1 Alikɔ̍rīnti 9 - Ye̳ka Onīpīpē̳ Yī O̳wo̳

Wɔhu̍ ba̍la u̍ku̍rɔ̍ yī ɔlɛrɔ̄ yī Ikra̍yisi

¹ Ami hɔ̄ lɛfiyɛ yī ɔ̄chɛ ɔha̍? Je̍ka aa̍ ami - ɔlɛrɔ̄ yī Ādā nɛ. N i̍ ma̍ Iji̍sɔ̄ɔsi, Ādādā yī alɔ je̍ ni̍ kɛ̄ɛ? Je̍ka aa̍ ala̍ - āchɛ nīi n lɛ bū la u̍ku̍rɔ̍ yī u nīi n ya̍ de Ādā ma̍ a̍nɛ?

² Āchɛ ehēhī i̍ ge̍ chɔ̄chɛ̄ hīka amɔ̍lɔ ɔlɛrɔ̄ yī Ādā ni̍, n jo̍ōkū hīka ala̍ ma̍ ge̍ē chɛ̄. Ala̍ ɛlɛjā re̍ka ochi̍chi̍ yī lɛlā nīi de u chabɔ̄ hīka amɔ̍lɔ - ɔlɛrɔ̄ yī Ādā ma̍ a̍nɛ, bū la ɔhɔ̄leyī yī ala̍ nīi ala̍ lɛ la Ādā Ikra̍yisi ma̍.

³ Yɛ̄grāa nīi āchɛ ge̍ yɛ ē ya̍ u la oko̍o ma̍, i̍ngɛ̍ɛ̄nɛ̄ nīi n ē ka ē de wa̍ a̍nɛ:

⁴ N i̍ ngma̍ lɛbɛ nīi āchɛ ē de ojōre̍ ba̍la ɔjā ɔgwɔ̍ɔ̄gwa̍ ē de u wu̍chē yī abɔ̄ u̍ku̍rɔ̍ yī u ni̍?

⁵ N i̍ ngma̍ la ɔya̍ lɔkɔ nīi alɛrɔ̄ yī Ādā āchɛ ehēhī yɛ ē ya̍ ma̍ ni̍? N i̍ ngma̍ la ɔwɔ̍ɔ̄nyā nīi - Ɔ̄chɛ yī Ikra̍yisi ma̍ hɛ̄ɛbɛ nīi o̍ ku u ga ɛyɛ, bɔ̄ɔkɔ nīi aɛ̍nɛ̍ anāngrɔ̄ɔ yī Ādā Iji̍sɔ̄ɔsi tū la Ipi̍ta ya̍ ma̍ ni̍?

⁶ Kɛ̄ɛ ami ba̍la Iba̍nābasi lōra̍alɔ ngma̍ la ɔya̍ u̍ku̍rɔ̍ yī ɔhɔ̄leyī yī alɔ ɛlɛjā ma̍?

⁷ Icho̍ojiya ɔha̍ hɔ̄ abɔ̍ɔ nīi ē chōo̍chē de okpo yī lɛhu̍ yī anu̍ ɔlɔjā de iyī nū? Kɛ̄ɛ ɔhi̍yɛ̄rɔ̄ ɔna̍ hɔ̄ abɔ̍ɔ nīi i̍ ē re̍ īkpɔ̄ɔ̄chi̍ yī yɛrɔ̄ yī anu̍ ɔlɔjā ni̍ ma̍? Kɛ̄ɛ ɔ̄chɛ ɔgbyɛ̄wū ɔna̍ hɔ̄ abɔ̍ɔ nīi i̍ ē gwa̍ amɛ̄ yī yɛwū nīi anu̍ ɔlɔjā po̍ōpi̍ tū la ɔjā ma̍ ni̍ ma̍?

⁸ N i̍ ge̍ē bli̍kpo̍ yī ɔchabɔ̄ yī ita yī lɛlā oli̍ngɛ̍ɛ̄nɛ̄ kpɛɛ ni̍; wu̍chē oji̍ nɛ, Lihɔ yī Imo̍sīisi titi ka i̍ngi̍ngɔ̍ɔ.

⁹ E̍ ta̍ tū la īpū yī Lihɔ yī Imo̍sīisi hīka, “A ā de ɔjā wā yɛna la oko̍o yɛ̄grāa nīi a bī ɔ̄ yɛ ē ya̍ nīi o̍ yɛ ē ru̍ igu ē de wɔ ma̍ ni̍.” O̍ re̍ka lɛlā yī yɛna tū Ɔwɔ la ɔtū a̍nɛ?

¹⁰ Je̍ka aa̍ alɔ nīi o̍ gbɛri̍ya̍ ku̍ alɔ ohu̍ nīi o̍ ka i̍ngɔ̍ɔ a̍nɛ? Lēchi̍, alɔ nīi e̍ ta̍ lɛlā nūma̍ tū de alɔ a̍nɛ. Wu̍chē oji̍ nɛ, ɔ̄chɛ nīi gɔ̄ iwu̍ ma̍, ba̍la ɔ̄chɛ nīi chi̍kri̍wu̍ ma̍ ya̍ u̍ku̍rɔ̍ ɔla̍ā deyīche ge̍ē re̍ ɔjāyɛ̄rɔ̄ ɔla̍ā.

¹¹ Alɔ ge̍ re̍ ɛpiyabuna yī āɛ̄jā ɔlamu bū la abɔ̄ yī ala̍ ma̍, re̍ka o̍ de yɔ̍ɔ̄kɔ̄kū?

¹² Āchɛ ehēhī ge̍ ngma̍ la odeyīche ɛjā eli̍ngɔ̍ɔ, o̍ i̍ ngma̍ nīi iyī alɔ ē gɔ̄ga ni̍? Alɔ ma̍, alɔ i̍ bī wɔhu̍ yī oli̍ngɔ̍ɔ ya̍ lɛlɛ̄lā ni̍. Ɔkɔkɔ ɔla̍ā, alɔ mlɔtū kpɔ̍ɔ̍ pi̍ye̍mā, hɛ̄ɛbɛ nīi ɔjɔ̄jā ge̍ e̍e re̍ka ɛkwɔ ogū ɔpɔ̄pū yī Wɔ̄kā Ɔlwɔnyɛ yī Ikra̍yisi ni̍.

¹³ Je̍ka aa̍ ala̍ jo̍ōkū hīka āchɛ nīi ē ya̍ u̍ku̍rɔ̍ abɔ̍ɔ la u̍nu̍ yī Ɔwɔ ma̍ ē nāa ojōre̍ yī wā bū abɔ̍ɔ la u̍nu̍ yī Ɔwɔ. Āchɛ nīi ē de ɛjā pā Ɔwɔ abɔ̍ɔ la ɛbɛ ɔpā Ɔwɔ ma̍ chī ē re̍ ɔjā nīi e̍ de pā Ɔwɔ ma̍.

¹⁴ Gala ɔgɔgu yī ɔla̍ā, Ādā ɔlɔjā de ka mɛ̍ hīka, āchɛ nīi - ɛ̍lɛ ē kā Wɔ̄kā Ɔlwɔnyɛ yī Ikra̍yisi ē de āchɛ ma̍, ɛ̍lɛ ge̍ nāa ɛjā yī ɔhɔ̄leyī yī ɛ̍lɛ bū la ɔ̍lɔ.

¹⁵ Ami ma̍, n i̍ bī wɔhu̍ oli̍ngɛ̍ɛ̄nɛ̄ nūma̍ ya̍ lɛlɛ̄lā je̍ ni̍. N i̍ chī yɛ ē ta̍ īpū nūma̍ hɛ̄ɛbɛ ge̍ē nāa wɔhu̍ ita nūma̍ wa̍a̍ ē de iyī u ni̍. Ɔkɔkɔ ɔla̍ā, n ā pīyaku̍. Ɔ̄chɔ̄chɛ i̍ ge̍ē de lɛlā nūma̍ nīi n yɛ ē bī gbogū la ɔkpakpa ma̍ ē pīya a̍kpla yī lɛlā mɛ ni̍.

¹⁶ N i̍ lwɔhu̍ ge̍ē bī gbogū ji wu̍chē lɔkɔ nīi ami - ɔ̄chɛ ɔkā Wɔ̄kā Ɔlwɔnyɛ yī Ikra̍yisi nɛ ma̍ ni̍. Je̍ka ɔkɔ nīi o̍ ka amɔ̍lɔ ge̍ ya̍ ma̍ nīi n yɛ ē ya̍ a̍nɛ. N i̍ ge̍ kā Wɔ̄kā Ɔlwɔnyɛ nūma̍ ni̍ ma̍, o̍ ge̍ dwɔ̄bi̍ de u kana̍ ma̍ ēēe!

¹⁷ O̍ ge̍ re̍ka n ya̍ u̍ku̍rɔ̍ yī u lɔkɔ nīi ami ɔlɔjā chikpo̍ ma̍ nɛ, n ge̍ē deyīche ure̍ yī u̍ku̍rɔ̍ yī ɔnɔ̄nāa. Wu̍chē lɔkɔ nīi Ɔwɔ de u̍ku̍rɔ̍ nūma̍ gbo u la abɔ̄ a̍nɛ ma̍, n yɛ ē ya̍ ɔ̄ bāa ɔjā nīi ngma̍ la ɔyɔ̍ɔ̄ya̍ ma̍.

¹⁸ Ɛpiyabuna ɔna̍ nīi n chī nāa la anu̍ ma̍? Ɔplɛ̄ɛhi nīi lɛ ge̍ē bī Wɔ̄kā Ɔlwɔnyɛ yī Ikra̍yisi ge̍ē koko̍o ē de āchɛ ji i̍ hɛ̍ wā wɔ̍la̍ yī ɔjɔ̄jā ni̍ ma̍, ba̍la opi̍ye̍mā ke̍e̍ hī ɔjā nīi ngma̍ la ami bāa olu̍ku̍rɔ̍ yī Wɔ̄kā Ɔlwɔnyɛ yī Ikra̍yisi ɔkɔ̄ka de āchɛ ma̍ nɛ.

¹⁹ Ami - ɔ̄chɛ ɔlamu nɛ. Ami i̍ ɔfiyɛ yī ɔ̄chɔ̄chɛ ni̍. N ē mɔ̍ɔ̄ma̍chi̍ ē de iyī u pīya ɔfiyɛ yī āchɛmāchɛ wa̍a̍ hɛ̄ɛbɛ ge̍ē bī āchɛ yɛ̄mɛ̄mɛ̄ wā ge̍ē je̍ Ɔwɔ.

²⁰ N ge̍ yɛ ē ya̍ u̍ku̍rɔ̍ ba̍la āchɛ yī Iju̍u ma̍, n ē hɔ̄ bāa ɔ̄chɛ yī Iju̍u ma̍, hɛ̄ɛbɛ ge̍ē jɔ̍ɔkɔ ē bī āā wā dikpo̍ ē ba̍ Ɔwɔ. N i̍ tōtū lɛfiyɛ yī Lihɔ yī Imo̍sīisi ni̍ ma̍, n ge̍ yɛ ē ya̍ u̍ku̍rɔ̍ ba̍la āchɛ nīi tū lɛfiyɛ yī Lihɔ yī Imo̍sīisi ma̍, n ē ya̍ bɔ̄ɔjā nīi ami tū ma̍, hɛ̄ɛbɛ ge̍ē bī āā wā dikpo̍ ē ba̍ Ɔwɔ.

²¹ Gala ɔgɔgu ɔla̍ā, n ge̍ yɛ ba̍la Ɛchɛkɔcha nīi - āchɛ nīi i̍ tū la lɛlā yī Lihɔ yī Imo̍sīisi ni̍ ma̍, n ē hɔ̄ bāa aa̍ ma̍, hɛ̄ɛbɛ ge̍ē bī āā wā dikpo̍ ē ba̍ Ɔwɔ. Ɔla̍ā i̍ re̍ka n yɛ ē tɔ̍ɔkɔ yī lihɔ yī Ɔwɔ ni̍. Wu̍chē oji̍ nɛ, n tū amu la lihɔ yī Ikra̍yisi.

²² N ge̍ chī yɛ ba̍la āchɛ nīi i̍ lɛ brii la ɔtū ode che Ɔwɔ ni̍ ma̍, n ē de ē lɛ kwīkwī bāa aa̍ ma̍, hɛ̄ɛbɛ ge̍ē bī āā wā dikpo̍ ē ba̍ Ɔwɔ. Lēchi̍, n ē de iyī u ē pīya ɔjāha̍ ɔjāha̍ wa̍a̍ ē mi̍yɛ̄gbla yī ita āchɛha̍ āchɛha̍ wa̍a̍, hɛ̄ɛbɛ ge̍ē hɛ̍ āchɛ ɛha̍ yī wā ta̍ gala ɔpɔ̄pū ɔha̍lɔha̍ wa̍a̍ nīi ge̍ ngmɛ̍rɛ̍ mɛ ma̍.

²³ Onūma̍ wa̍a̍ nīi n ē ya̍ ma̍, n ē ya̍ wu̍chē yī Wɔ̄kā Ɔlwɔnyɛ yī Ikra̍yisi, hɛ̄ɛbɛ nīi n ge̍ē re̍ uhwa yī nū.

²⁴ Je̍ka aa̍ ala̍ jo̍ōkū hīka e̍ ge̍ yɛ ē ta̍ahu̍ yī ɛnya ɔrɔ̄rɛ̄, alɛnya wa̍a̍ ē rɛ a̍nɛ; ɔ̄chɛ ūkpo̍he kpo̍kpo̍ ē chī ga nīi e̍ ē kɔ̄ ɔjā de ɔ̍ a̍nɛ. Ala̍ titi, ala̍ rɛ̄ gba̍a̍ gɛ, hɛ̄ɛbɛ nīi ala̍ ge̍ ga, gbɔjā.

²⁵ Āchɛ wa̍a̍ nīi gblāa la ita yī īrɛ̄ nūma̍ ongōngū ma̍ ē yɛ̍ɛ̄lā bāa ɔkɛ̍mɛ̍kɛ̍mɛ̍ ma̍. E̍ ē ya̍ i̍ngɔ̍ɔ hɛ̄ɛbɛ nīi e̍ ge̍ē nāa lɛkā oli̍hi̍hi̍ ɔha̍ nīi e̍ kɔ̄ de āchɛ nīi ga la īrɛ̄ ɔha̍ ɔyɔ̍ɔ̄ya̍ ma̍. Ɔjā ɔla̍ā nīi e̍ ē nāa ma̍ i̍ chī ri̍yɛchɛ ni̍. Iyī alɔ ma̍ onīi ge̍ē ri̍yɛchɛ kpɛɛ ku yɛ̄grāa ɔha̍lɔha̍ ma̍ nɛ.

²⁶ Ɔla̍ā - ohu̍ nīi ami ē rɛ̄ɛnya yī u kpɛɛ ge̍ē chɛ̄ la ɔbɔ̍ɔ̄ba̍ yī ɔgu la ɛbɛ nīi ɛnya ge̍ē ba̍ ma̍ a̍nɛ. N lɛ bāa ɔ̄chɛ ɔtrɛ̍ɛ̄kū nīi lɛkū yī nū i̍ ē mwajɛ ni̍ ma̍.

²⁷ N ē mlɛkū gwō tū ibi̍īyē yī u wɔhu̍ wɔhu̍, kpɛɛ nīi o̍ je̍ ɔ̄chɛ nīi - abā yī nū ma̍. Wu̍chē oji̍ nɛ, bāa ɔ̄chɛ nīi hī āchɛ ɛra̍ yī ahu̍ ɛnya ma̍, n i̍ chikpo̍ nīi e̍ ge̍ hi̍hi̍yo̍ yī u ni̍.