ODE HI̍YƐCHƐ 15 - Ye̳ka Onīpīpē̳ Yī O̳wo̳

Ɔgawu arāapa nīi - ogwīihi ma̍

¹ Bɛ̍ɛ̄nɛ̄ ma̍, n myɛ̍ma̍ ɔlɛbɛ̍bi̍ gba̍a̍ ɔha̍ abɔ̍ɔ la akpɔ̍ɔwɔ. Ayɛ̍ɛ̄chɛ̄rɔ̄ yī Ɔwɔ - arāapa bī ɔgawu arāapa ɛha̍ nīi re̍ka ogwīihi yī ɔgawu wa̍a̍ ma̍. Ogwīihi nɛ; wu̍chē oji̍ nɛ, aa̍ re̍ka lɛlā ɔchlɛhu̍ yī ɔtū ngurangura yī Ɔwɔ a̍nɛ.

² Bɛ̍ɛ̄nɛ̄ ma̍, n gba̍a ma̍ ɔjā ɔha̍ nīi lɛ bāa li̍hu nīi - inyinyɔ ke̍e̍ ti̍yabɔ̄ tū la ɔla̍ ma̍. N gba̍a ma̍ āchɛ nīi - yɛ̍ɛ̄ngrɔ̄ɔ de wɔhu̍ yī ɛbɛ̍ ɔnɔ̄kɔ̄kū ɔla̍ā ba̍la i̍kpe̍ēkū yī nū, ba̍la anu̍ nīi ri̍īyī la ina̍aba ina̍aba ma̍ kla̍ ke̍e̍ ma̍. Āchɛ ɛ̍lɛma̍ gblāa abɔ̍ɔ bla̍a li̍hu ɔla̍ā nīi - inyinyɔ ke̍e̍ ma̍. E̍ bī lɛ̄ngū ɛha̍ nīi Ɔwɔ de de wa̍ ma̍ abɔ̍ɔ la abɔ̄.

³ E̍ yɛ ē gwe̍ejē yī Imo̍sīisi nīi - ɔ̍chɛ̍ yī Ɔwɔ ma̍ ba̍la iyī Ɔyɔ̍ɔ̄nyīyɛrɔ̄ ɔla̍ā hīka, “Ɔwɔ Ādādā, Ɔgɔnyɛ Ɔnɔ̄kɔ̄kū! Lɛlā nīi a ā ya̍ ma̍ lɔ̄kɔ̄kū gba̍a lɛbɛ̍bi̍ kpa̍a! Awɔ - Ɔchwɔ̄lɛ̍ Ɔnɔ̄kɔ̄kū de ipwɔ̍ɔcha ɔha̍lɔha̍ wa̍a̍ a̍nɛ! Ɔpɔ̄pū yī lɛlā yī wɔ lɛ bāa ɔkpakpa ba̍la olēchi̍ lēchi̍ ma̍!

⁴ Ɔ̄nyɛ kpɛ̍ɛ i̍ ge̍ē tūuhwi yī wɔ ni̍ ma̍, Ādā? Ɔ̄nyɛ kpɛ̍ɛ ge̍ē hi̍hi̍yo̍ yī rīgā yī wɔ obī koko̍o ma̍? Awɔ lōru̍wɔ lɛ cha̍ri̍cha̍ri̍ a̍nɛ! Ipwɔ̍ɔcha ɔha̍lɔha̍ wa̍a̍ ge̍ē wā ge̍ē de lɛhu̍ gbo ajɛ la iyɔ̄bū yī wɔ! Wu̍chē oji̍ nɛ, a de lɛlā ɔlɛkpakpa ɔyɔ̍ɔ̄ya̍ yī wɔ hi̍yɛchɛ de wa̍ wa̍a̍ mɛ̍!”

⁵ La okwi̍ihi yī ɔla̍ā, u̍nu̍ yī Ɔwɔ nīi hɔ̄ la ichō ma̍ lwāa tɔ̍ɔ̄ta̍ ba̍la a̍ywɔ̍da̍ ɔla̍ā nīi Ɔwɔ ē hɔ̄ ma̍.

⁶ Ayɛ̍ɛ̄chɛ̄rɔ̄ yī Ɔwɔ arāapa ɛla̍ā nīi bī ɔgawu arāapa ma̍ bīyɛchɛ bū abɔ̍ɔ la u̍nu̍ yī Ɔwɔ ɔla̍ā. E̍ yi̍īyē la ɔ̄pa̍ ɔha̍ nīi ho̍ōhu̍ gba̍a ngma̍ cha̍ri̍cha̍ri̍ ma̍. Okri ɔha̍ nīi e̍ bī igo̍olu igo̍olu ke̍e̍ ya̍ ugu tū ɔ̄ ma̍ nīi e̍ de ku̍ la ɔgɛgɛ a̍nɛ.

⁷ Bɛ̍ɛ̄nɛ̄ ma̍, ɔha̍ lipu̍ yī ɛjā ɔhɔ̄leyī ɛla̍ā nīi lɛ ɛnɛ ma̍ gāa ge̍ nāa ɔtū ngurangura yī Ɔwɔ lipu̍ yī u̍kpu̍ūhā arāapa mōmu mōmu ge̍ de ayɛ̍ɛ̄chɛ̄rɔ̄ yī Ɔwɔ arāapa ɛla̍ā. Iyī Ɔwɔ nīi hɔ̄leyī ku yɛ̄grāa i̍mɔ̄mɛni̍ ma̍ nɛ.

⁸ U̍nu̍ yī Ɔwɔ de mōmu la ingūɔ̄la̍ nīi bū la rīgā ɔnɔ̄kɔ̄kū ba̍la wɔhu̍ yī Ɔwɔ ma̍. Ɔ̄chɔ̄chɛ i̍ ge̍ē chɛ̄ ga u̍nu̍ yī Ɔwɔ ɔla̍ā mɛ ni̍ kpɛɛ nīi ɔgawu arāapa ɛla̍ā nīi ayɛ̍ɛ̄chɛ̄rɔ̄ yī Ɔwɔ arāapa bī wā ma̍ ē de ē chlɛhu̍ o̍bū.