ODE HI̍YƐCHƐ 2 - Ye̳ka Onīpīpē̳ Yī O̳wo̳

Ɛrɔ̄ yī Ogrēeyī yī āchɛ yī Ɔwɔ la Ɛ̍fɛ̄susi

¹ “Lɛlā nīi a ge̍ē ka ē tū la īpū tɛ̄rɔ̄ hu ɔyɛ̍ɛ̄chɛ̄rɔ̄ yī Ɔwɔ nīi yɛ ē deyīrɛ ogrēeyī yī āchɛ yī Ɔwɔ nīi hɔ̄ la Ɛ̍fɛ̄susi ma̍ hɔ̄ ma̍ a̍nɛ: “Ami nīi bī i̍nyi̍nyɔ̍ɔwīyā arāapa la abɔ̄ līre̍ yī u ma̍, ami nīi yɛ ē yɛɛ la olo̍ōlo̍ yī ɛjā ode ɔla̍ che - arāapa ɛla̍ā ma̍, ami tɛ̄rɔ̄ nūma̍ a̍nɛ.

² N je̍ ɔjā nīi ala̍ ē ya̍ ma̍. N jo̍ōkū lɔkɔ nīi ala̍ ya̍ u̍ku̍rɔ̍ gba̍a̍ ma̍, ba̍la ɔkɔ nīi ala̍ mlɔtū gba̍a̍ ma̍. N jo̍ōkū hīka ala̍ i̍ ge̍ē chɛ̄ nāa lɛlā yī āchɛ ɔyɛ̍ɛ̄lā abi̍ ni̍. Āchɛ ɛha̍ nīi ē ka hīka aɛ̍lɛ - alɛrɔ̄ yī Ikra̍yisi nɛ nīi i̍ chī - alɛrɔ̄ ni̍ ma̍, n jo̍ōkū hīka ala̍ ma wā ma̍ de jo̍ōkū ka ɛ̍lɛ - alarīmɛ̄ nɛ mɛ̍.

³ N jo̍ōkū hīka ala̍ mlɔtū kpɔ̍ɔ̍ mi̍chi̍ mwɛbɛ wu̍chē yī u, ala̍ chī wa̍ābɔ̄ yī u ni̍ kpɔ̍ɔ̍.

⁴ N chī lɛ lɛlā ɔha̍ pīyeyīta̍ ala̍ u̍ma̍ama: Ala̍ i̍ yɛ abɔ̍ɔ ē yɔ̍ɔhɔtū yī u u̍ma̍ama bāa olo̍ ɔrāarāa ma̍ gɛ ni̍.

⁵ Ala̍ ā ma̍ lɔkɔ nīi ala̍ gwāajɛ ɔ̄kū ma̍ gɛ! Ala̍ ā pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ ɛla̍ā gɛ, nīi ala̍ ge̍ ya̍ bāa olo̍ ɔrāarāa ma̍. Ala̍ i̍ ge̍ pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ yī ala̍ ɔla̍ā ni̍, n ge̍ wā ge̍ē de ɔjā ode ɔla̍ che nīi - iyī ala̍ ma̍ ē nāa ē hī ɛbɛ nīi o̍ rɛ ma̍.

⁶ Lɛlā ohiyumɔtū nīi ala̍ ē ya̍ ma̍ re̍ka lɛlā yī Āchɛ yī Inikola̍yīta ɔyɔ̍ɔ̄ya̍ nīi ta̍ ala̍ anyī gba̍a̍ bɔ̄ɔkɔ nīi o̍ ta̍ ami ɔlɔjā anyī ma̍.

⁷ “Ala̍ ge̍ tū arɔ̄ ɔplɛ̍ɛ̄lā, ɔ̍lɔma̍ ala̍ ā plɛ̍ɛ̄lā nīi Uhu yī Ɔwɔ yɛ ma̍ ē ka ē de ogrēeyī yī āchɛ yī Ɔwɔ nūma̍ wa̍a̍ ma̍ gɛ! “Āchɛ wa̍a̍ nīi yɛ̍ɛ̄ngrɔ̄ɔ mɛ̍ ma̍, n ge̍ē de wɔhu̍ ē de wa̍ nīi e̍ ē re̍ īkpō yī ɔchi̍ yī ɔhɔ̄leyī nīi rɛ abɔ̍ɔ la Ɔyɛ̍ɛ̄rɔ̄ yī Ɔwɔ ma̍.

Ɛrɔ̄ yī Ogrēeyī yī āchɛ yī Ɔwɔ la Isima̍na

⁸ “Lɛlā nīi a ge̍ē ka ē tū la īpū tɛ̄rɔ̄ hu ɔyɛ̍ɛ̄chɛ̄rɔ̄ yī Ɔwɔ nīi ē deyīrɛ ogrēeyī yī āchɛ yī Ɔwɔ abɔ̍ɔ la Isima̍na ma̍ hɔ̄ ma̍ a̍nɛ: “Ami nīi re̍ka ɔyɔbū ba̍la ogwīihi ma̍ tɛ̄rɔ̄ nūma̍ hu ala̍ a̍nɛ. Ami nīi pīyaku̍ o̍bū gba̍a chōo̍chē hɔ̄leyī ma̍ nɛ.

⁹ N je̍ akanya nīi hɔ̄ de ala̍ ma̍. N jo̍ōkū hīka ala̍ gbyeklo̍. La olēchi̍ lēchi̍ yī nū, ala̍ chī gbwɔdu a̍nɛ. N jo̍ōkū yī lɛlā ɔdwɔ̄bi̍ wa̍a̍ nīi āchɛ ɛla̍ā nīi warīmɛ̄ ka aɛ̍lɛ - Iju̍u nɛ ma̍ yɛ ē ka ē ku̍ ala̍ ma̍. La olēchi̍ lēchi̍ yī nū, āchɛ ɛla̍ā tū ribi yī āchɛ yī Isa̍tan.

¹⁰ Ala̍ e̍e tūuhwi yī ichi̍ ɔha̍lɔha̍ nīi yɛ aa̍ ge̍ē wā la ala̍ ma̍ ni̍. Ala̍ ma̍ gɛ ko̍ō! Ɔngūwɛ̄gā ge̍ē ma ala̍ ē ma̍, ya̍ nīi e̍ ē ku̍ ibiha̍ yī ala̍ tū igbakɔbɔ ji. Akanya yī ala̍ ɔla̍ā chī ge̍ē lɛ ɔ̄chī igwo̍ ɔlamu. O̍ ge̍ ro̍ōre̍ka ɔpīyaku̍ yī ala̍, ala̍ ā de ɔtū che u kpɔ̍ɔ̍. Bū la ɛbɛ ɔla̍ā, n ge̍ē de ɔhɔ̄leyī ke̍e̍ ē de ala̍ bāa okpo ɔkla̍lɛhu̍ nīi ɔ̄chɛ ɔyɛ̍ɛ̄ngrɔ̄ɔ ē nāa ma̍.

¹¹ “Ala̍ ge̍ tū arɔ̄ ɔplɛ̍ɛ̄lā, ɔ̍lɔma̍ ala̍ ā darɔ̄ku lɛlā nīi Uhu yī Ɔwɔ yɛ ma̍ ē ka ē de ogrēeyī yī āchɛ yī Ɔwɔ nūma̍ wa̍a̍ ma̍ gɛ! “Āchɛ nīi ge̍ē yɛ̍ɛ̄ngrɔ̄ɔ ma̍, ɔpīyaku̍ o̍mgbo̍mɛpa ɔla̍ā i̍ ge̍ē ya̍ wā ɔjɔ̄jā ni̍.

Ɛrɔ̄ yī Ogrēeyī yī āchɛ yī Ɔwɔ la Ipɛ̍gāmum

¹² “Lɛlā nīi a ge̍ē ka ē tū la īpū tɛ̄rɔ̄ hu ɔyɛ̍ɛ̄chɛ̄rɔ̄ yī Ɔwɔ nīi ē deyīrɛ ogrēeyī yī āchɛ yī Ɔwɔ nīi hɔ̄ la Ipɛ̍gāmum ma̍ hɔ̄ ma̍ a̍nɛ: “Ami nīi bī oge olire̍ la aɛ̍ɛpɛpa ma̍ tɛ̄rɔ̄ nūma̍ hu ala̍ a̍nɛ.

¹³ N je̍ ɛbɛ nīi ala̍ hɔ̄ ma̍; abɔ̍ɔ nīi Isa̍tan re̍ ɔchwɔ̄lɛ̍ yī nū che a̍nɛ. Ala̍ chī ta̍ābɔ̄ ku̍ lɛlā yī u brii abɔ̍ɔ; ala̍ i̍ pi̍ye̍mā la ɔtū ode che um ochōche ni̍. Yɛ̄grāa nīi e̍ de A̍ntīpasi nīi - olitɛ̍ɛhi̍yɛ̍ yī u lēchi̍ lēchi̍ ngmo̍ abɔ̍ɔ la ɛbɛ ɔla̍ā nīi Isa̍tan twɔ̄lɛ̍ ma̍, ala̍ i̍ pi̍ye̍mā ni̍ kpɔ̍ɔ̍.

¹⁴ N chī lɛ lɛlā ɔha̍ kplɛ̄ɛ̄ ge̍ē ka ē ku̍ ala̍: Āchɛ ɛha̍ nīi gblāa abɔ̍ɔ ba̍la ala̍ ma̍, āchɛ ɔyɛ̍ɛ̄lā gala ɔgɔgu yī lɛlā ongōngū yī Iba̍lāam nɛ. Iba̍lāam nūma̍ ngū Iba̍lāaki lɔkɔ nīi o̍ ge̍ē ya̍ nīi Ali̍sɛ̄rɛli ge̍ē yɛ̍ɛ̄lā ɔdwɔ̄bi̍, ē re̍ ojōre̍ yī ɛchi̍yɛka ba̍la ɔ̍bɔ̍ɔ̄nyā ma̍.

¹⁵ Gala ɔgɔgu ɔla̍ā, āchɛ ɛha̍ titi nīi tū abɔ̍ɔ la olo̍ōlo̍ yī ala̍ ma̍ yɛ ē gala ɔgɔgu yī lɛlā ongōngū yī Āchɛ yī Inikola̍yīta.

¹⁶ Ala̍ ā pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ yī ala̍ gɛ. O̍ i̍ ge̍ i̍ngɔ̍ɔ ni̍, n ge̍ē wā dikpo̍ ē ba̍ ala̍ ɔpɔ̄ɔpɛ̄ ge̍ē nunu ē tāa āchɛ ɛla̍ā la oge nīi bīyɛchɛ lipu̍ yī oko̍o yī u ma̍.

¹⁷ “Ala̍ ge̍ tū arɔ̄ ɔplɛ̍ɛ̄lā, ɔ̍lɔma̍ ala̍ ā darɔ̄ku lɛlā nīi Uhu yī Ɔwɔ yɛ ma̍ ē ka ē de ogrēeyī yī āchɛ yī Ɔwɔ nūma̍ wa̍a̍ ma̍ gɛ! “Āchɛ ɛla̍ā nīi yɛ̍ɛ̄ngrɔ̄ɔ mɛ̍ ma̍, n ge̍ē de ojōre̍ nīi re̍ka ima̍na nīi trɛ̍ba ma̍ ē de wa̍. N ge̍ē gba̍a ē de i̍kplɛ̍ɛ̄chɔ̄ ɔnɛ̄rɛ̍ ɔha̍ nīi riyī onīpīpɛ̄ ɔha̍ che abɔ̍ɔ la anu̍ ma̍ de ɔnyɔnyɛ ɔnyɔnyɛ lipu̍ yī wā. Ɔ̄chɔ̄chɛ i̍ ge̍ē je̍ riyī yī ɔjā nīi che abɔ̍ɔ la i̍kplɛ̍ɛ̄chɔ̄ ɔ̍lɔma̍ ma̍ ni̍, ɔ̍chi̍kpa̍kpa̍ ɔ̄chɛ nīi lɛ ma̍.

Ɛrɔ̄ yī Ogrēeyī yī āchɛ yī Ɔwɔ la Itiya̍tīra

¹⁸ “Lɛlā nīi a ge̍ē ka ē tū la īpū tɛ̄rɔ̄ hu ɔyɛ̍ɛ̄chɛ̄rɔ̄ yī Ɔwɔ nīi deyīrɛ ogrēeyī yī āchɛ yī Ɔwɔ nīi hɔ̄ la Itiya̍tīra ma̍ bī ma̍ a̍nɛ: “Ami Ɔyi̍ yī Ɔwɔ tɛ̄rɔ̄ nūma̍ hu ala̍ a̍nɛ. Ami nīi īkprī yī u yɛ ē chɔ̄chɛ̄ bāa ɔla̍, nīi ikpo̍ yī u yɛ ē ho̍ōhu̍ kpɛ̍ɛ bāa upu nīi e̍ bī ɔjā nyiya anu̍ nīi yɛ ē ho̍ōhu̍ nya̍ri̍nya̍ri̍ ma̍ nɛ.

¹⁹ N je̍ ɔjā nīi ala̍ ē ya̍ ma̍. N je̍ ɔhɔtū nīi ala̍ lɛ ma̍, ba̍la lɔkɔ nīi ala̍ de ɔtū che brii ma̍, ba̍la ɛrɔ̄ nīi ala̍ yɛ ē chɛ̄ ma̍, ba̍la lɔkɔ nīi ala̍ mlɔtū hɔ̄ kpɔ̍ɔ̍ ma̍. N jo̍ōkū hīka ala̍ yɛ ē ya̍ yɛ̍yɛ̍ u̍ma̍ama ē hi̍ yɛ̄grāa ɔrāarāa.

²⁰ N chī lɛ lɛlā ɔha̍ pīyeyīta̍ ala̍: Ala̍ yɛ ē hīdīdū hī anu̍ ɔnyā ɔla̍ā nīi re̍ka Ijɛ̍sɛ̄bɛ̄ɛli nīi ka anɔ̍lɔ - ɔlɛrɔ̄ yī Ɔwɔ nɛ ma̍. Anu̍ chī yɛ ē ngū āchɛ yī u lɛlā ɔha̍, ya̍ nīi e̍ bi̍yēyī hī u, yɛ ē la̍ ɔ̍bɔ̍ɔ̄nyā bɛ̍bɛ̍ gba̍a yɛ ē re̍ ojōre̍ yī ɛchi̍yɛka a̍nɛ.

²¹ N de yɛ̄grāa de ɔ̍ hīka o̍ ge̍ pīyabɔ̄ta̍ hī lɛlā ɔdwɔ̄bi̍ yī nū ɔla̍ā wa̍a̍; o̍ i̍ chɛ̄ pīyabɔ̄ta̍ hī ya̍chi yī lɛlā ɔyɔ̍ɔ̄ya̍ yī nū ɔla̍ā ni̍.

²² Wu̍chē yī ɔla̍ā, n ge̍ē de ɔ̍ ta̍gbo la u̍bwɔ̍ la ɛbɛ nīi anu̍ ba̍la āchɛ ɛla̍ā nīi ē gbo ē tāa anu̍ ma̍ nīi e̍ ē mi̍chi̍ ɔdwɔ̄bi̍ ɔdwɔnyɛ. N ge̍ē ya̍ tāa aa̍ u̍ma̍ama, nɛ̄ni̍ e̍ ge̍ē hɔ̄ɔ̄hɔ̄ pīyabɔ̄ta̍ hī lɛlā ya̍chi ɔla̍ā nīi e̍ ē ya̍ ba̍la anu̍ ma̍.

²³ N ge̍ē gba̍a ē kpo̍ āchɛ wa̍a̍ nīi - a̍chi̍kpo̍ yī nū ma̍ ē ngmo̍ cha̍cha̍. Bū la ɛbɛ ɔla̍ā, alogrēeyī yī āchɛ yī Ɔwɔ mɔri̍mɔri̍ wa̍a̍ ge̍ē jo̍ōkū hīka amɔ̍lɔ - ɔ̄chɛ oje̍ ɛri̍ya̍ ogbōgbo yī āchɛ ba̍la ɔjā nīi āchɛ ē chikpo̍ ma̍ nɛ. N ge̍ē kla̍ ɔ̄chɛmɔ̄chɛ yī ala̍ ure̍ gala ɔgɔgu yī lɛlā nīi ɔnyɔnyɛ ya̍ ma̍.

²⁴ “Ala̍ āchɛ ehēhī nīi gblāa abɔ̍ɔ la Itiya̍tīra ma̍ i̍ chɛ̄ku lɛlā ongōngū ɔdwɔ̄bi̍ nūma̍ ni̍. Ala̍ ma̍ i̍ ngū lɛlā ɔla̍ā nīi āchɛ ehēhī hī ɔ̄ hīka, ‘lɛlā ɔtrɛ̍ba hiyuu yī Isa̍tan’ ma̍ ni̍. Wu̍chē yī ɔla̍ā, n ge̍ē koko̍o ē de ala̍! N i̍ ge̍ē de ɔkpalɛ̄kā ɔha̍ ē de ala̍ ē gɛ ni̍.

²⁵ Ala̍ ā ta̍ābɔ̄ ku̍ ɔjā nīi ala̍ lɛ ma̍ brii kpɛɛ nīi n ge̍ē wā.

^26-28 Āchɛ nīi ge̍ē yɛ̍ɛ̄ngrɔ̄ɔ ma̍, nīi ge̍ē ya̍ ɔjā nīi n chikpo̍ ma̍, kpɛɛ gbo̍ ɔ̄chī ɔkwɛ̍ɛjī pɛtɛɛ ma̍, n ge̍ē de wɔhu̍ ɔla̍ā pi̍i̍ nīi A̍dā yī u de de u ma̍ ē de wa̍: N ge̍ē de wɔhu̍ yī ɔcha wa̍a̍ ē tū wā la abɔ̄. E̍ ge̍ē lwɔhu̍ bāa a̍bi̍ije ma̍ la obōbī nīi e̍ ge̍ē bī ɔcha wa̍a̍ ma̍. Ɔcha wa̍a̍ chī ge̍ē de ē lɛ bāa yɛ̄hī yī ajɛ nīi ē chɔ̄chiya mi̍ni̍mi̍ni̍ ma̍ ē de wa̍. N chī ge̍ē de i̍nyi̍nyɔ̍ɔwīyā yī obūrɔ̍ɔ̄chī ɔla̍ā de wa̍.

²⁹ “Ala̍ ge̍ tū arɔ̄ ɔplɛ̍ɛ̄lā, ɔ̍lɔma̍ ala̍ ā darɔ̄ku lɛlā nīi Uhu yī Ɔwɔ yɛ ma̍ ē ka ē de ogrēeyī yī āchɛ yī Ɔwɔ nūma̍ wa̍a̍ ma̍ gɛ!