ODE HI̍YƐCHƐ 20 - Ye̳ka Onīpīpē̳ Yī O̳wo̳

Lipu̍ yī lɛ̍yi̍ u̍nɔ ɛpa che ohu igwo̍ ɔha̍

¹ Bɛ̍ɛ̄nɛ̄, n ma̍ ɔyɛ̍ɛ̄chɛ̄rɔ̄ yī Ɔwɔ ɔha̍ nīi bū abɔ̍ɔ la ichō yeēwā. O̍ bī oyi̍īgbɔ̄gɔ̄rɔ̄ yī ɔngɔ̄nɔ̄ngɔ̄nɔ̄ yī ayekū abɔ̍ɔ la abɔ̄ ba̍la agba̍ ɔnɔ̄kɔ̄kū ɔha̍.

² O̍ ku̍ anu̍ idra̍gɔn ɔla̍ā, ɔnyāku̍ yɛgwā ɔla̍ā nīi re̍ka Ɔngūwɛ̄gā kɛ̄ɛ Isa̍tan ma̍, de agba̍ tū ɔ̄ kpɛɛ gbo̍ lɛ̍yi̍ u̍nɔ ɛpa che ohu igwo̍.

³ Bɛ̍ɛ̄nɛ̄ ma̍, ɔyɛ̍ɛ̄chɛ̄rɔ̄ ɔla̍ā nāa anu̍ ta̍ tū ga ɔngɔ̄nɔ̄ngɔ̄nɔ̄ yī ayekū ɔ̍lɔma̍. O̍ de igbɔ̄gɔ̄rɔ̄ tū ɔ̄ de ɔ̍ hukɔ̄ hɛ̄ɛbɛ nīi o̍ i̍ ē gla̍ alipwɔ̍ɔcha ɛla̍ā wa̍a̍ ē mɛ ē gɛ ni̍, kpɛɛ ku lɛ̍yi̍ u̍nɔ ɛpa che ohu igwo̍ ɛla̍ā. Yɛ̄grāa ɔ̍lɔma̍ ge̍ ga mɛ̍, e̍ ge̍ē wī agba̍ hī ɔ̄ yɛ̄grāa ɔha̍ pi̍nyɛ̍ o̍bū.

⁴ Bɛ̍ɛ̄nɛ̄ ma̍, n ma̍ ɔchi̍īkpā ɛha̍ nīi āchɛ ɛha̍ hyāhɔ̄ abɔ̍ɔ la aa̍. E̍ de wɔhu̍ de āchɛ ɛ̍lɛma̍ nīi e̍ ge̍ē hlɛ̍ɛ̄pɔ̄. N gba̍a ma̍ uhu yī āchɛ ɛla̍ā nīi e̍ kpo̍ wā ngmo̍ wu̍chē lɔkɔ nīi e̍ koko̍o yī lɛlā yī Ɔwɔ ba̍la lɛlā olēchi̍ ɔla̍ā nīi Iji̍sɔ̄ɔsi de hi̍yɛchɛ ma̍. Aa̍ ma̍ i̍ ya̍ otūlichō de ɛbɛ̍ ɔnɔ̄kɔ̄kū ɔla̍ā kɛ̄ɛ i̍kpe̍ēkū yī nū ni̍. Aa̍ ma̍ i̍ ba̍ ina̍aba yī ɛbɛ̍ ɔnɔ̄kɔ̄kū ɔla̍ā la inēyī kɛ̄ɛ abɔ̄ yī wā ni̍. E̍ hye̍ēyī wā la ɔhɔ̄leyī ge̍ re̍ ɔchwɔ̄lɛ̍ ba̍la Ikra̍yisi lipu̍ yī lɛ̍yi̍ u̍nɔ ɛpa che ohu igwo̍.

⁵ Okū ehēhī ma̍ i̍ ge̍ē hye̍ēyī ni̍ kpɛɛ nīi lɛ̍yi̍ u̍nɔ ɛpa che ohu igwo̍ ɔla̍ā ga o̍bū. Onūma̍ re̍ka ohye̍ēyī la okū ɔrāarāa a̍nɛ.

⁶ A̍hōhi ba̍la ɔpiyɛ ɔnɔ̄kɔ̄kū ge̍ iyī āchɛ nīi ge̍ē tū lipu̍ yī āchɛ nīi hye̍ēyī la okū la ɔrāarāa nūma̍ ma̍! Ɔpīyaku̍ o̍mgbo̍mɛpa i̍ ge̍ē ya̍ wā ɔjɔ̄jā mɛ ē gɛ ni̍. E̍ ge̍ē de ē pīya aligbe yī Ɔwɔ ba̍la iyī Ikra̍yisi. E̍ chī ge̍ē re̍ ɔchwɔ̄lɛ̍ ba̍la anu̍ lipu̍ yī lɛ̍yi̍ u̍nɔ ɛpa che ohu igwo̍ ɔla̍ā.

E̍ de Isa̍tan gwō

⁷ Lɛ̍yi̍ u̍nɔ ɛpa che ohu igwo̍ ɔla̍ā ge̍ ga ma̍, e̍ ge̍ē wī orī hī Isa̍tan la igbakɔbɔ nīi o̍ tū ma̍.

⁸ Bɛ̍ɛ̄nɛ̄ ma̍, o̍ ge̍ē gāa ge̍ē gla̍ alipwɔ̍ɔcha mɔcha wa̍a̍ nīi hɔ̄ la ɛbɛha̍ ɛbɛha̍ wa̍a̍ nīi kwichi̍ tāa Igɔ̍ɔgi ba̍la Imegɔ̍ɔgi ma̍. Isa̍tan ge̍ē tu̍ wā wa̍a̍ grēeyī hɛ̄ɛbɛ ge̍ē kplɛ̍wu̍. E̍ ge̍ē lyɛ̄mɛ̄ kpɛ̍ɛ bāa wɔjɛ nīi gblāa la oko̍o yī li̍hu ma̍.

⁹ E̍ ge̍ē wī kla̍ la ajɛyɛ̄ɛchɛ wa̍a̍, ē ta̍kaka ē tū ɛbɛ nīi āchɛ yī Ɔwɔ gblāa ma̍ ba̍la ipwo̍gra nīi hi Ɔwɔ ɔtū ma̍. Ɔla̍ ɔha̍ chī ge̍ē bū abɔ̍ɔ la ichō ge̍ē de wa̍ ē chāajɛ cha̍cha̍.

¹⁰ Anu̍ Ɔngūwɛ̄gā ɔla̍ā nīi gla̍ āā ma̍, e̍ ku̍ ɔ̄ ta̍tū la li̍hu yī ɔla̍ ɔnɔ̄kɔ̄kū ba̍la isɔ̍fɔ. Abɔ̍ɔ nīi e̍ ku̍ anu̍ ɛbɛ̍ ɔnɔ̄kɔ̄kū ɔla̍ā ba̍la anu̍ ɔla̍ā nīi ē warīmɛ̄ ka anɔ̍lɔ ē ka ɛrɔ̄ yī Ɔwɔ ma̍ tū o̍bo̍bū a̍nɛ. Akanya ɔdwɔ̄bi̍ ɔdwɔnyɛ ge̍ē ya̍ wā abɔ̍ɔ myɛ̄grāa-myɛ̄grāa i̍ngɔ̍ɔ kpɛɛ ku yɛ̄grāa i̍mɔ̄mɛni̍.

Lɛpɔ̄ ɔhɔ̍ɔ̄hɛ̍ nīi - ogwīihi ma̍

¹¹ Bɛ̍ɛ̄nɛ̄ ma̍, n ma̍ atɛ̍ ɔnɔ̄kɔ̄kū ɔha̍ nīi lɛ̍rɛ̍ɛ̄rɛ̍ nīi ɔ̄chɛ ɔha̍ hyāhɔ̄ abɔ̍ɔ la anu̍. Ajɛ yī yɛchɛ wa̍a̍ ba̍la ichō de gwɛ̍ɛnya hī iyɔ̄bū yī nū nīi ɔ̄chɔ̄chɛ i̍ ma̍ wā gɛ ni̍.

¹² Bɛ̍ɛ̄nɛ̄ ma̍, n wā ge̍ ma̍ okū ɛnɛ̄kɛ̄kū ba̍la enīchi̍chɛ̍ wa̍a̍ nīi gblāa abɔ̍ɔ la iyɔ̄bū yī atɛ̍ ɔla̍ā. Īpū yɛ̄mɛ̄mɛ̄ lwāa tɔ̍ɔ̄ta̍ abɔ̍ɔ. Bɛ̍ɛ̄nɛ̄ ma̍ e̍ wā ge̍ lwāa īpū ɔha̍. Ɔla̍ā - īpū yī ɔhɔ̄leyī a̍nɛ. Okū ɛla̍ā wa̍a̍, e̍ yɛ ē hlɛ̍ɛ̄pɔ̄ yī wā gala ɔgɔgu lɔkɔ nīi ɔnyɔnyɛ yɛ̍ɛ̄lā nīi e̍ ta̍ tū abɔ̍ɔ la īpū ɛla̍ā ma̍.

¹³ Bɛ̍ɛ̄nɛ̄ ma̍, li̍hu wā ge̍ tu̍labɔ̄ hī okū wa̍a̍ nīi bī la abɔ̄ yī wā ma̍. Rikū ɔngmɔ̍ɔ̄chɛ ba̍la ayekū titi wā ge̍ tu̍labɔ̄ hī okū wa̍a̍ nīi bī la abɔ̄ yī wā ma̍. Aa̍ wa̍a̍, e̍ hlɛ̍ɛ̄pɔ̄ yī wā gala ɔgɔgu yī lɛlā nīi e̍ ya̍ ma̍.

¹⁴ Bɛ̍ɛ̄nɛ̄ ma̍, e̍ wa̍ābɔ̄ la rikū ɔngmɔ̍ɔ̄chɛ ba̍la ayekū ta̍tū ga li̍hu yī ɔla̍ ɔnɔ̄kɔ̄kū ɔ̍lɔma̍. Li̍hu yī ɔla̍ ɔnɔ̄kɔ̄kū ɔla̍ā, anu̍ re̍ka ɔpīyaku̍ o̍mgbo̍mɛpa a̍nɛ.

¹⁵ Ɔ̄chɛmɔ̄chɛ nīi riyī yī nū i̍ tū abɔ̍ɔ la īpū yī ɔhɔ̄leyī ɔla̍ā ni̍, e̍ ge̍ē wa̍ābɔ̄ la ɔlɔjā ta̍tū la li̍hu yī ɔla̍ ɔnɔ̄kɔ̄kū ɔ̍lɔma̍.