ODE HI̍YƐCHƐ 19 - Ye̳ka Onīpīpē̳ Yī O̳wo̳

¹ La okwi̍ihi yī ɔla̍ā, n po̍ ojiya ɔha̍ nīi lɛ bāa ojiya yī ogrēeyī ɔnɔ̄kɔ̄kū ɔha̍ ma̍ abɔ̍ɔ la ichō. E̍ yɛ ē ka hīka, “Ala̍ ā kā Ɔwɔ ɔkɔ̄kā oo! Wu̍chē oji̍ nɛ, ɔhɛ̍ta̍, ba̍la rīgā, ba̍la wɔhu̍ wa̍a̍ - iyī Ɔwɔ nīi - Ɔwɔ yī alɔ ma̍ nɛ.

² Lɛpɔ̄ ɔhɔ̍ɔ̄hɛ̍ nīi o̍ hɛ̍ ma̍ - lɛlā olēchi̍ lēchi̍ ba̍la lɛlā ɔlɛkpakpa nɛ. Anu̍ akpara oro̍ohohu ɔla̍ā nīi yɛ ē de ajɛyɛ̄ɛchɛ wa̍a̍ ē bīya ē bū la ya̍chi yī lɛlā ɔyɔ̍ɔ̄ya̍ yī nū ɔla̍ā ma̍, Ɔwɔ hɛ̍ ɔ̄ lɛpɔ̄ ɔdwɔ̄bi̍ mɛ̍. Ɔwɔ ya̍ ɔ̄ ichi̍ wu̍chē oji̍ nɛ, o̍ kpo̍ āchɛ nīi - āchɛ yī Ɔwɔ ma̍ ngmo̍.”

³ E̍ gba̍a chūukwa bɛ̍ɛ̄nɛ̄ hīka, “Ala̍ ā kā Ɔwɔ ɔkɔ̄kā! Ingūɔ̄la̍ ɔla̍ā nīi bū la ipwo̍gra oro̍ohohu ɔla̍ā nīi yɛ ē wɔla̍ ma̍ ge̍ē ngmli̍imū kpɛɛ ē ku yɛ̄grāa i̍mɔ̄mɛni̍!”

⁴ Bɛ̍ɛ̄nɛ̄, ɛjā ɔhɔ̄leyī ɛla̍ā nīi lɛ ɛnɛ ma̍ ba̍la ɛgabɔ̄ āchɛ ohu che ɛnɛ ɛla̍ā ngma̍ ta̍gbo la ajɛ, ya̍ otūlichō de Ɔwɔ nīi hyāhɔ̄ la atɛ̍ ɔla̍ā ma̍. E̍ ka hīka ɔ̍lɔ ge̍ lɛ i̍ngɔ̍ɔ, o̍gbo̍ ɔ̍lɔ ge̍ iyī Ɔwɔ.

Wɔga yī ɔngrɛ̄ba̍ yī Ɔyɔ̍ɔ̄nyīyɛrɔ̄ ɔla̍ā

⁵ Bɛ̍ɛ̄nɛ̄ ma̍, ɔkɔlɛ̄lā ɔha̍ bū abɔ̍ɔ la atɛ̍ ɔla̍ā hīka, “Ala̍ wa̍a̍ nīi - a̍chɛ̍ yī Ɔwɔ ma̍, ba̍la āchɛ̄ɛchɛ wa̍a̍ jimini nīi tūuhwi yī nū ma̍, āchɛ ɛnɛ̄kɛ̄kū kɛ̄ɛ enīchi̍chɛ̍ oo, ala̍ ā kā Ɔwɔ yī alɔ ɔkɔ̄kā!”

⁶ Bɛ̍ɛ̄nɛ̄ ma̍, n po̍ ɔkɔlɛ̄lā yī āchɛ nīi hīiru kpɛ̍ɛ bāa ɔgbādu ɔnɔ̄kɔ̄kū ɔha̍ kɛ̄ɛ bāa ojiya yī yenyi ɔnɔ̄kɔ̄kū nīi yɛ ē ha̍ābɔ̄ bū la ɛbɛ olichīichō ma̍, kɛ̄ɛ bāa ojiya yī yakpla̍ ɔnɔ̄kɔ̄kū nīi yɛ ē gbo ma̍. N po̍ nīi e̍ yɛ ē ka bɛ̍ɛ̄nɛ̄ hīka, “Ala̍ ā kā Ɔwɔ ɔkɔ̄kā! Wu̍chē oji̍ nɛ, Ādādā Nīi - Ɔwɔ yī alɔ, Ɔgɔnyɛ Ɔnɔ̄kɔ̄kū ma̍ - Ɔchwɔ̄lɛ̍ nɛ.

⁷ Alɔ ā wɔ̄wīyā, lɛ yayaya! Alɔ ā kā Ɔwɔ ɔkɔ̄kā wu̍chē rīgā yī nū! Wu̍chē oji̍ nɛ, yɛ̄grāa yī ɔngrɛ̄ba̍ yī Ɔyɔ̍ɔ̄nyīyɛrɔ̄ de gbajɛ mɛ̍. Ɔngrɛ̄ba̍ yī nū ɔlɔjā ti̍bi̍īyēchɛ̄ wa̍a̍ mɛ̍.

⁸ E̍ de ɔ̄pa̍ ābāchā ɔha̍ nīi ngmɔ̍ɔ̄ngma̍, hu̍ nya̍ri̍nya̍ri̍ ma̍ de ɔ̍ nīi o̍ ge̍ē yi̍īyē la anu̍ mɛ̍.” Ɔ̄pa̍ ābāchā ohu̍ nya̍ri̍nya̍ri̍ ɔla̍ā kwichi̍ tāa lɛlā ɔlɛkpakpa ɔyɔ̍ɔ̄ya̍ yī āchɛ yī Ɔwɔ.

⁹ Bɛ̍ɛ̄nɛ̄ ma̍, ɔyɛ̍ɛ̄chɛ̄rɔ̄ ɔla̍ā ka de u hīka, “De lɛlā nūma̍ ta̍ tū la īpū gɛ: A̍hōhi ge̍ iyī āchɛ nīi e̍ ge̍ē hī wā ɛra̍ yī wɔga yī ɔngrɛ̄ba̍ yī Ɔyɔ̍ɔ̄nyīyɛrɔ̄ ɔla̍ā ma̍. Lɛlā olēchi̍ lēchi̍ yī Ɔwɔ ɔlɔjā hɔ̄ ma̍ a̍nɛ.”

¹⁰ Bɛ̍ɛ̄nɛ̄ ma̍, n ngma̍ ta̍gbo la apli̍kpo̍ yī ɔyɛ̍ɛ̄chɛ̄rɔ̄ ɔla̍ā yɛ ge̍ē ya̍ otūlichō de ɔ̍. O̍ da u ɔpɔ̄ɔpɛ̄ ka amɔ̍lɔ ge̍ e̍e ya̍ i̍ngɔ̍ɔ ni̍. Anu̍ titi, anɔ̍lɔ hɔ̍chɛ̍ bāa amɔ̍lɔ ba̍la aɛ̍nɛ̍ yī amɔ̍lɔ ehēhī ba̍la āchɛ wa̍a̍ nīi - ɛ̍lɛ nāa lɛlā olēchi̍ lēchi̍ nīi Iji̍sɔ̄ɔsi ɔ̍lɔ de hi̍yɛchɛ ma̍. Ɔwɔ nīi aɛ̍lɛ ge̍ē ya̍ otūlichō de ɔ̍lɔ a̍nɛ. Lɛlā olēchi̍ lēchi̍ ɔla̍ā nīi Iji̍sɔ̄ɔsi de hi̍yɛchɛ ma̍, anu̍ re̍ka uhu nīi ē ya̍ nīi āchɛ ē ka ɛrɔ̄ yī Ɔwɔ a̍nɛ.

Ɔ̄chɛ oche wɔnya ɔnɛ̄rɛ̍ɛ̄rɛ̍ ɔha̍

¹¹ Bɛ̍ɛ̄nɛ̄, n ma̍ nīi ichō lwāa tɔ̍ɔ̄ta̍; wɔnya ɔnɛ̄rɛ̍ ɔha̍ rɛ abɔ̍ɔ. Ɔ̄chɛ nīi che la ichō yī wɔnya ɔ̍lɔma̍ ma̍ re̍ka Ɔngma̍ La Ɔdɔtūche, ba̍la Olēchi̍ Lēchi̍. O̍ ē hlɛ̍ɛ̄pɔ̄ yī nū kpakpa; o̍ ē chī kplɛ̍wu̍ yī nū kpakpa.

¹² Īkprī yī nū lɛ bāa u̍blɛ̍ɛ̄nyī yī ɔla̍ ma̍. O̍ kla̍ okpo ɔkla̍lɛhu̍ yɛ̄mɛ̄mɛ̄ la īkplɛ̄hu̍ yī nū. E̍ de riyī yī nū ɔha̍ ta̍ gblāa abɔ̍ɔ la ibi̍īyē yī nū. Ɔ̄chɔ̄chɛ i̍ chī je̍ riyī yī nū ɔ̍lɔma̍ ni̍, ɔ̍chi̍kpa̍kpa̍ anu̍ ɔlɔjā.

¹³ Aru̍ ɔkwajɛ yī nū nīi o̍ ru abɔ̍ɔ ma̍ mi̍ya yeyī bāa ɔkplɔkplɔ ma̍. Riyī nīi e̍ ē bī hī ɔ̄ ɛra̍ ma̍ re̍ka “Lɛlā yī Ɔwɔ.”

¹⁴ Āchɛ ɔkplɛ̍wu̍ wa̍a̍ nīi gblāa la ichō ma̍ pɛ̍ wa̍a̍ ku ɔ̍ la u̍tu. Aa̍ wa̍a̍ che la wɔnya ɔnɛ̄rɛ̍ ɔnɛ̄rɛ̍ cha̍cha̍. Aa̍ wa̍a̍ chī yi̍īyē la ābāchā ɔnɛ̄rɛ̍ nīi ngmɔ̍ɔ̄ngma̍ cha̍ri̍cha̍ri̍ ma̍.

¹⁵ Oge oliri̍re̍ ɔha̍ bīyɛchɛ bū abɔ̍ɔ lipu̍ yī oko̍o yī nū. Ɔla̍ā nīi o̍ ge̍ē bī de alipwɔ̍ɔcha mɔcha wa̍a̍ gwō a̍nɛ. O̍ ge̍ē bī wɔhu̍ yī ipwɔ̍ɔcha ɔha̍lɔha̍ wa̍a̍ brii bāa a̍bi̍ije ma̍. Anu̍ chī ge̍ē kɔ̄ ɛ̍mwɔ̄ ɔla̍ā nīi - ɔtū ngurangura yī Ɔwɔ Ɔgɔnyɛ ma̍ ē tū bū la ɛbɛ ɔya̍ ɛ̍mwɔ̄ ɔ̍lɔma̍ a̍nɛ.

¹⁶ Abɔ̍ɔ la aru̍ ɔkwajɛ yī nū ɔla̍ā ba̍la ichō yī ikpo̍ yī nū, e̍ ta̍ riyī ɔha̍ gblāa la anu̍ hīka, “Ɔchwɔ̄lɛ̍ yī Ɛchwɔ̄lɛ̍ Wa̍a̍,” ba̍la “Ādādā yī Ādādā Wa̍a̍.”

¹⁷ Bɛ̍ɛ̄nɛ̄ ma̍, n wā ge̍ ma̍ ɔyɛ̍ɛ̄chɛ̄rɔ̄ yī Ɔwɔ ɔha̍ nīi yarɛ abɔ̍ɔ la ichō yī yɛnɔ. O̍ tɔ̍ɔna gbōō grāa a̍gba̍ana wa̍a̍ nīi yɛ ē wu ē ga la ichō ma̍ hīka, “Ala̍ ā tu̍ wā ge̍ grēeyī la wɔga ɔnɔ̄kɔ̄kū yī Ɔwɔ gɛ oo!

¹⁸ Ala̍ ā wā ge̍ re̍ ɛbɛ̍ yī āchɛ nīi - ɛchwɔ̄lɛ̍ ma̍, ba̍la alɛhu̍ yī icho̍ojiya ba̍la āchɛ ɔkplɛ̍wu̍ yī wā gɛ. Ala̍ ā wā ge̍ re̍ ɛbɛ̍ yī wɔnya ɛla̍ā ba̍la āchɛ nīi che la aa̍ ma̍, ba̍la ɛbɛ̍ yī āchɛ̄ɛchɛ wa̍a̍ jimini. E̍ ge̍ - afiyɛ oo, aywɔ̍lɛ̍ oo, āchɛ ɛnɛ̄kɛ̄kū kɛ̄ɛ enīchi̍chɛ̍ oo, ala̍ ā wā re̍.”

¹⁹ Bɛ̍ɛ̄nɛ̄ ma̍, n ma̍ nīi anu̍ ɛbɛ̍ ɔnɔ̄kɔ̄kū ɔla̍ā ba̍la ɔchwɔ̄lɛ̍ wa̍a̍ la ajɛyɛ̄ɛchɛ ba̍la āchɛ ɔkplɛ̍wu̍ yī wā wa̍a̍ gāa ge̍ grēeyī hɛ̄ɛbɛ ge̍ē kplɛ̍wu̍ tāa ɔ̄chɛ ɔla̍ā nīi che wɔnya ɔnɛ̄rɛ̍ ma̍ ba̍la āchɛ ɛkplɛ̍wu̍ yī nū.

²⁰ Ɛbɛ̍ ɔnɔ̄kɔ̄kū ɔla̍ā ma̍, e̍ de ɔ̍ ku̍ bāa ɔfiyɛ yī lɛwu̍ ma̍, ba̍la anu̍ ɔla̍ā nīi ē warīmɛ̄ ka anɔ̍lɔ ē ka ɛrɔ̄ yī Ɔwɔ nīi yɛ̍ɛ̄lā ɔlɛbɛ̍bi̍ yɛ̄mɛ̄mɛ̄ abɔ̍ɔ la iyɔ̄bū yī nū ma̍. Bū la lɛlā ɔlɛbɛ̍bi̍ ɛla̍ā nīi o̍ ya̍ ma̍ nīi o̍ bī gla̍ āchɛ wa̍a̍ nīi ba̍ ina̍aba yī ɛbɛ̍ ɔnɔ̄kɔ̄kū ɔla̍ā ba̍la enīi ya̍ otūlichō de i̍kpe̍ēkū yī ɛbɛ̍ ɔnɔ̄kɔ̄kū ɔla̍ā ma̍ a̍nɛ. Ɛbɛ̍ ɔnɔ̄kɔ̄kū ɔla̍ā ba̍la anu̍ ɔla̍ā nīi ē warīmɛ̄ ka anɔ̍lɔ ē ka ɛrɔ̄ yī Ɔwɔ ma̍, e̍ ku̍ wā la eyī la eyī ta̍tū lipu̍ yī ɔla̍ ɔnɔ̄kɔ̄kū ke̍ke̍ni̍ nīi isɔ̍fɔ yɛ ē chɔ̄chɛ̄ la anu̍ ma̍.

²¹ Āchɛ ɛkplɛ̍wu̍ yī wā wa̍a̍, e̍ kpo̍ wā ngmo̍ la yāā oliri̍re̍ ɔla̍ā nīi bīyɛchɛ bū la oko̍o yī ɔ̄chɛ nīi che wɔnya ɔnɛ̄rɛ̍ ma̍. A̍gba̍ana ɛla̍ā re̍ ɛbɛ̍ yī wā lɔkɔkɔ nīi e̍ re̍ ba̍ mɛ ma̍.