ODE HI̍YƐCHƐ 21 - Ye̳ka Onīpīpē̳ Yī O̳wo̳

Ichō onīpīpɛ̄ ba̍la Ajɛ onīpīpɛ̄

¹ Bɛ̍ɛ̄nɛ̄ ma̍, n ma̍ ichō onīpīpɛ̄ ba̍la ajɛ onīpīpɛ̄ ɔha̍. Ichō ba̍la ajɛ nīi hɔ̄ o̍bū ma̍ i̍ hɔ̄ gɛ ni̍. Li̍hu wa̍a̍ nīi hɔ̄ o̍bū ma̍ i̍ hɔ̄ gɛ ni̍.

² Bɛ̍ɛ̄nɛ̄ ma̍, n ma̍ Ipwo̍gra Ɔnɛ̄ɛhɛhi ɔla̍ā nīi - Ijɛru̍sālɛm onīpīpɛ̄ ma̍ nīi o̍ bū la ichō yeēwā bū la abɔ̄ yī Ɔwɔ. Ɔwɔ de ɔ̍ yɔ̍ɔ̄ya̍ lɔ̄lā ke̍e̍ bāa ɔngrɛ̄ba̍ nīi yi̍īyē yɛ grāa ɔbu̍ūnū ma̍.

³ Bɛ̍ɛ̄nɛ̄ ma̍, n wā ge̍ po̍ ɔkɔlɛ̄lā ɔha̍ nīi tɔ̍ɔna bū abɔ̍ɔ la atɛ̍ ɔla̍ā hīka, “Wɔlɛ̍ yī Ɔwɔ hɔ̄ lipu̍ yī āchɛ̄ɛchɛ bɛ̍ɛ̄nɛ̄. Ɔwɔ ɔlɔjā ge̍ē hɔ̄ ba̍la aa̍ bɛ̍ɛ̄nɛ̄. E̍ ge̍ē de ē pīya āchɛ yī nū. Ɔwɔ ɔlɔjā ge̍ē hɔ̄ ba̍la aa̍ a̍nɛ. O̍ ge̍ē re̍ka Ɔwɔ yī wā.

⁴ O̍ ge̍ē ngū yeje ē hī wā eyī. Ɔpīyaku̍ ɔha̍lɔha̍ i̍ ge̍ē hɔ̄ de wa̍ gɛ ni̍. Īlāanyī kɛ̄ɛ lɛgba kɛ̄ɛ lɛlā ohwōhwō ɔha̍lɔha̍ i̍ ge̍ē hɔ̄ gɛ ni̍. Ɛjā ɔnɛ̄chɛ̄ ɛla̍ā wa̍a̍ mɛ mɛ̍.”

⁵ Bɛ̍ɛ̄nɛ̄ ma̍, Ādā nīi hyāhɔ̄ abɔ̍ɔ la atɛ̍ ɔla̍ā ma̍ ka hīka, anɔ̍lɔ ge̍ē gbla̍a ɔjāha̍ ɔjāha̍ wa̍a̍ ē ya̍ īpīpɛ̄ bɛ̍ɛ̄nɛ̄. O̍ gba̍a ka hīka amɔ̍lɔ ge̍ ta̍ lɛlā nūma̍ tū la īpū; wu̍chē oji̍ nɛ, lɛlā nūma̍ ɔ̍lɔ - ichɛ̄ɛhi nɛ; āchɛ ɛ̍lɛ ge̍ de ɔtū che ɔ̍lɔ.

⁶ O̍ gba̍a ka bɛ̍ɛ̄nɛ̄ hīka, “N de ɔ̍ ya̍ la ɔgɔ̄grāa mɛ̍. Ami re̍ka A̍lfa ba̍la O̍mēga, Ɔyɔbū ba̍la Ogwīihi a̍nɛ. Ɔ̄chɛ nīi ge̍ ku̍ odīyenyi, n ge̍ē de yenyi ɔgwɔ̍ɔ̄gwa̍ kɔ̄kɔ̄ de ɔlɔjā. Yenyi ɔla̍ā ge̍ē bū la ribu̍ yī yenyi nīi ē de ɔhɔ̄leyī de ɔ̄chɛ ma̍.

⁷ Ɔ̄chɛmɔ̄chɛ nīi ge̍ yɛ̍ɛ̄ngrɔ̄ɔ mɛ mɛ̍ ge̍ē nāa lɛlā nūma̍ bū la abɔ̄ yī u: N ge̍ē re̍ka Ɔwɔ yī u; anu̍ chī ge̍ē re̍ka ɔyi̍ yī u.

⁸ Aluhwi, ba̍la alɔwɛ, ba̍la anāngrɔ̄ɔ ɛla̍ angrɔ̄ɔ ba̍la anyānyā nīi ē la̍ anyā ma̍, ba̍la āchɛ ɔngma̍āchɛ, ba̍la alya̍chi yī lɛlā ɔyɔ̍ɔ̄ya̍, ba̍la alobūdeyī ɔyɔ̍ɔ̄ya̍, ba̍la āchɛ ɔya̍ otūlichō yī ɛchi̍yɛka, ba̍la alarīmɛ̄ wa̍a̍, ɛbɛ yī wā re̍ka li̍hu ɔla̍ā nīi ɔla̍ ba̍la isɔ̍fɔ yɛ ē chɔ̄chɛ̄ rururu ma̍. Ɔla̍ā re̍ka ɔpīyaku̍ o̍mgbo̍mɛpa a̍nɛ.”

Ijɛru̍sālɛm onīpīpɛ̄ ɔ̍lɔma̍

⁹ Ūkpo̍he lipu̍ yī ayɛ̍ɛ̄chɛ̄rɔ̄ yī Ɔwɔ arāapa ɛla̍ā nīi bī u̍kpu̍ūhā arāapa mōmu la ɔgawu arāapa ɛla̍ā nīi gwīihi ma̍ wā dikpo̍ba̍ u bɛ̍ɛ̄nɛ̄. O̍ da u ka amɔ̍lɔ ge̍ yewā hɛ̄ɛbɛ nīi anɔ̍lɔ ge̍ chabɔ̄ yī Ɔngrɛ̄ba̍ nīi - ɔ̍lɔ ɔnyā yī Ɔyɔ̍ɔ̄nyīyɛrɔ̄ ɔla̍ā ma̍ hu̍ amɔ̍lɔ gɛ.

¹⁰ Ɔpɔ̄ɔpɛ̄, Uhu yī Ɔwɔ kla̍ ami i̍ngɔ̍ɔ bri̍bri̍bri̍; ɔyɛ̍ɛ̄chɛ̄rɔ̄ yī Ɔwɔ ɔla̍ā nāa ami ge̍ che la ichō yī yɛwu ɔnɔ̄kɔ̄kū ɔha̍ ge̍ chabɔ̄ yī Ijɛru̍sālɛm, Ipwo̍gra Ɔnɛ̄ɛhɛhi ɔla̍ā hu̍ u. Ɔwɔ de tɛ̄rɔ̄ bū abɔ̍ɔ la ichō yeēwā la ajɛ.

¹¹ O̍ ho̍ōhu̍ kpɛ̍ɛ bāa achɔ̄ ɔlamu ɔlamu ɔha̍ ma̍, bāa onīi re̍ka ija̍si̍pa nīi lɛ chra̍da̍da̍ bāa ikri̍si̍ta ma̍.

¹² Ɔga̍ha̍ ɔta̍kakatū ipwo̍gra ɔla̍ā la ichō kpɛ̍ɛji; o̍ tū oko̍no̍grīgba igwo̍lɛpa. Ayɛ̍ɛ̄chɛ̄rɔ̄ yī Ɔwɔ lɛ igwo̍lɛpa nīi ē gbō oko̍no̍grīgba ɛla̍ā ma̍. Abɔ̍ɔ la oko̍no̍grīgba ɛla̍ā, e̍ ta̍ riyī yī ipwɔ̍ɔma igwo̍lɛpa yī Ali̍sɛ̄rɛli che la aa̍.

¹³ Oko̍no̍grīgba ɛtɛ̍ta̍ hɔ̄ la wāā ūkpo̍he a̍nɛ: ɛta̍ hɔ̄ la wāā yɛnɔ ɔ̄chī, ɛta̍ hɔ̄ la wāā yɛnɔ ɔ̄nɛ̄, ɛta̍ hɔ̄ la wāā yī ihi̍yajɛ, ɛta̍ hɔ̄ la wāā yī ichō.

¹⁴ Ɔga̍ha̍ yī ipwo̍gra ɔla̍ā, e̍ gwo̍ ɔ̄ che la ichō yī achɔ̄ igwo̍lɛpa. Abɔ̍ɔ la achɔ̄ ɛla̍ā nīi e̍ ta̍ riyī yī āchɛ igwo̍lɛpa nīi - alɛrɔ̄ yī Ɔyɔ̍ɔ̄nyīyɛrɔ̄ ɔla̍ā ma̍ che a̍nɛ.

¹⁵ Ɔyɛ̍ɛ̄chɛ̄rɔ̄ yī Ɔwɔ ɔla̍ā nīi kɛlā tāa ami ma̍ bī u̍kpɔ̍chi̍ obī miya ɛbɛ abɔ̍ɔ. U̍kpɔ̍chi̍ ɔ̍lɔma̍, e̍ ya̍ la igo̍olu igo̍olu ke̍e̍. O̍ bī ge̍ē miya līkpō yī ipwo̍gra ɔlɔjā wa̍a̍ ba̍la oko̍no̍grīgba yī nū ba̍la ɔga̍ha̍ yī nū.

¹⁶ Ipwo̍gra ɔ̍lɔma̍ jɔ̄ɔ̄jɛ̄ lɛ ɛ̍ngɔ̍ ɔha̍lɔha̍ wa̍a̍. Lɔkɔ nīi ɔgwɔ̄gwā yī nū lɛ ma̍ i̍ngi̍ngɔ̍ɔ nīi wɔa̍ yī nū lɛ a̍nɛ. Ɔyɛ̍ɛ̄chɛ̄rɔ̄ yī Ɔwɔ ɔla̍ā bī u̍kpɔ̍chi̍ obī miya ɛbɛ ɔ̍lɔma̍ miya līkpō yī ipwo̍gra ɔla̍ā: Ɔgwɔ̄gwā yī nū lɛ ina̍aba u̍nɔ ɛta̍ che ohu igwɛ̍ɛrwɔ̄. Wɔa̍ yī nū lɛ i̍ngi̍ngɔ̍ɔ; ɔjɔ̄jɛ̄ yī nū chī lɛ i̍ngi̍ngɔ̍ɔ.

¹⁷ Ɔyɛ̍ɛ̄chɛ̄rɔ̄ yī Ɔwɔ ɔla̍ā gba̍a miya līkpō yī ɔga̍ha̍ nīi ta̍kakatū ipwo̍gra ɔla̍ā ma̍. O̍ lɛ ikpo̍ ohu igwo̍ che ikpo̍ igwe̍erīiyī la ɔjɔ̄jɛ̄ ga ichō, gala ɔgɔgu yī ita yī ɔjā obī miya ɛbɛ nīi o̍ bī yɛ ē miya ma̍.

¹⁸ Ɔga̍ha̍ yī nū, e̍ ma la achɔ̄ nīi re̍ka ija̍si̍pa ma̍. Ipwo̍gra ɔlɔjā ɔlɔjā, e̍ gwo̍ ɔ̄ la igo̍olu igo̍olu, lɛ chra̍da̍da̍ kpɛ̍ɛ bāa inyɔ ma̍.

¹⁹ Achɔ̄ nīi e̍ de wu̍tu yī ɔga̍ha̍ yī ipwo̍gra ɔla̍ā ma̍, e̍ ya̍ ugu tū wā la achɔ̄ ɔlamu ɔlamu ita ɔha̍lɔha̍ wa̍a̍. Lipu̍ yī achɔ̄ ɔlamu ɔlamu ɛla̍ā nīi e̍ bī wu̍tu yī nū ma̍, ɔrāarāa re̍ka Ija̍si̍pa, ɔmɛpa re̍ka Isafa̍ya; ɔmɛta̍ re̍ka a̍gēeti, ɔmɛnɛ re̍ka ɛ̍mɛ̄rāadi,

²⁰ Ɔmɛrwɔ̄ re̍ka ɔ̍nīisi, omerīiyī re̍ka ikane̍liya, ɔmarāapa re̍ka ikwa̍asi oligigɔ, ɔmarāata̍ re̍ka ibe̍rīili, ɔmarāanɛ re̍ka ito̍pāasi, omigwo̍ re̍ka ikalisɛ̍dɔ̄ni, omigwo̍lo̍he re̍ka itɔ̍kwɔ̄ɔsi, omigwo̍lɛpa re̍ka a̍mɛ̄tīisi.

²¹ Oko̍no̍grīgba igwo̍lɛpa ɛla̍ā, e̍ ya̍ la akpānā akpānā ke̍e̍. Akpānā ūkpo̍he ūkpo̍he nīi e̍ bī ya̍ oko̍no̍grīgba ɔnyɔnyɛ ɔnyɔnyɛ a̍nɛ. Ogblo̍lo̍ yī ipwo̍gra ɔla̍ā - igo̍olu igo̍olu ke̍e̍ nɛ. Ɔ̄chɛ ē myɛ̍ma̍ gala anu̍ bāa inyɔ ma̍.

²² N i̍ ma̍ u̍nu̍ yī Ɔwɔ abɔ̍ɔ la ipwo̍gra nūma̍ ni̍. Wu̍chē oji̍ nɛ, Ɔwɔ ɔlɔjā nīi - Ādādā, Ɔgɔnyɛ Ɔnɔ̄kɔ̄kū ma̍ ba̍la Ɔyɔ̍ɔ̄nyīyɛrɔ̄ ɔla̍ā re̍ka u̍nu̍ yī Ɔwɔ abɔ̍ɔ a̍nɛ.

²³ Yɛnɔ kɛ̄ɛ ɔwīyā i̍ gba̍a ge̍ē fi̍yajɛ abɔ̍ɔ la ipwo̍gra ɔla̍ā gɛ ni̍. Wu̍chē oji̍ nɛ, oho̍ōhu̍ nīi Ɔwɔ ho̍ōhu̍ ma̍ ē fi̍yajɛ abɔ̍ɔ la anu̍ a̍nɛ. Ɔyɔ̍ɔ̄nyīyɛrɔ̄ ɔla̍ā chī re̍ka otīnīkā yī abɔ̍ɔ a̍nɛ.

²⁴ Ɛbɛ ɔlɛgēdēgēdē yī nū nīi āchɛ yɛchɛ ge̍ē bī myɛ̍ma̍ yɛɛ a̍nɛ. Ɛchwɔ̄lɛ̍ yī ajɛyɛ̄ɛchɛ wa̍a̍ ge̍ē kpo̍ wɔdu yī wā bī wā aba̍bɔ̍ɔ.

²⁵ Ɔpu yī oko̍no̍grīgba yī ipwo̍gra ɔla̍ā ge̍ē ta̍āpāapɛ̄ yɛ̄grāa ɔha̍lɔha̍. E̍ i̍ ge̍ē gū wā ogōgū ni̍; wu̍chē oji̍ nɛ, otu̍ i̍ ge̍ē bōbī abɔ̍ɔ ni̍.

²⁶ Rīgā ɔnɔ̄kɔ̄kū ba̍la wɔdu yī ɔchamɔcha wa̍a̍, e̍ ge̍ē kpo̍ ɔ̄ wā la ipwo̍gra ɔla̍ā.

²⁷ Ɛjā wa̍a̍ nīi i̍ lɛ cha̍ri̍cha̍ri̍ ni̍ ma̍, ɔha̍lɔha̍ i̍ ge̍ē ga ē tū gāa ipwo̍gra ɔla̍ā ni̍. Āchɛ nīi ē yɛ̍ɛ̄lā oliwēyī iwēyī ma̍ kɛ̄ɛ ē warīmɛ̄ ma̍, ɔ̄chɔ̄chɛ oli̍ngɔ̍ɔ i̍ ge̍ē chɛ̄ gāa ni̍. Āchɛ lōru̍wā nīi riyī yī wā tū abɔ̍ɔ la īpū yī Ɔyɔ̍ɔ̄nyīyɛrɔ̄ ɔla̍ā nīi re̍ka īpū yī ɔhɔ̄leyī ma̍ ge̍ē chɛ̄ gāa ipwo̍gra ɔla̍ā a̍nɛ.