ODE HI̍YƐCHƐ 1 - Ye̳ka Onīpīpē̳ Yī O̳wo̳

Owu̍tu

¹ Īpū yī lɛlā nīi Ɔwɔ de de Iji̍sɔ̄ɔsi Ikra̍yisi nīi o̍ de hi̍yɛchɛ ma̍ hɔ̄ ma̍ a̍nɛ. Ɔwɔ de lɛlā nīi yɛ amu ge̍ē hli̍kpa̍ ē ya̍ ma̍ de Ikra̍yisi hɛ̄ɛbɛ nīi o̍ ge̍ē de ē chabɔ̄ hu̍ a̍chɛ̍ yī Ɔwɔ. Ikra̍yisi de lɛlā ɔ̍lɔma̍ chabɔ̄ hu̍ Ijɔ̍ɔn ɔ̍chɛ̍ yī Ɔwɔ gala abɔ̄ yī ɔyɛ̍ɛ̄chɛ̄rɔ̄ yī Ɔwɔ ɔlɔjā nīi o̍ de tɛ̄rɔ̄ ma̍.

² Ijɔ̍ɔn chī koko̍o yī lɛlā ɔ̍lɔma̍ wa̍a̍. Oko̍o yī lɛlā ɔla̍ā nīi Ɔwɔ tɛ̄rɔ̄ ma̍ ba̍la lɛlā olēchi̍ lēchi̍ ɔla̍ā nīi Iji̍sɔ̄ɔsi Ikra̍yisi de hi̍yɛchɛ ma̍ tū ma̍ a̍nɛ.

³ A̍hōhi ge̍ - iyī āchɛ nīi ge̍ē ma̍ lɛlā yī īpū nūma̍ ma̍! A̍hōhi ge̍ gba̍a iyī āchɛ nīi ge̍ē darɔ̄ku lɛlā yī wɔmu ɔmɔ̍ɔ̄ma̍ nūma̍ gba̍a ē ya̍ lɔkɔ nīi īpū nūma̍ ka ma̍. Wu̍chē oji̍ nɛ, yɛ̄grāa ɔ̍lɔma̍ nīi lɛlā nūma̍ wa̍a̍ ge̍ē ya̍ ma̍ de hōhī kurɛkurɛ mɛ̍.

Ɔma̍kpɔɔ yī Ogrēeyī yī āchɛ yī Ɔwɔ yī ɛbɛ arāapa ɛha̍

⁴ Ami Ijɔ̍ɔn yɛ ma̍ ē tɛ̄rɔ̄ nūma̍ ē hu ogrēeyī yī āchɛ yī Ɔwɔ yī ɛbɛ arāapa nīi hɔ̄ la ajɛ yī E̍siya ma̍ a̍nɛ: Ɔpiyɛ ba̍la ogbodɔ̍dɔ̍ ge̍ iyī ala̍ bū la abɔ̄ yī Ɔwɔ nīi hɔ̄ i̍ngɔ̍ɔ gbi̍chɛ gbi̍chɛ, chī hɔ̄ u̍ma̍ama, chī ge̍ē wā we̍ ma̍! O̍ ge̍ gba̍a iyī ala̍ bū la abɔ̄ yī uhu arāapa ɛla̍ā nīi ē gblāa la iyɔ̄bū yī atɛ̍ yī Ɔwɔ ma̍!

⁵ O̍ ge̍ gba̍a iyī ala̍ bū la abɔ̄ yī Iji̍sɔ̄ɔsi Ikra̍yisi ɔlɔjā nīi re̍ka itɛ̍ɛhi̍yɛ̍ nīi ɔ̄chɛ ē de ɔtū che ɔ̍ ma̍! Anu̍ - ɔyi̍ rɛ̄ɛya yī Ɔwɔ nīi o̍ de ɔ̍ hye̍ēyī bū la okū a̍nɛ. Anu̍ - Ɔchwɔ̄lɛ̍ yī ɛchwɔ̄lɛ̍ wa̍a̍ amu la ajɛyɛ̄ɛchɛ a̍nɛ. Iji̍sɔ̄ɔsi yɔ̍ɔhɔtū yī alɔ gba̍a̍; bū la ɔpīyaku̍ yī nū, o̍ de alɔ hīya lɛfiyɛ ke̍e̍ hī lɛlā ɔdwɔ̄bi̍ yī alɔ wa̍a̍.

⁶ O̍ de alɔ kpo̍ pīya wɔma yī aligbe nīi ge̍ē hɔ̍chɛ̍ yī Ɔwɔ yī nū ba̍la A̍dā yī nū ma̍. Rīgā ba̍la wɔhu̍ ɔla̍ā ge̍ iyī Iji̍sɔ̄ɔsi Ikra̍yisi kpɛɛ ku yɛ̄grāa i̍mɔ̄mɛni̍! O̍ ge̍ lɛ i̍ngɔ̍ɔ!

⁷ Ala̍ ma̍ gɛ ko̍ō! Iji̍sɔ̄ɔsi yɛ amu yewā bū la akpɔ̍ɔwɔ. Ɔ̄chɛmɔ̄chɛ, tūla āchɛ nīi gwō abada tū ɔ̄ ma̍ ge̍ē ma̍ ɔ̄. Āchɛ wa̍a̍ la ajɛyɛ̄ɛchɛ ge̍ē drɛ̄ɛgba ē tū ɔ̄. I̍ngɔ̍ɔ ichɛ̄ɛhi nɛ! O̍ ge̍ lɛ i̍ngɔ̍ɔ!

⁸ Ɔwɔ nīi - Ādādā Ɔgɔnyɛ Ɔnɔ̄kɔ̄kū ma̍ ka hīka anɔ̍lɔ re̍ka A̍lfa ba̍la O̍mēga a̍nɛ! Anu̍ hɔ̄ gbi̍chɛ gbi̍chɛ, hɔ̄ u̍ma̍ama, chī ge̍ē wā we̍ a̍nɛ.

Yɛ̍ma̍ yī lɛlā nīi Ijɔ̍ɔn ma̍ de ka ma̍

⁹ Ami Ijɔ̍ɔn nīi - ɔɔ̍nɛ̍ yī ala̍ ɔnɔ̄ngrɔ̄ɔ ma̍ nɛ. Bū la otū ngmo̍tu̍chɛ̄ yī alɔ ba̍la Iji̍sɔ̄ɔsi, ami titi yɛ ē mi̍chi̍ bāa ala̍ ma̍. N tū la ɔpiyɛ yī Ɔchwɔ̄lɛ̍ Oro̍ōre̍ yī nū bāa ala̍ ma̍. N chī gba̍a tū la ɔmlɔtū kpɔ̍ɔ̍ bāa ala̍ ma̍. E̍ bī u pīya ge̍ hɔ̄ la ajɛ ɔha̍ nīi hɛ̍che abɔ̍ɔ li̍hu nīi re̍ka Ipati̍mɔ̄ɔsi ma̍. Wu̍chē lɔkɔ nīi n yɛ ē ka ɛrɔ̄ yī Ɔwɔ ba̍la lɛlā olēchi̍ lēchi̍ nīi Iji̍sɔ̄ɔsi de hi̍yɛchɛ ma̍ - ohu̍ nīi e̍ ku̍ u ge̍ hɔ̄ abɔ̍ɔ a̍nɛ.

¹⁰ I̍chi̍chɛ ɔha̍ la Ɔ̄chī Ɔmyɛ̍nyɛ̍ nīi e̍ de kwɔbɔ̄ de Ādā ma̍, Uhu yī Ɔwɔ kla̍ ami i̍ngɔ̍ɔ bri̍bri̍bri̍ abɔ̍ɔ. Bɛ̍ɛ̄nɛ̄ ma̍, n po̍ ɔkɔlɛ̄lā ɔha̍ frāfrāfrā bāa lɛjī ma̍ la wāā yī okwi̍ihi yī u.

¹¹ O̍ ka grāa ami hīka amɔ̍lɔ ge̍ ta̍ lɛlā wa̍a̍ nīi amɔ̍lɔ ge̍ē ma̍ ma̍ tū la īpū nīi amɔ̍lɔ ge̍ de tɛ̄rɔ̄ hu ogrēeyī yī āchɛ yī Ɔwɔ yī ɛbɛ arāapa nūma̍: Iyī Ɛ̍fɛ̄susi ba̍la iyī Isima̍na, ba̍la iyī Ipɛ̍gāmum, ba̍la iyī Itiya̍tīra, ba̍la iyī Isa̍dīisi, ba̍la iyī Ifiladɛ̍fiya ba̍la iyī Ileyode̍siya.

¹² Bɛ̍ɛ̄nɛ̄ ma̍, n wā ge̍ pīyeyī kpa̍ta̍ yɛ ge̍ē ma̍ ɔ̄chɛ nīi yɛ ē kɛlā tāa ami ma̍. N ma̍ ɛjā ode ɔla̍ che - arāapa gblāa abɔ̍ɔ nīi e̍ ya̍ la igo̍olu igo̍olu ke̍e̍.

¹³ Abɔ̍ɔ la olo̍ōlo̍ yī ɛjā ode ɔla̍ che ɛla̍ā, n ma̍ ɔjā ɔhɔ̄leyī ɔha̍ nīi lɛ bāa ɔngrɔ̄ɔ ma̍. O̍ ru aru̍ ɔkwajɛ nīi yɛ pɛtɛɛ ge̍ chɛ̄ la a̍pa̍atīkpo̍ ma̍. Opikritū yī aru̍ ɔkwajɛ ɔ̍lɔma̍ - igo̍olu ke̍e̍ nīi e̍ ya̍ la anu̍ a̍nɛ. Ɔla̍ā ku̍ la yɛ̄grāa yī ɔgɛgɛ yī nū.

¹⁴ Inyɛ̄lɛ̄hu̍ yī nū lɛ̍rɛ̍ kpɛ̍ɛ bāa ipu yī owu̍ kɛ̄ɛ ada ma̍. Īkprī yī nū yɛ ē chɔ̄chɛ̄ bāa ɔla̍ ma̍.

¹⁵ Ikpo̍ yī nū ho̍ōhu̍ kpɛ̍ɛ bāa upu nīi e̍ de ɔ̍ ngrāa la ɔla̍ o̍bū chōo̍chē bī ɔjā nyiya anu̍ tū ma̍. Ɔkɔlɛ̄lā yī nū ya̍ ojiya kpɛ̍ɛ bāa yenyi ɔpɔ̍ɔ̄pɛ̍ nīi yɛ ē ha̍ābɔ̄ bū la ichō ɔnɔ̄kɔ̄kū ɔha̍ hwɛɛ ē wa̍ la ihi̍yajɛ ma̍.

¹⁶ O̍ bī i̍nyi̍nyɔ̍ɔwīyā arāapa la abɔ̄ līre̍ yī nū. Oge olire̍ la oe̍ ɛpɛpa ɔha̍ bīyɛchɛ ku abɔ̍ɔ la oko̍o yī nū. Inēyī yī nū hu̍ nya̍ri̍nya̍ri̍ kpɛ̍ɛ bāa yɛnɔ oche la yakpalɛ̄hu̍ ma̍.

¹⁷ N ma̍ ɔ̄ ma̍, n ngma̍ ta̍gbo la apli̍kpo̍ yī nū gblɔgɔdɔ bāa okū ma̍. O̍ de abɔ̄ līre̍ che u du̍mɔ̍, da u hīka ɔ̍lɔ ge̍, “A ā tūuhwi ni̍. Ami nīi re̍ka ɔyɔbū ba̍la ogwīihi ma̍ hɔ̄ ma̍ a̍nɛ.

¹⁸ Ami - ɔ̄chɛ ɔhɔ̄leyī kpɛɛ nɛ. N pīyaku̍ o̍bū. Ma̍ gɛ, u̍ma̍ama n ge̍ē hɔ̄leyī ku yɛ̄grāa i̍mɔ̄mɛni̍ bɛ̍ɛ̄nɛ̄. Ami bī wɔhu̍ yī ɔpīyaku̍ ba̍la ayekū a̍nɛ.

¹⁹ O̍ lɛ i̍ngɔ̍ɔ ma̍, ta̍ lɛlā nīi a yɛ ē ma̍ wa̍a̍ ma̍ tū la īpū gɛ. Lɛlā nīi hɔ̄ u̍ma̍ama ma̍, ba̍la onīi ge̍ē ya̍ la ɔ̄chī iyɔ̄bū ma̍ nɛ.

²⁰ Ochi̍chi̍ yī lɛlā nīi trɛ̍ba abɔ̍ɔ lipu̍ yī lɛlā yī i̍nyi̍nyɔ̍ɔwīyā arāapa ɛla̍ā nīi a ma̍ la abɔ̄ līre̍ yī u ma̍ ba̍la lɛlā yī ɛjā ode ɔla̍ che - arāapa nūma̍ hɔ̄ ma̍ a̍nɛ: I̍nyi̍nyɔ̍ɔwīyā arāapa ɛla̍ā - ayɛ̍ɛ̄chɛ̄rɔ̄ yī Ɔwɔ nīi yɛ ē deyīrɛ ogrēeyī yī āchɛ yī Ɔwɔ la ɛbɛ arāapa ɛla̍ā ma̍ nɛ. Ɛjā ode ɔla̍ che - arāapa ɛla̍ā - ogrēeyī yī āchɛ yī Ɔwɔ nīi hɔ̄ la ɛbɛ arāapa ma̍ nɛ.