ODE HI̍YƐCHƐ 10 - Ye̳ka Onīpīpē̳ Yī O̳wo̳

Ɔyɛ̍ɛ̄chɛ̄rɔ̄ yī Ɔwɔ ba̍la īpū onīchi̍chɛ̍ ɔha̍

¹ Bɛ̍ɛ̄nɛ̄ ma̍, n wā ge̍ ma̍ ɔyɛ̍ɛ̄chɛ̄rɔ̄ yī Ɔwɔ ɔnɔ̄kɔ̄kū ke̍ke̍ni̍ ɔha̍ nīi bīyɛchɛ bū la ichō yeēwā. Akpɔ̍ɔwɔ mi̍ya tū ɔ̄ la iyē bāa ɔkplɛkplɛ ma̍. Ɔjɔ̍ hɛ̍ ta̍kakatū īkplɛ̄hu̍ yī nū. Eyī yī nū lɛ bāa yɛnɔ ma̍; ikpo̍ yī nū chī lɛ bāa u̍blɛ̍ɛ̄nyī yī ɔla̍ ɔnɔ̄kɔ̄kū ma̍.

² Īpū onīchi̍chɛ̍ ita nīi e̍ ē hā ɔ̄ ɔhɔ̄hā ngmri̍ngmri̍ ma̍, o̍ lwāa anu̍ bī abɔ̍ɔ la abɔ̄. O̍ yɛ la ikpo̍ līre̍ yī nū ge̍ che la li̍hu, de ikpo̍ līfīyē che la ajɛyɛ̄ɛchɛ ɔlamu.

³ O̍ tɔ̍ɔna wɔhu̍ wɔhu̍ kpɛ̍ɛ nīi ɔkɔ yī nū ya̍ bɔ̄ɔkɔ nīi wɔ̍ga̍ba̍ yɛ ē hwɔnū ma̍. O̍ hɛ̄ra̍ i̍ngɔ̍ɔ ɔpɔ̄ɔpɛ̄ ma̍, yakplɔ̍ɔwɔ arāapa gbo hīya anu̍ ɔkɔ.

⁴ E̍ yɛ ē kɛlā bɛ̍ɛ̄nɛ̄ ma̍, n yɛ ge̍ē de ē ta̍tū la īpū; ɔpɔ̄ɔpɛ̄, n po̍ ɔkɔlɛ̄lā ɔha̍ bū abɔ̍ɔ la ichō hīka, “Lɛlā ɛla̍ā nīi yakplɔ̍ɔwɔ arāapa ka ma̍, a ā de hi̍yɛchɛ ni̍; a ā ta̍ ɔ̄ tū la īpū ni̍.”

⁵ Bɛ̍ɛ̄nɛ̄ ma̍, ɔyɛ̍ɛ̄chɛ̄rɔ̄ yī Ɔwɔ ɔla̍ā nīi n ma̍ nīi o̍ de ikpo̍ ɔha̍ rɛ la li̍hu, de ɔha̍ rɛ la ajɛyɛ̄ɛchɛ ma̍ hu abɔ̄ līre̍ yī nū hwa̍a̍ ga ichō.

⁶ O̍ choko̍o lēchi̍ lēchi̍ gbo riyī yī Ɔwɔ nīi hɔ̄leyī kpɛɛ ku yɛ̄grāa i̍mɔ̄mɛni̍ ma̍. Ɔwɔ nīi ya̍ ichō ba̍la ɛjāha̍ ɛjāha̍ wa̍a̍ nīi hɔ̄ abɔ̍ɔ la ichō ma̍, nīi ya̍ ajɛyɛ̄ɛchɛ wa̍a̍ ba̍la ɛjāha̍ ɛjāha̍ wa̍a̍ nīi gblāa la anu̍ ma̍, nīi chī ya̍ yenyi wa̍a̍ ba̍la ɛjāha̍ ɛjāha̍ wa̍a̍ nīi gblāa la anu̍ ma̍ nɛ. Ɔyɛ̍ɛ̄chɛ̄rɔ̄ yī Ɔwɔ ɔla̍ā ka bɛ̍ɛ̄nɛ̄ hīka, “Irwɛ ɔha̍lɔha̍ i̍ ge̍ē hɔ̄ gɛ ni̍ ko̍ō!

⁷ Ɔyɛ̍ɛ̄chɛ̄rɔ̄ yī Ɔwɔ ɔmarāapa ɔla̍ā ge̍ gwō lɛjī yī nū mɛ̍, ɔ̍lɔma̍ Ɔwɔ ge̍ē de lɛlā ɔmɔ̄miya yī nū nīi trɛ̍ba ma̍ ē ya̍ la ɔgɔ̄grāa. O̍ ge̍ē ya̍ i̍ngɔ̍ɔ ke̍e̍ lɔkɔ nīi anu̍ ɔlɔjā ka de a̍chɛ̍ yī nū nīi - āchɛ ɔkɛrɔ̄ yī nū ma̍.”

⁸ Bɛ̍ɛ̄nɛ̄ ma̍, ɔkɔlɛ̄lā nīi n po̍ bū la ichō i̍gba̍a ma̍ gba̍a ka grāa ami hīka, “Gāa ge̍ nāa īpū nīi lɔ̄lwāa bī aa̍ la abɔ̄ yī ɔyɛ̍ɛ̄chɛ̄rɔ̄ yī Ɔwɔ ɔla̍ā nīi de ikpo̍ ɔha̍ rɛ la li̍hu, de ɔha̍ rɛ la yɛchɛ ɔlamu ma̍.”

⁹ N pīya bɛ̍ɛ̄nɛ̄ dikpo̍ba̍ ɔyɛ̍ɛ̄chɛ̄rɔ̄ yī Ɔwɔ ɔla̍ā hīka o̍ ge̍ de īpū onīchi̍chɛ̍ ɔla̍ā de u gɛ. O̍ da u hīka, “Nāa gɛ nīi a ā de re̍. O̍ ge̍ē lwɔnyɛ bāa ɛngu̍ɛrɛ ma̍ la oko̍o; abɔ̍ɔ lipu̍ yī wɔ, o̍ chī ge̍ē de ē mɔ̍ɔ̄ma̍ ɛbɛ̍bɛ̍ ɛbɛ̍bɛ̍.”

¹⁰ N de īpū onīchi̍chɛ̍ ɔ̍lɔma̍ nāa bū la abɔ̄ yī nū de re̍ bɛ̍ɛ̄nɛ̄. O̍ lwɔnyɛ kpɛ̍ɛ bāa ɛngu̍ɛrɛ ma̍ la oko̍o; n chī de mlɛ bɛ̍ɛ̄nɛ̄ ma̍, o̍ chōo̍chē de mɔ̍ɔ̄ma̍ kpɛ̍ɛ abɔ̍ɔ lipu̍ yī u.

¹¹ Bɛ̍ɛ̄nɛ̄ ma̍, e̍ koko̍o de u hīka amɔ̍lɔ ge̍ gba̍a gāa ge̍ ka ɛrɔ̄ yī Ɔwɔ de āchɛ. Lɛɛ nūma̍, amɔ̍lɔ ge̍ kɛlā nīi - ɔ̍lɔ lā ku̍ ɔcha wa̍a̍ ba̍la ipwɔ̍ɔma wa̍a̍ ba̍la āchɛ ita ɔha̍lɔha̍ wa̍a̍ ba̍la ɛchwɔ̄lɛ̍ yɛ̄mɛ̄mɛ̄ bɛ̍ɛ̄nɛ̄.