ODE HI̍YƐCHƐ 12 - Ye̳ka Onīpīpē̳ Yī O̳wo̳

Ɔnyā ɔha̍ ba̍la ɛbɛ̍ nīi re̍ka Idra̍gɔn ma̍

¹ Bɛ̍ɛ̄nɛ̄ ma̍, lɛlā ɔlɛbɛ̍bi̍ gba̍a̍ ɔha̍ bīyɛchɛ abɔ̍ɔ la ichō yī akpɔ̍ɔwɔ. Ɔnyā ɔha̍ nīi rɛ abɔ̍ɔ ma̍ de yɛnɔ nāa tū la iyē bāa ɔ̄pa̍ ma̍; o̍ yarɛ la ichō yī ɔwīyā; o̍ chī de i̍nyi̍nyɔ̍ɔwīyā igwo̍lɛpa kla̍ la lɛhu̍ bāa okpo ɔkla̍lɛhu̍ ma̍.

² Ɔnyā ɔ̍lɔma̍ yɛ ē lwɔ̄ɔma yī ɔyi̍. Wɔnɔ yī wɔma ɔlɔ̄lā ya̍ ɔ̄ nīi o̍ mi̍chi̍ gba̍a̍ yɛ ē drɛ̄ɛgba.

³ Ɔpɔ̄ɔpɛ̄, lɛlā ɔlɛbɛ̍bi̍ ɔha̍ gba̍a bīyɛchɛ abɔ̍ɔ la ichō yī akpɔ̍ɔwɔ. Ɛbɛ̍ ɔlɛbɛ̍bi̍ ɔha̍ nīi re̍ka idra̍gɔn ma̍ rɛ abɔ̍ɔ. O̍ lɔ̄kū kpɛ̍ɛji, lɔ̍a̍ bāa ɔnyɔɔ ma̍. O̍ tū īkplɛ̄hu̍ arāapa, tū ajī igwo̍. O̍ kla̍ okpo ɔkla̍lɛhu̍ abɔ̍ɔ la īkplɛ̄hu̍ ɔnyɔnyɛ ɔnyɔnyɛ ɛla̍ā.

⁴ O̍ bī otri̍ihi yī nū gla wāā ūkpo̍he lipu̍ yī ɛta̍ yī i̍nyi̍nyɔ̍ɔwīyā wa̍a̍ abɔ̍ɔ la ichō chīyēgblāa wā la ajɛ. O̍ pīya yarɛ abɔ̍ɔ hi̍kpo̍tū ɔnyā ɔla̍ā nīi yɛ ē lwɔ̄ɔma yī ɔyi̍ ma̍, hɛ̄ɛbɛ nīi ɔnyā ɔla̍ā ge̍ ma ɔyi̍ ɔpɔ̄ɔpɛ̄ ma̍ nīi o̍ ge̍ē de ē nāa ē re̍.

⁵ Bɛ̍ɛ̄nɛ̄ ma̍, ɔnyā ɔla̍ā wā ge̍ ma ɔyi̍ ɔnɔ̄ngrɔ̄ɔ nīi ge̍ē bī wɔhu̍ yī ɔcha wa̍a̍ la ajɛyɛ̄ɛchɛ ma̍. Wɔhu̍ yī ɛbɛ obōbī yī nū ge̍ē lɛ brii bāa a̍bi̍ije ma̍. Ɔpɔ̄ɔpɛ̄, e̍ wā ge̍ ko̍o̍ la ɔyi̍ ɔla̍ā pīya dikpo̍ba̍ Ɔwɔ abɔ̍ɔ la atɛ̍ yī nū.

⁶ Ɛ̍nɛ̍ ɔlɔyi̍ de gwɛ̍ɛnya pīya ga lipu̍ a̍chi̍ chukuru la ɛbɛ ɔha̍ nīi Ɔwɔ gbla̍a lɔ̄lā abɔ̍ɔ de ɔ̍ ma̍. Abɔ̍ɔ nīi ɔnyā ɔla̍ā ge̍ē hɔ̄ nīi e̍ ē deyīrɛ ɔ̍ lipu̍ yī ɔ̄chī u̍nɔ ɛta̍ che ɔ̄chī ohu ɛta̍ o̍bū a̍nɛ.

⁷ Bɛ̍ɛ̄nɛ̄ ma̍, lɛwu̍ gbo abɔ̍ɔ la ichō. Ima̍yi̍kɛ̄ɛli ba̍la ayɛ̍ɛ̄chɛ̄rɔ̄ yī Ɔwɔ wa̍a̍ nīi hɔ̄ la ihi̍yajɛ yī nū ma̍ kplɛ̍wu̍ tāa ɛbɛ̍ ɔdwɔ̄bi̍ ɔla̍ā nīi re̍ka idra̍gɔn ma̍. Idra̍gɔn ɔ̍lɔma̍ ba̍la ayɛ̍ɛ̄chɛ̄rɔ̄ yī nū titi kū unu brii pīyeyīta̍ wā.

⁸ E̍ chī de idra̍gɔn ɔ̍lɔma̍ gwō. Bū la ɛbɛ ɔla̍ā, e̍ de anu̍ ba̍la ayɛ̍ɛ̄chɛ̄rɔ̄ yī nū nīi chɛ̄ku ɔ̍ ma̍ kpo̍ nū pīya hī ichō.

⁹ Okru̍utu yī ɛbɛ̍ ɔnɔ̄kɔ̄kū ɔla̍ā nīi re̍ka idra̍gɔn ma̍, e̍ de ɔ̍ nū hī ɛbɛ ke̍e̍. Anu̍ re̍ka ɔnyāku̍ yɛgwā ɔla̍ā nīi re̍ka Ɔngūwɛ̄gā kɛ̄ɛ Isa̍tan nīi ē gla̍ āchɛ yī yɛchɛ nūma̍ ma̍ a̍nɛ. E̍ de ɔ̍ nū pīya wā amu la ajɛyɛ̄ɛchɛ tūla ayɛ̍ɛ̄chɛ̄rɔ̄ wa̍a̍ nīi - āchɛ yī nū ma̍.

¹⁰ Bɛ̍ɛ̄nɛ̄ ma̍, n po̍ ɔkɔlɛ̄lā ɔha̍ bāa ɔfrāfrā ma̍ abɔ̍ɔ la ichō ka ɔ̍lɔ ge̍, “U̍ma̍ama, ɔhɛ̍ta̍ nīi Ɔwɔ de ma̍ wā mɛ̍ oo! Ɔwɔ ɔlɔjā de wɔhu̍ nīi o̍ lɛ bāa Ɔchwɔ̄lɛ̍ ma̍ chabɔ̄ ke̍e̍ mɛ̍! Ɔhɔ̍ɔnyɛta̍ Nīi Ɔwɔ Hōhu Ma̍ titi de wɔhu̍ nīi o̍ lɛ ma̍ chabɔ̄ ke̍e̍ mɛ̍. Wu̍chē oji̍ nɛ, anu̍ ɔla̍ā nīi ē gāa iyɔ̄bū yī Ɔwɔ myɛ̄grāa-myɛ̄grāa ge̍ē kɛlā abi̍ ku̍ aɛ̍nɛ̍ yī alɔ ma̍, e̍ de ɔ̍ nū pīya hī ichō mɛ̍.

¹¹ Aɛ̍nɛ̍ yī alɔ de ɔ̍ gwō ke̍e̍ mɛ̍. E̍ ya̍ i̍ngɔ̍ɔ mɛ bū la yeyī yī ɔpīyaku̍ yī Ɔyɔ̍ɔ̄nyīyɛrɔ̄ yī Ɔwɔ ba̍la lɛlā olēchi̍ lēchi̍ yī Ɔwɔ nīi e̍ bī koko̍o de ɔ̄chɛ ma̍. E̍ chrōoko̍o ge̍ē tu̍labɔ̄ hī ɔhɔ̄leyī yī wā ē pīyēku̍.

¹² Ɔwɔ̄wīyā ge̍ hɔ̄ abɔ̍ɔ la ichō wa̍a̍ gɛ! Āchɛ nīi gblāa abɔ̍ɔ wa̍a̍ ma̍, ala̍ ā wīyā gba̍a̍ gɛ! Amu la ajɛ ba̍la li̍hu wa̍a̍ ma̍, i̍īyo̍ de ala̍! Wu̍chē oji̍ nɛ, Ɔngūwɛ̄gā pīya wā dikpo̍ba̍ ala̍ mɛ̍. Ɔtū ngurangura yɛ abɔ̍ɔ ya̍ ɔ̄ gba̍a̍ wu̍chē oji̍ nɛ, o̍ jo̍ōkū hīka ɔ̄chī yī anu̍ ɔ̍lɔ de hōhī pi̍nyɛ̍ ji bɛ̍ɛ̄nɛ̄.”

¹³ Anu̍ ɛbɛ̍ ɔla̍ā nīi re̍ka idra̍gɔn ma̍ ma̍ hīka ɛ̍lɛ de anu̍ nū pīya wā la ajɛyɛ̄ɛchɛ ma̍, o̍ kū la onū ɔnyā ɔla̍ā nīi ma ɔyi̍ ɔnɔ̄ngrɔ̄ɔ ma̍ ɛnya bɛ̍ɛ̄nɛ̄.

¹⁴ E̍ chī de acha̍ ɛpa bāa iyī oge ɔnɔ̄kɔ̄kū ma̍ tū ɔnyā ɔla̍ā hɛ̄ɛbɛ nīi o̍ ge̍ē wōwu pīya gāa ɛbɛ yī nū nīi hɔ̄ la lipu̍ a̍chi̍ chukuru ɔ̍lɔma̍ ma̍. Abɔ̍ɔ nīi o̍ ge̍ē hɔ̄ la lɛ̍yi̍ ɛta̍ che ɔyɔ̍ɔ erīiyī hɛ̄ɛbɛ nīi anu̍ ɔla̍ā nīi re̍ka yɛgwā ma̍, i̍ ge̍ē ya̍ ɔ̄ ɔjɔ̄jā mɛ ni̍ a̍nɛ.

¹⁵ Ɛbɛ̍ ɔdwɔ̄bi̍ ɔla̍ā hīchii mu yenyi bū la oko̍o kpɛ̍ɛ bāa yenyi ɔhɛ̍rɛ̍ ma̍, hɛ̄ɛbɛ nīi yenyi ɔla̍ā ge̍ē de ɔnyā ɔla̍ā pɛ̍ pīya.

¹⁶ Ɔpɔ̄ɔpɛ̄, ajɛ wā ge̍ tū ɔnyā ɔla̍ā wɔbɔ̄; ajɛ lwāa oko̍o de yenyi ɔla̍ā nīi ɛbɛ̍ ɔdwɔ̄bi̍ ɔla̍ā mu la oko̍o ma̍ gwa̍ cha̍cha̍.

¹⁷ Ɛbɛ̍ ɔla̍ā nīi re̍ka idra̍gɔn ma̍ de ya̍ ɔtū ngurangura ɔlamu ɔlamu tāa ɔnyā ɔla̍ā. O̍ pīya dikpo̍ba̍ āchɛ wa̍a̍ nīi bū la wɔma yī ɔnyā ɔla̍ā ma̍, hɛ̄ɛbɛ ge̍ē kpo̍ wā lɛwu̍. Āchɛ wa̍a̍ nīi yɛ ē ya̍ lɔkɔ nīi Ɔwɔ ka ɛ̍lɛ ge̍ ya̍ ma̍, āchɛ nīi chɛ̄ lɛlā olēchi̍ lēchi̍ ɔla̍ā nīi Iji̍sɔ̄ɔsi de hi̍yɛchɛ ma̍, aa̍ re̍ka wɔma yī ɔnyā ɔla̍ā a̍nɛ.

¹⁸ Anu̍ idra̍gɔn ɔ̍lɔma̍ pīya rɛ abɔ̍ɔ la oko̍o li̍hu.