ODE HI̍YƐCHƐ 16 - Ye̳ka Onīpīpē̳ Yī O̳wo̳

U̍kpu̍ūhā ɛla̍ā nīi ɔtū ngurangura yī Ɔwɔ tū ma̍

¹ Bɛ̍ɛ̄nɛ̄ ma̍, n po̍ ɔkɔlɛ̄lā ɔha̍ kpɛ̍ɛ bāa ɔfrāfrā ma̍ bū abɔ̍ɔ la u̍nu̍ yī Ɔwɔ. O̍ ka grāa ayɛ̍ɛ̄chɛ̄rɔ̄ yī Ɔwɔ arāapa ɛla̍ā hīka, “Ala̍ ā gāa ge̍ wa̍ābɔ̄ la ɔtū ngurangura yī Ɔwɔ nīi tū la u̍kpu̍ūhā arāapa ɛla̍ā ma̍ chīyēgblāa ga ajɛyɛ̄ɛchɛ gɛ!”

² Ɔpɔ̄ɔpɛ̄, ɔyɛ̍ɛ̄chɛ̄rɔ̄ yī Ɔwɔ ɔrāarāa gāa ge̍ de iyī u̍kpu̍ūhā yī nū chīyēkla̍ ajɛyɛ̄ɛchɛ wa̍a̍. Ripi̍ ɔdwɔ̄bi̍ ɔdwɔnyɛ ɔha̍ nīi ē hwōhwō gba̍a̍ ma̍ hɛ̍ āchɛ wa̍a̍ nīi ba̍ ina̍aba yī ɛbɛ̍ ɔnɔ̄kɔ̄kū ɔla̍ā ma̍, ba̍la āchɛ nīi ya̍ otūlichō de i̍kpe̍ēkū yī ɛbɛ̍ ɔnɔ̄kɔ̄kū ɔ̍lɔma̍ ma̍.

³ Ɔyɛ̍ɛ̄chɛ̄rɔ̄ yī Ɔwɔ ɔmɛpa de iyī u̍kpu̍ūhā yī nū chīyēkla̍ la li̍hu wa̍a̍. Ɔpɔ̄ɔpɛ̄ yenyi de ya̍ bāa yeyī yī okū ma̍ wa̍a̍. Ɛjāha̍ ɛjāha̍ wa̍a̍ nīi hɔ̄ la yenyi ma̍ pīyaku̍ cha̍cha̍.

⁴ Ɔyɛ̍ɛ̄chɛ̄rɔ̄ yī Ɔwɔ ɔmɛta̍ titi gāa ge̍ de iyī u̍kpu̍ūhā yī nū chīyētū ɔkpa̍ wa̍a̍ ba̍la u̍bu̍yēenyi wa̍a̍. Ɔpɔ̄ɔpɛ̄, yenyi ɛla̍ā wa̍a̍ de pīya yeyī cha̍cha̍.

⁵ Bɛ̍ɛ̄nɛ̄ ma̍, n po̍ nīi ɔyɛ̍ɛ̄chɛ̄rɔ̄ yī Ɔwɔ nīi ē deyīrɛ yenyi wa̍a̍ ma̍ ka hīka, “Ēē, Ɔwɔ Ɔnɛ̄ɛhɛhi! A hɔ̄ gbi̍chɛ gbi̍chɛ; a chī hɔ̄ u̍ma̍ama! Lɛpɔ̄ ɔhɔ̍ɔ̄hɛ̍ yī wɔ nūma̍, a hɛ̍ kpakpa kpɛ̍ɛji!

⁶ E̍ kpo̍ a̍chɛ̍ yī Ɔwɔ ba̍la āchɛ ɔkɛrɔ̄ yī nū wa̍a̍ ngmo̍. Wu̍chē yī ɔla̍ā, a de yeyī de wa̍ ka ɛ̍lɛ ge̍ gwa̍. Ɔjā nīi ngma̍ la aa̍ ke̍e̍ ma̍ nīi e̍ yɛ ē nāa a̍nɛ.”

⁷ Bɛ̍ɛ̄nɛ̄ ma̍, ɔkɔlɛ̄lā ɔha̍ bū abɔ̍ɔ la ɛbɛ ɔyɔ̍ɔ̄pɔ̄pā ɔla̍ā hīka, “Ɔwɔ Ādādā, Ɔgɔnyɛ Ɔnɔ̄kɔ̄kū! Lɛpɔ̄ ɔhɔ̍ɔ̄hɛ̍ yī wɔ - lɛpɔ̄ ɔhɔ̍ɔ̄hɛ̍ olēchi̍ lēchi̍ ba̍la ɔlɛkpakpa ke̍e̍ nɛ!”

⁸ Bɛ̍ɛ̄nɛ̄ ma̍, ɔyɛ̍ɛ̄chɛ̄rɔ̄ yī Ɔwɔ ɔmɛnɛ gāa ge̍ de iyī u̍kpu̍ūhā yī nū chīyēkla̍ yɛnɔ. Ɔpɔ̄ɔpɛ̄, e̍ ya̍ nīi ɔhɛ̍puu ɔnɔ̄kɔ̄kū yī yɛnɔ pa̍ āchɛ ɔla̍ kpɛ̍ɛ ɛbɛ̍bɛ̍ ɛbɛ̍bɛ̍.

⁹ Ɔhɛ̍puu ɔnɔ̄kɔ̄kū ɔla̍ā pa̍ āchɛ i̍ngɔ̍ɔ gba̍a̍ ma̍, e̍ pra̍a Ɔwɔ ɛcha̍, anu̍ nīi bī wɔhu̍ yī ɔgawu ɛla̍ā wa̍a̍ ma̍. E̍ i̍ chī chɛ̄ pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ yī wā chōo̍chē kā rīgā yī Ɔwɔ ɔkɔ̄kā mɛ ni̍ kpɔ̍ɔ̍.

¹⁰ Bɛ̍ɛ̄nɛ̄ ma̍, ɔyɛ̍ɛ̄chɛ̄rɔ̄ yī Ɔwɔ nīi - ɔmɛrwɔ̄ ma̍ gāa ge̍ de ɔtū ngurangura nīi tū la u̍kpu̍ūhā yī nū ma̍ chīyēkla̍ atɛ̍ yī ɛbɛ̍ ɔnɔ̄kɔ̄kū ɔla̍ā. Ɛbɛ wa̍a̍ nīi ɛbɛ̍ ɔnɔ̄kɔ̄kū ɔla̍ā re̍ ɔchwɔ̄lɛ̍ yī nū ma̍ de dobū ke̍e̍. Āchɛ ku̍ iyī wā angūu la u̍blɛ̍ɛ̄nyī wu̍chē yī wɔnɔ nīi hɔ̄ de wa̍ ma̍.

¹¹ E̍ pra̍a Ɔwɔ la ichō ɛcha̍ wu̍chē yī wɔnɔ nīi hɔ̄ de wa̍ ba̍la ripi̍ ɔdwɔ̄bi̍ ɔla̍ā nīi hɛ̍ wā ma̍. E̍ i̍ chī chɛ̄ pīyabɔ̄ta̍ hī ɔpɔ̄pū yī wā nīi e̍ ē ku ma̍ ni̍ kpɔ̍ɔ̍.

¹² Bɛ̍ɛ̄nɛ̄ ma̍, ɔyɛ̍ɛ̄chɛ̄rɔ̄ yī Ɔwɔ nīi - omerīiyī ma̍ gāa ge̍ de iyī u̍kpu̍ūhā yī nū chīyētū ɔkpa̍ ɔnɔ̄kɔ̄kū ɔla̍ā nīi re̍ka Iyu̍frēeti ma̍. Ɔkpa̍ ɔnɔ̄kɔ̄kū ɔla̍ā de ngmo̍ hɔ̍ɔ̄kā hɛ̄ɛbɛ nīi ɔchwɔ̄lɛ̍ ɛla̍ā nīi bū la yɛnɔ ɔ̄chī ma̍ ge̍ē ga ɔpɛ̄.

¹³ Bɛ̍ɛ̄nɛ̄ ma̍, n ma̍ uhu ɔdwɔ̄bi̍ ɛta̍. E̍ lɛ bāa ɛdu ma̍. E̍ yɛ ē bīyɛchɛ ē bū lipu̍ yī oko̍o yī anu̍ idra̍gɔn ɔla̍ā ba̍la anu̍ ɛbɛ̍ ɔnɔ̄kɔ̄kū ɔla̍ā ba̍la anu̍ ɔla̍ā nīi warīmɛ̄ ka anɔ̍lɔ ē ka ɛrɔ̄ yī Ɔwɔ ma̍.

¹⁴ Uhu ɔdwɔ̄bi̍ ɛla̍ā, aa̍ re̍ka uhu yī yapri̍ija ɔdwɔ̄bi̍ ɛla̍ā nīi ē yɛ̍ɛ̄lā ɔlɛbɛ̍bi̍ ma̍ a̍nɛ. Uhu ɔdwɔ̄bi̍ ɛta̍ ɛla̍ā pīya dikpo̍ba̍ ɔchwɔ̄lɛ̍ wa̍a̍ la ajɛyɛ̄ɛchɛ, hɛ̄ɛbɛ ge̍ē tu̍ wā grēeyī nīi e̍ ge̍ē kplɛ̍wu̍ i̍chi̍chɛ ɔla̍ā. I̍chi̍chɛ ɔla̍ā re̍ka Ɔ̄chī Ɔnɔ̄kɔ̄kū nīi Ādādā Ɔgɔnyɛ Ɔnɔ̄kɔ̄kū ge̍ wā a̍nɛ.

¹⁵ “Ala̍ ma̍ gɛ ko̍ō! N yɛ abɔ̍ɔ yewā bɔ̄ɔkɔ nīi uwī bū ɔ̄chɛ obōbū ma̍. A̍hōhi ge̍ iyī ɔ̄chɛ nīi gboleyī, deyīrɛ ɛjā otūlohi̍ yī nū ma̍! Bū la ɛbɛ ɔla̍ā, o̍ i̍ ge̍ē yɛ la ohi̍ ɛwɛwa ē de liwēyī de iyī nū la ɔgbādu ni̍.”

¹⁶ Uhu ɛla̍ā bī ɔchwɔ̄lɛ̍ ɛla̍ā wa̍a̍ ge̍ grēeyī abɔ̍ɔ la ɛbɛ ɔha̍ nīi re̍ka “Amagɛ̍dɔn” la oko̍o yī Ihi̍bru ma̍.

¹⁷ Bɛ̍ɛ̄nɛ̄ ma̍, ɔyɛ̍ɛ̄chɛ̄rɔ̄ yī Ɔwɔ ɔmarāapa de iyī u̍kpu̍ūhā yī nū chīyētū owu yī yɛchɛ nūma̍. Ɔkɔlɛ̄lā ɔha̍ bū abɔ̍ɔ la atɛ̍ yī u̍nu̍ yī Ɔwɔ bāa ɔfrāfrā ma̍ hīka, “O̍ de chlɛhu̍ mɛ̍ oo!”

¹⁸ Ɔpɔ̄ɔpɛ̄ ɔla̍ yī yakpla̍ kɔ̄ manyamanya, ojiya rɛ, yakpla̍ gbo ɛbɛ̍bɛ̍ ɛbɛ̍bɛ̍, ajɛ he̍ejē wɔhu̍ wɔhu̍ de yu̍uhuhwi. Ita yī ajɛ ohe̍ejē wɔhu̍ wɔhu̍ i̍ngɔ̍ɔ i̍ hɔ̄ la abɔ̄ nīi Ɔwɔ ya̍ ɔ̄chɛ̄ɛchɛ ma̍ je̍ ni̍. Onūma̍ re̍ka ɔdwɔ̄bi̍ ɔdwɔnyɛ yī wā wa̍a̍ a̍nɛ.

¹⁹ Anu̍ ipwo̍gra oro̍ohohu ɔla̍ā ma̍, ajɛ ohe̍ejē wɔhu̍ wɔhu̍ ɔla̍ā de ɔ̍ ta̍āā gblāa ga ɛbɛ ɛta̍. Ipwo̍gra yī ipwɔ̍ɔcha ɔha̍lɔha̍ wa̍a̍, o̍ de ɔ̍ chāajɛ mɔri̍mɔri̍. Ɔwɔ bla lɛlā yī anu̍ Iba̍bīlɔn ɔla̍ā nīi - ipwo̍gra oro̍ohohu ma̍. Wu̍chē yī ɔla̍ā, Ɔwɔ ya̍ nīi o̍ gwa̍ akro ɛ̍mwɔ̄ ɔla̍ā nīi - ɔtū ngurangura oluhuhwi yī Ɔwɔ ma̍ bū la ɔgba̍galā yī nū.

²⁰ Ajɛ wa̍a̍ nīi hɔ̍ɔ̄hɛ̍ che la li̍hu ma̍ bi̍ cha̍cha̍. Yɛwu wa̍a̍ de mɛ cha̍cha̍.

²¹ Lɛchɔ̄ yī yakpla̍ ɔnɔ̄kɔ̄kū ɔnɔ̄kɔ̄kū nīi lyɛnu̍ kpɛ̍ɛ gbajɛ la iki̍lōgram ohu ɛpa che igwo̍ ma̍ ha̍ābɔ̄ bū la ichō ge̍ dra̍ āchɛ. Āchɛ pra̍a Ɔwɔ ɛcha̍ kpɛ̍ɛ wu̍chē yī ɔgawu ɔla̍ā nīi - achɔ̄ yī yakpla̍ ma̍. Wu̍chē oji̍ nɛ, ɔgawu ɔla̍ā dwɔ̄bi̍ de yu̍uhuhwi.