ODE HI̍YƐCHƐ 22 - Ye̳ka Onīpīpē̳ Yī O̳wo̳

¹ Bɛ̍ɛ̄nɛ̄ ma̍, ɔyɛ̍ɛ̄chɛ̄rɔ̄ yī Ɔwɔ ɔla̍ā wā ge̍ chabɔ̄ yī ɔkpa̍ ɔla̍ā nīi yenyi yī nū de ɔhɔ̄leyī de ɔ̄chɛ ma̍ hu̍ u. Yenyi ɔla̍ā hu̍ kpɛ̍ɛ bāa achɔ̄ ɔha̍ nīi re̍ka ikri̍si̍ta ma̍. O̍ pɛ̍ bū la atɛ̍ yī Ɔwɔ ba̍la Ɔyɔ̍ɔ̄nyīyɛrɔ̄ ɔla̍ā.

² O̍ chī pɛ̍ ga i̍ngɔ̍ɔ la iyārɛ̄ɛpa yī ogblo̍lo̍ yī ipwo̍gra ɔla̍ā. Abɔ̍ɔ la oe̍ ɛpɛpa yī ɔkpa̍ ɔla̍ā, ɔchi̍ nīi de ɔhɔ̄leyī de ɔ̄chɛ ma̍ rɛ abɔ̍ɔ. E̍ ē wa̍ īkpō igbigwo̍lɛpa lipu̍ yī lɛ̍yi̍, ugbo̍he lipu̍ yī ɔwɔ̄wīyā. Īpū yī ɔchi̍ ɔla̍ā, anu̍ nīi e̍ ge̍ē bī nyiya ɔchamɔcha obo̍chi̍ a̍nɛ.

³ Ɔjāmɔjā nīi Ɔwɔ ge̍ gbo ɔ̍ yɛka mɛ̍, e̍ i̍ ge̍ē chɛ̄ wā abɔ̍ɔ la ipwo̍gra ɔla̍ā ni̍. Atɛ̍ yī Ɔwɔ ba̍la iyī Ɔyɔ̍ɔ̄nyīyɛrɔ̄ ɔla̍ā ge̍ē hɔ̄ abɔ̍ɔ la ipwo̍gra ɔla̍ā. Āchɛ nīi - a̍chɛ̍ yī nū ma̍ ge̍ē ya̍ otūlichō de ɔ̍.

⁴ E̍ ge̍ē ma̍ ɔ̄ la eyī. E̍ ge̍ē de riyī yī nū ta̍ che la inēyī yī wā.

⁵ Otu̍ obōbī ɔha̍lɔha̍ i̍ ge̍ē hɔ̄ abɔ̍ɔ ni̍. Otīnīkā kɛ̄ɛ yɛnɔ ɔchɔ̄chɛ̄ ɔha̍lɔha̍ i̍ ge̍ē ku̍ āchɛ ɔkɔ ē gɛ ni̍. Wu̍chē oji̍ nɛ, Ɔwɔ Nīi - Ādādā Ma̍ ge̍ē fi̍yajɛ ē de wa̍ a̍nɛ. Āchɛ ɛla̍ā wa̍a̍ ge̍ē re̍ ɔchwɔ̄lɛ̍ kpɛɛ ku yɛ̄grāa ɔha̍lɔha̍.

Ɔwɔ̄wā yī Iji̍sɔ̄ɔsi

⁶ Bɛ̍ɛ̄nɛ̄ ma̍, ɔyɛ̍ɛ̄chɛ̄rɔ̄ yī Ɔwɔ ɔla̍ā ka de u hīka, “Ma̍ ko̍ō, lɛlā nūma̍ wa̍a̍ - lɛlā olēchi̍ lēchi̍ nīi āchɛ ge̍ē de ɔtū che ɔ̍ nɛ. Ɔwɔ Nīi - Ādādā Ma̍, anu̍ ē de Uhu yī nū de āchɛ ɔkɛrɔ̄ yī Ɔwɔ a̍nɛ. Anu̍ de ɔyɛ̍ɛ̄chɛ̄rɔ̄ yī nū tɛ̄rɔ̄ wā ge̍ē de lɛlā nīi ge̍ē hli̍kpa̍ ē ya̍ ma̍ chabɔ̄ hu̍ a̍chɛ̍ yī nū a̍nɛ.”

⁷ Iji̍sɔ̄ɔsi ɔlɔjā ka hīka, “Ala̍ ma̍ gɛ ko̍ō! N yɛ abɔ̍ɔ yewā u̍ma̍ama. A̍hōhi ge̍ iyī āchɛ nīi ya̍ lɔkɔ nīi e̍ mwɔ̍ɔmu tū la īpū nūma̍ ma̍.”

⁸ Ami Ijɔ̍ɔn ɔlɔjā plɛ̍ɛ̄lā nūma̍ wa̍a̍ gba̍a de mɔ̍ɔ̄ma̍ la eyī mɛ̍. N kwɛ̍ɛjī la lɛlā nūma̍ la opo̍ōpo̍ ba̍la ɔmɔ̍ɔ̄ma̍ ma̍, n ngma̍ ta̍gbo la apli̍kpo̍ yī ɔyɛ̍ɛ̄chɛ̄rɔ̄ yī Ɔwɔ nīi chabɔ̄ yī lɛlā nūma̍ wa̍a̍ hu̍ u ma̍ yɛ ge̍ē ya̍ otūlichō de ɔ̍.

⁹ Ɔpɔ̄ɔpɛ̄, o̍ da u ka amɔ̍lɔ ge̍ e̍e ya̍ i̍ngɔ̍ɔ ni̍. Anu̍ titi, anɔ̍lɔ hɔ̍chɛ̍ yī Ɔwɔ bāa amɔ̍lɔ ba̍la aɛ̍nɛ̍ yī amɔ̍lɔ nīi - ɛ̍lɛ āchɛ ɛkɛrɔ̄ yī Ɔwɔ ma̍, ba̍la āchɛ wa̍a̍ nīi - ɛ̍lɛ ge̍ē ya̍ lɔkɔ nīi lɛlā yī īpū nūma̍ ɔ̍lɔ ka ma̍. Ɔwɔ nīi aɛ̍lɛ ge̍ē ya̍ otūlichō de ɔ̍lɔ a̍nɛ.

¹⁰ O̍ gba̍a ka de u hīka, amɔ̍lɔ ge̍ e̍e de ɛrɔ̄ yī wɔmu ɔmɔ̍ɔ̄ma̍ nūma̍ trɛ̍ba ni̍. Wu̍chē oji̍ nɛ, yɛ̄grāa ɔ̍lɔ de hōhī kurɛkurɛ nīi lɛlā nūma̍ wa̍a̍ ɔ̍lɔ ge̍ē ya̍ mɛ̍.

¹¹ Ɔ̄chɛ ɔdwɔ̄bi̍ ɔ̍lɔ ge̍ē ya̍ ɔdwɔ̄bi̍ gāa iyɔ̄bū iyɔ̄bū. Ɔ̄chɛ ɔyɛ̍ɛ̄lā ɔnɛ̄ɛhɛhi ɔ̍lɔ chī ge̍ē lɛ cha̍ri̍cha̍ri̍ gāa iyɔ̄bū iyɔ̄bū.

¹² Iji̍sɔ̄ɔsi ɔlɔjā ka hīka, “Ala̍ ma̍ gɛ ko̍ō! N yɛ abɔ̍ɔ yewā u̍ma̍ama. N ge̍ē bī ɔjā wā ge̍ē kla̍ āchɛ ure̍ lɔkɔ nīi ɔnyɔnyɛ ɔnyɔnyɛ ya̍ ma̍.

¹³ Ami re̍ka A̍lfa ba̍la O̍mēga - ɔyɔbū ba̍la ogwīihi kɛ̄ɛ owu̍tu ba̍la ɔchlɛhu̍ a̍nɛ.”

¹⁴ A̍hōhi ge̍ iyī āchɛ nīi de aru̍ yī wā nɔ̄na ngma̍ cha̍ri̍cha̍ri̍, nīi lwɔhu̍ ge̍ē re̍ īkpɔ̄ɔ̄chi̍ ɔla̍ā nīi ē de ɔhɔ̄leyī de ɔ̄chɛ ma̍, nīi gba̍a lwɔhu̍ ge̍ē ga la oko̍no̍grīgba ɛla̍ā chɛ̄ gāa ipwo̍gra ɔla̍ā mɛ ma̍!

¹⁵ Āchɛ ehēhī nūma̍ ma̍ i̍ ge̍ē chɛ̄ gāa abɔ̍ɔ ni̍: Angāngrɔ̄ɔ ɛla̍ angrɔ̄ɔ ba̍la anyānyā ɛla̍ anyā, ba̍la alobūdeyī, ba̍la alya̍chi yī lɛlā ɔyɔ̍ɔ̄ya̍, ba̍la āchɛ ɔngma̍āchɛ, ba̍la alɛchi̍yɛka, ba̍la alarīmɛ̄ yī oko̍o ba̍la iyī lɛlā ɔyɔ̍ɔ̄ya̍.

¹⁶ “Ami Iji̍sɔ̄ɔsi ɔlɔjā de ɔyɛ̍ɛ̄chɛ̄rɔ̄ yī u tɛ̄rɔ̄ hɛ̄ɛbɛ nīi o̍ ge̍ē koko̍o de ala̍ abɔ̍ɔ la ogrēeyī yī āchɛ yī Ɔwɔ wa̍a̍ a̍nɛ. Ami ɔyi̍ nīi bū la wɔma yī Ide̍bīidi nɛ. Ami re̍ka i̍nyi̍nyɔ̍ɔwīyā ɔla̍ā nīi ē fi̍yajɛ la ɔ̄chī ma̍ a̍nɛ.”

¹⁷ Uhu yī Ɔwɔ ba̍la Ɔngrɛ̄ba̍ yī Ikra̍yisi ka hīka ɔ̍lɔ ge̍, “Yewā!” Ɔ̄chɛmɔ̄chɛ nīi ge̍ po̍, ɔlɔjā titi ge̍ ka hīka, “Yewā!” Ɔ̄chɛmɔ̄chɛ nīi ge̍ ku̍ odīyenyi, ɔlɔjā ge̍ yewā. Ala̍ ge̍ chikpo̍, ala̍ ā yewā ge̍ nāa yenyi nīi ē de ɔhɔ̄leyī de ɔ̄chɛ ma̍ gɛ, ma̍a ɔjā ɔkɔ̄kɔ̄ nɛ.

Ɔchlɛhu̍

¹⁸ Ala̍ wa̍a̍ nīi yɛ ē po̍ ɛrɔ̄ yī wɔmu ɔmɔ̍ɔ̄ma̍ nīi tū ma̍ la īpū nūma̍ ma̍, ami Ijɔ̍ɔn ta̍ ala̍ ɔna lēchi̍ lēchi̍ mɛ̍! Ɔ̄chɛ nīi ge̍ gba̍a de lɛlā ɔha̍ ba̍ lɛlā nīi tū ma̍ ma̍, Ɔwɔ ge̍ de ɔgawu nīi tū la īpū nūma̍ ma̍ ē chɔba la ichi̍ nīi ɔlɔjā ge̍ē ma̍ ma̍ ē de ɔ̍.

¹⁹ Ɔ̄chɛ nīi ge̍ chī de lɛlā ɔha̍ amu lipu̍ yī ɛrɔ̄ yī wɔmu ɔmɔ̍ɔ̄ma̍ yī īpū nūma̍ hwō ta̍anū, īkpɔ̄ɔ̄chi̍ yī ɔhɔ̄leyī nīi ge̍ē re̍ka iyī ɔlɔjā ma̍, ba̍la ɛbɛ nīi - iyī ɔlɔjā abɔ̍ɔ la Ipwo̍gra Ɔnɛ̄ɛhɛhi ɔla̍ā nīi tū la īpū nūma̍ ma̍, Ɔwɔ ge̍ē kɔ̄ hwō ta̍anū.

²⁰ Ādā ɔlɔjā nīi ya̍ ochi̍chi̍ yī lɛlā ode hi̍yɛchɛ nūma̍ wa̍a̍ ma̍ ka hīka ɔ̍lɔ - ichɛ̄ɛhi nɛ. Anɔ̍lɔ yɛ abɔ̍ɔ yewā u̍ma̍ama! O̍ ge̍ lɛ i̍ngɔ̍ɔ! Yewā gɛ, Ādā Iji̍sɔ̄ɔsi!

²¹ Ɔpiyɛ yī Ādā Iji̍sɔ̄ɔsi ge̍ hɔ̄ ba̍la ɔ̄chɛmɔ̄chɛ wa̍a̍.