ODE HI̍YƐCHƐ 17 - Ye̳ka Onīpīpē̳ Yī O̳wo̳

Akpara ɔnɔ̄kɔ̄kū nīi ro̍ohohu ma̍

¹ Bɛ̍ɛ̄nɛ̄ ma̍, ɔha̍ lipu̍ yī ayɛ̍ɛ̄chɛ̄rɔ̄ yī Ɔwɔ arāapa ɔla̍ā nīi bī ɔtū ngurangura yī Ɔwɔ lipu̍ yī u̍kpu̍ūhā arāapa ma̍ wā dikpo̍ba̍ u ge̍ ka hīka, “Yewā nīi n ā chabɔ̄ hu̍ wɔ lɔkɔ nīi Ɔwɔ ge̍ē ya̍ akpara oro̍ohohu ɔla̍ā ichi̍ ma̍ gɛ! Ipwo̍gra oro̍ohohu ɔla̍ā nīi kū bla̍a ɔkpa̍ yɛ̄mɛ̄mɛ̄ ɛla̍ā ma̍ re̍ i̍ngɔ̍ɔ a̍nɛ.

² Ɔchwɔ̄lɛ̍ wa̍a̍ la ajɛyɛ̄ɛchɛ gāa ge̍ yɛ̍ɛ̄lā ya̍chi ɔla̍ā ba̍la anu̍ akpara oro̍ohohu ɔ̍lɔma̍. Āchɛ yī yɛchɛ wa̍a̍ de ya̍ bāa āchɛ ɔwīyɔ̄jā bū la ɛ̍mwɔ̄ ɔgwɔ̍ɔ̄gwa̍ ma̍ wu̍chē yī ya̍chi yī lɛlā ɔyɔ̍ɔ̄ya̍ ba̍la akpara ɔla̍ā.”

³ Ɔpɔ̄ɔpɛ̄, Uhu yī Ɔwɔ kla̍ ami bri̍bri̍bri̍; ɔyɛ̍ɛ̄chɛ̄rɔ̄ yī Ɔwɔ ɔla̍ā nāa ami pīya ga lipu̍ a̍chi̍ chukuru ɔha̍. Bɛ̍ɛ̄nɛ̄ ma̍, n ma̍ ɔnyā ɔha̍ nīi hyāhɔ̄ abɔ̍ɔ la ichō yī ɛbɛ̍ ɔnɔ̄kɔ̄kū ɔnɔ̄ɔ̍ɔ̄a̍ ɔha̍. E̍ ta̍ riyī yī wɔbi̍ lɛlā che ɛbɛ̍ ɔ̍lɔma̍ miyēmiyē wa̍a̍. Ɛbɛ̍ ɔnɔ̄kɔ̄kū ɔla̍ā tū īkplɛ̄hu̍ arāapa ba̍la ajī igwo̍.

⁴ Āɛ̄jā otūlibi̍īyē nīi - ɔnɔ̄a̍ nyɔɔ ba̍la ɔnɔ̄a̍ nyɛ̍ri̍nyɛ̍ri̍ ma̍ nīi ɔnyā ɔ̍lɔma̍ tū a̍nɛ. Āɛ̄jā yī igo̍olu, ba̍la achɔ̄ ɔlamu ɔlamu ɛha̍ ba̍la akpānā nīi o̍ kpo̍ daba̍ wa̍a̍ a̍nɛ. O̍ bī ɔgba̍galā yī igo̍olu ɔha̍ la abɔ̄. Ɛjā eli̍hi̍hi̍ya̍ ba̍la a̍kpla yī ɛjā ɛha̍lɛha̍ nīi bū la ya̍chi yī lɛlā ɔyɔ̍ɔ̄ya̍ yī nū ɛla̍ā ma̍ mu ɔgba̍galā ɔla̍ā omōmu rɛ abɔ̍ɔ a̍nɛ.

⁵ Abɔ̍ɔ la inēyī yī ɔnyā ɔ̍lɔma̍, e̍ ta̍ riyī ɔha̍ nīi ochi̍chi̍ yī nū trɛ̍ba ma̍ che abɔ̍ɔ hīka, “Iba̍bīlɔn Oro̍ohohu! Ɛ̍nɛ̍ yī akpara ba̍la lɛlā ya̍chi ɔyɔ̍ɔ̄ya̍ wa̍a̍ la yɛchɛ.”

⁶ Bɛ̍ɛ̄nɛ̄ ma̍, n ma̍ hīka ɔnyā ɔ̍lɔma̍ de ya̍ bāa ɔ̄chɛ ɔwīyɔ̄jā ma̍ bū la yeyī yī āchɛ yī Ɔwɔ ba̍la yeyī yī itɛ̍ɛhi̍yɛ̍ ɛnɛ̄ɛhɛhi yī Iji̍sɔ̄ɔsi nīi āchɛ ɛha̍ kpo̍ wā ngmo̍ wu̍chē lɔkɔ nīi e̍ pɔ̍ɔkɔ yī Iji̍sɔ̄ɔsi ma̍. N ma̍ ɔnyā ɔla̍ā ma̍, o̍ de ya̍ u lɛbɛ̍bi̍ ɔlamu ɔlamu.

⁷ Ɔyɛ̍ɛ̄chɛ̄rɔ̄ yī Ɔwɔ ɔla̍ā da u bɛ̍ɛ̄nɛ̄ hīka, “Ɔna̍ - ɔlɛ wɔ lɛbɛ̍bi̍ ma̍/? N ge̍ē koko̍o yī lɛlā ɔtrɛ̍ba nīi lā ku ɔnyā ɔla̍ā ba̍la ɛbɛ̍ ɔnɔ̄kɔ̄kū otū īkplɛ̄hu̍ arāapa ba̍la ajī igwo̍ nīi o̍ che aa̍ la anu̍ ma̍ ē de wɔ.

⁸ Ɛbɛ̍ ɔnɔ̄kɔ̄kū ɔla̍ā nīi a ma̍ ma̍ hɔ̄leyī o̍bū; u̍ma̍ama, o̍ i̍ hɔ̄leyī ni̍. O̍ chī ge̍ē bū la ɔngɔ̄nɔ̄ngɔ̄nɔ̄ yī ayekū wā nīi e̍ ē de ɔ̍ ē chāajɛ ligbo̍ ligbo̍ we̍. Āchɛ yī yɛchɛ wa̍a̍ nīi riyī yī wā i̍ tū la īpū yī ɔhɔ̄leyī ɔla̍ā o̍bū nīi yɛchɛ wu̍tu ni̍ ma̍, o̍ ge̍ē de ē ya̍ wā lɛbɛ̍bi̍ nīi e̍ ge̍ē ma̍ ɛbɛ̍ ɔnɔ̄kɔ̄kū ɔla̍ā ma̍. Wu̍chē oji̍ nɛ, o̍ hɔ̄leyī o̍bū; o̍ i̍ chī hɔ̄leyī u̍ma̍ama ni̍; o̍ chī ge̍ē ku̍chē we̍.

⁹ “Lɛlā nūma̍ wa̍a̍ ngma̍ nīi ɔ̄chɛ ē jyɛ̍ɛ̄lā kure̍kure̍, po̍ ochi̍chi̍ yī lɛlā mɛ. Īkplɛ̄hu̍ arāapa ɛla̍ā kwichi̍ tāa u̍kpo̍chi arāapa nīi - ɛbɛ nīi ɔnyā ɔla̍ā hyāhɔ̄ ɔhɔ̄hɔ̄ ma̍. E̍ gba̍a kwichi̍ tāa ɔchwɔ̄lɛ̍ arāapa ɛha̍.

¹⁰ Ɛrwɔ̄ lipu̍ yī wā gwāajɛ mɛ̍. Ɔha̍ hɔ̄ amu ē re̍ ɔchwɔ̄lɛ̍; ɔha̍ i̍ chī wā we̍ ni̍. Ɔla̍ā ge̍ē wā ma̍, o̍ chī ge̍ē hɔ̄ la yɛ̄grāa ɔha̍ pi̍nyɛ̍ o̍bū.

¹¹ Anu̍ ɛbɛ̍ ɔnɔ̄kɔ̄kū ɔla̍ā nīi hɔ̄leyī o̍bū i̍ hɔ̄ u̍ma̍ama gɛ ni̍ ma̍, anu̍ - ɔchwɔ̄lɛ̍ ɔmarāata̍ a̍nɛ. O̍ chī tū abɔ̍ɔ lipu̍ yī ɔchwɔ̄lɛ̍ arāapa ɛla̍ā. Anu̍ ma̍ ge̍ē de ē chāajɛ.

¹² “Ajī igwo̍ nīi a chī ma̍ ma̍ re̍ka ɔchwɔ̄lɛ̍ igwo̍ ɛha̍ nīi i̍ wu̍tu yī wɔhu̍ yī ɛbɛ obōbī we̍ ni̍ ma̍. E̍ chī yɛ abɔ̍ɔ ge̍ē nāa wɔhu̍ yī ɛbɛ obōbī bāa ɔchwɔ̄lɛ̍ ma̍ tāa ɛbɛ̍ ɔnɔ̄kɔ̄kū ɔla̍ā la ākārākā ūkpo̍he.

¹³ Ɔchwɔ̄lɛ̍ igwo̍ nūma̍ bī ohu̍ yī lɛlā ūkpo̍he ūkpo̍he. E̍ nāa wɔhu̍ yī wā ba̍la wɔhu̍ obī yɛ̍ɛ̄lā yī wā de anu̍ ɛbɛ̍ ɔnɔ̄kɔ̄kū ɔla̍ā mɛ̍.

¹⁴ E̍ ge̍ē bɔ̍ɔ̄ba̍ kplɛ̍wu̍ tāa Ɔyɔ̍ɔ̄nyīyɛrɔ̄ ɔla̍ā. Ɔyɔ̍ɔ̄nyīyɛrɔ̄ ɔla̍ā ba̍la alikpɛ̍ɛ yī nū nīi o̍ hī wā ɛra̍, de wa̍ hōhu nīi chī de ɔtū che ɔ̍ ma̍ ge̍ē de wa̍ gwō ke̍e̍. Wu̍chē oji̍ nɛ, Ɔyɔ̍ɔ̄nyīyɛrɔ̄ ɔla̍ā re̍ka Ādādā yī ādā wa̍a̍ ba̍la Ɔchwɔ̄lɛ̍ yī ɛchwɔ̄lɛ̍ wa̍a̍ a̍nɛ.”

¹⁵ Ɔyɛ̍ɛ̄chɛ̄rɔ̄ yī Ɔwɔ ɔla̍ā gba̍a koko̍o de u hīka, “Yenyi nīi a ma̍ nīi akpara ɔla̍ā hyāhɔ̄ aa̍ la anu̍ ma̍ kwichi̍ tāa ɔchamɔcha wa̍a̍ ba̍la ipwɔ̍ɔma ɔha̍lɔha̍ wa̍a̍ ba̍la ipwɔ̍ɔcha wa̍a̍ ba̍la ita yī āchɛ̄ɛchɛ ɔha̍lɔha̍ wa̍a̍.

¹⁶ Ajī igwo̍ ɛla̍ā nīi a ma̍ ma̍ ba̍la ɛbɛ̍ ɔnɔ̄kɔ̄kū ɔla̍ā, akpara ɔla̍ā ge̍ē de ē pīya ɔta̍anyī yī wā. E̍ ge̍ē de ɔjāmɔjā nīi akpara ɔla̍ā lɛ ma̍ nāa ē hī ɔ̄ abɔ̄. E̍ ge̍ē hɛ̍ ɔ̄ ohi̍ ɛwɛwa. E̍ ge̍ē de ɔ̍ ɛbɛ̍ yī ibi̍īyē re̍ cha̍cha̍ o̍bū gba̍a de ɔ̍ chāajɛ la ɔla̍.

¹⁷ Wu̍chē oji̍ nɛ, Ɔwɔ de ɛri̍ya̍ ɔha̍ tū wā la ūkpɔ̄tū ya̍ nīi e̍ ē hɔ̍ɔ̄hla̍ la oge̍ ya̍ lɔkɔ nīi Ɔwɔ ɔlɔjā miya ma̍. Ɔla̍ā re̍ka e̍ ge̍ē ya̍ ɔgulɛ̄lā ūkpo̍he nīi aa̍ wa̍a̍ miya ma̍, gba̍a ē nāa wɔhu̍ ɔchwɔ̄lɛ̍ oro̍ōre̍ yī wā de ɛbɛ̍ ɔnɔ̄kɔ̄kū ɔla̍ā kpɛɛ nīi lɛlā yī Ɔwɔ de ē ya̍ la ɔgɔ̄grāa o̍bū.

¹⁸ “Ɔnyā ɔla̍ā nīi a ma̍ ma̍, anu̍ - ipwo̍gra oro̍ohohu ɔla̍ā nīi bī wɔhu̍ yī ɔchwɔ̄lɛ̍ yī ajɛyɛ̄ɛchɛ wa̍a̍ ma̍ a̍nɛ.”