IJE̍MĒEHI 1 - Ye̳ka Onīpīpē̳ Yī O̳wo̳

Owu̍tu

¹ Ami Ije̍mēehi nīi hɔ̍chɛ̍ yī Ɔwɔ ba̍la Iji̍sɔ̄ɔsi Ikra̍yisi nīi Ādādā yī alɔ ma̍, ami ta̍ īpū nūma̍ tɛ̄rɔ̄ a̍nɛ. N da ala̍ o̍be wa̍a̍, ala̍ ipwɔ̍ɔma igwo̍lɛpa nīi mīyanya ta̍ ɔchamɔcha ta̍ wa̍a̍ la yɛchɛ ma̍.

Ɔtū ode chōche ba̍la lɛlā ojo̍ōje̍ ka̍ka̍

² Aɛ̍nɛ̍ yī u, yɛ̄grāa nīi ɔmama̍ ita ɔha̍lɔha̍ wa̍a̍ ge̍ē hɔ̄ de ala̍ ma̍, ala̍ ā nāa anu̍ bāa ɔwɔ̄wīyā ma̍.

³ Wu̍chē oji̍ nɛ, ala̍ jo̍ōkū hīka ɔtū ode chōche yī ala̍ ge̍ lɛ brii kpɔ̍ɔ̍ abɔ̍ɔ lipu̍ yī ɔmama̍ ɔla̍ā mɛ̍, ala̍ ge̍ē de ē mlɔtū hɔ̄ kpɔ̍ɔ̍ ē mɛ bɛ̍ɛ̄nɛ̄.

⁴ Ɔtū ɔmɔ̄mla kpɔ̍ɔ̍ yī ala̍ ɔla̍ā ge̍ gɔ̄grāa krididi; o̍ ge̍ e̍e ngmla̍a ala̍ ni̍. O̍ ge̍ lɛ i̍ngɔ̍ɔ hɛ̄ɛbɛ nīi ala̍ ge̍ de hwɔhi hwɔhi gɔ̄grāa krididi nīi ɛbɛbɛ ge̍ e̍e kɔ̄ lā ni̍.

⁵ Ɔ̄chɛ nīi ge̍ chikpo̍ yī lɛlā ojo̍ōje̍ ka̍ka̍, ɔlɔjā ge̍ che Ɔwɔ ikpo̍ la ɔhā. Ɔwɔ nīi ē kɔ̄ ɔjā de āchɛ la ūkpɔ̄tū ɔlɛgbadagbada ba̍la ɔlɛyaya ma̍ ge̍ē de lɛlā ojo̍ōje̍ ka̍ka̍ ē de ɔlɔjā ke̍e̍.

⁶ Ɔlɔjā ge̍ yɛ ē che Ɔwɔ ikpo̍ ma̍, o̍ ge̍ de ɔtū che Ɔwɔ brii. Ahu̍ ɔtɔ̍ɔ̄ta̍ ɔha̍lɔha̍ ge̍ e̍e hɔ̄ la ūkpɔ̄tū yī nū ni̍. Wu̍chē oji̍ nɛ, ɔ̄chɛ nīi ē ta̍ahu̍ yī lɛlā ma̍ lɛ bāa a̍kpa̍yēenyi yī li̍hu nīi ahuhu ē gwō ɔ̄ gāa ma̍ gāa a̍nū ma̍.

⁷ Ɔ̄chɛ oli̍ngɔ̍ɔ ge̍ e̍e gbɛri̍ya̍ ka anɔ̍lɔ ge̍ē nāa ɔjɔ̄jā bū la abɔ̄ yī Ādā nīi - Ɔwɔ ma̍ ni̍.

⁸ Wu̍chē oji̍ nɛ, o̍ de ūkpɔ̄tū hɛ̍ɛpa, yɛ ē ka ɔha̍ chōo̍chē ya̍ ɔha̍ ihihi.

Yeklo̍ ba̍la wɔdu ogbōgbo

⁹ Ɔɔ̍nɛ̍ yī alɔ olyeklo̍ nīi Ɔwɔ ge̍ nāa anu̍ nīichō ma̍ ge̍ wɔ̄wīyā.

¹⁰ Ɔɔ̍nɛ̍ yī alɔ ɔlwɔdu titi ge̍ wɔ̄wīyā yɛ̄grāa nīi Ɔwɔ ge̍ē bī ɔ̄ ga ajɛ ma̍. Wu̍chē oji̍ nɛ, wɔdu ē ngmla̍a ɔ̄chɛ bɔ̄ɔkɔ nīi īpū yī ɔchi̍ ɔha̍ ē ngmla̍a ē hunū ma̍.

¹¹ Yɛnɔ ge̍ chɛ̄ hwīyē gba̍a̍ mɛ̍, o̍ ē de ɛchi̍ ɛla̍ā ngmo̍ ju̍wɛ̍ju̍wɛ̍. Īpū yī wā ngmla̍a ē hunū cha̍cha̍ ɔpɔ̄ɔpɛ̄. Bū la ɛbɛ ɔla̍ā, i̍hi̍hi̍ yī wā oli̍gba̍a ɔla̍ā ē chāajɛ cha̍cha̍. I̍ngi̍ngɔ̍ɔ nīi lɛlā yī ɔlwɔdu lɛ a̍nɛ. O̍ ge̍ē pīyēku̍ yɛ̄grāa nīi o̍ kū yɛ ē kwɔgɔgu yī lɛlā yī nū ɔla̍ā ma̍.

Ɔmama̍ ba̍la otu̍tū

¹² A̍hōhi ge̍ - iyī ɔ̄chɛ nīi hɔ̄ brii la ɔtū ode chōche yɛ̄grāa nīi ɔmama̍ ɔha̍ hɔ̄ de ɔ̍ ma̍! Wu̍chē oji̍ nɛ, o̍ ge̍ ku̍ ga la ɔmama̍ ɔ̍lɔma̍ ke̍e̍ mɛ mɛ̍, Ɔwɔ ge̍ē de ɔhɔ̄leyī kla̍ anu̍ ure̍. Ɔjā nīi Ɔwɔ choko̍o ge̍ē de ē de āchɛ nīi ywɔ̍ɔnyɛ yī nū ma̍ bī aa̍ a̍nɛ.

¹³ Otu̍tū ge̍ chi̍na̍ hɔ̄ de ɔ̄chɛ ɔha̍ bū la ita yī ɔmama̍ oli̍ngɔ̍ɔ, ɔ̄chɔ̄chɛ ge̍ e̍e ka hīka, “Otu̍tū nūma̍ bū la abɔ̄ yī Ɔwɔ” ni̍. Ɔjɔ̄jā i̍ ē tū Ɔwɔ ē tū nīi o̍ ē yɛ̍ɛ̄lā abi̍ ē mɛ ni̍. Ɔwɔ ɔlɔjā i̍ ē chī tū ɔ̄chɛ ē tū nīi o̍ ē yɛ̍ɛ̄lā abi̍ ni̍.

¹⁴ A̍hla̍ ɔdwɔ̄bi̍ yī ɔ̄chɛ ɔlɔjā, anu̍ ē pi ɔ̄chɛ ē de ɔ̍ ē ku̍, o̍bū nīi otu̍tū ē hɔ̄ de ɔ̄chɛ a̍nɛ.

¹⁵ A̍hla̍ ɔdwɔ̄bi̍ ɔla̍ā ge̍ de hrīpu̍ mɛ̍, o̍ ē ma lɛlā ɔdwɔ̄bi̍. Lɛlā ɔdwɔ̄bi̍ ge̍ de jɛ̄ ke̍ke̍ni̍ mɛ̍, o̍ ē hrīpu̍ ē ma rikū.

¹⁶ Ɔjɔ̄jā ge̍ e̍e gla̍ ala̍ ni̍, aɛ̍nɛ̍ yī u.

¹⁷ Ɔjā ɔkɔ̄kɔ̄ wa̍a̍ nīi - ɔnɛ̄ɛhɛhi ma̍ ba̍la ɔjā odōde wa̍a̍ nīi hwɔhi gɔ̄grāa ma̍ bū abɔ̍ɔ la ichō. O̍ ē bū la abɔ̄ yī Ɔwɔ nīi - A̍dā yī ɛbɛ ɔlɛgēdēgēdē yī ichō wa̍a̍ ma̍. Ɔwɔ i̍ ē pīya ē ta̍ ni̍ lachi̍lachi̍. O̍ i̍ ē pīya okwi̍ihi ta̍ alɔ ē ya̍ nīi alɔ ē gblāa la ɛbɛ odobū ni̍.

¹⁸ Lɔkɔ nīi anu̍ ɔlɔjā chikpo̍ ma̍ nīi o̍ de alɔ pīya ayi̍ yī nū bū la lɛlā olēchi̍ lēchi̍ yī nū nīi o̍ de ma̍ a̍nɛ. O̍ ya̍ i̍ngɔ̍ɔ hɛ̄ɛbɛ nīi alɔ ge̍ē re̍ka ɛmaga yī ɛjā wa̍a̍ nīi o̍ yɔ̍ɔ̄ya̍ ma̍.

Lɛlā opo̍ōpo̍ ba̍la lɛlā ɔyɔ̍ɔ̄ya̍

¹⁹ Aɛ̍nɛ̍ yī u lēchi̍ lēchi̍, ala̍ e̍e mwanyī yī lɛlā nūma̍ ni̍: Ala̍ ā hi̍kpi̍kpa̍ darɔ̄ku lɛlā. Ala̍ e̍e hli̍kpa̍ kɛlā la oko̍o ni̍. Ala̍ e̍e hli̍kpa̍ ya̍ ɔtū ngurangura ni̍.

²⁰ Ɔtū ngurangura yī ɔ̄chɛ̄ɛchɛ i̍ ya̍ u̍ku̍rɔ̍ yī lɛlā ɔlɛkpakpa nīi Ɔwɔ miya ma̍ ē mɛ ni̍.

²¹ Wu̍chē yī ɔla̍ā, ala̍ ā tu̍labɔ̄ hī a̍kpla yī lɛlā ɔha̍lɔha̍ wa̍a̍ ba̍la lɛlā abi̍ ɔyɔ̍ɔ̄ya̍ wa̍a̍. Ala̍ ā tu̍ hī iyī ala̍ de Ɔwɔ nīi ala̍ ge̍ nāa lɛlā nīi o̍ de tū ala̍ abɔ̍ɔ la ūkpɔ̄tū ma̍. Lɛlā yī nū ɔla̍ā ge̍ē hɛ̍ ala̍ ē ta̍ ē mɛ a̍nɛ.

²² Ala̍ ā darɔ̄ku lɛlā yī nū nīi ala̍ ge̍ ya̍ ɔjā nīi o̍ ka ma̍. Ala̍ ge̍ yɛ abɔ̍ɔ ē po̍ tū la arɔ̄ ji, o̍ re̍ka ala̍ yɛ ē gla̍ iyī ala̍.

²³ Ɔ̄chɛ nīi ge̍ yɛ ē plɛ̍ɛ̄lā ɔla̍ā i̍ngɔ̍ɔ ji nīi i̍ ge̍ ya̍ ɔjā nīi o̍ ka ma̍ ni̍, ɔlɔjā lɛ bāa ɔ̄chɛ nīi yɛ ē ma̍ iyī nū la inyɔ ma̍.

²⁴ O̍ ma̍ iyī nū yɛ̍yɛ̍ wa̍a̍ o̍bū nīi o̍ pīya, o̍ ē chī de mwanyī lɔkɔ nīi o̍ lɛ ma̍ ɔpɔ̄ɔpɛ̄.

²⁵ Ɔ̄chɛ nīi ge̍ chī gbeyīchi̍i̍ yɛ ē ma̍ lihɔ ɔhwɔhi hwɔhi gɔ̄grāa ɔla̍ā nīi ē de āchɛ ē hīya lɛfiyɛ ma̍ nīi ɔlɔjā ge̍ yɛ ē deyīku ɔ̍ kpɔ̍ɔ̍ bɛ̍ɛ? O̍ ge̍ re̍ka ɔlɔjā i̍ yɛ ē darɔ̄ku lɛlā i̍ngi̍ngɔ̍ɔ ji chōo̍chē de mwanyī ni̍; nīi o̍ ge̍ yɛ ē yɛ̍ɛ̄lā ɔ̍lɔma̍ ɔyɔ̍ɔ̄ya̍, Ɔwɔ ge̍ē de ɔpiyɛ ē kla̍ ɔjā nīi ɔ̄chɛ ɔlɔjā yɛ ē ya̍ ma̍.

²⁶ Ɔ̄chɛ ɔha̍ yɛ abɔ̍ɔ ē gbɛri̍ya̍ ka anɔ̍lɔ ē ya̍ ɔpɔ̄pū yī lɛlā yī Ɔwɔ? Ɔ̍lɔma̍ ɔlɔjā ge̍ ku̍ u̍blɛ̍ɛ̄nyī yī nū tū orī gɛ, nɛ̄ni̍ ɔpɔ̄pū yī lɛlā yī Ɔwɔ nīi ɔlɔjā ya̍ ma̍ - a̍ji nɛ. O̍ re̍ka ɔlɔjā yɛ ē gla̍ iyī anu̍ ɔlɔjā.

²⁷ Ɔpɔ̄pū yī lɛlā yī Ɔwɔ nīi Ɔwɔ A̍dā ɔlɔjā nāa ka ɔ̍lɔ lɛ chra̍da̍da̍ gba̍a lɛ kpakpa ma̍ hɔ̄ ma̍ i̍ngɛ̍ɛ̄nɛ̄ a̍nɛ: Wɔbɔ̄ otū ayo̍ōkū ba̍la anyōkū nīi yɛ ē mi̍chi̍ ma̍, ba̍la ode iyī ɔ̄chɛ la cha̍ri̍cha̍ri̍ hī lɛlā abi̍ amu la yɛchɛ nūma̍ nɛ.