ODE HI̍YƐCHƐ 14 - Ye̳ka Onīpīpē̳ Yī O̳wo̳

Ejē yī āchɛ nīi e̍ de wa̍ hīya lɛfiyɛ ma̍

¹ N yɛ ē myɛ̍ma̍ bɛ̍ɛ̄nɛ̄ ma̍, n ma̍ Ɔyɔ̍ɔ̄nyīyɛrɔ̄ ɔla̍ā nīi yarɛ abɔ̍ɔ la Yɛwu yī Isa̍yɔn. Āchɛ u̍nɔ ohu igwa̍arāata̍ ɛla̍ā nīi e̍ ta̍ riyī yī nū ba̍la iyī A̍dā yī nū che la inēyī yī wā wa̍a̍ ma̍ tīkpo̍ yɛ abɔ̍ɔ tāa anu̍.

² Bɛ̍ɛ̄nɛ̄ ma̍, n po̍ ɔkɔlɛ̄lā ɔha̍ bū abɔ̍ɔ la ichō ya̍ ojiya kpɛ̍ɛ bāa yenyi ɔnɔ̄kɔ̄kū ɔha̍ nīi yɛ ē ha̍ābɔ̄ bū la ichō yī achɔ̄ olichīichō ɔha̍ chīyētū gāa ajɛ hwɛɛ ma̍, kɛ̄ɛ bāa yakpla̍ ɔnɔ̄kɔ̄kū ɔha̍ nīi ē gbo ma̍. Ɔkɔlɛ̄lā ɔla̍ā nīi n po̍ ma̍ lɛ bāa ejē ɔha̍ nīi alɛ̄ngū ogwōgwō gblāa yɛ ē gwō ma̍.

³ Āchɛ u̍nɔ ohu igwa̍arāata̍ ɛla̍ā yararɛ wa̍a̍ abɔ̍ɔ pīya iyɔ̄bū ta̍ atɛ̍ ɔla̍ā, ba̍la ɛjā ɔhɔ̄leyī ɛla̍ā nīi lɛ ɛnɛ ma̍ ba̍la ɛgabɔ̄ āchɛ ohu che ɛnɛ ɛla̍ā. Āchɛ u̍nɔ ohu igwa̍arāata̍ ɛla̍ā gwe̍ejē onīpīpɛ̄ ɔha̍ bɛ̍ɛ̄nɛ̄. Aa̍ lōri̍īwā nīi e̍ de wa̍ hīya lɛfiyɛ hī ajɛyɛ̄ɛchɛ nūma̍ ma̍ je̍ ejē ɔ̍lɔma̍ a̍nɛ.

⁴ Aa̍ re̍ka āchɛ nīi de iyī wā lā cha̍ri̍cha̍ri̍ i̍ chɛ̄ gbo tāa anyā ni̍ a̍nɛ. E̍ ē ku Ɔyɔ̍ɔ̄nyīyɛrɔ̄ ɔla̍ā gāa ɛbɛha̍ ɛbɛha̍ wa̍a̍ nīi o̍ ē yɛ ma̍. Lipu̍ yī āchɛ̄ɛchɛ wa̍a̍, aa̍ nīi e̍ de wa̍ hīya lɛfiyɛ ke̍e̍ a̍nɛ. Aa̍ re̍ka āchɛ ɛrāarāa nīi e̍ de wa̍ kwɔbɔ̄ de Ɔwɔ ba̍la Ɔyɔ̍ɔ̄nyīyɛrɔ̄ ɔla̍ā a̍nɛ.

⁵ Arīmɛ̄ ɔha̍lɔha̍ i̍ bū la oko̍o yī wā je̍ ni̍. Rīnyī yī lɛlɛ̄lā i̍ hɔ̄ la ibi̍īyē yī wā ni̍.

Lɛlā yī ayɛ̍ɛ̄chɛ̄rɔ̄ yī Ɔwɔ nīi lɛ ɛta̍ ma̍

⁶ Bɛ̍ɛ̄nɛ̄ ma̍, n ma̍ ɔyɛ̍ɛ̄chɛ̄rɔ̄ yī Ɔwɔ ɔha̍ nīi o̍ yɛ ē wu ga la ichō hwɛɛ. E̍ de ɔ̍ tɛ̄rɔ̄ nīi o̍ ge̍ē bī Wɔ̄kā Ɔlwɔnyɛ i̍mɔ̄mɛni̍ ɔla̍ā ge̍ē koko̍o de yɛchɛ wa̍a̍. O̍ ge̍ē de ē koko̍o ē de ɔchamɔcha wa̍a̍, ba̍la ipwɔ̍ɔma ɔha̍lɔha̍ wa̍a̍, ba̍la ipwɔ̍ɔcha ɔha̍lɔha̍ wa̍a̍, ba̍la ita āchɛ̄ɛchɛ ɔha̍lɔha̍ wa̍a̍.

⁷ Ɔyɛ̍ɛ̄chɛ̄rɔ̄ yī Ɔwɔ ɔla̍ā tɔ̍ɔna gbōō bɛ̍ɛ̄nɛ̄ hīka, “Ala̍ ā tūuhwi yī Ɔwɔ! Ala̍ ā kā ɔ̄ ɔkɔ̄kā wu̍chē rīgā yī nū! Wu̍chē oji̍ nɛ, yɛ̄grāa de gbajɛ nīi o̍ ge̍ē hlɛ̍ɛ̄pɔ̄ yī āchɛ̄ɛchɛ wa̍a̍ mɛ̍. Ala̍ ā ya̍ otūlichō de ɔ̍, anu̍ nīi ya̍ ichō ba̍la ajɛ ba̍la li̍hu ba̍la u̍bu̍yēenyi wa̍a̍ ma̍!”

⁸ Ɔyɛ̍ɛ̄chɛ̄rɔ̄ yī Ɔwɔ ɔmɛpa titi ku anu̍ ɔla̍ā la u̍tu ka bɛ̍ɛ̄nɛ̄ hīka, “Iba̍bīlɔn gwāajɛ mɛ̍ oo! Iba̍bīlɔn ɔla̍ā nīi lɛ bāa oke̍ke̍ni̍ ma̍ gwāajɛ ke̍e̍ mɛ̍! Anu̍ nīi ē de akro ɛ̍mwɔ̄ nīi - a̍hla̍ yī lɛlā u̍mūda̍rī ɔyɔ̍ɔ̄ya̍ yī nū de āchɛ, ē tu̍ wā tū nīi e̍ ē gwa̍ ma̍!”

⁹ Ɔyɛ̍ɛ̄chɛ̄rɔ̄ yī Ɔwɔ ɔmɛta̍ gba̍a ku ɛpa ɛla̍ā la u̍tu̍tu, tɔ̍ɔna gbōō hīka, “Āchɛ wa̍a̍ nīi ē ya̍ otūlichō de ɛbɛ̍ ɔnɔ̄kɔ̄kū ɔla̍ā, ba̍la i̍kpe̍ēkū yī ɛbɛ̍ ɔnɔ̄kɔ̄kū ɔla̍ā ma̍, kɛ̄ɛ nīi ba̍ ina̍aba yī ɛbɛ̍ ɔnɔ̄kɔ̄kū ɔla̍ā la inēyī yī wā kɛ̄ɛ abɔ̄ ma̍,

¹⁰ ɛlɛjā ge̍ē gwa̍ akro ɛ̍mwɔ̄ nīi re̍ka ɔtū ngurangura yī Ɔwɔ tū la ɔgba̍galā yī ɔtū ngurangura yī nū ma̍. Āchɛ wa̍a̍ nīi ge̍ē ya̍ i̍ngɔ̍ɔ ma̍, e̍ ge̍ē bī ɔla̍ ba̍la isɔ̍fɔ ē ya̍ wā ichi̍ gba̍a̍ la eyī yī ayɛ̍ɛ̄chɛ̄rɔ̄ ɛnɛ̄ɛhɛhi yī Ɔwɔ ba̍la Ɔyɔ̍ɔ̄nyīyɛrɔ̄ ɔlɔjā.

¹¹ Ingūɔ̄la̍ yī ɔla̍ ɔla̍ā nīi e̍ ge̍ē mi̍chi̍ lipu̍ yī nū ma̍ ge̍ē ngmli̍imū gāa ichīichō kpɛɛ ku yɛ̄grāa i̍mɔ̄mɛni̍. La yɛnɔ kɛ̄ɛ otu̍ oo, ɔmyɛ̍nyɛ̍ ɔha̍lɔha̍ i̍ hɔ̄ de āchɛ ɛla̍ā nīi ē ya̍ otūlichō de ɛbɛ̍ ɔnɔ̄kɔ̄kū ɔla̍ā, kɛ̄ɛ i̍kpe̍ēkū yī ɛbɛ̍ ɔnɔ̄kɔ̄kū ɔla̍ā, kɛ̄ɛ ba̍ ina̍aba yī riyī yī ɛbɛ̍ ɔnɔ̄kɔ̄kū ɔla̍ā ma̍ ni̍.”

¹² Bū la ɛbɛ ɔla̍ā, o̍ ngma̍ nīi āchɛ yī Ɔwɔ ē tū ūkpɔ̄tū yɛngrɔ̄ɔ. Āchɛ nīi ē yɛ̍ɛ̄lā nīi Ɔwɔ ka ɛ̍lɛ ge̍ ya̍ ma̍ nɛ, aa̍ nīi yɛ ē de iyī wā lā de Iji̍sɔ̄ɔsi yɛ̍yɛ̍ ma̍ nɛ.

¹³ Bɛ̍ɛ̄nɛ̄ ma̍, n po̍ ɔkɔlɛ̄lā ɔha̍ bū abɔ̍ɔ la ichō hīka, “Ta̍ lɛlā nūma̍ tū la īpū gɛ: A̍hōhi ge̍ - iyī āchɛ nīi ge̍ē pīyaku̍ bū la u̍ma̍ama nūma̍ la u̍ku̍rɔ̍ yī Ādā nīi e̍ yɛ ē ya̍ ma̍!” Uhu yī Ɔwɔ hīyɔkɔ ɔpɔ̄ɔpɛ̄ hīka, “O̍ ge̍ē lɛ i̍ngɔ̍ɔ ichɛ̄ɛhi! Āchɛ nūma̍ ge̍ē lɛ ɔmyɛ̍nyɛ̍ ɔlamu-ɔlamu ē hī u̍ku̍rɔ̍ nīi e̍ ya̍ gba̍a̍ ma̍. Wu̍chē oji̍ nɛ, ɛpiyabuna yī u̍ku̍rɔ̍ nīi e̍ ya̍ wa̍a̍ ma̍ ē yɛ ba̍la aa̍.”

Yɛchɛ de je̍ bāa ɛjāyɛ̄rɔ̄ ma̍ mɛ̍

¹⁴ Bɛ̍ɛ̄nɛ̄ nīi n yɛ ē myɛ̍ma̍ ma̍, n ma̍ akpɔ̍ɔwɔ ɔha̍ nīi lɛ̍rɛ̍ɛ̄rɛ̍ fre̍te̍te̍. Ɔ̄chɛ ɔha̍ nīi hyāhɔ̄ abɔ̍ɔ la ichō yī akpɔ̍ɔwɔ ɔ̍lɔma̍ ma̍ lɛ bāa ɔyi̍ ɔngrɔ̄ɔ ma̍. O̍ kla̍ okpo ɔkla̍lɛhu̍ nīi e̍ ya̍ la igo̍olu igo̍olu ke̍e̍ ma̍. O̍ chī bī i̍kpa̍yā oliri̍re̍ ɔha̍ la abɔ̄.

¹⁵ Bɛ̍ɛ̄nɛ̄ ma̍, ɔyɛ̍ɛ̄chɛ̄rɔ̄ yī Ɔwɔ ɔha̍ bīyɛchɛ bū abɔ̍ɔ la u̍nu̍ yī Ɔwɔ wā ge̍ tɔ̍ɔna gbōō grāa anu̍ ɔla̍ā nīi hyāhɔ̄ la ichō yī akpɔ̍ɔwɔ ɔla̍ā ma̍. O̍ da ɔ̍ hīka, “Nāa i̍kpa̍yā yī wɔ ɔla̍ā tābɔ̄ gɛ nīi a ā de ɛjāyɛ̄rɔ̄ kpo̍ hɛ̍; ma̍a yɛ̄grāa kpakpa de gbajɛ mɛ̍. Ajɛ yī yɛchɛ nūma̍ re̍ka ɛjāyɛ̄rɔ̄ a̍nɛ. O̍ de pɔ̄pīya ke̍e̍ bāa ɛjāyɛ̄rɔ̄ ma̍ mɛ̍.”

¹⁶ Bɛ̍ɛ̄nɛ̄ ma̍, anu̍ ɔla̍ā nīi hyāhɔ̄ la ichō yī akpɔ̍ɔwɔ ma̍ nāa i̍kpa̍yā yī nū tābɔ̄ yɛ ē krāa ajɛyɛ̄ɛchɛ bāa ɛjāyɛ̄rɔ̄ ma̍. Ɔpɔ̄ɔpɛ̄, o̍ de ajɛyɛ̄ɛchɛ hɛ̍ wa̍a̍ bɔ̄ɔkɔ nīi e̍ ē hɛ̍ ɛjāyɛ̄rɔ̄ ma̍.

¹⁷ Bɛ̍ɛ̄nɛ̄, n gba̍a ma̍ ɔyɛ̍ɛ̄chɛ̄rɔ̄ yī Ɔwɔ ɔha̍ nīi bīyɛchɛ bū la u̍nu̍ yī Ɔwɔ abɔ̍ɔ la ichō. Anu̍ titi bī i̍kpa̍yā oliri̍re̍ ita ɔla̍ā la abɔ̄.

¹⁸ Ɔyɛ̍ɛ̄chɛ̄rɔ̄ yī Ɔwɔ nīi ē deyīrɛ ɔla̍ ma̍ titi bīyɛchɛ bū abɔ̍ɔ la ɛbɛ ɔyɔ̍ɔ̄pɔ̄pā wā. O̍ ka gbōō grāa ɔyɛ̍ɛ̄chɛ̄rɔ̄ ɔla̍ā nīi bī i̍kpa̍yā oliri̍re̍ ma̍ hīka, “Nāa i̍kpa̍yā yī wɔ ɔla̍ā tābɔ̄ gɛ, nīi a ā kpo̍ īkpɔ̄ɔ̄chi̍ ɛla̍ā ngmla̍a hī yɛrɔ̄ yī īkpɔ̄ɔ̄chi̍ nīi - ajɛyɛ̄ɛchɛ ma̍. Wu̍chē oji̍ nɛ, e̍ de pɔ̄pīya wa̍a̍ mɛ̍.”

¹⁹ Ɔpɔ̄ɔpɛ̄, ɔyɛ̍ɛ̄chɛ̄rɔ̄ yī Ɔwɔ ɔla̍ā nāa i̍kpa̍yā yī nū tābɔ̄ pīyeyīta̍ ajɛyɛ̄ɛchɛ bɛ̍ɛ̄nɛ̄. O̍ de īkpɔ̄ɔ̄chi̍ ɔ̍lɔma̍ kpo̍ ngmla̍a wa̍a̍ ma̍, o̍ kpo̍ wā chīyētū la ɛbɛ ɔya̍ ɛ̍mwɔ̄ nīi - iyī ɔtū ngurangura yī Ɔwɔ ma̍.

²⁰ Ɛbɛ ɔya̍ ɛ̍mwɔ̄ ɔ̍lɔma̍ de yenyi yī īkpɔ̄ɔ̄chi̍ ɛla̍ā pi̍ wa̍a̍ chīyenū gblāa ga ikō yī ipwo̍gra ɔla̍ā. Yeyī ke̍e̍ bīyɛchɛ bū la ɛbɛ ɔya̍ ɛ̍mwɔ̄ ɔla̍ā a̍nɛ. O̍ de ya̍ bɔ̄ɔkɔ nīi yenyi ē hɛ̍rɛ̍ ma̍. Ɛbɛ nīi yeyī ɔla̍ā pɛ̍ gbajɛ ma̍ la ina̍aba ohu igwo̍; o̍ chī ri̍īyī gbajɛ la ikpo̍ ɛrwɔ̄ ga ichō.