U̍ku̍rɔ̍ yī Alɛrɔ̄ 21 - Ye̳ka Onīpīpē̳ Yī O̳wo̳

Ipɔ̍ɔli ga Ijɛru̍sālɛm

¹ Alɔ ta̍ wā ɔhɔ̄lɛhi ma̍, alɔ pīya bɛ̍ɛ̄nɛ̄. Alɔ hɛ̍ yenyi ārɛ̄ kpakpakpa ga ipwo̍gra Iko̍osi. Ɔ̄chī ɔmɛpa, alɔ gbajɛ ga ajɛ yī Iro̍odi nīi li̍hu ta̍kakatū ɔ̄ ma̍. Alɔ pīya abɔ̍ɔ ga ipwo̍gra yī Ipa̍tāra.

² Alɔ ma̍ wɔwu̍ ɔha̍ nīi yɛ gāa ɔcha yī Ifoni̍siya ma̍, alɔ tū wɔwu̍ ɔla̍ā pīya bɛ̍ɛ̄nɛ̄.

³ Alɔ wā ge̍ gbajɛ la ɛbɛ nīi ɔ̄chɛ ē ma̍ ɔcha yī Isa̍yi̍prɔ̄ɔsi nīi li̍hu ta̍kakatū ɔ̄ ma̍, alɔ ga la wāā yī ihi̍yajɛ yī nū ga Isi̍riya. Wɔwu̍ yī alɔ ku̍ lɛga la Ita̍ya. E̍ chikpo̍ ge̍ē kpo̍ iho̍ yī nū wu̍ abɔ̍ɔ.

⁴ Alɔ gāla̍ āchɛ yī Iji̍sɔ̄ɔsi, hɔ̄ tāa aa̍ ɔ̄chī arāapa abɔ̍ɔ. Bū la wɔhu̍ yī Uhu yī Ɔwɔ, e̍ ta̍ Ipɔ̍ɔli ɔna ka ɔ̍lɔ ge̍ e̍e ga Ijɛru̍sālɛm ni̍.

⁵ Ɔ̄chī arāapa ɔla̍ā wā ge̍ ga ma̍, alɔ pīya. Āchɛ ɛla̍ā wa̍a̍ tūla anyā yī wā ba̍la ayi̍ yī wā bī alɔ ɔtū ngmɛ̍ɛchɛ hī ipwo̍gra yī wā. Alɔ wa̍a̍ de ūnōowu tū ajɛ abɔ̍ɔ la wɔjɛ yī oko̍o yī li̍hu ɔla̍ā, jɔhā de Ɔwɔ.

⁶ Alɔ ta̍ ɔ̍nyīnū ɔhɔ̄lɛhi bɛ̍ɛ̄nɛ̄ ma̍, alɔ wā ge̍ pīya ga wɔwu̍; aa̍ ku̍chē pīya yī wɔlɛ̍.

⁷ Alɔ hu wɔwu̍ bū abɔ̍ɔ la Ita̍ya ga ipwo̍gra yī Itole̍māyisi. Alɔ gāa ge̍ da āchɛ yī Iji̍sɔ̄ɔsi o̍be, de chā tāa aa̍ ɔ̄chī ūkpo̍he.

⁸ Ɔ̄chī ɔmɛpa yī nū, alɔ pīya ga Isi̍sari̍ya. Alɔ nyā bū wɔlɛ̍ yī ɔ̄chɛ ɔkwɔ̄kā yī Iji̍sɔ̄ɔsi nīi re̍ka Ifi̍līipu ma̍ ge̍ hɔ̄ tāa anu̍. O̍ tū abɔ̍ɔ lipu̍ yī ɛgabɔ̄ āchɛ arāapa nīi e̍ hu īchāha̍ la Ijɛru̍sālɛm ma̍.

⁹ Ayi̍ yī nū anānyā lɛ āchɛ ɛnɛ gblāa abɔ̍ɔ i̍ blɛ̍ba̍ ni̍. E̍ ē ka ɛrɔ̄ yī Ɔwɔ de āchɛ.

¹⁰ Alɔ hɔ̄ abɔ̍ɔ ɔ̄chī ɛmɛ̍ɛmla̍a ma̍, ɔ̄chɛ ɔka ɛrɔ̄ yī Ɔwɔ ɔha̍ wā bū la Ijudi̍ya. O̍ re̍ka A̍gābusi.

¹¹ O̍ wā dikpo̍ba̍ alɔ ge̍ ko̍o̍ la ɔjā okwo̍owu yī Ipɔ̍ɔli, de mi̍ya tū iyī nū la ikpo̍ ɛpɛpa ba̍la abɔ̄, ka bɛ̍ɛ̄nɛ̄ hīka, “Uhu Ɔnɛ̄ɛhɛhi yī Ɔwɔ ka hīka i̍ngɛ̍ɛ̄nɛ̄ nīi Iju̍u ɛ̍lɛ ge̍ē ya̍ tāa ɔ̄chɛ nīi - ɔ̍lɔ lɛ ɔjā nūma̍ ma̍ abɔ̍ɔ la Ijɛru̍sālɛm a̍nɛ. Ɛ̍lɛ ge̍ē wa̍ābɔ̄ la ɔ̍lɔ de Ɛchɛkɔcha.”

¹² Alɔ plɛ̍ɛ̄lā nūma̍ ma̍, alɔ ba̍la āchɛ nīi gblāa abɔ̍ɔ wa̍a̍ ma̍ ra̍ābɔ̄ de Ipɔ̍ɔli kpɛ̍ɛji hīka o̍ ge̍ e̍e ga Ijɛru̍sālɛm ni̍.

¹³ Ipɔ̍ɔli hīyɔkɔ bɛ̍ɛ̄nɛ̄ hīka, “Oji̍ nīi ala̍ yɛ ma̍ ē drɛ̄ɛgba i̍ngɔ̍ɔ ē ti̍ya ami ūkpɔ̄tū tū ma̍/? Ami ma̍, n tībi̍īyē i̍ngɔ̍ɔ mɛ̍. O̍ i̍ ge̍ u̍tu ba̍ la orōrī owā um ɔwɔ̄wā ni̍. E̍ ge̍ de u ngmo̍ abɔ̍ɔ la Ijɛru̍sālɛm wu̍chē yī riyī yī Ādā Iji̍sɔ̄ɔsi gɛ!”

¹⁴ Oko̍o yī alɔ i̍ che la anu̍ gɛ ni̍ ma̍, alɔ pi̍ye̍mā cho̍cho̍. Alɔ ka hīka, “O̍ ge̍ lɛ lɔkɔ nīi Ādā chikpo̍ ma̍ gɛ!”

¹⁵ Alɔ hɔ̄ abɔ̍ɔ pi̍nyɛ̍ ma̍, alɔ kpo̍ āɛ̄jā yī alɔ wā ge̍ pīya yī Ijɛru̍sālɛm.

¹⁶ A̍chi̍kpo̍ yī Iji̍sɔ̄ɔsi ɛha̍ abɔ̍ɔ la Isi̍sari̍ya wā ba̍la alɔ. E̍ bī alɔ ga wɔlɛ̍ yī ɔ̄chɛ nīi alɔ ge̍ē tū ɔ̄ wɔga ma̍. O̍ re̍ka Ine̍sin. Anu̍ - ɔ̄chɛ yī Iji̍sɔ̄ɔsi gbi̍chɛ gbi̍chɛ nɛ. O̍ bū la Isa̍yi̍prɔ̄ɔsi.

Ipɔ̍ɔli gāa ge̍ ma̍ Ije̍mēehi

¹⁷ Alɔ gbajɛ ga Ijɛru̍sālɛm ma̍, āchɛ yī Iji̍sɔ̄ɔsi wā ge̍ de alɔ o̍be la ɔwɔ̄wīyā.

¹⁸ Ɔ̄chī ɔ̍mɛpa, Ipɔ̍ɔli pīya la alɔ ga ɛbɛ yī Ije̍mēehi gāa ge̍ ma̍ ɔ̄. Ɛgabɔ̄ yī ogrēeyī yī āchɛ yī Ɔwɔ wa̍a̍ gblāa abɔ̍ɔ.

¹⁹ Ipɔ̍ɔli da wa̍ o̍be. O̍ koko̍o yī lɛlā wa̍a̍ nīi Ɔwɔ ya̍ gala abɔ̄ yī nū abɔ̍ɔ lipu̍ yī Ɛchɛkɔcha ma̍ de wa̍.

²⁰ Aa̍ wa̍a̍ po̍ ma̍, e̍ kā Ɔwɔ ɔkɔ̄kā kpɛ̍ɛji. E̍ wā ge̍ de Ipɔ̍ɔli bɛ̍ɛ̄nɛ̄ hīka, “Ɔɔ̍nɛ̍ yī alɔ, a jo̍ōkū hīka Iju̍u yɛ̄mɛ̄mɛ̄ de pīya āchɛ yī Iji̍sɔ̄ɔsi mɛ̍. E̍ chī yɛ amu ē gbō Lihɔ yī Imo̍sīisi hwɔhi hwɔhi kpɔ̍ɔ̍ we̍.

²¹ E̍ po̍ hīka aɔ̍lɔ yɛ abɔ̍ɔ ē ngū Iju̍u wa̍a̍ nīi gblāa la ɔcha ma̍ hīka ɛ̍lɛ ge̍ tu̍ hī Lihɔ yī Imo̍sīisi. Aɔ̍lɔ ka ɛ̍lɛ ge̍ e̍e ta̍ ayi̍ yī ɛ̍lɛ wɔwu̍ gɛ ni̍; ɛ̍lɛ ge̍ e̍e yɛ̍ɛ̄lā yī ɔchɔ̍ɔwɔ yī Iju̍u gɛ ni̍.

²² Alɔ jo̍ōkū hīka e̍ i̍ ge̍ē wīyā ē tū la opo̍ hīka aɔ̍lɔ wā amu mɛ̍ ni̍. Alɔ ge̍ē ya̍ kana̍ ma̍?

²³ Chu̍chu̍u, ya̍ lɔkɔ nīi alɔ ge̍ē ka ē de wɔ ma̍. Āchɛ ɛha̍ choko̍o yī lɛlā lēchi̍ lēchi̍, gbyɛka gblāa amu āchɛ ɛnɛ.

²⁴ Gāa ge̍ tū ba̍la aa̍ nīi āā gwā lɛbi̍ ba̍la aa̍ lɔkɔ nīi Lihɔ yī Imo̍sīisi ka āchɛ ɛ̍lɛ ge̍ ya̍ ma̍. De okpo nīi ē ge̍ē bī yɛ̍ɛ̄lā ɔla̍ā wa̍a̍ ma̍ de wa̍, nīi e̍ ge̍ de lɛhu̍ yī wā pra̍a i̍ngi̍ngɔ̍ɔ. Bū la ɛbɛ ɔla̍ā, āchɛ wa̍a̍ ge̍ē jo̍ōkū hīka lɛlā nīi ɛ̍lɛ ka ku̍ aɔ̍lɔ wa̍a̍ ma̍ ɔ̍lɔ - arīmɛ̄ nɛ. E̍ ge̍ē jo̍ōkū hīka aɔ̍lɔ ē yɛ̍ɛ̄lā lɔkɔ nīi Lihɔ yī Imo̍sīisi ɔ̍lɔ chikpo̍ ke̍e̍ ma̍.

²⁵ Iyī Ɛchɛkɔcha nīi de pīya āchɛ yī Ikra̍yisi ma̍, alɔ ta̍ īpū tɛ̄rɔ̄ hu wā mɛ̍. Alɔ ka de wa̍ hīka e̍ ge̍ e̍e re̍ ojōre̍ nīi āchɛ de pā ɛchi̍yɛka ma̍ ni̍. E̍ ge̍ e̍e re̍ yeyī ni̍. E̍ ge̍ e̍e re̍ ɛbɛ̍ nīi e̍ ngmo̍ ji i̍ hɛ̍ ɔ̄ yeyī hunū ni̍ ma̍ ni̍. E̍ ge̍ e̍e la anyā bɛ̍bɛ̍ kɛ̄ɛ ya̍chi yī lɛlā ni̍.”

²⁶ Ɔ̄chī ɔmɛpa, Ipɔ̍ɔli wā ge̍ pīya ba̍la āchɛ ɛla̍ā bɛ̍ɛ̄nɛ̄, gāa ge̍ gwā lɛbi̍ lɔkɔ nīi Lihɔ yī Imo̍sīisi chabɔ̄ ma̍, o̍bū nīi Ipɔ̍ɔli wā ge̍ pīya ga u̍nu̍ yī Ɔwɔ. O̍ gāa ge̍ē koko̍o yī ɔ̄chī nīi lɛbi̍ ɔgwɔ̄gwā yī wā ge̍ chlɛhu̍ ma̍, ba̍la ɔ̄chī nīi e̍ ge̍ē ya̍ ɔpɔ̄pā wu̍chē yī ɔnyɔnyɛ ma̍.

E̍ de Ipɔ̍ɔli ku̍ abɔ̍ɔ la U̍nu̍ yī Ɔwɔ

²⁷ Ɔ̄chī arāapa ɔ̍lɔma̍ hōhī pi̍nyɛ̍ nīi o̍ ge̍ē kwɛ̍ɛjī ma̍, Iju̍u ɛha̍ nīi bū la ajɛ yī E̍siya ma̍ ma̍ Ipɔ̍ɔli abɔ̍ɔ la u̍nu̍ yī Ɔwɔ. E̍ ta̍tu̍tu̍ yī lɛlā, de āchɛ ti̍yatū. E̍ de Ipɔ̍ɔli kū abɔ̍ɔ ɔpɔ̄ɔpɛ̄.

²⁸ E̍ to̍ohwe̍e hīka, “Aya̍ali̍sɛ̄rɛli cha̍cha̍cha̍, ala̍ tu̍ wā gɛ oo! Ala̍ chu̍chu̍u gɛ! Ɔ̄chɛ nīi ē gāa bɛ̍bɛ̍, ē ngū āchɛ lɛlā abi̍ pīyeyīta̍ Ali̍sɛ̄rɛli ma̍ hɔ̄ ma̍ mɛ̍. Anu̍ ka ɔ̄chɔ̄chɛ ɔ̍lɔ ge̍ e̍e ya̍ otūlichō yī Lihɔ yī Imo̍sīisi ba̍la u̍nu̍ yī Ɔwɔ nūma̍ ni̍ a̍nɛ. Ɔdwɔ̄bi̍ yī nū wa̍a̍ ma̍, o̍ gba̍a bī Ɛchɛkɔcha ɛha̍ chɛ̄ wā amu la u̍nu̍ yī Ɔwɔ mɛ̍. O̍ de ɛbɛ ɔnɛ̄ɛhɛhi nūma̍ bīya i̍ngɔ̍ɔ ke̍e̍ mɛ̍.”

²⁹ Ɔjā nīi hu̍ nīi e̍ ka i̍ngɔ̍ɔ ma̍, e̍ ma̍ Itrofi̍mūsi nīi - Ɔlɛ̍fɛ̄susi ma̍ ba̍la Ipɔ̍ɔli abɔ̍ɔ la ipwɔ̍ɔ̄lɛ̍ ma̍, e̍ je̍ka Ipɔ̍ɔli ɔ̍lɔ bī ɔ̍lɔ wā abɔ̍ɔ lipu̍ yī u̍nu̍ yī Ɔwɔ.

³⁰ Ɛbɛ de ti̍yatū la Ijɛru̍sālɛm wa̍a̍ ɔpɔ̄ɔpɛ̄. Āchɛ chē gbūdūū wā abɔ̍ɔ. E̍ kpakri la Ipɔ̍ɔli ɔpɔ̄ɔpɛ̄ pi ɔ̍ kpēlēkpēlē bīyɛchɛ hī u̍nu̍ yī Ɔwɔ, de ɔpu yī u̍nu̍ yī Ɔwɔ kpo̍ gū cha̍cha̍.

³¹ Ongmo̍ōngmo̍ nīi āchɛ ɛla̍ā yɛ ē aa̍ ge̍ē de Ipɔ̍ɔli ngmo̍ bɛ̍ɛ̄nɛ̄ a̍nɛ. Ɛrɔ̄ gbajɛ ga ɛbɛ yī a̍dā icho̍ojiya ɔpɔ̄ɔpɛ̄ ka Ijɛru̍sālɛm wa̍a̍ ɔ̍lɔ de ti̍yatū rɛ abɔ̍ɔ mɛ̍.

³² Ɔpɔ̄ɔpɛ̄, o̍ bī alɛhu̍ yī icho̍ojiya ba̍la āchɛ ɛkplɛ̍wu̍ pīya ga abɔ̍ɔ. Āchɛ ɛla̍ā ma̍ a̍dā icho̍ojiya ɔla̍ā ba̍la āchɛ ɛkplɛ̍wu̍ yī nū ma̍, e̍ pi̍ye̍mā hī lijē ogwō Ipɔ̍ɔli ogwōgwō.

³³ A̍dā icho̍ojiya ɔla̍ā gāa dikpo̍ba̍ Ipɔ̍ɔli ge̍ de ɔ̍ ku̍. O̍ ka de āchɛ ɛkplɛ̍wu̍ yī nū ka ɛ̍lɛ ge̍ de agba̍ ɛpa tū Ipɔ̍ɔli. O̍ che āchɛ ɛla̍ā ikpo̍ hīka ɔngrɔ̄ɔ ɔla̍ā ɔ̍lɔ - ɔ̄nyɛ nɛ? Ɔ̍lɔ chī ya̍ kana̍?

³⁴ Āchɛ ɛha̍ abɔ̍ɔ lipu̍ yī ɔgbādu ɔla̍ā ya̍ ojiya nīi a̍dā icho̍ojiya i̍ je̍ ochi̍chi̍ yī ɔjɔ̄jā mɛ ni̍. O̍ ka de āchɛ ɛkplɛ̍wu̍ yī nū ka ɛ̍lɛ ge̍ de Ipɔ̍ɔli bī pīya ga u̍nu̍ yī āchɛ ɛkplɛ̍wu̍ ɔha̍ nīi e̍ ē gbō ɔ̄ ogbōgbō ma̍.

³⁵ E̍ bī Ipɔ̍ɔli wa̍a̍ ge̍ gbajɛ la ɛbɛ nīi e̍ ē tū ichō ge̍ u̍nu̍ ɔla̍ā ma̍, icho̍ojiya ɛha̍ nāa Ipɔ̍ɔli hwa̍a̍ bī ga ichō. Wu̍chē oji̍ nɛ, ɔtū ngurangura yī āchɛ ɛla̍ā de yu̍uhuhwi mɛ̍ - ohu̍ nīi e̍ hu ɔ̍ hwa̍a̍ a̍nɛ.

³⁶ E̍ chē gbūdūū ku Ipɔ̍ɔli la u̍tu, ti̍ira̍gba̍ ka aɛ̍lɛ ge̍ de ɔ̍lɔ ngmo̍! Aɛ̍lɛ ge̍ ngmo̍ ɔ̍lɔ!

Ipɔ̍ɔli koko̍o yī lɛlā yī nū

³⁷ E̍ yɛ ge̍ē bī Ipɔ̍ɔli ē chɛ̄ u̍nu̍ ɔla̍ā ma̍, o̍ ka de a̍dā icho̍ojiya ɔla̍ā ka anɔ̍lɔ chikpo̍ ge̍ē kɛlā de ɔ̍lɔ. A̍dā icho̍ojiya ɔla̍ā chikpo̍ bɛ̍ɛ̄nɛ̄ hīka, “Hɔ̍ɔ! Re̍ka a ē ka Igri̍iki ē mɛ?

³⁸ N je̍ka awɔ - Oli̍jīipu ɔha̍ nīi ta̍tu̍tu̍ yī lɛlā ogbōgbo i̍krɔ̍ɔ ma̍ nɛ ko̍ō! Ɔ̄chɛ ɔ̍lɔma̍ kpo̍ āchɛ u̍nɔ igwo̍ chɔbū yɛ ge̍ē kplɛ̍wu̍ tāa igɔ̍mɛ̄ɛti. O̍ bī āchɛ ɔ̍lɔma̍ ga abɔ̍ɔ ga lipu̍ a̍chi̍ chukuru.”

³⁹ Ipɔ̍ɔli hīya anu̍ ɔkɔ hīka, “Ami ma̍ - Iju̍u nɛ. E̍ ma u la Ita̍susi la ajɛ yī Isili̍siya. Ami - oyo̍olipwo̍gra ɔlamu ɔlamu gba̍a nɛ. Chu̍chu̍u, de yɛ̄grāa de u nīi n ā kɛlā de āchɛ nūma̍!”

⁴⁰ Ɔngrɔ̄ɔ ɔla̍ā de wɔhu̍ de Ipɔ̍ɔli ka ɔ̍lɔ ge̍ kɛlā tāa ɛ̍lɛ gɛ. Ipɔ̍ɔli tu̍ che ga oko̍prīinu ɔla̍ā yɛ̍yɛ̍ bɛ̍ɛ̄nɛ̄ ma̍, o̍ kɛlā de wa̍ la oko̍o yī Ihi̍bru bɛ̍ɛ̄nɛ̄.