ODE HI̍YƐCHƐ 9 - YƐKA ONĪPĪPƐ̄ YĪ ƆWƆ BA̍LA EJĒ ƆKƆ̄KĀ

¹ Bɛ̍ɛ̄nɛ̄, ɔyɛ̍ɛ̄chɛ̄rɔ̄ yī Ɔwɔ nīi - ɔmɛrwɔ̄ ma̍ gwō lɛjī yī nū; ɔpɔ̄ɔpɛ̄, n ma̍ i̍nyi̍nyɔ̍ɔwīyā ɔha̍ nīi ha̍ābɔ̄ bū abɔ̍ɔ la ichō wā la ajɛ. Anu̍ nīi e̍ de ɔyi̍īgbɔ̄gɔ̄rɔ̄ yī ɛbɛ ɔlɛngɔ̄nɔ̄ngɔ̄nɔ̄ yī ayekū oli̍gba̍o̍ de ɔ̍ a̍nɛ.

² O̍ de ɔpu yī ɛbɛ ɔlɛngɔ̄nɔ̄ngɔ̄nɔ̄ yī ayekū oli̍gba̍o̍ lwāa ma̍, ingūɔ̄la̍ bīyɛchɛ abɔ̍ɔ kpɛ̍ɛ bāa ingūɔ̄la̍ nīi ē bū la u̍nu̍ yī ɔla̍ ɔnɔ̄kɔ̄kū ma̍. Yɛnɔ nīi yɛ ē chɛ̄ ma̍, ba̍la owu wa̍a̍ de gbo̍bi̍ la ingūɔ̄la̍ ɔla̍ā nīi hu abɔ̍ɔ la ɛbɛ ɔlɛngɔ̄nɔ̄ngɔ̄nɔ̄ yī ayekū oli̍gba̍o̍ ɔ̍lɔma̍ ma̍.

³ Ikūba tīkpi̍kpo̍ tāa ingūɔ̄la̍ ɔla̍ā wā la ajɛyɛ̄ɛchɛ wa̍a̍. E̍ de wɔhu̍ nīi lɛ bāa iyī yɛna āpɛ̄wu̍ ma̍ de wa̍.

⁴ E̍ ka de wa̍ ka ɛ̍lɛ ge̍ e̍e de a̍chi̍, kɛ̄ɛ ɛchi̍ kɛ̄ɛ ɔjɔ̄jā i̍ngɔ̍ɔ bīya ni̍. Āchɛ nīi i̍ ba̍ ina̍aba yī Ɔwɔ ni̍ ma̍ nīi e̍ ge̍ē ya̍ wā ɔjā a̍nɛ.

⁵ E̍ i̍ chī ka nīi ikūba ɛ̍lɛma̍ ge̍ē ngmo̍ āchɛ nūma̍ ni̍. Akanya ɔdwɔ̄bi̍ gba̍a̍ nīi e̍ ge̍ē ya̍ wā la ɔyɔ̍ɔ ɛrwɔ̄ ji a̍nɛ. Wɔnɔ nīi e̍ ge̍ē ma̍ bū la akanya ɔdwɔ̄bi̍ ɔ̍lɔma̍ ma̍ ge̍ē lɛ bɔ̄ɔkɔ nīi yɛna āpɛ̄wu̍ ge̍ chɛ̄ ɔ̄chɛ nīi o̍ ē hwōhwō ma̍.

⁶ Lipu̍ yī ɔyɔ̍ɔ ɛrwɔ̄ ɔla̍ā, āchɛ ɛla̍ā ge̍ē gāla̍ ɔpīyaku̍; e̍ i̍ chī ge̍ē ma̍ ɔ̄ ni̍. E̍ ge̍ē chikpo̍ yī ɔpīyaku̍; o̍ chī ge̍ē de ē gwɛ̍ɛnya ē hī wā.

⁷ Ikūba ɛla̍ā de ya̍ bāa wɔnya nīi tībi̍īyē nīi e̍ bī yɛ ga lɛwu̍ okpo̍ōkpo̍ ma̍. Lɛhu̍ yī ikūba ɛ̍lɛma̍ che ɔjā ɔha̍ nīi lɛ bāa okpo ɔkla̍lɛhu̍ yī igo̍olu ma̍. Eyī yī wā chī lɛ bāa eyī yī āchɛ̄ɛchɛ ma̍.

⁸ Urū yī wā lɛ bāa inyɛ̄lɛ̄hu̍ yī anyā ma̍; angūu lɛ bāa angūu yī wɔ̍ga̍ba̍ ma̍.

⁹ Ɔjā ɔha̍ nīi ba̍ wā abɔ̍ɔ la ɔgɛgɛ ma̍ lɛ bāa a̍bi̍ije ɔlɛpatapata nīi e̍ ē de ba̍ ɔgɛgɛ lɛwu̍ okpo̍ōkpo̍ ma̍. Ojiya yī owōwu yī wā lɛ bāa ojiya yī wɔwu̍ ajɛ nīi wɔnya yɛ̄mɛ̄mɛ̄ pi ɔ̍ kɔ̄leyī yɛ gāa lɛwu̍ ɔha̍ ma̍.

¹⁰ Ikūba ɛla̍ā tū otri̍ihi ba̍la ɛbɛ ɔchɔ̄chɛ bāa yɛna āpɛ̄wu̍ ma̍. Wɔhu̍ nīi e̍ lɛ ge̍ē bī ya̍ āchɛ ɔjā lipu̍ yī ɔyɔ̍ɔ ɛrwɔ̄ ɔla̍ā ma̍ tū la otri̍ihi yī wā ɛla̍ā.

¹¹ E̍ lɛ ɔchwɔ̄lɛ̍ nīi - ɔ̄chɛ odeyīrɛ wa̍ ma̍. Ɔyɛ̍ɛ̄chɛ̄rɔ̄ yī Ɔwɔ nīi ē deyīrɛ ɛbɛ ɔlɛngɔ̄nɔ̄ngɔ̄nɔ̄ yī ayekū ɔ̍lɔma̍ ma̍ - ɔchwɔ̄lɛ̍ yī wā a̍nɛ. Riyī yī nū re̍ka A̍bādɔn la oko̍o yī Ihi̍bru. O̍ chī re̍ka Apɔ̍līyɔn la oko̍o yī Igri̍iki. Ochi̍chi̍ yī nū re̍ka, “Ɛkplɔ Ɔbīya ɛbɛ.”

¹² Akanya ɔdwɔ̄bi̍ ɔdwɔnyɛ ɔrāarāa chlɛhu̍ hɔ̄ ma̍ a̍nɛ. O̍ e̍e hī ɛpa nīi ge̍ē wā la okwi̍ihi yī onūma̍.

¹³ Bɛ̍ɛ̄nɛ̄ ma̍, ɔyɛ̍ɛ̄chɛ̄rɔ̄ yī Ɔwɔ nīi - omerīiyī ma̍ wā ge̍ gwō lɛjī yī nū; ɔpɔ̄ɔpɛ̄, n po̍ ɔkɔlɛ̄lā ɔha̍ nīi bū abɔ̍ɔ la ɛ̍ngɔ̍ ɛnɛnɛ yī ɛbɛ ɔyɔ̍ɔ̄pɔ̄pā ɔla̍ā nīi - igo̍olu igo̍olu ke̍e̍ rɛ abɔ̍ɔ la iyɔ̄bū yī Ɔwɔ ma̍.

¹⁴ Ɔkɔlɛ̄lā ɔla̍ā ka grāa ɔyɛ̍ɛ̄chɛ̄rɔ̄ yī Ɔwɔ omerīiyī ɔla̍ā nīi bī lɛjī ma̍ hīka, “Wī orī hī ayɛ̍ɛ̄chɛ̄rɔ̄ yī Ɔwɔ ɛnɛ ɛla̍ā nīi e̍ ku̍ wā tū orī gblāa la ɔkpa̍ ɔnɔ̄kɔ̄kū ɔla̍ā nīi re̍ka Iyu̍frēeti ma̍ gɛ!”

¹⁵ E̍ de orī wī hī wā bɛ̍ɛ̄nɛ̄. Ayɛ̍ɛ̄chɛ̄rɔ̄ yī Ɔwɔ ɛnɛ ɛla̍ā, e̍ de wa̍ gblāa tīgbē yī yɛ̄grāa nūma̍ pi̍i̍, la ɔ̄chī nūma̍ pi̍i̍, yī ɔyɔ̍ɔ nūma̍ pi̍i̍, yī lɛ̍yi̍ nūma̍ pi̍i̍, hɛ̄ɛbɛ nīi e̍ ge̍ē de wāā ūkpo̍he lipu̍ yī ɛta̍ yī āchɛ̄ɛchɛ wa̍a̍ ē kpo̍ ngmo̍.

¹⁶ E̍ koko̍o de u lɔkɔ nīi alɛwu̍ okpo̍ōkpo̍ ɛla̍ā lyɛ̄mɛ̄ ma̍. E̍ lɛ u̍nu̍nɔ la ɛbɛ u̍nɔ ohu erīiyī che ɛrwɔ̄ la ɛbɛ igwo̍ nīi che wɔnya ma̍.

¹⁷ Yɛ̍ma̍ ɔlɛbɛ̍bi̍ ɔla̍ā nīi n ma̍ ma̍, n ma̍ wɔnya yɛ̄mɛ̄mɛ̄ ba̍la āchɛ nīi che la aa̍ ma̍: A̍bi̍ije ɔlɛpatapata nīi e̍ de ba̍ la ɔgɛgɛ yī wā ma̍ lɔ̍a̍ nyɔɔ bāa ɔla̍ ma̍, e̍ chī liblu̍ublu̍u bāa achɔ̄ ɔha̍ nīi re̍ka isafa̍ya ma̍, e̍ chī gba̍a ligigɔ bāa ɔjāha̍ nīi re̍ka isɔ̍fɔ ma̍. Lɛhu̍ yī wɔnya ɛla̍ā lɛ bāa iyī wɔ̍ga̍ba̍ ma̍. Ɔla̍ ba̍la ingūɔ̄la̍ ba̍la ɔjāha̍ nīi re̍ka isɔ̍fɔ ma̍ yɛ ē bīyɛchɛ ē bū lipu̍ yī oko̍o yī wā.

¹⁸ Wāā ūkpo̍he lipu̍ yī ɛta̍ yī āchɛ̄ɛchɛ mɔri̍mɔri̍ pīyaku̍ bū la ɔgawu ɛla̍ā nīi lɛ ɛta̍ ma̍. Ɔla̍, ba̍la ingūɔ̄la̍ ba̍la ɔjā ɔla̍ā nīi re̍ka isɔ̍fɔ yɛ ē bīyɛchɛ la oko̍o yī wɔnya ɛla̍ā ma̍, aa̍ - ɔgawu ɛta̍ ɔ̍lɔma̍ nɛ.

¹⁹ Wɔhu̍ obī ya̍ āchɛ ɔjā yī wɔnya ɛla̍ā tū la oko̍o yī wā ba̍la otri̍ihi yī wā titi. Otri̍ihi yī wā lɛ bāa yɛgwā ma̍, tū īkplɛ̄hu̍ wa̍a̍. Aa̍ nīi e̍ ē bī ya̍ āchɛ ɔjā a̍nɛ.

²⁰ Āchɛ̄ɛchɛ wa̍a̍ nīi hōhī nīi ɔgawu ɛla̍ā i̍ kpo̍ wā ngmo̍ ni̍ ma̍ i̍ chɛ̄ pīyabɔ̄ta̍ hī otūlichō ɔyɔ̍ɔ̄ya̍ de ɛjā nīi aa̍ ɛlɛjā yɔ̍ɔ̄ya̍ ma̍ ni̍. E̍ i̍ pi̍ye̍mā hī otūlichō ɔyɔ̍ɔ̄ya̍ de ɛjā bāa yapri̍ija ɔdwɔ̄bi̍ kɛ̄ɛ i̍kpe̍ēkū nīi e̍ ya̍ la igo̍olu, kɛ̄ɛ isi̍li̍ba, kɛ̄ɛ ibrɔ̍ɔnsi, kɛ̄ɛ lɛchɔ̄, kɛ̄ɛ ɔchi̍ ma̍ ni̍. Ɛjā nūma̍ wa̍a̍ i̍ ē chī myɛ̍ma̍ kɛ̄ɛ ē plɛ̍ɛ̄lā kɛ̄ɛ ē yɛɛ ē mɛ ni̍.

²¹ Āchɛ ɛla̍ā i̍ chī gba̍a pīyabɔ̄ta̍ hī lɛlā ɔdwɔ̄bi̍ ɔyɔ̍ɔ̄ya̍ yī wā nīi re̍ka āchɛ ongmo̍ōngmo̍, ba̍la obūdeyī ɔyɔ̍ɔ̄ya̍ ba̍la ɔ̍bɔ̍ɔ̄nyā ɔlɔ̍ɔ̄la̍ ba̍la uwī owōwī nīi e̍ ē ya̍ ma̍ ni̍.