbo̍ nīi o̍ hīyɔtū ligbo̍ ligbo̍ we̍ ni̍ ma̍. Wu̍chē oji̍ nɛ, n ma̍ hīka ɔjā nīi ala̍ ya̍ ma̍ i̍ hwɔhi gɔ̄grāa la eyī yī Ɔwɔ yī u we̍ ni̍.

³ Je̍ka aa̍ ala̍ bla lɛlā nīi e̍ ngū ala̍ ba̍la ɔkɔ nīi ala̍ po̍ ma̍? Ala̍ ā yɛ̍ɛ̄lā ɔ̍lɔma̍ gɛ! Ala̍ ā pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ wa̍a̍ gɛ. Ala̍ i̍ ge̍ hye̍ēyī ni̍, n ge̍ē wā dikpo̍ ē ba̍ ala̍ lwɛ̍ɛ̍ bāa uwī ma̍; ala̍ i̍ ge̍ē je̍ yɛ̄grāa nīi n ge̍ē gbajɛ ē wā ma̍ ni̍ lachi̍lachi̍.

⁴ Āchɛ ɛha̍ yī ala̍ pi̍nyɛ̍ abɔ̍ɔ la Isa̍dīisi de ɛjā otūlibi̍īyē yī wā lā bāa ɔcha̍ri̍cha̍ri̍ ma̍. Aa̍ ɛla̍ā ge̍ē tīkpo̍ ē tāa ami la āɛ̄jā ɔnɛ̄rɛ̍ɛ̄rɛ̍ fre̍te̍te̍ nīi aa̍ ge̍ē tū ma̍. Wu̍chē oji̍ nɛ, aa̍ ngma̍ la ɔya̍ i̍ngɔ̍ɔ.

⁵ Āchɛ nīi yɛ̍ɛ̄ngrɔ̄ɔ ma̍, n ge̍ē de ɛjā otūlibi̍īyē ɔlɛfre̍te̍te̍ i̍ngɔ̍ɔ ɔla̍ā ru wa̍. N i̍ ge̍ē de riyī yī wā wu̍ hī īpū nīi riyī ɔhɔ̄leyī tū ma̍ ni̍. N ge̍ē de ē ka gbra abɔ̍ɔ la iyɔ̄bū yī A̍dā yī u ba̍la ayɛ̍ɛ̄chɛ̄rɔ̄ yī nū hīka aa̍ - āchɛ yī u nɛ.

⁶ “Ala̍ ge̍ tū arɔ̄ ɔplɛ̍ɛ̄lā, ɔ̍lɔma̍ ala̍ ā darɔ̄ku lɛlā nīi Uhu yī Ɔwɔ yɛ ma̍ ē ka ē de ogrēeyī yī āchɛ yī Ɔwɔ nūma̍ wa̍a̍ ma̍ gɛ!

Ɛrɔ̄ yī Ogrēeyī yī āchɛ yī Ɔwɔ la Ifiladɛ̍fiya

⁷ “Lɛlā nīi a ge̍ē ka ē tū la īpū tɛ̄rɔ̄ hu ɔyɛ̍ɛ̄chɛ̄rɔ̄ yī Ɔwɔ nīi ē deyīrɛ ogrēeyī yī āchɛ yī Ɔwɔ nīi hɔ̄ la Ifiladɛ̍fiya ma̍ hɔ̄ ma̍ a̍nɛ: “Ami nīi - ɔ̄chɛ ɔnɛ̄ɛhɛhi ba̍la olēchi̍ lēchi̍ ma̍ tɛ̄rɔ̄ nūma̍ hu ala̍ a̍nɛ. Ami - ɔ̄chɛ obī oyi̍īgbɔ̄gɔ̄rɔ̄ yī Ide̍bīidi a̍nɛ. Ami ē lwāa ɔpu nīi ɔ̄chɔ̄chɛ i̍ ē gū ɔ̄ mɛ ē gɛ ni̍ a̍nɛ. Ami chī gū ɔpu nīi ɔ̄chɔ̄chɛ i̍ ē lwāa anu̍ mɛ ē gɛ ni̍ a̍nɛ.

⁸ N je̍ ɔjā nīi ala̍ ē ya̍ ma̍. N jo̍ōkū hīka ala̍ lwɔhu̍ pi̍nyɛ̍. N jo̍ōkū hīka ala̍ yɛ ē ga la ɔgɔgu yī lɛlā ongōngū yī u hwɔhi hwɔhi mɛ̍, ala̍ i̍ wa̍ābɔ̄ yī lɛlā yī u ni̍. N lwāa ɔpu tɔ̍ɔ̄ta̍ lā amu de ala̍; ɔ̄chɔ̄chɛ i̍ ge̍ē tu̍ ɔ̄ gū hɛ̍ ala̍ ē tū mɛ ni̍.

⁹ Ala̍ ma̍ gɛ ko̍ō! Aa̍ ɛla̍ā nīi - āchɛ yī Isa̍tan ma̍, alarīmɛ̄ ɛla̍ā nīi ka aɛ̍lɛ - Iju̍u nɛ nīi i̍ chī Iju̍u ni̍ ma̍, n ge̍ē ya̍ lɛbɛ nīi e̍ ē wā dikpo̍ ē ba̍ ala̍ ge̍ē kū la ajɛ la apli̍kpo̍ yī ala̍. Bū la ɛbɛ ɔla̍ā, e̍ ge̍ē jo̍ōkū wa̍a̍ hīka amɔ̍lɔ yɔ̍ɔhɔtū yī ala̍ gblɛ̍ɛgblɛ̍ɛ.

¹⁰ Wu̍chē lɔkɔ nīi ala̍ po̍ ɔkɔlɛlā yī u, mlɔtū i̍ngɔ̍ɔ kpɔ̍ɔ̍ ma̍, n ge̍ē de ala̍ ē gbōgbō ke̍e̍ ē hī akanya nīi yɛ aa̍ ge̍ē wā la ajɛyɛ̄ɛchɛ ma̍. Akanya ɔla̍ā - ɔmama̍ de āchɛ wa̍a̍ la ajɛyɛ̄ɛchɛ nɛ.

¹¹ N yɛ abɔ̍ɔ ge̍ē hli̍kpa̍ ā wā mɛ̍. Ala̍ ā de ɔjā nīi ala̍ lɛ ma̍ gbōgbō yɛ̍yɛ̍ gɛ, hɛ̄ɛbɛ nīi ɔ̄chɔ̄chɛ ge̍ e̍e nu̍ ala̍ ɔjā nīi ala̍ ge̍ē gbo wu̍chē yī yɛngrɔ̄ɔ ɔyɔ̍ɔ̄ya̍ ma̍ ni̍.

¹² Ɔ̄chɛ nīi ge̍ē yɛ̍ɛ̄ngrɔ̄ɔ ma̍, n ge̍ē de ɔlɔjā pīya ɔchi̍yɔ̍ɔda nīi ge̍ē ku̍ u̍nu̍ yī Ɔwɔ yī u ē bī ma̍. Ɔlɔjā i̍ ge̍ē pīya ē hī abɔ̍ɔ ge̍ē gbo̍ gɛ ni̍. N ge̍ē ta̍ riyī yī Ɔwɔ yī u ē gblāa la anu̍. N ge̍ē gba̍a ē ta̍ riyī yī Ijɛru̍sālɛm onīpīpɛ̄ nīi ge̍ē bū abɔ̍ɔ la ichō la abɔ̄ yī Ɔwɔ yī u wā ma̍ gblāa la ɔlɔjā. Anu̍ - ipwo̍gra yī Ɔwɔ yī u a̍nɛ. N ge̍ē gba̍a ē ta̍ riyī onīpīpɛ̄ yī ami ɔlɔjā che la ɔ̄chɛ ɔlɔjā.

¹³ “Ala̍ ge̍ tū arɔ̄ ɔplɛ̍ɛ̄lā, ɔ̍lɔma̍ ala̍ ā darɔ̄ku lɛlā nīi Uhu yī Ɔwɔ yɛ ma̍ ē ka ē de ogrēeyī yī āchɛ yī Ɔwɔ nūma̍ wa̍a̍ ma̍ gɛ!

Ɛrɔ̄ yī Ogrēeyī yī āchɛ yī Ɔwɔ la Ileyode̍siya

¹⁴ “Lɛlā nīi a ge̍ē ka ē tū la īpū tɛ̄rɔ̄ hu ɔyɛ̍ɛ̄chɛ̄rɔ̄ yī Ɔwɔ nīi ē deyīrɛ ogrēeyī yī āchɛ yī Ɔwɔ nīi hɔ̄ la Ileyode̍siya ma̍ hɔ̄ ma̍ a̍nɛ: “Ami nīi re̍ka Amɛɛn ma̍, ami nīi - itɛ̍ɛhi̍yɛ̍ olēchi̍ lēchi̍ nīi e̍ de ɔtū che ɔ̍ ma̍, ami nīi - owu̍tu yī ɛjā wa̍a̍ nīi Ɔwɔ yɔ̍ɔ̄ya̍ ma̍, ami tɛ̄rɔ̄ nūma̍ hu ala̍ a̍nɛ.

¹⁵ N je̍ ɔjā nīi ala̍ ya̍ ma̍. N jo̍ōkū hīka ala̍ i̍ hɔ̄hīya dɔ̍dɔ̍ kɛ̄ɛ kwɔ̍la̍ kpa̍kpa̍ ni̍. Ɔ̄chɛ pīya ka ala̍ lɛ bāa ɔha̍ lipu̍ yī lɛlā ɛpɛpa nūma̍ ma̍!

¹⁶ Wu̍chē lɔkɔ nīi ala̍ lɛ biyebiye ji nīi ala̍ i̍ hɔ̄hīya dɔ̍dɔ̍ kɛ̄ɛ kwɔ̍la̍ kpa̍kpa̍ ni̍ ma̍, n ge̍ē de ala̍ mu ē hunū hī iyī u oko̍o.

¹⁷ Ala̍ ē ka hīka ala̍ ɔ̍lɔ gbwɔdu, lɛ ɛjā mwɛbɛ; ɔjɔ̄jā ɔ̍lɔ i̍ ku ala̍ lɛha̍ ni̍. Ɔ̄chɛ pīya ka ala̍ jo̍ōkū lɔkɔ nīi ala̍ tū la īlāanyī gba̍a̍, de lɛhɛ̍ha̍ gba̍a̍ ma̍! Ala̍ nīi gbyeklo̍, yɛ aa̍ la ibi̍īyē ɛwɛwa, gba̍a priyī gblāa aa̍ ma̍?

¹⁸ N ā ka de ala̍ lɔkɔ nīi ala̍ ge̍ē ya̍ ma̍ gɛ: Ala̍ ā wā ge̍ ra̍ igo̍olu ɔlamu ɔlamu nīi e̍ gbla̍a anu̍ ya̍ la ɔla̍ ma̍ bū la abɔ̄ yī u, hɛ̄ɛbɛ nīi ala̍ ge̍ gbwɔdu. Ala̍ ā wā ge̍ ra̍ ɛjā otūlibi̍īyē nīi lɛ̍rɛ̍ fra̍ta̍ta̍ ma̍ nīi ala̍ ge̍ de tū kla̍ ibi̍īyē ɛwɛwa oliwēyī iwēyī yī ala̍ ɛla̍ā. Ala̍ gba̍a wā ge̍ ra̍ ɔchi̍ nīi ala̍ ge̍ de ta̍ la eyī yī ala̍ ɛla̍ā nīi i̍ ē myɛ̍ma̍ ni̍ ma̍ hɛ̄ɛbɛ nīi ala̍ ge̍ myɛ̍ma̍.

¹⁹ Āchɛ nīi hi um ɔtū ma̍ nīi n ē kalābi̍ ē tāa aa̍ ē ya̍ wā ichi̍ a̍nɛ. O̍ lɛ i̍ngɔ̍ɔ ma̍, ala̍ ā pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ la olēchi̍ lēchi̍ yī nū gɛ.

²⁰ Ala̍ ma̍ gɛ ko̍ō! N yarɛ amu la oko̍prīinu ē de abɔ̄ ku ɔpu mɛ̍. Ɔ̄chɛ nīi ge̍ pɔ̍ɔkɔ yī u de ɔpu lwāa hī ɛbɛ de u, n ge̍ē chɛ̄ ga u̍nu̍ yī ɔlɔjā. N ge̍ē kū ojōre̍ ē tāa anu̍; anu̍ titi ge̍ē re̍ ba̍la ami.

²¹ Āchɛ nīi yɛ ē yɛ̍ɛ̄ngrɔ̄ɔ ma̍, n ge̍ de wɔhu̍ ē de wa̍ nīi e̍ ē hɔ̄ bla̍a ami abɔ̍ɔ la atɛ̍ yī u gala ɔgɔgu lɔkɔ nīi ami yɛ̍ɛ̄ngrɔ̄ɔ nīi n hɔ̄ ma̍ u̍ma̍ama bla̍a Ɔwɔ A̍dā yī u la atɛ̍ yī nū ma̍.

²² “Ala̍ ge̍ tū arɔ̄ ɔplɛ̍ɛ̄lā, ɔ̍lɔma̍ ala̍ ā darɔ̄ku lɛlā nīi Uhu yī Ɔwɔ yɛ ma̍ ē ka ē de ogrēeyī yī āchɛ yī Ɔwɔ nūma̍ wa̍a̍ ma̍ gɛ!”