ODE HI̍YƐCHƐ 11 - Ye̳ka Onīpīpē̳ Yī O̳wo̳

Itɛ̍ɛhi̍yɛ̍ ɛpa nīi e̍ de tɛ̄rɔ̄ ma̍

¹ Bɛ̍ɛ̄nɛ̄ ma̍, e̍ wā ge̍ de u̍kpɔ̍chi̍ obī miya ɛbɛ līkpō ɔha̍ de u. O̍ lɛ bāa a̍bi̍ije ma̍. Ɔyɛ̍ɛ̄chɛ̄rɔ̄ yī Ɔwɔ da u bɛ̍ɛ̄nɛ̄ hīka, “Nīichō gāa nīi a ā miya līkpō yī u̍nu̍ yī Ɔwɔ ba̍la ɛbɛ ɔyɔ̍ɔ̄pɔ̄pā ɔla̍ā. Ka āchɛ wa̍a̍ nīi gblāa abɔ̍ɔ ē ya̍ otūlichō ma̍ ɔkɔ̄ka.

² Pi̍ye̍mā hī iyɛ̍ɛchɛ yī ɛbɛ yī u̍nu̍ yī Ɔwɔ; a ā miya ɛbɛ ɛla̍ā ni̍. Wu̍chē oji̍ nɛ, abɔ̍ɔ nīi e̍ de lā de āchɛ i̍je̍ Ɔwɔ ni̍ a̍nɛ. Āchɛ i̍je̍ Ɔwɔ ni̍ ge̍ē de ikpo̍ ē ba̍ ajɛ yī Ipwo̍gra Ɔnɛ̄ɛhɛhi nūma̍ bāa ɔchɛ̍kɛ̄chɛkɛ̄ ma̍ lipu̍ yī ɔyɔ̍ɔ ohu ɛpa che ɛpa.

³ N chī ge̍ē de itɛ̍ɛhi̍yɛ̍ yī u ɛpa ē tɛ̄rɔ̄ wā. E̍ ge̍ē tū a̍chiyɔ̄pa̍. E̍ wā ge̍ē ka ɛrɔ̄ yī Ɔwɔ abɔ̍ɔ lipu̍ ɔ̄chī u̍nɔ ɛta̍ che ɔ̄chī ohu ɛta̍ ɛla̍ā.”

⁴ Ɔchi̍ ɔha̍ nīi re̍ka o̍līifu ma̍ lɛ ɛpa ba̍la otīnīkā ɛpa nīi rɛ abɔ̍ɔ la iyɔ̄bū yī anu̍ nīi - Ādā yī ajɛyɛ̄ɛchɛ wa̍a̍ ma̍; aa̍ re̍ka itɛ̍ɛhi̍yɛ̍ yī u ɔ̍lɔma̍ a̍nɛ.

⁵ Ɔ̄chɛ ɔha̍ ge̍ chikpo̍ ge̍ē ya̍ wā ɔjā, ɔla̍ ɔha̍ ge̍ē bīyɛchɛ la oko̍o yī wā ge̍ē de aluji yī wā ɛla̍ā chāajɛ ke̍e̍ ɔpɔ̄ɔpɛ̄. Gala ɔgɔgu nūma̍, ɔ̄chɛmɔ̄chɛ nīi ge̍ chikpo̍ ge̍ē ya̍ wā ɔjā, e̍ ē de ɔlɔjā ngmo̍.

⁶ E̍ lwɔhu̍ ge̍ē de akpɔ̍ɔwɔ wa̍a̍ ē tu̍ gū hɛ̄ɛbɛ nīi riwō ɔha̍lɔha̍ i̍ ge̍ē hā yɛ̄grāa nīi e̍ yɛ ē ka ɛrɔ̄ yī Ɔwɔ ma̍ ni̍. E̍ lwɔhu̍ i̍ngi̍ngɔ̍ɔ la ɔya̍ nīi u̍bu̍yēenyi ɔha̍lɔha̍ wa̍a̍ de pīya yeyī ke̍e̍. E̍ gba̍a lwɔhu̍ la ɔya̍ nīi ɔgawu ita ɔha̍lɔha̍ wa̍a̍ wā la ajɛyɛ̄ɛchɛ nūma̍ myɛ̄grāa-myɛ̄grāa lɔkɔ nīi o̍ rīya aa̍ ma̍.

⁷ Itɛ̍ɛhi̍yɛ̍ ɛpa ɛla̍ā ge̍ kwɛ̍ɛjī la ɛrɔ̄ ɔkɔ̄ka yī wā ɔla̍ā mɛ̍, ɛbɛ̍ ɔha̍ nīi bū la ɛbɛ ɔlɛngɔ̄nɔ̄ngɔ̄nɔ̄ yī ayekū oli̍gba̍o̍ ma̍ ge̍ē nunu ē tāa aa̍. Ɛbɛ̍ ɔ̍lɔma̍ ge̍ē de wa̍ gwō, kpo̍ wā ngmo̍.

⁸ Okū yī wā ge̍ē de ē ya̍ gblāa abɔ̍ɔ la ogblo̍lo̍ yī ipwo̍gra ɔnɔ̄kɔ̄kū ɔla̍ā nīi e̍ de Ādādā yī wā gwōba̍ la ɔchi̍ ɔhrɛ̍ɛpa ma̍. Riyī ɔnāa kwichi̍ yī ipwo̍gra ɔla̍ā re̍ka Iso̍dɔm kɛ̄ɛ I̍jīipu.

⁹ Ɔcha wa̍a̍, ba̍la ipwɔ̍ɔma ɔha̍lɔha̍ wa̍a̍, ba̍la ipwɔ̍ɔcha ɔha̍lɔha̍ wa̍a̍ ba̍la ita yī āchɛ̄ɛchɛ ɔha̍lɔha̍ wa̍a̍ ge̍ē ma̍ okū yī wā ɛla̍ā lipu̍ yī ɔ̄chī ɛta̍ che rɛ̄rɛ̄. E̍ i̍ ge̍ē chɛ̄ nīi e̍ ē kpo̍ wā nyi ni̍.

¹⁰ Āchɛ wa̍a̍ la ɔkpa̍ajɛyɛ̄ɛchɛ nūma̍ ge̍ wɔ̄wīyā wu̍chē yī ɔpīyaku̍ yī itɛ̍ɛhi̍yɛ̍ ɛpa ɛla̍ā. Āchɛ wa̍a̍ ge̍ē ya̍ ɔwɔ̄wīyā, kɔ̄ ɔjā tɛ̄rɔ̄ hu ɔ̍nyīnū. Wu̍chē oji̍ nɛ, alɛrɔ̄ yī Ɔwɔ āchɛ ɛpa nūma̍ bī ichi̍ ɔmɔ̍ɔ̄ma̍ gba̍a̍ ge̍ de alipu̍ yī yɛchɛ.

¹¹ Ɔ̄chī ɛta̍ che rɛ̄rɛ̄ ɔ̍lɔma̍ wā ge̍ ga ma̍, owu ɔhɔ̍ɔ̄hɛ̍ nīi ē de ɔhɔ̄leyī de āchɛ ma̍ bū la abɔ̄ yī Ɔwɔ wā ge̍ tū okū yī wā ɛla̍ā. E̍ nīichō yarɛ bɛ̍ɛ̄nɛ̄. Bū la ɛbɛ ɔla̍ā, āchɛ wa̍a̍ nīi ma̍ wā i̍ngɔ̍ɔ ma̍ de kpo̍ tūuhwi ɔlamu ɔlamu.

¹² Ɔpɔ̄ɔpɛ̄, āchɛ ɔkɛrɔ̄ yī Ɔwɔ ɛpa ɛla̍ā po̍ ɔkɔlɛ̄lā ɔha̍ gbōō bū la ichō. O̍ ka grāa aa̍ hīka, “Ala̍ ā pīya wā oo!” Aluji yī wā gblāa abɔ̍ɔ ē ma̍ wā chwaa nīi e̍ pīya ga ichō ga lipu̍ yī akpɔ̍ɔwɔ ke̍e̍ ma̍.

¹³ Yɛ̄gɛ̄grāa ɔla̍ā ɔpɔ̄ɔpɛ̄, ajɛ wa̍a̍ he̍ejē dwɔ̄bi̍ dwɔ̄bi̍; wāā ūkpo̍he lipu̍ yī igwo̍ yī ipwo̍gra ɔla̍ā de chāajɛ cha̍cha̍. Āchɛ̄ɛchɛ u̍nɔ igwa̍arāapa che ohu igwo̍ nīi pīyaku̍ bū la ajɛ nīi he̍ejē dwɔ̄bi̍ dwɔ̄bi̍ ma̍. Āchɛ ehēhī wa̍a̍ de kpo̍ tūuhwi ɔlamu ɔlamu; e̍ chōo̍chē kā Ɔwɔ la ichō ɔkɔ̄kā wu̍chē yī wɔhu̍ yī nū.

¹⁴ Akanya ɔdwɔ̄bi̍ ɔdwɔnyɛ ɔmɛpa ga bī aa̍ a̍nɛ. Ala̍ ma̍ gɛ ko̍ō! Akanya ɔdwɔ̄bi̍ ɔdwɔnyɛ ɔmɛta̍ yī wā yɛ amu yewā u̍ma̍ama!

Lɛjī ɔmarāapa

¹⁵ Bɛ̍ɛ̄nɛ̄ ma̍, ɔyɛ̍ɛ̄chɛ̄rɔ̄ yī Ɔwɔ nīi - ɔmarāapa ma̍ wā ge̍ gwō lɛjī yī nū bɛ̍ɛ̄nɛ̄. Ɔpɔ̄ɔpɛ̄, ɔkɔlɛ̄lā yɛ̄mɛ̄mɛ̄ lɛ bāa ɔfrāfrā ma̍ bū la ichō hīka, “Wɔhu̍ yī yɛchɛ obōbī wa̍a̍ hɔ̄ la abɔ̄ yī Ādādā yī alɔ ba̍la Ɔhɔ̍ɔnyɛta̍ Nīi Ɔwɔ Hōhu Ma̍ bɛ̍ɛ̄nɛ̄. Anu̍ ge̍ē bī wɔhu̍ ɔla̍ā kpɛɛ ku yɛ̄grāa i̍mɔ̄mɛni̍ a̍nɛ.”

¹⁶ Bɛ̍ɛ̄nɛ̄ ma̍, ɛgabɔ̄ ohu che ɛnɛ ɛla̍ā nīi hyāhɔ̄ la ɔchi̍īkpā yī wā abɔ̍ɔ hi̍kpo̍tū Ɔwɔ ma̍ de lɛhu̍ gbo ajɛ, ya̍ otūlichō de Ɔwɔ.

¹⁷ E̍ ka bɛ̍ɛ̄nɛ̄ hīka, “Ɔwɔ Ādādā ba̍la Ɔgɔnyɛ Ɔnɔ̄kɔ̄kū! A hɔ̄ gbi̍chɛ gbi̍chɛ; a chī hɔ̄ u̍ma̍ama. Alɔ da wɔ o̍be gba̍a̍ wu̍chē lɔkɔ nīi a nāa wɔhu̍ ɔnɔ̄kɔ̄kū yī wɔ bī amu ē bī ɛbɛ wa̍a̍ ma̍.

¹⁸ Āchɛ i̍je̍ Ɔwɔ ni̍ de kpo̍ he̍ēyīwɔnɔ ɛbɛ̍bɛ̍ ɛbɛ̍bɛ̍. Wu̍chē oji̍ nɛ, yɛ̄grāa yī ɔtū ngurangura yī wɔ de gbajɛ mɛ̍. Yɛ̄grāa yī lɛpɔ̄ ɔhɔ̍ɔ̄hɛ̍ yī āchɛ nīi ko̍ōku̍ ma̍ gbajɛ mɛ̍. Yɛ̄grāa de gbajɛ nīi a ge̍ē kla̍ a̍chɛ̍ yī wɔ nīi ka ɛrɔ̄ yī wɔ ma̍ ure̍ yī lɛlā yī wā mɛ̍, aa̍ ba̍la āchɛ yī wɔ wa̍a̍ nīi ē ya̍ otūlichō yī wɔ ma̍ nɛ, e̍ ge̍ lɔ̄lɛ ke̍ke̍ni̍ kɛ̄ɛ pi̍nyɛ̍. Yɛ̄grāa de gbajɛ nīi a ge̍ē kpo̍ āchɛ nīi de yɛchɛ chāajɛ ma̍ ā chāajɛ titi mɛ̍.”

¹⁹ U̍nu̍ yī Ɔwɔ abɔ̍ɔ la ichō lwāa tɔ̍ɔ̄ta̍ ɔpɔ̄ɔpɛ̄; yakpa ɔla̍ā nīi yɛka ɔgwɔ̍ɔ̄gwa̍ yī Ɔwɔ tū ma̍ rɛ abɔ̍ɔ la u̍nu̍ yī Ɔwɔ. Ɔpɔ̄ɔpɛ̄, ɔla̍ yī yakpla̍ kɔ̄ manyamanya, ojiya rɛ; yakpla̍ gbo ɛbɛ̍bɛ̍ ɛbɛ̍bɛ̍, ajɛ he̍ejē dwɔ̄bi̍ dwɔ̄bi̍, achɔ̄ yī yakpla̍ ha̍ābɔ̄ bāa ɔkpɔ̍tɔ̍kpɔ̍tɔ̍ ma̍.