ODE HI̍YƐCHƐ 13 - Ye̳ka Onīpīpē̳ Yī O̳wo̳

Ɛbɛ̍ ɔnɔ̄kɔ̄kū ɛpa ɛha̍

¹ Bɛ̍ɛ̄nɛ̄ ma̍, n ma̍ ɛbɛ̍ ɔnɔ̄kɔ̄kū ɔha̍ nīi yɛ ē bīyɛchɛ lipu̍ li̍hu. O̍ bū ajī igwo̍; o̍ chī tū īkplɛ̄hu̍ arāapa. O̍ de okpo ɔkla̍lɛhu̍ kla̍ la ajī ɛla̍ā wa̍a̍ lūkpō lūkpō. E̍ ta̍ riyī yī wɔbi̍ lɛlā che abɔ̍ɔ la īkplɛ̄hu̍ yī nū ɛla̍ā wa̍a̍ lūkpō lūkpō.

² Ɛbɛ̍ ɔnɔ̄kɔ̄kū ɔla̍ā nīi n ma̍ ma̍ lɛ bāa yɛjɛ ma̍. Ikpo̍ yī nū chī lɛ bāa iyī wɔmu̍u ma̍. Oko̍o yī nū chī gba̍a lɛ ke̍e̍ bāa iyī wɔ̍ga̍ba̍ ma̍. Anu̍ ɛbɛ̍ ɔla̍ā nīi re̍ka idra̍gɔn ma̍ de wɔhu̍ yī nū, ba̍la atɛ̍ yī nū, ba̍la wɔhu̍ yī ɛbɛ obōbī yī nū ɔnɔ̄kɔ̄kū gba̍a̍ ɔla̍ā de ɔ̍.

³ Lɛhu̍ yī nū ɔha̍ ya̍ bɔ̄ɔjā nīi e̍ ya̍ ɔ̄ ɔjā nīi o̍ pīyaku̍ o̍bū ma̍. Lipi̍ yī ɔjā ɔla̍ā nīi chī ya̍ ɔ̄ i̍ngɔ̍ɔ gba̍a̍ ma̍ chī de je̍ ke̍e̍ mɛ̍. O̍ de ya̍ alyɛchɛ nūma̍ wa̍a̍ lɛbɛ̍bi̍; e̍ pīya ku ɛbɛ̍ ɔnɔ̄kɔ̄kū ɔla̍ā.

⁴ E̍ chī ya̍ otūlichō de idra̍gɔn ɔla̍ā wu̍chē lɔkɔ nīi o̍ de wɔhu̍ ɔla̍ā i̍ngɔ̍ɔ wa̍a̍ de ɛbɛ̍ ɔnɔ̄kɔ̄kū ɔ̍lɔma̍ ma̍. E̍ ya̍ otūlichō yī ɛbɛ̍ ɔnɔ̄kɔ̄kū ɔ̍lɔma̍ kpɛ̍ɛji. E̍ kā ɔ̄ ɔkɔ̄kā hīka, ɔ̄nyɛ ɔ̍lɔ lɛ bāa ɛbɛ̍ ɔnɔ̄kɔ̄kū nūma̍ mɛ? Ɔ̄nyɛ ɔ̍lɔ ge̍ē kpa̍ākū tū ɔ̍lɔ ē mɛ ma̍?

⁵ E̍ pi̍ye̍mā hī ɛbɛ̍ ɔnɔ̄kɔ̄kū ɔ̍lɔma̍ nīi o̍ ge̍ē kɛlā ɔdwɔ̄bi̍ okwi̍bi̍īyē grigri ji. E̍ pi̍ye̍mā hī ɔ̄ nīi o̍ ge̍ē bī wɔhu̍ i̍ngɔ̍ɔ la ɔyɔ̍ɔ ohu ɛpa che ɛpa.

⁶ O̍ kū la ɔcha̍ Ɔwɔ ɛcha̍, ba̍la riyī yī Ɔwɔ, ba̍la ɛbɛ nīi Ɔwɔ hɔ̄ ma̍, ba̍la āchɛ wa̍a̍ nīi gblāa abɔ̍ɔ la ichō ma̍.

⁷ E̍ pi̍ye̍mā hī ɔ̄ nīi o̍ ge̍ē kplɛ̍wu̍ tāa āchɛ yī Ɔwɔ ē de wa̍ gwō. E̍ gba̍a de wɔhu̍ de ɔ̍ nīi o̍ bī wɔhu̍ yī ɔchamɔcha wa̍a̍, ba̍la ipwɔ̍ɔma ɔha̍lɔha̍ wa̍a̍ ba̍la ipwɔ̍ɔcha ɔha̍lɔha̍ ba̍la ita yī āchɛ̄ɛchɛ ɔha̍lɔha̍ wa̍a̍.

⁸ Āchɛ wa̍a̍ amu la ajɛyɛ̄ɛchɛ nūma̍ nīi riyī yī wā i̍ tū la īpū yī ɔhɔ̄leyī ɔla̍ā nīi e̍ ta̍ gbi̍chɛ gbi̍chɛ lɔ̄lā o̍bū nīi yɛchɛ wu̍tu ni̍ ma̍, aa̍ wa̍a̍ ge̍ē ya̍ otūlichō de ɛbɛ̍ ɔnɔ̄kɔ̄kū ɔ̍lɔma̍. Īpū yī ɔhɔ̄leyī ɔla̍ā - iyī Ɔyɔ̍ɔ̄nyīyɛrɔ̄ nīi e̍ de ngmo̍ ya̍ ɔpɔ̄pā ma̍ nɛ.

⁹ “Ala̍ ge̍ tū arɔ̄ ɔplɛ̍ɛ̄lā, ɔ̍lɔma̍ ala̍ ā darɔ̄ku lɛlā nūma̍ wa̍a̍ gɛ!

¹⁰ Āchɛ nīi e̍ ge̍ē ku̍ wā pīya bāa afiyɛ yī lɛwu̍ ma̍ re̍ka āchɛ nīi e̍ ge̍ē ku̍ wā pīya afiyɛ yī lɛwu̍ ichɛ̄ɛhi. Āchɛ nīi ge̍ē ku̍ rikū yāā ma̍ chī ge̍ē ku̍ rikū yāā i̍ngɔ̍ɔ ichɛ̄ɛhi. Bū la ɛbɛ ɔla̍ā, o̍ ngma̍ nīi āchɛ yī Ɔwɔ wa̍a̍ ge̍ tū ūkpɔ̄tū yɛngrɔ̄ɔ brii gba̍a de ɔtū che Ɔwɔ brii.”

¹¹ Bɛ̍ɛ̄nɛ̄ ma̍, n gba̍a ma̍ ɛbɛ̍ ɔnɔ̄kɔ̄kū ɔha̍ nīi yɛ ē bīyɛchɛ bū la ajɛ. O̍ tū ajī ɛpa bāa oyo̍ōmlodo ma̍. O̍ chī kɛlā bāa anu̍ ɛbɛ̍ ɔla̍ā nīi re̍ka idra̍gɔn ma̍.

¹² O̍ nāa wɔhu̍ ɔnɔ̄kɔ̄kū yī ɛbɛ̍ ɔnɔ̄kɔ̄kū ɔrāarāa ɔla̍ā nīi rɛ abɔ̍ɔ ba̍la anu̍ ma̍ bī yɛ ē ya̍ u̍ku̍rɔ̍. O̍ ya̍ nīi yɛchɛ wa̍a̍ ba̍la ɔjāha̍ ɔjāha̍ wa̍a̍ nīi gblāa la anu̍ ma̍ ya̍ otūlichō de ɛbɛ̍ ɔnɔ̄kɔ̄kū ɔrāarāa ɔla̍ā nīi che ukpru ɔnɔ̄kɔ̄kū ke̍ke̍ni̍ ma̍.

¹³ Ɛbɛ̍ ɔnɔ̄kɔ̄kū ɔ̍mɛpa nūma̍ yɛ̍ɛ̄lā ɔlɛbɛ̍bi̍ yɛ̄mɛ̄mɛ̄, ya̍ nīi ɔla̍ bū la ichō wā la ajɛ abɔ̍ɔ la eyī yī āchɛ wa̍a̍.

¹⁴ O̍ gla̍ āchɛ yɛchɛ wa̍a̍ bū la lɛlā ɔlɛbɛ̍bi̍ ɔla̍ā wa̍a̍ nīi e̍ pi̍ye̍mā nīi o̍ ya̍ abɔ̍ɔ la iyɔ̄bū yī ɛbɛ̍ ɔnɔ̄kɔ̄kū ɔrāarāa ɔla̍ā ma̍. O̍ ka de āchɛ yī yɛchɛ wa̍a̍ ka ɛ̍lɛ ge̍ ya̍ i̍kpe̍ēkū igbla yī ɛbɛ̍ ɔnɔ̄kɔ̄kū ɔrāarāa ɔla̍ā nīi ɛ̍lɛ gɔ̄ ɔ̍lɔ yāā i̍ngɔ̍ɔ nīi ɔ̍lɔ chī wōwi kpɔ̍ɔ̍ ma̍, hɛ̄ɛbɛ nīi ɛ̍lɛ ge̍ ya̍ otūlichō yī ɔ̍lɔ.

¹⁵ E̍ pi̍ye̍mā hī ɛbɛ̍ ɔnɔ̄kɔ̄kū ɔmɛpa nūma̍ nīi o̍ mu owu yī ɔhɔ̄leyī tū i̍kpe̍ēkū nīi - igbla yī ɛbɛ̍ ɔrāarāa ɔla̍ā ma̍, hɛ̄ɛbɛ nīi o̍ ge̍ē kɛlā, hɛ̄ɛbɛ nīi o̍ ge̍ē ngmo̍ āchɛ nīi i̍ chɛ̄ ya̍ otūlichō yī nū ni̍ ma̍.

¹⁶ Āchɛ ɔnɔ̄kɔ̄kū kɛ̄ɛ āchɛ enīchi̍chɛ̍ oo, alwɔdu kɛ̄ɛ alyeklo̍ oo, afiyɛ kɛ̄ɛ aywɔ̍lɛ̍ oo, āchɛ̄ɛchɛ wa̍a̍ jimini, ɛbɛ̍ ɔla̍ā ku̍ wā wɔhu̍ wɔhu̍ de ina̍aba ɔha̍ ba̍ wā la abɔ̄ līre̍ ba̍la inēyī cha̍cha̍.

¹⁷ Ɔ̄chɔ̄chɛ i̍ ē bī ɔjɔ̄jā ge̍ē ra̍ kɛ̄ɛ ē ra̍ ɔjɔ̄jā ɔrɔ̍ɔ̄ra̍ mɛ ni̍, ɔ̍chi̍kpa̍kpa̍ ɔlɔjā ba̍ ina̍aba ɔ̍lɔma̍. Riyī yī ɛbɛ̍ ɔnɔ̄kɔ̄kū ɔla̍ā, kɛ̄ɛ i̍ngɔ̍ɔ ni̍ ina̍aba nīi bū la riyī yī nū ɔ̍lɔma̍ ma̍ nīi āchɛ ē ba̍ a̍nɛ.

¹⁸ O̍ ngma̍ nīi ɔ̄chɛ ē je̍ kure̍kure̍ gba̍a̍ wu̍chē yī lɛlā yī ina̍aba yī riyī yī ɛbɛ̍ ɔnɔ̄kɔ̄kū ɔla̍ā. Ɔ̄chɛ nīi ge̍ je̍ kure̍kure̍ gba̍a̍, o̍ ge̍ē je̍ ochi̍chi̍ yī ina̍aba yī ɛbɛ̍ ɔnɔ̄kɔ̄kū ɔ̍lɔma̍. Wu̍chē oji̍ nɛ, ina̍aba yī nū ɔla̍ā kwichi̍ tū riyī nīi ɔ̄chɛ̄ɛchɛ ē re̍ ma̍. Ina̍aba ɔla̍ā hɔ̄ ma̍ a̍nɛ: 666.