ODE HI̍YƐCHƐ 18 - Ye̳ka Onīpīpē̳ Yī O̳wo̳

Ajɛ ogwōgwō yī Iba̍bīlɔn

¹ La okwi̍ihi yī ɔla̍ā, n ma̍ ɔyɛ̍ɛ̄chɛ̄rɔ̄ yī Ɔwɔ ɔha̍ nīi o̍ hrāajɛ bū la ichō yɛ ē wā. O̍ nāa wɔhu̍ ɔnɔ̄kɔ̄kū ke̍ke̍ni̍. Ajɛ yī yɛchɛ wa̍a̍ nyā gēdēgēdē bū la oho̍ōhu̍ ɔlɛbɛ̍bi̍ yī ɔyɛ̍ɛ̄chɛ̄rɔ̄ yī Ɔwɔ ɔla̍ā.

² O̍ tɔ̍ɔna ka gbōō bɛ̍ɛ̄nɛ̄ hīka, “O̍ gwāajɛ mɛ̍ oo! Iba̍bīlɔn Oro̍ohohu ɔla̍ā gwāajɛ ke̍e̍ mɛ̍! O̍ de pīya ɛbɛ ɔlwɔ̄lɛ̍ yī yapri̍ija ɔdwɔ̄bi̍ ba̍la ɛbɛ ɔgāā bɛ̍bɛ̍ yī uhu ɔdwɔ̄bi̍ ɛha̍lɛha̍ wa̍a̍ mɛ̍! A̍gba̍ana ɛrɛ̍bi̍ ba̍la enīi ta̍ āchɛ anyī gba̍a̍ ma̍ gblāa abɔ̍ɔ la anu̍ a̍nɛ!

³ Wu̍chē oji̍ nɛ, o̍ ya̍ nīi ɔcha wa̍a̍ gwa̍ akro ɛ̍mwɔ̄ yī nū ɔ̍lɔma̍, ya̍ nīi e̍ hɔ̍ɔ̄hla̍ la ɔya̍chi yī lɛlā ɔla̍ā ba̍la anu̍. Ɔchwɔ̄lɛ̍ yī ajɛyɛ̄ɛchɛ wa̍a̍ gāa ge̍ ya̍chi yī lɛlā ɔla̍ā ba̍la anu̍. Alɔ̍hi̍ ɔnɔ̄kɔ̄kū yī ajɛyɛ̄ɛchɛ wa̍a̍ de kpo̍ gbwɔdu wu̍chē yī ya̍chi yī lɛlā ɔyɔ̍ɔ̄ya̍ yī nū ɔla̍ā nīi hla̍ anu̍ la ɔyɔ̍ɔ̄ya̍ i̍ngɔ̍ɔ gba̍a̍ ma̍.”

⁴ Bɛ̍ɛ̄nɛ̄ ma̍, n po̍ ɔkɔlɛ̄lā ɔha̍ bū abɔ̍ɔ la ichō hīka, “Āchɛ yī u, ala̍ ā bīyɛchɛ oo! Ala̍ ā bīyɛchɛ hī ipwo̍gra ɔla̍ā! Ala̍ e̍e gblāa tābɔ̄ lɛlā ɔdwɔ̄bi̍ ɔyɔ̍ɔ̄ya̍ yī wā ni̍! Ala̍ e̍e gblāa mi̍chi̍ nīi ge̍ē hɔ̄ de ɔ̍ ma̍ ni̍!

⁵ Wu̍chē oji̍ nɛ, lɛlā ɔdwɔ̄bi̍ yī nū mwɛbɛ gba̍a̍. Ɔwɔ bla lɛlā abi̍ ɔyɔ̍ɔ̄ya̍ yī nū wa̍a̍ mɛ̍.

⁶ Ya̍ tāa anu̍ lɔkɔ nīi anu̍ ya̍ āchɛ ma̍ gɛ! Kla̍ anu̍ ure̍ ikɛpa yī onīi anu̍ ya̍ ma̍! De akro nīi lwɔhu̍ ikɛpa hi̍ iyī nū nīi o̍ de de āchɛ ma̍ tū la ɔgba̍galā ɔla̍ā pi̍i̍ de ɔ̍!

⁷ De ichi̍ ɔmɔ̍ɔ̄ma̍ ba̍la īlāanyī gba̍a̍ de ɔ̍ kwiko la rīgā ba̍la āɛ̄jā ɛnɛ̄ɛhɛhi ɛla̍ā nīi o̍ kpo̍ de iyī nū iyī nū ma̍! Wu̍chē oji̍ nɛ, o̍ ē ka ē de iyī nū myɛ̄grāa-myɛ̄grāa hīka, anɔ̍lɔ hɔ̄ ma̍ ma̍, anɔ̍lɔ - ɔchwɔ̄lɛ̍ nɛ; anɔ̍lɔ i̍ onyōkū ni̍. Īlāanyī ɔha̍lɔha̍ ɔ̍lɔ i̍ ge̍ē hɔ̄ de anu̍ ge̍ē gbo̍ ni̍.

⁸ Wu̍chē yī ɔla̍ā, ɔgawu wa̍a̍ nīi ge̍ē wā la anu̍ ma̍ ge̍ē wā la anu̍ i̍chi̍chɛ. Ɔgawu yī iyē oko̍ōku̍ ba̍la īlāanyī ba̍la lɛmiyɛ ɔdwɔ̄bi̍ ɔdwɔnyɛ nɛ. O̍ chī ge̍ē de ē wɔla̍ ē tāajɛ. Wu̍chē oji̍ nɛ, Ɔwɔ Ādādā nīi hɛ̍ ɔ̄ lɛpɔ̄ ma̍ - ɔgɔnyɛ gba̍a̍ nɛ!”

⁹ Ɔchwɔ̄lɛ̍ yī ajɛ yɛchɛ wa̍a̍ nīi tābɔ̄ ya̍chi yī lɛlā ɔyɔ̍ɔ̄ya̍ ba̍la a̍hla̍ ɔdwɔ̄bi̍ ɔla̍ā ba̍la anu̍ ma̍ ge̍ē drɛ̄ɛgba ē gwe̍ejrīkā tū ipwo̍gra ɔla̍ā yɛ̄grāa ɔla̍ā nīi e̍ ge̍ē ma̍ ingūɔ̄la̍ yī ɔla̍ nīi o̍ yɛ ē wu ma̍.

¹⁰ Wu̍chē lɔkɔ nīi e̍ yɛ ē tūuhwi yī ichi̍ yī ipwo̍gra ɔla̍ā ma̍, e̍ ge̍ē hɛ̍ rɛ abɔ̍ɔ hwɛɛ ē ka hīka ɔ̍lɔ ge̍, “Ɔcha̍a̍hoho̍o! Wo̍ro̍ro̍ro̍o! Iba̍bīlɔn ɔnɔ̄kɔ̄kū oro̍ohohu nūma̍! Re̍ka lipu̍ yī ākārākā ūkpo̍he ji nīi ɔchāajɛ yī wɔ de chlɛhu̍ i̍ngɔ̍ɔ hɔ̄ ma̍ a̍nɛ?”

¹¹ Alɔ̍hi̍ ɔnɔ̄kɔ̄kū yī ajɛyɛ̄ɛchɛ wa̍a̍ titi ge̍ē drɛ̄ɛgba ē gwe̍ejrīkā tū ɔ̄. Wu̍chē oji̍ nɛ, ɔ̄chɔ̄chɛ i̍ ge̍ē ra̍ āɛ̄jā yī ɔ̍hi̍ yī wā gɛ ni̍.

¹² Ɛjā bāa igo̍olu, isi̍li̍ba, achɔ̄ ɛlamu ɛlamu ɛha̍ ba̍la akpānā, e̍ i̍ ge̍ē ra̍ tāa aa̍ gɛ ni̍. Ɛjā bāa ɔ̄pa̍ ābāchā ɛha̍, ba̍la ɔ̄pa̍ ɔnɔ̄a̍ nyɔɔ ɛha̍, ba̍la ɔ̄pa̍ yī ihi̍li̍ki, ba̍la ɔ̄pa̍ ɔnɔ̄a̍ nyɛ̍ri̍nyɛ̍ri̍ ɛha̍ ma̍, e̍ i̍ chī ge̍ē ra̍ la abɔ̄ yī wā gɛ ni̍. Ɛjā bāa ligbo̍ yī ɔchi̍ ɔha̍ nīi ku lɛha̍ gba̍a̍ ma̍, ba̍la āɛ̄jā wa̍a̍ nīi e̍ ya̍ bū la angūu yī inyi ma̍, ba̍la enīi e̍ ya̍ la ita ɔchi̍ ɔha̍ nīi lwɔ̍la̍ gba̍a̍ ma̍, ba̍la enīi e̍ ya̍ la oje ita ɔha̍ nīi re̍ka ibrɔ̍ɔnsi ma̍, ba̍la iyī oje ɔlamu, ba̍la iyī achɔ̄ nīi re̍ka ima̍buli ma̍, e̍ i̍ ge̍ē ra̍ tāa aa̍ ē gɛ ni̍.

¹³ Ɛjā bāa ɔjā oni̍pī gɛnɛgɛnɛ ɔha̍ nīi re̍ka isi̍nāmɔn ma̍, ba̍la ɔchi̍ oni̍pī kwɛ̍kwɛ̍ ɛha̍, ba̍la ɔjā oni̍pī kwɛ̍kwɛ̍ nīi re̍ka isɛ̍ɛti ma̍ ba̍la yanɔ̄ oni̍pī kwɛ̍kwɛ̍ ɔha̍ nīi re̍ka ima̍a ma̍, ba̍la ɔjā oni̍pī kwɛ̍kwɛ̍ nīi re̍ka ifra̍nkīsɛ̄ɛsi ma̍, e̍ i̍ ge̍ē ra̍ tāa aa̍ gɛ ni̍. Ɛjā bāa ɛ̍mwɔ̄ ba̍la yanɔ̄, ba̍la igu nīi re̍ka ifla̍wa ba̍la iwi̍iti ma̍, ba̍la egedebi̍ya̍, ba̍la anyīyɛrɔ̄, ba̍la wɔnya ba̍la wɔwu̍ ajɛ, afiyɛ wa̍a̍ ba̍la ɔhɔ̄leyī yī āchɛ̄ɛchɛ, e̍ i̍ ge̍ē ra̍ tāa aa̍ gɛ ni̍.

¹⁴ Alɔ̍hi̍ ɛla̍ā wa̍a̍ da ipwo̍gra ɔla̍ā bɛ̍ɛ̄nɛ̄ hīka, “O̍ re̍ka ɛjā ɛnɛ̄ɛhɛhi ɛla̍ā wa̍a̍ nīi a hɔ̍ɔ̄hla̍ ge̍ē de ē lɔ̄lɛ ma̍ de chāajɛ wa̍a̍ mɛ? O̍ re̍ka wɔdu ba̍la rīgā ɔla̍ā wa̍a̍ mɛ cha̍cha̍ mɛ̍? Aba̍ nīi a yɛ abɔ̍ɔ ge̍ē ma̍ wā ge̍ē gbo̍ we̍ ma̍?”

¹⁵ Alɔ̍hi̍ ɛla̍ā wa̍a̍ nīi de gbwɔdu bū la ɔ̍hi̍ ɔtɔ̍ɔ̄ta̍ la ipwo̍gra ɔla̍ā ma̍ ge̍ē hɛ̍ rɛ abɔ̍ɔ hwɛɛ ē drɛ̄ɛgba ē gwe̍ejrīkā. Wu̍chē oji̍ nɛ, e̍ yɛ ē tūuhwi yī ichi̍ ɔmɔ̍ɔ̄ma̍ nīi hɔ̄ de ɔ̍ ma̍.

¹⁶ E̍ ge̍ē ka hīka ɔ̍lɔ ge̍, “Ɔcha̍a̍hoho̍o! Wo̍ro̍ro̍ro̍o! Ipwo̍gra oro̍ohohu nūma̍! Ipwo̍gra nūma̍ nīi kpo̍ ɔ̄pa̍ yī ābāchā ɛla̍ā ba̍la ɔ̄pa̍ ɔnɔ̄a̍ nyɔɔ ɛla̍ā ba̍la ɔnɔ̄a̍ nyɛ̍ri̍nyɛ̍ri̍ ɛla̍ā daba̍, gba̍a kpo̍ āɛ̄jā yī igo̍olu, ba̍la achɔ̄ ɔlamu ɔlamu ɛla̍ā, ba̍la akpānā wa̍a̍ daba̍ ma̍!

¹⁷ Anu̍ nīi wɔdu ɔnɔ̄kɔ̄kū nūma̍ wa̍a̍ de chāajɛ i̍ngɔ̍ɔ lipu̍ yī ākārākā ūkpo̍he ɔbɔbɔ a̍nɛ?” Āchɛ wa̍a̍ nīi - alɛhu̍ yī ijagidō ma̍ ba̍la āchɛ nīi tū la wɔwu̍ wa̍a̍ ma̍ ba̍la āchɛ ɔpwɔ̍wu̍ wa̍a̍ ba̍la āchɛ nīi ē ya̍ u̍ku̍rɔ̍ yī ɔhɔ̄leyī yī wā abɔ̍ɔ la li̍hu ma̍ ge̍ē hɛ̍ gblāa abɔ̍ɔ hwɛɛ.

¹⁸ E̍ ge̍ē to̍ohwe̍e wu̍chē yī ingūɔ̄la̍ yī ipwo̍gra ɔla̍ā nīi yɛ ē wɔla̍ ma̍. Ipwo̍gra ɔha̍lɔha̍ ɔ̍lɔ i̍ lɛ bāa ipwo̍gra oro̍ohohu nūma̍ je̍ ni̍ oo!

¹⁹ E̍ kpo̍ ajɛ tū la lɛhu̍, to̍ohwe̍e, drɛ̄ɛgba ka ɔ̍lɔ ge̍, “Ɔcha̍a̍hoho̍o! Wo̍ro̍ro̍ro̍o! Ipwo̍gra ɔnɔ̄kɔ̄kū nūma̍! Ipwo̍gra nūma̍ nīi alwɔwu̍ nīi ē ga la li̍hu wa̍a̍ ma̍ de kpo̍ gbwɔdu bū la wɔdu yī nū ma̍! Anu̍ nīi ɔjāha̍ ɔjāha̍ yī nū ɔla̍ā wa̍a̍ de chāajɛ i̍ngɔ̍ɔ lipu̍ yī ākārākā ūkpo̍he ɔbɔbɔ a̍nɛ?”

²⁰ Alichō wa̍a̍, ala̍ ā wɔ̄wīyā wu̍chē yī ɔchāajɛ yī ipwo̍gra ɔla̍ā gɛ. Ala̍ āchɛ yī Ɔwɔ, ba̍la alɛrɔ̄ ba̍la āchɛ ɔkɛrɔ̄ yī Ɔwɔ mɔri̍mɔri̍, ala̍ ā wɔ̄wīyā gɛ! Wu̍chē oji̍ nɛ, Ɔwɔ hɛ̍ ipwo̍gra ɔla̍ā lɛpɔ̄ ɔdwɔ̄bi̍ wu̍chē yī ɔjā nīi o̍ ya̍ tāa ala̍ ma̍ mɛ̍.

²¹ Bɛ̍ɛ̄nɛ̄ ma̍, ɔyɛ̍ɛ̄chɛ̄rɔ̄ yī Ɔwɔ ɔnɔ̄kɔ̄kū ɔha̍ nāa lɛchɔ̄ ɔha̍ nīi lɔ̄kū kpɛ̍ɛ bāa lɛchɔ̄ ɛdɛ̄ ma̍, wa̍ābɔ̄ la anu̍ ta̍tū ga li̍hu. O̍ ka bɛ̍ɛ̄nɛ̄ hīka, “I̍ngɛ̍ɛ̄nɛ̄ nīi e̍ ge̍ē wa̍ābɔ̄ la Iba̍bīlɔn ipwo̍gra oro̍ohohu ɔla̍ā dra̍ ajɛ wɔhu̍ wɔhu̍ nīi ɔ̄chɔ̄chɛ i̍ ē ma̍ ɔ̄ ē gɛ ni̍ a̍nɛ.

²² Ɔkɔ yī ejē yī alɛ̄ngū ogwōgwō ba̍la alejē ogwo̍ōgwo̍, alu̍fle ba̍la alɛjī ogwōgwō wa̍a̍, ɔ̄chɔ̄chɛ i̍ ge̍ē po̍ abɔ̍ɔ la awɔ ipwo̍gra ɔla̍ā gɛ ni̍. Olu̍ku̍rɔ̍ ita ɔha̍lɔha̍ i̍ ge̍ē hɔ̄ abɔ̍ɔ la awɔ ipwo̍gra ɔla̍ā gɛ ni̍. Ɔ̄chɔ̄chɛ i̍ ge̍ē po̍ ojiya yī lɛchɔ̄ ɛdɛ̄ abɔ̍ɔ la awɔ ge̍ē gbo̍ gɛ ni̍.

²³ Ɔla̍ yī otīnīkā, ɔ̄chɔ̄chɛ i̍ ge̍ē ma̍ abɔ̍ɔ la awɔ ē gɛ ni̍. Ɔ̄chɔ̄chɛ i̍ ge̍ē pɔ̍ɔkɔ yī angrɛ̄ba̍ ba̍la ɛba̍āngrɛ̄ba̍ abɔ̍ɔ la awɔ ipwo̍gra ɔla̍ā ge̍ē gbo̍ gɛ ni̍. Alɔ̍hi̍ nīi - iyī awɔ ipwo̍gra ɔla̍ā ma̍, aa̍ lwɔhu̍ gɔ̄ga wa̍a̍ lipu̍ yɛchɛ a̍nɛ. Bū la obūdeyī yī wɔ nīi a chī bī gla̍ āchɛ yī yɛchɛ wa̍a̍ i̍ngɔ̍ɔ a̍nɛ.”

²⁴ Ɔwɔ de ichi̍ de ipwo̍gra yī Iba̍bīlɔn i̍ngɔ̍ɔ wu̍chē yī ɔpīyaku̍ yī āchɛ ɔkɛrɔ̄ yī Ɔwɔ ba̍la āchɛ yī Ɔwɔ wa̍a̍ nīi de jī la lɛhu̍ yī ipwo̍gra ɔla̍ā ma̍. Ɔpīyaku̍ yī āchɛ wa̍a̍ nīi e̍ kpo̍ wā ngmo̍ amu la ajɛyɛ̄ɛchɛ ma̍ nɛ.