11 ALITƐSALONA̍YĪKA 3 - Ye̳ka Onīpīpē̳ Yī O̳wo̳

Ala̍ ā jɔhā de alɔ

¹ La ɔchlɛhu̍ yī lɛlā wa̍a̍, aɛ̍nɛ̍ yī u, ala̍ ā jɔhā de alɔ. Ala̍ ā ya̍ i̍ngɔ̍ɔ hɛ̄ɛbɛ nīi ɛrɔ̄ yī Ādā ge̍ ngrāa pa̍pa̍pa̍ ga iyɔ̄bū iyɔ̄bū nīi o̍ ge̍ lɛ ɔkɔ̄kā i̍ngi̍ngɔ̍ɔ lɔkɔ nīi o̍ lɛ la owu̍tu la olo̍ōlo̍ yī ala̍ ma̍.

² Ala̍ ā gba̍a jɔhā i̍ngi̍ngɔ̍ɔ hɛ̄ɛbɛ nīi Ɔwɔ ge̍ de alɔ wu̍ ngmɛ̍ɛchɛ hī alwɔbi̍ lɛlā ba̍la āchɛ ɔdwɔ̄bi̍ wa̍a̍. Wu̍chē oji̍ nɛ, i̍ āchɛ wa̍a̍ chɛ̄ku ɛrɔ̄ yī Ɔwɔ a̍ni̍.

³ Ādā ɔlɔjā ma̍, ɔ̄chɛ nīi e̍ ē de ɔtū che ɔ̍ nɛ. O̍ ge̍ē ya̍ nīi ala̍ ē hwɔhi hwɔhi ē hī anu̍ Ɔdwɔ̄bi̍ ɔla̍ā.

⁴ Ādā ɔlɔjā ya̍ nīi alɔ de ɔtū che ala̍ hwɔhi hwɔhi hīka ala̍ yɛ abɔ̍ɔ ē ya̍ ɔjā nīi alɔ ka de ala̍ ma̍. Ala̍ chī ge̍ē ya̍ i̍ngɔ̍ɔ ē gāa iyɔ̄bū iyɔ̄bū nīi alɔ jo̍ōkū.

⁵ Ādā ge̍ bī ūkpɔ̄tū yī ala̍ ɔtū lɛbɛ nīi ala̍ ge̍ ywɔ̍ɔnyɛ yī Ɔwɔ. O̍ ge̍ bī ala̍ ga ɔmlɔtū hɔ̄ kpɔ̍ɔ̍ nīi Ikra̍yisi ē de ma̍.

Ɔjā nīi ala̍ ge̍ē ya̍ pi̍i̍ ma̍

⁶ Aɛ̍nɛ̍ yī u, bū la riyī yī Ādā Iji̍sɔ̄ɔsi Ikra̍yisi nīi alɔ yɛ ma̍ ge̍ē ka ē de ala̍ a̍nɛ: Ala̍ ā gwō gbo̍o̍ hī aɛ̍nɛ̍ yī alɔ ɛha̍ ɛla̍ā nīi gblāa la ɔhɔ̄leyī yī ɔdwɔbɔ̄ ma̍. Aa̍ ɛla̍ā nīi i̍ ē gala ɔgɔgu yī lɛlā nīi alɔ ngū wā ni̍ ma̍ nɛ.

⁷ Je̍ka aa̍ ala̍ ɛlɛjā jo̍ōkū hwɔhi hwɔhi hīka o̍ ngma̍ nīi ala̍ ē ya̍ ɔhɔ̄leyī lɔkɔ nīi alɔ ē ya̍ ma̍! Alɔ i̍ dwɔbɔ̄ yɛ̄grāa nīi alɔ hɔ̄ abɔ̍ɔ ba̍la ala̍ ma̍ ni̍.

⁸ Alɔ i̍ nāa wɔbɔ̄ otōtū ɔha̍lɔha̍ la abɔ̄ yī ala̍ ji ni̍, ɔ̍chi̍kpa̍kpa̍ onīi alɔ kla̍ ure̍ o̍bū ma̍. Ɔkɔkɔ ɔla̍ā, alɔ ē ya̍ u̍ku̍rɔ̍ i̍ngɔ̍ɔ gba̍a̍ ē nyiya gba̍a̍. Alɔ ē ya̍ u̍ku̍rɔ̍ la yɛnɔ la otu̍ hɛ̄ɛbɛ nīi alɔ i̍ ge̍ē hɔ̄ ji nīi ɔ̄chɔ̄chɛ ē bī alɔ ni̍.

⁹ I̍ owu̍chē hīka o̍ ngma̍ nīi alɔ ē nāa wɔbɔ̄ otōtū la abɔ̄ yī ala̍ ni̍ - ohu̍ nīi alɔ ē ya̍ i̍ngɔ̍ɔ a̍ni̍. Alɔ ya̍ i̍ngɔ̍ɔ hɛ̄ɛbɛ nīi ala̍ ge̍ē ma̍ bī gbla alɔ.

¹⁰ Olo̍ nīi alɔ hɔ̄ abɔ̍ɔ ba̍la ala̍ ma̍, alɔ ē ka ē de ala̍ hīka, “Ɔ̄chɛ nīi i̍ ē chikpo̍ ge̍ē ya̍ u̍ku̍rɔ̍ ni̍ ma̍, ɔlɔjā i̍ ngma̍ la ore̍ ojōre̍ ni̍.”

¹¹ Alɔ ka i̍ngɔ̍ɔ wu̍chē oji̍ nɛ, alɔ po̍ hīka āchɛ ɛha̍ ɛ̍lɛ hɔ̄ abɔ̍ɔ lipu̍ yī ala̍ nīi - ɛ̍lɛ dwɔbɔ̄ kpɛ̍ɛji. Ɛlɛjā ɛ̍lɛ i̍ ē ya̍ ɔjɔ̄jā wɔ̄bɔ̄bɔ̄ yī ɛ̍lɛ ni̍, chōo̍chē chikpo̍ yī ode u̍ku̍rɔ̍ yī āchɛ ti̍yatū.

¹² Alɔ ge̍ē koko̍o ē de āchɛ nūma̍ bū la riyī yī Ādā Iji̍sɔ̄ɔsi Ikra̍yisi gba̍a ē ta̍ wā ɔna: E̍ ge̍ ya̍ ɔhɔ̄leyī nīi lɛ kpakpa ma̍. E̍ ge̍ ya̍ u̍ku̍rɔ̍ lɛ ɔjā bī bī iyī wā.

¹³ Aɛ̍nɛ̍ yī u! Lɛlā ɔnɛ̄ɛhɛhi ɔyɔ̍ɔ̄ya̍ ge̍ e̍e de jɛ̄ ala̍ ni̍.

¹⁴ Ɔha̍ni̍ ɔ̄chɛ ɔha̍ ē hɔ̄ abɔ̍ɔ nīi i̍ chikpo̍ ge̍ ya̍ lɔkɔ nīi alɔ ka tū la īpū tɛ̄rɔ̄ hu ala̍ ma̍ ni̍ oo! O̍ ge̍ lɛ i̍ngɔ̍ɔ, ɔ̍lɔma̍ ala̍ ā du̍mɔ̍-du̍mɔ̍ ba̍la ɔ̄chɛ oli̍ngɔ̍ɔ ɔla̍ā. Ala̍ e̍e tābɔ̄ yī lɛlā ɔyɔ̍ɔ̄ya̍ ba̍la anu̍ ni̍, hɛ̄ɛbɛ nīi liwēyī ge̍ ya̍ ɔ̄.

¹⁵ Ala̍ e̍e chī yɛ̍ɛ̄lā tāa anu̍ bāa oluji ma̍ ni̍. Ala̍ ā ta̍ ɔ̄ ɔna yī lɛlā ji bāa ɔɔ̍nɛ̍ yī ala̍ ma̍.

Ɔchlɛhu̍ yī lɛlā

¹⁶ Ādā ɔlɔjā nīi ɔhɔ̄leyī yī alɔ bū la abɔ̄ yī nū ma̍ ge̍ de ogbodɔ̍dɔ̍ la olo̍ ɔha̍lɔha̍ ba̍la ɔpɔ̄pū ɔha̍lɔha̍ wa̍a̍ de ala̍. Ādā ge̍ hɔ̄ ba̍la ala̍ wa̍a̍!

¹⁷ Ɛbɛ nūma̍ ma̍, n ge̍ē ta̍ īpū la abɔ̄ yī u: AMI IPƆ̍ƆLI NƐ, N DA ALA̍ O̍BE WA̍A̍. I̍ngɛ̍ɛ̄nɛ̄ nīi n ē ta̍ riyī yī u la īpū yī u ɔha̍lɔha̍ wa̍a̍ a̍nɛ. I̍ngɔ̍ɔ nīi n ē ta̍ ɔjā a̍nɛ.

¹⁸ Ɔpiyɛ yī Ādā Iji̍sɔ̄ɔsi Ikra̍yisi ge̍ hɔ̄ ba̍la ala̍ wa̍a̍.